Instagram
English
A A A A A

Bad Character: [Fear]
ESAYA 35:4
Khongotelani lava nga ku kanakaneni, mi ku: “Tiyani, mi nga chavi! Vonani, Xikwembu xa n'wina xi ta ta xi ta mi rihisela eka valala va n'wina, xi ta mi lwela, xi mi ponisa!”

YOHANE 14:27
“Ndzi mi siyela ku rhula, ndzi mi nyika ku rhula ka mina. A ndzi mi nyiki hilaha misava yi nyikaka hakona. Timbilu ta n'wina ti nga karhateki, ti nga khomiwi hi ku chava.

YOXUWA 1:9
Tsundzuka leswi ndzi ku leriseke swona: Tiya, u va ni xivindzi; u nga chavi nchumu, u nga heli matimba, hikuva mina HOSI Xikwembu xa wena ndzi ta va na wena hinkwako lomu u nga ta ya kona.”

MATEWU 6:34
Hikwalaho ke mi nga tshuki mi vilela hi swa mundzuku, hikuva mundzuku wu ta tikarhatela swa wona. Ku karhateka ka siku rin'wana ni rin'wana, ku ringene rona.

ESAYA 43:1
N'wina va ka Yakobo, HOSI Xikwembu lexi xi mi tumbuluxeke, xona muvumbi wa n'wina Vaisraele, xi vurisa sweswo xi ri: “Mi nga chavi, hikuva ndzi ta mi kutsula, ndzi mi vitanile hi mavito ya n'wina, mi va mina.

TIPISALEMA 23:4
Ni loko ndzi nga famba enkoveni wa xinyami xo chavisa, a ndzi chavi nchumu xo biha, hikuva u na mina: Wa ndzi lwela ni ku ndzi hlayisa.

TIPISALEMA 34:4
Ndzi komberile HOSI Xikwembu leswaku xi ndzi pfuna, kutani xi ndzi hlamurile, xi ndzi ntshunxa eku chaveni ka mina hinkwako.

TIPISALEMA 94:19
Loko ndzi ri maxangwini layo tala ndzi pfumala ku rhula, u ndzi khongoterile, ndzi kuma ku tsaka.

VARHOMA 8:38-39
[38] Hikuva ndzi kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba[39] leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.

TIPISALEMA 27:1
Rivoni ra mina ni muponisi wa mina i HOSI Xikwembu, xana i mani la nga ndzi chavisaka xana? HOSI Xikwembu i khokholo ra vutomi bya mina, xana i mani loyi ndzi nga n'wi chavaka xana?

1 PETRO 5:6-7
[6] Hikokwalaho, titsongahateni ehansi ka voko ra matimba ra Xikwembu, leswaku hi nkarhi wa kona xi ta mi tlakusa.[7] Rhulani ku karhateka hinkwako ka n'wina eka xona, hikuva xi tikarhatela n'wina.

TIPISALEMA 118:6
A ndzi chavi nchumu, hikuva HOSI Xikwembu xi na mina, xana munhu a nga ndzi endla yini xana?

2 TIMOTIYA 1:7
Hikuva Xikwembu a xi hi nyikanga moya wa vutoya, kambe xi hi nyikile moya wa matimba, ni wa rirhandzu, ni wa ku tikhoma.

TIPISALEMA 115:11
N'wina mi chavaka HOSI Xikwembu, tshembani xona, hi xona xitlhangu ni mupfuni wa n'wina.

TIPISALEMA 103:17
Kasi rirhandzu ra HOSI Xikwembu rona a ri ri kona na khale, ra ha ta va kona hilaha ku nga heriki. Xikwembu xi lwela lava va xi chavaka, xi tshembeka ku ya fika eka vatukulu va vona hinkwavo,

TIPISALEMA 112:1
Dzunisani HOSI! Ku katekile munhu loyi a chavaka HOSI Xikwembu, la rhandzaka ku endla leswi xi lerisaka swona.

DEUTERONOMA 31:6
Hikokwalaho, tiyani mi va ni xivindzi, va nga tshuki va mi chavisa kumbe ku mi rhurhumerisa, hikuva HOSI Xikwembu hi xoxe, hi xona xi fambaka na n'wina. Xi nga ka xi nga mi fularheli, kumbe ku mi tshika mi ri n'wexe.”

1 TIKRONIKA 28:20
Davhida a engeta a byela Solomoni n'wana wa yena, a ku: “Tiya swinene n'wananga, u nga kanakani, u nghena entirhweni; naswona u nga chavi, u nga heli mbilu, hikuva HOSI Xikwembu, xona Xikwembu xa mina, xi ta va na wena. A xi nga ku tshiki, a xi nga ku rivali, u kondza u heta ntirho hinkwawo, u lulamisa hinkwaswo leswi nga ta tirhisiwa eTempeleni.

TIPISALEMA 56:3-4
[3] Loko ndzi khomiwa hi ku chava, ndzi titshembela wena ntsena.[4] Ndzi dzunisa Xikwembu hikwalaho ka switshembiso swa xona, ndzi tshemba xona, a ndzi chavi nchumu. Munhu a nga ndzi endla yini xana?

ESAYA 41:10-13
[10] Mi nga chavi, hikuva ndzi na n'wina, mi nga rhurhumeli, hikuva ndzi Xikwembu xa n'wina; ndzi ta mi tiyisa, ndzi mi pfuna, ndzi mi hlulela valala hi voko ra mina.[11] “Hinkwavo lava va mi hlundzukeleke, va ta tsongahatiwa, va khomisiwa tingana; vanhu lava lwaka na n'wina a va nga ha vi kona, va ta hela va ku bì![12] Lava holovaka na n'wina, mi ta va lava, mi va pfumala, lava va mi hlaselaka, a va nga ha vi kona, va ta nyamalala,[13] hikuva mina HOSI Xikwembu xa n'wina, ndzi mi khome hi voko, hi mina ndzi nge: ‘Mi nga chavi, ndzi ta mi pfuna.’ ”

ESAYA 54:4
“U nga chavi, hikuva a wu nga ha khomiwi hi tingana; u nga tipandzisi nhloko, hikuva a wu nga ha vangeriwi leswi nga ta ku nyumisa; tingana leti u veke na tona loko wa ha ri ntsongo, u ta ti rivala, ni leswaku a wu hlekuriwa loko u nga ha ri na nuna, a wu nga ha swi tsundzuki.

MATEWU 10:28
“Mi nga tshuki mi chava lava dlayaka miri, va ri hava matimba yo dlaya moya; kambe chavani loyi a nga ni matimba yo lovisa moya ni miri wa munhu eTiheleni.

VARHOMA 8:15
Hikuva Moya lowu mi nga nyikiwa wona, a wu mi endli mahlonga ni ku tlhela wu mi vangela ku chava, kambe wu mi endla vana; hi matimba ya Moya lowu, hi huwelela hi ku: “Abba, Tatana!”

1 VAKORINTO 16:13
Hitekani, mi tiya swinene eku pfumeleni, mi va vavanuna, mi tinyika matimba.

VAHEVERU 13:5-6
[5] Mi nga fumiwi hi mali eku hanyeni ka n'wina, kutani mi kolwa hi leswi mi nga na swona, hikuva Xikwembu xi te: “Ndzi nga ka ndzi nga ku tshiki, kumbe ku ku cukumeta, ni siku ni rin'we.”[6] Hikokwalaho hi nga vula hi tiyile, hi ku: “Hosi i mupfuni wa mina, a ndzi nga chavi nchumu; munhu a nga ndzi endla yini xana?”

1 YOHANE 4:18
Ku hava ku chava erirhandzwini, hikuva rirhandzu leri hetisekeke ri susa ku chava. Ku chava ku fambelana ni ku biwa, kutani loyi a chavaka a nga hetisekanga erirhandzwini.

1 PETRO 3:13-14
[13] Sweswi ke, xana i mani loyi a nga mi endlaka leswo biha, loko n'wina mi hisekela ku endla leswi lulameke xana?[14] Kambe niloko mi twisiwa ku vava hikwalaho ka leswo lulama, mi katekile; mi nga chavi vanhu, naswona mi nga karhateki.

Tsonga Bible 1989
© Bible Society of South Africa. All rights reserved