A A A A A

Church: [Speaking in Languages]


1 VAKORINTO ൧:൫
hikuva mi nyikiwe hi yena swilo hinkwaswo, eku vulavuleni hinkwako ka marito, ni le ku tiveni hinkwako,

TIMHAKA 2:4
Kutani hinkwavo va tala hi Moya lowo Kwetsima, va sungula ku vulavula hi tindzimi tin'wana, hilaha Moya wu nga va vulavurisa hakona.

TIMHAKA ൧൯:൬
Kuteloko Pawulo a va tlhandlekile mavoko, Moya lowo Kwetsima wu ta ehenhla ka vona; kutani va vulavula hi tindzimi, va ri karhi va profeta.

VAGALATIYA 5:22
Kambe mihandzu ya Moya, i rirhandzu, ni ku tsaka, ni ku rhula, ni ku yingisela, ni ku tsakelana, ni vunene, ni ku tshembeka, ni ku olova, ni ku tikhoma.

MARKA 16:17
Hi wona masingita lama nga ta endliwa hi lava pfumeleke: Va ta hlongola mademona hi vito ra mina, va ta vulavula tindzimi letintshwa;

1 VAKORINTO 14:2
Hikuva loyi a vulavulaka tindzimi tin'wana a nga vulavuri na munhu, u vulavula na Xikwembu ntsena; hikuva a ku na la n'wi yingisaka, loko a vulavula emoyeni wa yena leswi nga tiviwiki.

1 VAKORINTO 14:23
Kungakuloko kereke hinkwayo yi hlengeletene exivandleni xi ri xin'we, kutani hinkwavo va vulavula tindzimi, kakuloko ku nghena vanhu lava nga riki na ku tiva, hambi va ri lava nga pfumeriki, xana va nga ka va nga vuri leswaku mi ni vuhunguki xana?

1 VAKORINTO 14:27-28
[27] Kungakuloko un'wana a vulavula tindzimi, a ku endlisiwe sweswo va ri vambirhi kumbe vanharhu; ku endliwa hi ku landzelelana, un'wana a hlamusela.[28] Kungakuloko muhundzuluxi a nga ri kona, la vulavulaka tindzimi a a timiyelele ekerekeni, a tivulavulela swakwe, a vulavula ni Xikwembu.

1 VAKORINTO 12:8-11
[8] Hikuva un'wana u nyikiwa hi Moya marito ya vutlhari; un'wana u nyikiwa marito ya ku tiva hi Moya wolowo;[9] un'wana u nyikiwa ku pfumela hi wona Moya wolowo; un'wana u nyikiwa hi Moya wolowo matimba ya ku hanyisa;[10] un'wana u nyikiwa mitirho ya masingita; un'wana u nyikiwa ku profeta; un'wana ku avanyisa mimoya; un'wana u nyikiwa ku tiva tinxaka ta tindzimi; un'wana u nyikiwa ku hlamusela tindzimi.[11] Kambe Moya wolowo wu ri wun'we wu tirha leswo hinkwaswo, wu ri karhi wu avela un'wana ni un'wana hi laha wu rhandzaka hakona.

1 VAKORINTO 13:1-13
[1] Hambiloko ndzi nga vulavula tindzimi ta vanhu ni ta tintsumi, kambe ndzi nga ri na rirhandzu; ndzi kotisa nanga leyi yimbaka, hambi swi ri swiphambati leswi pfumaka.[2] Kutani hambi ndzi nga nyikiwa vuprofeta, ni loko ndzi tiva swihundla hinkwaswo ni vutlhari hinkwabyo; hambi ndzi ri ni ku pfumela hinkwako, ndzi ko ndzi tlakusa tintshava; kambe ndzi nga ri na rirhandzu, a ndzi nchumu.[3] Hambi ndzi avela rifuwo ra mina hinkwaro, ndzi phamela swisiwana, kumbe ndzi nyiketa miri wa mina leswaku wu hisiwa, kambe ndzi nga ri na rirhandzu, leswo a swi ndzi pfuni nchumu.[4] Rirhandzu ri ni ku yingisela, ri tele vunene, rirhandzu a ri na mona; rirhandzu a ri na ku tinyungubyisa; a ri tikukumuxi,[5] a ri khomisi tingana; a ri tilaveleri swa rona ntsena; a ri karihi; a ri ehleketi swo biha;[6] a ri tsakeri ku homboloka, kambe ri tsakelana ni ntiyiso;[7] ri yingisela hinkwaswo, ri pfumela hinkwaswo, ri tshemba hinkwaswo, ri rhwala hinkwaswo.[8] Rirhandzu ri nga ka ri nga heri, ni siku ni rin'we. Kasi loko byi ri vuprofeta byi ta hela, na tona tindzimi ti ta tshika ku va kona, ni ku tiva ku ta hela.[9] Hikuva ha tiva hitlhelo rin'we, kambe ha profeta hitlhelo rin'we ntsena;[10] kambe siku ku fikaka ku hetiseka, hilaha leswi nga swa tlhelo rin'we swi nga ta herisiwa.[11] Loko ndza ha ri xihlangi, a ndzi vulavula kukota xihlangi, a ndzi anakanya kukota xihlangi, a ndzi ringanyeta kukota xihlangi; kambe siku ndzi hundzukeke wanuna, ndzi tshikile swa vuhlangi.[12] Sweswi, hi vona hi xivonivoni, hi ritsandze; enkarhini wolowo hi ta vona hi mahlo lama langutanaka; sweswi ndzi tiva tlhelo rin'wana ntsena; enkarhini wolowo ndzi ta tiva kukota loko ndzi tiviwile na mina.[13] Sweswi ku tiyile swinharhu leswi: ku pfumela, ni ku langutela, ni rirhandzu; kambe lexikulu eka swona, i rirhandzu.

1 VAKORINTO 14:1-40
[1] Phikelelani rirhandzu; chivirikelani na tona tinyiko ta Moya, ngopfungopfu ya ku profeta.[2] Hikuva loyi a vulavulaka tindzimi tin'wana a nga vulavuri na munhu, u vulavula na Xikwembu ntsena; hikuva a ku na la n'wi yingisaka, loko a vulavula emoyeni wa yena leswi nga tiviwiki.[3] Kambe loko a ri la profetaka, u byela vanhu leswi va akisaka, ni leswi va khongotelaka, ni leswi va chavelelaka.[4] La vulavulaka tindzimi u tiakisa a ri swakwe; kambe la profetaka u akisa Kereke.[5] Ndzi nga rhandza leswaku mi vulavula tindzimi hinkwenu, kambe ndzi nga swi rhandza ku tlurisa loko mi profeta. Hikuva la profetaka, u tlula la vulavulaka tindzimi, loko ku nga ri loko a hundzula, leswaku Kereke yi ta kuma ku akisiwa kona.[6] Kutani sweswi, vamakwerhu, loko ndzi ta eka n'wina, ndzi vulavula tindzimi, ndzi ta mi pfuna hi mukhuva wihi, loko ndzi nga vulavuri na n'wina hi ku mi pfuletela timhaka, hambi ku ri hi ku tiva, hambi ku ri hi vuprofeta, hambi ku ri hi dyondzo.[7] Swi tano eka swilo leswi nga hanyiki leswi nga ni mpfumawulo, hambi yi ri nanga, kumbe dzandzana, loko swi nga yimbi tinoto leti twakalaka, ku nga tiviwa ha yini leswi yimbeleriwaka hi nanga, kumbe hi dzandzana xana?[8] Kutani loko mhalamhala yi ri ni mpfumawulo lowu nga tivikaniki, i mani la nga ta tsutsumela enyimpini?[9] Swi tano na n'wina, loko mi nga humesi hi tindzimi ta n'wina mhaka leyi twakalaka, xana vanhu va ta tiva ha yini leswi vuriwaka? Mi ta va mi vulavula swahava.[10] Marito ya ku tala ya tinxakaxaka, ma kona la emisaveni; kambe a ku na rito ni rin'we leri nga twakariki.[11] Kungakuloko ndzi nga tivi leswaku marito lawa ma ri yini, ndzi ta va mubarbari eka la vulavulaka; ni la vulavulaka a nga va mubarbari eka mina.[12] Kutani sweswi, leswi mi lavaka ku chivirikela tinyiko ta Moya, lavani ku andzeriwa ngopfu, kereke yi ta akisiwa hakona.[13] Hikwalaho ndzi nge: La vulavulaka tindzimi a a khongele leswaku a nyikiwa ni ku hlamusela.[14] Hikuva kungakuloko ndzi khongela hi ririmi leri nga twiwiki, moya wa mina wa khongela, kambe ku twisisa ka mina a ku pfuni van'wana ha nchumu.[15] Ndzi nga endlisa ku yini xana? Ndzi ta khongela hi Moya, na kona ndzi ta khongela hi ku twisisa. Ndzi ta yimbelela hi Moya, na kona ndzi ta yimbelela hi ku twisisa.[16] Loko swi nga ri tano, kungakuloko u khensa hi Moya, xana la nga tiviki nchumu, a nga tiyisa ku yini ku khensa ka wena, loko a ku: “Amen,” loko a nga tivi leswi u swi vulaka?[17] Kunene u khensa swinene, kambe van'wana a va akisiwi hakona.[18] Ndzi khensa Xikwembu xa mina, hikuva ndzi vulavula tindzimi ku tlurisa n'wina hinkwenu;[19] kambe, enhlengeletanweni, ndzi nga rhandza ku vula marito ya ntlhanu ntsena hi ku twisisa ka mina, ndzi ta dyondzisa ni van'wana, ku tlurisa marito ya khume ra madzana ya tindzimi tin'wana.[20] Vamakwerhu, mi nga tshuki mi va swihlangi eku twisiseni, kambe mi va swihlangi elunyeni, loko ku ri ku twisiseni mi va lava hetisekeke.[21] Ku tsariwile enawini va ku: “Ndzi ta vulavula ni tiko leri, hi vanhu va tindzimi tin'wana, ni milomu ya vamatiko; na kona, va nga ka va nga ndzi yingisi, ku vula Hosi.”[22] Hikwalaho, tindzimi i xikombiso ku nga ri eka vapfumeri, kambe eka lava nga pfumeriki; kasi vuprofeta i xikombiso ku nga ri eka lava nga pfumeriki, kambe eka vapfumeri.[23] Kungakuloko kereke hinkwayo yi hlengeletene exivandleni xi ri xin'we, kutani hinkwavo va vulavula tindzimi, kakuloko ku nghena vanhu lava nga riki na ku tiva, hambi va ri lava nga pfumeriki, xana va nga ka va nga vuri leswaku mi ni vuhunguki xana?[24] Kambe kungakuloko hinkwavo va profeta, kutani ku nga nghena munhu la nga pfumeriki, hambi a ri loyi a nga tiviki, a nga khorwisiwa hi hinkwavo, a avanyisiwa hi hinkwavo;[25] hi mukhuva wolowo, makungu ya mbilu ya yena ma vonakisa, kutani u ta tiwisela ehansi hi mombo, a khongela Xikwembu, kutani u ta vula leswaku Xikwembu xi le xikarhi ka n'wina hi xiviri.[26] Xana swi to yini, vamakwerhu? Ndzi ri, hi masiku hinkwawo, loko mi hlengeletene, un'wana ni un'wana eka n'wina, loko a ri ni pisalema, ni loko yi ri dyondzo, hambi ti ri tindzimi tin'wana, hambi ku ri ku kombisiwa, kumbe ku hlamusela, hinkwaswo a swi endleriwe ku akisana.[27] Kungakuloko un'wana a vulavula tindzimi, a ku endlisiwe sweswo va ri vambirhi kumbe vanharhu; ku endliwa hi ku landzelelana, un'wana a hlamusela.[28] Kungakuloko muhundzuluxi a nga ri kona, la vulavulaka tindzimi a a timiyelele ekerekeni, a tivulavulela swakwe, a vulavula ni Xikwembu.[29] A ku vulavule vaprofeta vambirhi kumbe vanharhu, kutani van'wana va avanyisa leswi va swi vuleke.[30] Kambe loko un'wana wa lava tshamiseke a pfuleteriwa mhaka, la nga rhanga u ta miyela.[31] Hikuva mi nga profeta hinkwenu hi ku landzelelana leswaku hinkwavo vadyondzisiwa, hinkwavo va tiyisiwa.[32] Mimoya ya vaprofeta vi rhumiwa hi vaprofeta;[33] hikuva Xikwembu a hi Xikwembu xa dzolonga, kambe i xa ku rhula.[34] Kukotisa etikerekeni hinkwato ta vakwetsimi, vavasati va n'wina a va miyele etinhlengeletanweni; hikuva a va pfumeleriwi ku vulavula; va fanele ku yingisa, kukota leswi nawu wu swi vulaka na wona.[35] Kutakuloko mhaka yi ri kona leyi va rhandzaka ku yi tiva, a va yi vutise eka vanuna va vona ekaya, hikuva a swi lulameli vavasati loko va vulavula ekerekeni.[36] Xana rito ra Xikwembu ri huma eka n'wina, kumbe hi n'wina ntsena lava ri mi teleke xana?[37] Kungakuloko un'wana a tiringanisa leswaku i muprofeta, kumbe munhu la nga ni Moya, a a twisise leswaku timhaka teto ndzi mi tsalelaka tona, i milawu ya Hosi.[38] Kutani loko un'wana a tialela ku ti tiva, a a tialele.[39] Hikwalaho, vamakwerhu, ngopfu chivirikelani ku profeta, mi nga tshuki mi sivela ku vulavula tindzimi.[40] Ntsena hinkwaswo a swi endliwe hi ku lulama ni hi nawu.

Tsonga Bible
© Bible Society of South Africa. All rights reserved