A A A A A

God: [God's Love]


1 VAKORINTO 13:13
Sweswi, ku tiyile swilo swinharhu leswi: Ku pfumela, ni ku langutela, ni rirhandzu; kambe lexikulu ngopfu eka swona i rirhandzu.

1 YOHANE 3:1
Ma nga vona rirhandzu lerikulu leri Tatana a hi rhandzaka ha rona, ku fika laha hi vuriwaka vana va Xikwembu; nisweswi, hi vona. Lexi endlaka leswaku misava yi nga hi tivi, i mhaka ya leswi yi nga n'wi tivangiki.

1 YOHANE 4:7-8
[7] Varhandziwa! A hi rhandzaneni, hikuva rirhandzu i ra Xikwembu, kutani un'wana ni un'wana loyi a nga ni rirhandzu ú tswariwile hi Xikwembu, naswona ú tiva Xikwembu.[8] Loyi a nga riki na rirhandzu, a nga tivi Xikwembu, hikuva Xikwembu i rirhandzu.

1 YOHANE 4:16-19
[16] Hikokwalaho, ha tiva ni ku tshemba rirhandzu leri Xikwembu xi nga na rona eka hina. Xikwembu i rirhandzu, kutani loyi a tshamaka erirhandzwini, ú tshame eka Xikwembu, na Xikwembu xi tshama eka yena.[17] Kutani loko rirhandzu ri hetiseka eka hina, hi ta tiya nhlana esikwini ra ku avanyisa, hikuva leswi Kriste a nga swona, na hina hi swo leswi hi nga swona laha misaveni.[18] Ku hava ku chava erirhandzwini, hikuva rirhandzu leri hetisekeke ri susa ku chava. Ku chava ku fambelana ni ku biwa, kutani loyi a chavaka a nga hetisekanga erirhandzwini.[19] Hina hi ni rirhandzu hikuva ku rhangile Xikwembu xi hi rhandza.

VAGALATIYA 2:20
hikokwalaho, a nga ha ri mina la hanyaka, kambe i Kriste la hanyaka eka mina. Sweswi, loko ndzi hanya emirini, ndzi hanya hi ku pfumela, ku nga ku pfumela eka N'wana wa Xikwembu loyi a ndzi rhandzeke, a va a tinyiketa hikwalaho ka mina.

YEREMIYA 29:11
Makungu lawa ndzi nga na wona ehenhla ka n'wina, ma tiviwa hi mina ntsena. Mina HOSI ndzi ri, makungu ya kona i ya ku mi katekisa, ku nga ri ku mi vangela makhombo; ndzi mi tshembisa leswaku ma ha ta vona minkarhi leyi taka.

YEREMIYA 31:3
Vaisraele a va ku: ‘HOSI yi tikombile eka hina yi suka kule!’ Kutani mina ndzi ku ka vona: Ndzi mi rhandzile hi rirhandzu leri nga heriki, a ndzi tshiki ku mi komba ku tshembeka ka mina.

YOHANE 3:16
Hikuva Xikwembu xi rhandzile misava swonghasi, xi ko xi nyika N'wana wa xona la nga un'we, leswaku un'wana ni un'wana la pfumelaka ka yena, a nga lovi, kambe a va ni vutomi lebyi nga heriki.

YOHANE 15:13
A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye.

TIPISALEMA 86:15
Kambe wena N'wini wanga, u Xikwembu lexi twelaka vanhu evusiwana; wa va tsetselela, u hlwela ku kariha, u tele tintswalo ni ku tshembeka.

TIPISALEMA 136:26
Tlangelani Xikwembu xa matilo! — Rirhandzu ra xona hi leri nga heriki —

VARHOMA 5:8
Kambe Xikwembu xi kombisa erivaleni rirhandzu ra xona eka hina, hileswi Kriste a nga hi fela loko ha ha ri vadyohi.

DEUTERONOMA 7:9
Hikokwalaho, tsundzukani leswaku HOSI Xikwembu xa n'wina, i Xikwembu xi ri xoxe, naswona xa tshembeka, xi hlayisa ntwanano wa xona. Lava va xi rhandzaka ni ku hlayisa milawu ya xona, xa va rhandza ku ya fika eka rixaka ra madzana-dzana.

SOFONIYA 3:17
HOSI Xikwembu xa wena, xi na wena, yona nhenha leyi yi ku hlurisaka valala; xi ta tlhela xi ku komba rirhandzu ra xona, xi ta tsaka swinene ha wena,

VAEFESA 2:4-5
[4] Kambe Xikwembu xi ni musa swinene, hikwalaho ka rirhandzu lerikulu leri xi hi rhandzeke ha rona.[5] Hikokwalaho, hambileswi a hi file hi mhaka ya swivi swa hina, xi hi vuyisile evutomini swin'we na Kriste. I tintswalo ta Xikwembu leti ti mi poniseke.

1 PETRO 5:6-7
[6] Hikokwalaho, titsongahateni ehansi ka voko ra matimba ra Xikwembu, leswaku hi nkarhi wa kona xi ta mi tlakusa.[7] Rhulani ku karhateka hinkwako ka n'wina eka xona, hikuva xi tikarhatela n'wina.

VARHOMA 8:37-39
[37] E-e! Eka sweswo hinkwaswo, hi hlula hi va hi hlurisisa hikwalaho ka yena loyi a hi rhandzeke.[38] Hikuva ndzi kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba[39] leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.

Tsonga Bible 1989
© Bible Society of South Africa. All rights reserved