A A A A A

Sins: [Hate]


1 Johana 1:6
Omiyo ka wawacho ni wan e winjruok kode to pod wawuotho e mudho to wariambo kendo ok wawuothi e adiera.

1 Johana 2:9-17
[9] Ngʼato angʼata mawacho niwuotho e ler to mon gi wadgi pod osiko e mudho.[10] Ngʼat mohero owadgi to odak e ler, kendo ngʼama kamano onge obadho manyalo miyo ochwanyre.[11] Ngʼat mamon gi owadgi to ni e mudho, kendo mudho nogo ema owuothoe, kokia kuma odhiye, nikech mudho odino wangʼe.[12] Andikonu un nyithinda mageno nikech osewenu richou, kuom nying Yesu.[13] Andikonu un wuone nikech ungʼeyo Jalno mane nitie nyaka aa chakruok. Andikonu, un jomatindo, nikech useloyo ngʼama rach.[14] Andikonu un nyithindo mageno nikech ungʼeyo Wuoro. Andikonu un wuone, nikech ungʼeyo Jalno mane nitie nyaka aa chakruok. Andikonu un jomatindo, nikech utegno, kendo wach Nyasaye odak e chunyu, kendo useloyo ngʼama rach.[15] Kik uher piny kata gimoro amora manie pinyni. Ka ngʼato ohero piny, to hera mar Wuoro onge e iye.[16] Nimar gik moko duto manie piny, kaka gombo mar wangʼ kendo gombo mar ringruok kod sunga ma ji sungorego kuom gik ma gin-go, ok aa kuom Wuoro, to gin mana mag pinyni.[17] Pinyni kaachiel gi gombo duto kadho, to ngʼat matimo dwach Nyasaye nobed mangima nyaka chiengʼ.

Efeso 4:31
Weuru kecho gi mirima gi ich wangʼ gi gwandruok gi himruok gi ketho nying kod himruok duto.

Ngeche 8:13-25
[13] Luoro Jehova Nyasaye en sin gi richo; amon gi sunga kod ngʼayi, timbe maricho kod wuoyo mochido.[14] Ngʼado rieko kod ngʼado bura malongʼo gin maga; an-gi winjo tiend wach kod nyalo.[15] An ema amiyo ruodhi locho kendo joloch loso chike makare.[16] Nikech an, amiyo yawuot ruodhi loch kod joka ruodhi duto marito pinje.[17] Ahero jogo mohera, to jogo ma manya yuda.[18] Mwandu gi luor ni kuoma, mwandu mochwere kod mewo.[19] Olemba ber moloyo dhahabu maber, gino machiwo oloyo fedha moyier.[20] Awuotho e yo mobidhore makare, e yore mag bura makare,[21] kachiwo mwandu ni jogo mohera kendo amiyo kuondegi mag keno bedo mopongʼ chutho.[22] “Jehova Nyasaye nokwongo chweya kaka tichne mokwongo motelo ni tijene machon.[23] Noyiera aa chakruok manyaka chiengʼ, kapok piny kobetie.[24] Kapok nembe kobetie, nonywola kata ka sokni mopongʼ gi pi ne onge.[25] Nonywola ka gode madongo ne pok obedo kuonde ma gintie, bende ka gode matindo ne pod onge,

Ngeche 10:12-18
[12] Sigu kelo miero, to hera umo maricho duto.[13] Rieko iyudo e dho jogo mongʼeyo tiend wach, to luth en mar ngʼe ngʼatno maonge gi rieko mar ngʼado bura.[14] Joma riek okano ngʼeyo, to dho joma ofuwo kelo kethruok.[15] Mwandu mar jomoko e ohinga mochiel motegno ma gigengʼorego, to dhier e kethruok mar jochan.[16] Pok joma kare kelonegi ngima, to mwandu ma joricho yudo kelonegi kum.[17] Ngʼat mawinjo weche mirieyego wuotho e yo madhiyo e ngima, to ngʼat motamore kethone tero ji mamoko e yor lal.[18] Ngʼatno mapando sigu manie chunye, dhoge nigi miriambo, to ngʼatno ma jakwoth ofuwo.

Zaburi 5:5
Josunga ok nyal chungʼ e nyimi; imon gi ji duto matimo gik maricho.

Zaburi 31:6
Asin gi joma lamo nyiseche manono ma dhano oloso; an to aketo genona kuom Jehova Nyasaye.

Zaburi 36:2
Nikech chunye wuonde kendo owuondore kende, chunye wuonde ma ok onyal neno richone mosin-go.

Zaburi 45:7
Ihero tim makare to imon gi timbe maricho; emomiyo Nyasaye, ma Nyasachi, osetingʼi malo moyombo jowadu nikech osewiri gi mo mamiyi mor.

Zaburi 97:10
Joma ohero Jehova Nyasaye mondo osin gi gik maricho nimar orito ngima joge ma jo-adiera, kendo oresogi e lwet joma richo.

Zaburi 119:163
Asin kendo ajok gi miriambo, to ahero chikni.

Rumi 12:9
Hera nyaka bed mar adier. Beduru mosin gi timbe maricho; padreuru kuom gik mabeyo.

Tim jo-Lawi 19:17-18
[17] “ ‘Kik ibwon owadu gi chunyi. Nyis wadu kethone e wangʼe, mondo kik iriwri kode e richone.[18] “ ‘Kik idwar chulo kuor, kendo kik ibed ngʼama mon gi jowadgi, to her wadu kaka iherori iwuon. An e Jehova Nyasaye.

Luka 6:27-28
[27] “Anto awachonu un joma winja kama: Heruru wasiku, timuru maber ni jomamon kodu.[28] Gwedhuru joma kwongʼou lamuru ni joma sandou.

Mathayo 5:23-24
[23] “Kuom mano, ka ichiwo michni e nyim kendo mar misango to iparo ka in kanyo ni nyawadu ni kodi gi wach,[24] to we michnino piny kanyo e nyim kendo mar misango. Kuong idhi ilos kindi gi nyawadu; eka ibi ichiw michni.

1 Johana 3:14-15
[14] Wangʼeyo ni wasekalo waa e tho miwadonjo e ngima, nikech wahero owetewa. Ngʼama ok ohero owadgi osiko e tho.[15] Ngʼama mon gi owadgi en janek, to ungʼeyo ni janek onge gi ngima mochwere.

1 Johana 4:19-20
[19] Wan gihera nikech Nyasaye noherowa mokwongo.[20] Ka ngʼato wacho ni ohero Nyasaye to omon gi wadgi to en ja-miriambo; nikech ngʼama ok ohero wadgi, moseneno gi wangʼe, ok nyal hero Nyasaye mapok oneno.

Eklesiastes 3:1-8
[1] Nitiere kinde mar gimoro amora, kod thuolo mitimoe tich moro ka moro e bwo polo:[2] kinde mar nywol kod kinde mar tho, kinde mar pitho kod kinde mar putho,[3] kinde mar nek kod kinde mar chang, kinde mar muko kod kinde mar gero,[4] kinde mar kuyo kod kinde mar mor, kinde mar ywak kod kinde mar miel,[5] kinde mar keyo kite kod kinde mar chokogi, kinde mar kwakruok kod kinde mar weyo kwakruok,[6] kinde mar dwaro gimoro kod kinde ma gimoro lalie, kinde mar kano gimoro kod kinde mar wito gimoro,[7] kinde mar yiecho gimoro kod kinde mar twangʼo, kinde mar lingʼ kod kinde mar wuoyo,[8] kinde mar hera kod kinde mar sin, kinde mar lweny kod kinde mar kwe.

Luo Bible 2020
Copyright © 1980, 2002, 2003, 2020 by Biblica, Inc