Instagram
English
A A A A A

Life: [Sex]


2 Korintho 12:21
Aluor bende ni ka achako alimou, to timbeu nyalo miyo Nyasacha kuod wiya e nyimu, mi aywagi nikech ji mathoth kuomu mosetimo richo to otamore weyo timbegi maricho kaka, terruok kod anjawo.

Efeso 5:3
To e dieru kik winjre ni nitie terruok kata kit dwanyruok moro amora, kata wuoro, nikech gik ma kamago ok owinjore jomaler moluwo Nyasaye otim.

Efeso 5:33
Omiyo ngʼato ka ngʼato kuomu nyaka her chiege mana kaka oherore owuon kendo dhako nyaka luor chwore.

Galatia 5:19
Timbe mag ringruok nenore ratiro, gin kaka: chode, timbe mochido, anjawo,

Chakruok 2:24
Kuom mano, dichwo nowe wuon kod min kendo nopadre gi chiege; mi gidok ringruok achiel.

Hibrania 13:4
Ji duto nyaka kwan kend kaka gima ler kendo joma okendore nyaka rit singruok mar kend. Nikech Nyasaye biro kumo ngʼato angʼata ma jachode, gi joma timo timbe dwanyruok duto bed ni gin joma nyiri kata yawuowi.

1 Korintho 6:9
Donge ungʼeyo ni joma timo timbe maricho ok noyud gweth mar pinyruoth Nyasaye? Kik ngʼato wuondu! Ngʼeuru ni jochode kata joma lamo nyiseche manono, kata joma terore, kata chwo ma terore gi chwo wetegi,

1 Korintho 6:18
Ringuru utony ni terruok. Richo duto ma ngʼato timo otimo oko mar ringre, to ngʼat machodo timo richo ni ringre owuon.

1 Johana 1:9
To ka wahulo richowa, to oweyonwagi kendo opwodhowa kuom timbe duto ma ok odhi kare nikech en Ja-adiera kendo otimo gima kare.

Mathayo 5:28
Anto anyisou ni ngʼato angʼata morango dhako gi gombo oseterore kode gi ei chunye.

Mariko 7:22-23
[22] kod wuoro; kaachiel gi timbe maricho, wuond, anjawo, ketho nying, sunga kod fuwo.[23] Gik marichogi duto wuok e chuny dhano kendo miyo ngʼato bedo mogak.”

1 Thesalonika 4:3-5
[3] En dwaro Nyasaye mondo ubed jomaler. Nyasaye dwaro ni ubed mabor gi timbe mag terruok[4] to bende ngʼato ka ngʼato nyaka puonjre rito ringre e yo maler kendo malongʼo,[5] ma ok oyie mondo ringre oowre gi gombo mathoth kaka jopiny makia Nyasaye timo.

Mariko 10:6-9
[6] To chakre chwech piny, Nyasaye nochweyogi dichwo gi dhako.[7] ‘Kuom mano, dichwo nowe wuon kod min kendo nopadre gi chiege,[8] mi ji ariyogo nobed ringruok achiel.’ Omiyo koro ok gin ji ariyo, to gin ringruok achiel.[9] Kuom mano, gima Nyasaye oseriwo kaachiel kik dhano moro amora pogi.”

Ngeche 5:15-19
[15] Modh pi moa e dapigi iwuon, pi mamol moa e sokoni iwuon.[16] Bende ber mondo soknigi omol ka oo oko e yore mag dala, kata aoregi mag pi e kuonde chokruok manie dier dala?[17] Ne ni gibedo magi iwuon kendo kik iriwgi gi joma galagala.[18] Sokoni mondo ogwedhi, kendo ibed mamor gi chiegi mane ikendo ka in wuowi.[19] Ojaber ka mwanda, kendo olongʼo ka nyakech, thundene mad romi kinde duto, mad herane omaki moloyo.

1 Korintho 13:4-8
[4] Hera timo kinda, kendo ongʼwon, oonge nyiego, ok osungre, bende ok opakre.[5] Wiye ok tek, ok odwar mare kende, iye ok wangʼ piyo kendo ok omak sadha.[6] Hera ok mor gi gik maricho, to omor gi adiera.[7] Hera umo weche duto, osiko oyie ayieya, osiko ogeno agena, kendo osiko odhil adhila.[8] Hera ok rum. To kama nitiere weche mikoro, weche mikoro norum; kama nitiere wuoyo gi dhok mayoreyore, dhok mayoreyore norum; kama nitiere ngʼeyo; ngʼeyo bende nokadhi.

Wer Mamit 7:6-12
[6] Mano kaka ijaber kendo imiya mor, mano kaka imora, yaye jaherana![7] Dendi odongo mana ka othith, to thundi to chalo mana ka olemo, mogudore kanyachiel.[8] Ne awacho niya, “Abiro lwenyo yiend othith; nyaka amak olembe gi lweta.” Mad thundeni chal gi olemb, mzabibu mochokore kanyachiel, to tik mar muchi chal gi olemo mayom,[9] kendo dhogi chal mana gi divai mamit. Mad divai lor mos e dwond jaherana, kamol mos e kind lewe kod lekene komadhe.[10] An mar jaherana, kendo gombone ni kuoma.[11] Bi, jaherana, bi wadhi waba ei gwengʼ, kendo wanind oko e bunge.[12] Bi wamondi gokinyi wadhi, e puothe mzabibu mondo wangʼiane, ka mzabibu oseolo, bende wangʼiane ka gisechako thiewo, kendo ka olembe mongʼinore oselokore makwar; kuno, ema abiro miyie herana.

1 Korintho 6:13-20
[13] “Chiemo en mar ich, ich en mar chiemo,” to Nyasaye biro ketho gik moko ariyo duto. Ringruok ok en mar terruok, to en mar miyo Ruoth duongʼ, mana kaka Ruoth bende en mar ringruok.[14] Kuom teko Nyasaye nochiero Ruoth Yesu oa kuom joma otho kendo wan bende obiro chierowa.[15] Donge ungʼeyo ni ringreu gin fuonde Kristo owuon? Bende dakaw fuonde Kristo mondo ariw gi dhako ma jachode? Mano ok nyal timore ngangʼ![16] Koso ukia ni ngʼat moriwore gi dhako ma jachode bedo kode e achiel kuom ringruok? Ndiko wacho niya, “Ji ariyogo nodok ringruok achiel.”[17] To ngʼat moriwore gi Ruoth doko chuny achiel kode.[18] Ringuru utony ni terruok. Richo duto ma ngʼato timo otimo oko mar ringre, to ngʼat machodo timo richo ni ringre owuon.[19] Donge ungʼeyo ni ringreu en hekalu mar Roho Maler modak eiu kendo ma Nyasaye osechiwonu? Ok un mau uwegi;[20] to nongʼiewu gi nengo matek. Omiyo miuru Nyasaye duongʼ gi ringreu.

Luo Bible 2020
Copyright © 1980, 2002, 2003, 2020 by Biblica, Inc