A A A A A

Additional: [Work]


VAKOLOSA 3:23
Xin'wana ni xin'wana lexi mi xi endlaka, xi endleni hi mbilu hinkwayo, onge hi loko mi tirhela Hosi, ku nga ri vanhu;

VAEFESA 4:28
Loyi a a toloverile ku yiva, a nga ha engeti a yiva; kambe a a tikarhate a tirha hi mavoko ya yena, a tirhela swo tipfuna ha swona, leswaku a ta kuma swo pambulela loyi a pfumalaka.

YOHANE 6:27
Mi nga tirheleni swakudya leswi bolaka, kambe tirhelani swakudya leswi nga boriki, swi nga leswi nyikaka vutomi lebyi nga heriki. Swakudya leswi, mi ta nyikiwa hi N'wana-wa-Munhu, hikuva hi yena loyi Xikwembu Tatana xi n'wi fungheke hi mfungho wa xona.”

VAGALATIYA 6:4-5
[4] Un'wana ni un'wana a a kambisise ntirho wa yena, ku ri kona laha a nga kotaka ku tidzunisa hi swa yena, ku nga ri hi swa un'wana;[5] hikuva un'wana ni un'wana ú ta rhwala mpingu wa yena.

TIPISALEMA 90:17
Hi funengete hi tintswalo ta wena, we Xikwembu xa hina ni N'wini wa hina; katekisa mintirho ya hina, ina yi katekise!

SWIVURISO 12:11
Munhu loyi a rimaka, ú ta dya a xurha, kambe loyi a landzelelaka leswi nga pfuniki nchumu, a nga ehleketi swinene.

SWIVURISO 13:4
Lolo ri fa hi ku navela, kambe a ri kumi nchumu; munhu wa migingiriko yena, ú dya a xurha.

VAFILIPIYA 4:13
Ndzi nga endla hinkwaswo hi matimba ya Loyi a ndzi tiyisaka.

VAKOLOSA 3:24
hikuva ma swi tiva leswaku mi ta nyikiwa ndzhaka hi Hosi, yi ri hakelo ya n'wina. Mi le ku tirheleni ka Hosi ya hina Kriste.

SWIVURISO 12:24
Vanhu va migingiriko va ta va valawuri, kasi lavo loloha va ta rhwexiwa mintirho yo tika.

SWIVURISO 14:23
Hinkwavo lava tikarhataka, va vuyeriwa, kambe lava tshamelaka ku phyaphyarha ntsena, vo tichela vusiwana.

GENESA 2:3
Hikokwalaho, Xikwembu xi katekisa siku leri ra vu-7, xi ri endla leri hlawulekeke, hikuva hi siku leri xi wisile entirhweni wa xona hinkwawo lowu xi wu endleke loko xi tumbuluxa swilo.

LUKA 1:37
hikuva a ku na xilo na xin'we lexi hlulaka Xikwembu.”

1 TIMOTIYA 5:8
Loko munhu a nga pfuni maxaka ya yena, ngopfu-ngopfu lava va nga va ndyangu wa yena wa xiviri, ú landzurile vupfumeri, kutani ú tlula ni vamatiko hi ku biha.

YEREMIYA 29:11
Makungu lawa ndzi nga na wona ehenhla ka n'wina, ma tiviwa hi mina ntsena. Mina HOSI ndzi ri, makungu ya kona i ya ku mi katekisa, ku nga ri ku mi vangela makhombo; ndzi mi tshembisa leswaku ma ha ta vona minkarhi leyi taka.

SWIVURISO 6:10-12
[10] Wena u ri: “Ndza há kú bàà, ndzi etlelanyana switsongo, ndza ha khondlanyana mavoko, ndzi wisa.”[11] Kasi hi loko vusiwana byi nghenile kukota xi-ta-xi-famba, ni vusweti ku fana ni xigevenga.[12] Munhu loyi a rhendzelekaka a ri karhi a hangalasa mavunwa, a nga pfuni nchumu, ú bihile.

2 TIMOTIYA 2:6
Mutirhi loyi a tirheke hi matimba emasin'wini, hi yena loyi a fanelaka ku rhanga a kuma mihandzu ya kona.

GENESA 2:15
HOSI Xikwembu xi teka munhu xi n'wi veka entangeni wa Edeni, leswaku a ta wu rima ni ku wu hlayisa.

TITO 2:7-8
[7] A ku rhange wena u va xikombiso xa mintirho leyinene hi matlhelo hinkwawo. Ku dyondzisa ka wena a ku ve loku humaka embilwini, u va ni ndzhuti;[8] tirhisa marito lama nga wona ya xiviri, lama nga solekiki, leswaku loyi a lwaka na wena a ta khoma hi tingana hi ku pfumala leswo biha leswi a nga swi vulaka ehenhla ka hina.

SWIVURISO 16:3
Loko u endla xilo, kombela HOSI Xikwembu xi ku pfuna, kutani makungu ya wena ma ta katekisiwa.

Tsonga Bible 1989
© Bible Society of South Africa. All rights reserved