A A A A A

Additional: [Evil]

1 Korintho 13:6
Hera ok mor gi gik maricho, to omor gi adiera.

1 Johana 5:19
Wangʼeyo ni wan nyithind Nyasaye, kendo piny duto ni e bwo loch mar ngʼama rach.

1 Ruodhi 14:9
Isetimo richo moloyo ji duto mane odak kapok idak. Iseloso ne in iwuon nyiseche mamoko, nyiseche mag chuma; isemiyo iya owangʼ mi idhira ka ngʼeyi.

1 Ruodhi 17:13
Elija nowachone niya, “Kik ibed maluor dhi dala kendo tim kaka isewacho. To mokwongo losna kuon matin kuom gima in-go mondo ikelna eka ilos gimoro ni in kaachiel gi wuodi

1 Petro 3:9
Kik uchul richo kar richo, kata ayany kar ayany kar timo kamano to gwedhuru agwedha, nikech mano omiyo noluongou, mondo uyud gweth.

1 Samuel 12:20
Samuel nodwokogi niya, “Kik ubed maluor. Kata obedo ni usetimo tim marachni, koro kik ulokru uwe Jehova Nyasaye, to tineuru gi chunyu duto.

1 Samuel 15:23
nimar ngʼanyo chal gi richo mar jwok, to tok teko chalo gi richo mar lamo nyiseche manono. Nikech isedagi wach Jehova Nyasaye En bende osedagi ni kik ibed ruoth.”

1 Thesalonika 5:22
Pogreuru gi timbe maricho duto.

2 Weche mag Ndalo 29:6
Kwerewa ne ok jo-ratiro; omiyo negitimo richo e nyim wangʼ Jehova Nyasaye, ma Nyasachwa kane giweye. Ne gingʼanyone hekalu mar Jehova Nyasaye, ma giweyo luwe.

2 Timotheo 2:22
Ring iwe gombo maricho mag jomatindo kendo ket chunyi mar luwo ngima maler, gi yie, gihera, kod kwe, kaachiel gi joma lamo Ruoth Nyasaye gi chuny maler.

Isaya 5:20
Mano kaka nobed malit ne joma luongo tim mamono ni ber to tim maber ni rach; jogo maketo mudho kar ler to kar ler gikete mudho, joma keto gik makech kar mamit to mamit giketo kar makech.

Isaya 32:6
Nimar ngʼat mofuwo wacho weche mofuwo, kendo opongʼ gi richo: Otimo timbe mag richo kendo olando miriambo kuom Jehova Nyasaye; mi omon joma odenyo chamo gik monego gicham kendo joma riyo oloyo otamoe pi.

Johana 3:20
Ngʼato ka ngʼato matimo richo ok dwar ler, kendo ok odwar donjo ei ler, nikech oluor ni dipo ka timbene ongʼere.

Jong’ad Bura 2:19
To ka jangʼad bura notho, ji noduogo e timbe mangʼeny mag anjawo moloyo kata mago mag kweregi, ka giluwo bangʼ nyiseche mamoko kendo tiyonegi kendo ka gilamogi. Negitamore weyo timbegi mamono kod timbegi mag wich teko.

Ayub 4:8
Gima aseneno en ni joma chwoyo richo gi chandruok kayo mana richo.

Ngeche 3:7
Kik ibed mariek e pachi iwuon to luor Jehova Nyasaye eka inilo richo.

Ngeche 4:16
Nikech ok ginyal nindo nyaka gitim gima mono; ayula wangʼ bende ok nyal terogi kapok gimiyo ngʼato opodho.

Ngeche 8:13
Luoro Jehova Nyasaye en sin gi richo; amon gi sunga kod ngʼayi, timbe maricho kod wuoyo mochido.

Ngeche 10:29
Yor Jehova Nyasaye e kar pondo ni joma kare, to en kethruok ni jogo matimo richo.

Ngeche 12:20
Wuond ni e chuny jogo machano timo marach, to mor en mar jogo mohero kwe.

Zaburi 7:14
Ngʼama iye okuot gi gik maricho kendo ma yach gi chandruok nywolo yamo nono.

Zaburi 28:3
Kik iywaya oko gi joricho, kod joma timo gik maricho, joma wuoyo gi jowetegi maber to opando sigu e chunygi.

Zaburi 37:9
Nikech joma richo ibiro ngʼad kargi oko, to joma oketo genogi kuom Jehova Nyasaye piny biro bedo margi.

Zaburi 50:19
Utiyo gi dhou kuom timo richo kendo lewu oikore ne wuond.

Zaburi 73:7
Wengegi onyiedhore gi bor kendo miriambo maricho mopongʼo pachgi onge gikogi.

Zaburi 141:4
Kik iyie gimoro amora marach ywa chunya, ma dimi an bende atim timbe maricho, kaachiel gi joma timbe gi richo; rita mondo kik acham chiembgi mabeyonegi.

Rumi 6:12
Emomiyo koro kik uyie mondo richo obed gi loch e ringreu matho ka uchopo gombone maricho.

Rumi 12:21
Kik uyie richo lou, to louru richo gi tim maber.

Mariko 7:21-22
[21] Nikech chuny dhano ema richo duto wuokie kaka: paro maricho, chode, kuo, nek, terruok,[22] kod wuoro; kaachiel gi timbe maricho, wuond, anjawo, ketho nying, sunga kod fuwo.

Mathayo 12:34-35
[34] Un koth thuonde fu-gi, ere kaka un ma un jomaricho kamano unyalo wacho gima ber? Nimar gik mopongʼo chuny ngʼato ema wuok e dho ngʼato.[35] Ngʼat maber golo gik mabeyo mawuok kuom ber mokano e iye, to ngʼat marach golo gik maricho mawuok kuom rach mokano e iye.

Jakobo 1:13-14
[13] To ka itemo ngʼato to kik owach niya, “Nyasaye tema.” Nikech Nyasaye ok nyal tem gi gik maricho, to en owuon bende ok otem ji[14] makmana ngʼato ka ngʼato itemo mana ka gombone owuon maricho oywaye kendo tere e richo.

Jakobo 3:6-8
[6] Lep bende en mach kendo piny mopongʼ gi richo e kind fuonde duto mag ringruok. Oketho ringruok duto ka omoko mach mawangʼo ngima dhano duto mi chop en owuon bende wangʼe e Gehena.[7] Kit le duto gi winy mafuyo gi gik mamol kaachiel gi chwech Nyasaye duto manie nam, dhano nyalo boyo kendo oseboyo,[8] to onge ngʼama nyalo boyo lep. En gima rach ma ok ywe mopongʼ gi kwiri marach.

Rumi ۲:۲۹-۳۲
[۲۹] Ooyo, ja-Yahudi mar adier en ngʼato ma ja-Yahudi gi e chunye kendo tero nyangu mar adier bende en mar chuny, mano en tich Roho to ok mar rito Chik. Ngʼat ma kamano ok yud pak kuom ji, to oyudo pak kuom Nyasaye.[۳۰] To ere ohand bedo ja-Yahudi kata ber tero nyangu?[۳۱] Nitie ber mangʼeny! Mokwongo, gin ema ne omigi wechegi mag Nyasaye.[۳۲] To kapo ni moko kuomgi ne onge gi yie, to bende bedogi maonge yie nyalo ketho adiera mar Nyasaye?

Rumi 2:8-12
[8] To joma ohero margi kendo ma ok luw adiera, to luwo mana timbe ma ok kare, norom gi mirimb Nyasaye mager.[9] Masira gi chandruok malit nobedi ni ji duto matimo richo, mokwongo ni jo-Yahudi, eka bangʼe ni joma ok jo-Yahudi bende;[10] to ngʼato ka ngʼato matimo maber noyud duongʼ gi pak kod kwe, mokwongo ni jo-Yahudi, eka bangʼe ni joma ok jo-Yahudi bende;[11] nikech Nyasaye ok dew wangʼ ji.[12] Ji duto matimo richo, ka ok ongʼeyo chik nolal nono kata obedo ni gikia chik kamano, to ji duto matimo richo ka gin e bwo Chik nongʼadnigi bura gi Chikno.

Efeso 6:12-16
[12] Nikech wasigu mwakedogo ok gin dhano, to wakedo gi jotelo, kod ruodhi mag piny motimo mudhoni, kaachiel gi lang chuny maricho modak e kor polo.[13] Omiyo manreuru mogik gi gige lweny mag Nyasaye, mondo ka kinde mag richo ochopo to uyud teko mar chungʼ kar tiendu kendo kusetimo madwarore duto to mondo uchungʼ.[14] Emomiyo nyonuru piny motegno, kutweyo nungou gi kamba mar adiera, kendo kurwako tim makare ka gige lweny mag akor,[15] rwakreuru gi ikruok mar lando Injili makelo kwe kaka wuoche e tiendu.[16] Ewi mago duto tingʼuru yie maru ka okumba mugengʼogo aserni makakni ka mach moa kuom ngʼat marach.

Ngeche 14:16-22
[16] Ngʼat mariek oluoro Jehova Nyasaye kendo okwedo richo, to ngʼama ofuwo wiye tek kendo omuomore.[17] Ngʼat ma iye wangʼ piyo timo gik mofuwo, to ngʼat ma ja-miganga ji mon-go.[18] Joma ngʼeyogi tin nwangʼo fuwo, to jomariek irwako nigi ogut ngʼeyo.[19] Joricho kulore e nyim joma beyo, to jo-ajendeke e dhorangeye mag joma kare.[20] Jochan ok dwar kata gi jobutgi, to jo-mwandu nigi osiepe mangʼeny.[21] Ngʼatno machayo jabute timo richo, to ogwedhi ngʼatno mangʼwon gi jogo mochando.[22] Donge jogo machano marach lal nono? To jogo machano gima ber yudo hera kendo imiyogi luor.

Rumi 7:19-25
[19] Nimar ok atim gima ber ma adwaro mondo atim to asiko atimo mana gima rach.[20] Koro ka atimo gima ok adwar timo, to koro an ok ema atime, to richo modak e iya ema time.[21] Omiyo ayudo chikni katiyo: Ni ka adwaro timo gima ber, to apo ka rach bende ni koda.[22] Nimar ei chunya maiye amor gi chik Nyasaye;[23] to aneno chik machielo katiyo e fuonde mag ringra makedo gi chik manie chunya, mamiyo abedo misumba Chik mar richo manie fuondena.[24] Mano kaka an ngʼama chandore! En ngʼa mabiro resa kuom ringruokni mar tho?[25] Erokamano ne Nyasaye kuom Yesu Kristo Ruodhwa! Kuom mano, an awuon gi ei pacha an misumba mar chik Nyasaye, to kuom kita mar richo, an misumba mar chik mar richo.

Mathayo 13:36-43
[36] Eka noweyo oganda mi odonjo e ot. Jopuonjrene nobiro ire kawacho niya, “Nyiswae tiend ngech buya manie puodho.”[37] Nodwokogi niya, “Ngʼat mane okomo kodhi mabeyo en Wuod Dhano.[38] Puodho en piny, to kodhi maber ochungʼ kar yawuot pinyruoth. Buya gin yawuot ngʼat marach,[39] to jasigu ma komogi en Jachien. Keyo en giko piny, to jokeyo gin malaike.[40] “Mana kaka ipudho buya kendo iwangʼo e mach, e kaka biro bedo chiengʼ giko piny.[41] Wuod Dhano biro oro malaikane, kendo gibiro golo gimoro amora manie pinyruodhe makelo richo kod ji duto matimo gik maricho.[42] Gibiro witogi e mach makakni, kama ywagruok gi mwodo lak nobedie.[43] Eka joma kare norieny kaka wangʼ chiengʼ ei pinyruoth mar Wuon-gi. Ngʼat man-gi ite to mondo owinji.

Ngeche 6:12-19
[12] Ngʼat mamono kendo jaricho mawuotho awuotha kowacho weche mogak,[13] oningʼo wangʼe, owuoyo gi tiendene ka ogoro piny, kendo ogwelo ji gi lith lwetene,[14] ochano richo kod miriambo ei chunye, kinde duto okelo miero.[15] Kuom mano, masira biro make maloye apoya nono; notieke apoya nono, maonge resruok.[16] Nitie gik moko auchiel ma Jehova Nyasaye mon-go, chutho gin gik moko abiriyo ma ok more:[17] wenge mag sunga, lep mariambo, lwedo machwero remo maonge ketho,[18] chuny machano chenro maricho, tiende maringo kadhi e richo,[19] jahang wach mawacho miriambo kendo ngʼatno makelo miero e kind jowete.

Chakruok 6:1-8
[1] Kane dhano ochako medore e piny, kendo onywolonegi nyiri,[2] yawuot Nyasaye noneno ni nyi dhano beyo kendo negikendo moro amora mane chunygi ogombo.[3] Eka Jehova Nyasaye nowacho niya, “Mucha machiwo ngima ok nodag kuom dhano nyaka chiengʼ, nikech en ringruok matow, ndalone nobed higni mia achiel gi piero ariyo.”[4] Jo-Nefilim ma gin joma robede miwuoro ne nitie e piny e ndalogo kendo kod ndalo maluwe, e kindeno ma yawuot Nyasaye kod nyi dhano nonywomore monywolo nyithindo. Nyithindogo ne thuondi kendo joma ne nigi huma e ndalogo.[5] Jehova Nyasaye noneno kaka richo dhano ogundho e piny kendo kaka paro duto mag chunye ne mana timo richo seche duto.[6] Jehova Nyasaye chunye nodoko malit kuom keto dhano e piny kendo chunye nopongʼ gi lit.[7] Kuom mano Jehova Nyasaye nowacho niya, “Abiro nego dhano duto masechweyo e wangʼ piny kaachiel gi le kod gik mamol duto kod winy mafuyo e kor polo nimar dine ber ka dine ok achweyogi.”[8] To Nowa noyudo ngʼwono e wangʼ Jehova Nyasaye.

1 Timotheo 6:2-10
[2] Jogo man-gi ruodhi moyie kuom Kristo kik nyisgi achaya moro amora nikech gin jowete kuom Kristo. Kar timo kamano to owinjore gitinegi maber moloyo, nikech jogo mayudo ohala e tichgi gin owete kuom Kristo ma gihero. Magi e gik manyaka ipuonj ji kijiwogi matek.[3] Ka ngʼato opuonjo gima opogore ma ok owinjore gi puonj ma adier mag Ruodhwa Yesu Kristo kendo mamiyo ji luoro Nyasaye,[4] to ngʼeuru ni ngʼat ma kamano wuondore kende owuon bende onge gima ongʼeyo. Ngʼat ma kamano kasore gi mino wach kendo gigoyo mbaka manono makelo nyiego, gi dhawo, gi kuoth, kod chich maricho;[5] kod miero ma ok rum e kind joma pachgi osekethore kendo ma adiera oselalnigi. Giparo ni lamo Nyasaye en yor yudo mwandu.[6] To geno Nyasaye gi chuny modhil en ohala maduongʼ.[7] Nimar onge gima ne wakelo e pinyni kendo onge gima wabiro kawo wadhigo.[8] Omiyo ka wan gi chiemo kod lewni to mago mondo oromwa.[9] Joma gombo mondo obed gi mwandu nwangʼo tem kendo gimoko e obadho kuom gik mofuwo mangʼeny kod gombo mathoth kendo gombo ma kamano kelo kethruok kendo miyo ji lal.[10] Nikech hero pesa e chakruok mar kit richo duto. Jomoko ma chunygi osegedo e yore mag yudo pesa oseweyo yie mi gichwowo chunygi giwegi gi masiche mathoth.

Zaburi 34:13-21
[13] nyaka ogengʼ lewe kik wuo marach kendo ogengʼ dhoge kuom wacho miriambo.[14] Lokri iwe timbe maricho kendo itim tim maber; many kwe kendo iluwe.[15] Wangʼ Jehova Nyasaye ni kuom joma kare kendo ite winjo ywakgi;[16] to Jehova Nyasaye mon gi joma timo gik maricho, kendo omiyo wich wil kodgi e piny.[17] Joma kare koywak to Jehova Nyasaye winjogi; oresogi e chandruokgi duto.[18] Jehova Nyasaye chiegni gi joma chunygi otur kendo oreso joma chunygi muol.[19] Ngʼat makare nyalo bedo gi chandruok mangʼeny, to Jehova Nyasaye rese kuomgi duto;[20] orito chokene duto, ma kata achiel kuomgi ok notur.[21] Timbe maricho biro nego ngʼama timbene rach, to jowasik joma kare, bura biro loyo.

Zaburi 52:1-9
[1] Kuom jatend wer. Maskil mar Daudi. Kane noyudo Doeg ja-Edom nosedhi ir Saulo kendo onyise niya, “Daudi osedhi e od Ahimelek.” Angʼo momiyo isungori kuom tim marach, yaye ngʼat maratego? Angʼo momiyo isungori odiechiengʼ duto, in ma in gir wichkuot e nyim Nyasaye?[2] Ichano timbe midwaro wuondogo ji, lewi bende chano gik modwaro hinyogo ji; kendo lewino chalo gi wembe mabith.[3] Ihero rach moloyo ber, miriambo mitni moloyo wacho adiera. Sela[4] Ihero weche duto machwanyo ji, yaye in lep mohero wuondni![5] To Nyasaye biro tieli piny matieki chuth nyaka chiengʼ; obiro yudhi mi oyiechi oko e hembi; obiro pudhi mi ogoli e piny joma ngima. Sela[6] Joma kare biro neno mano mi gibed maluor; gibiro nyiere kagiwacho ni,[7] “Koro neyeuru ngʼatno, mane ok okawo Nyasaye obedo kar pondo mare, to nogeno mana kuom mwandune mathoth kendo notieko joma moko mondo eka omed bedo gi teko!”[8] An to achalo yiend zeituni madongo maber e od Nyasaye; ageno kuom hera ma ok rem mar Nyasaye manyaka chiengʼ.[9] Abiro paki nyaka chiengʼ kuom gima isetimo; abiro paki e nyim jogi maler. Abiro keto geno mara kuom nyingi, nikech nyingi ber.

Eklesiastes 9:3-12
[3] Ma e richo mantiere kuom gimoro amora matimore e piny: Giko machalre choponegi duto. Kata kamano, chuny dhano opongʼ gi richo kendo nitie neko e pachgi e kinde ma gingima, to bangʼe to giriwore gi joma otho.[4] Ngʼato angʼata mangima pod nigi geno, mana kaka ngero moro wacho ni ber bedo guok mangima moloyo sibuor mosetho![5] Nimar joma ngima ongʼeyo ni gibiro tho, to joma osetho ok ongʼeyo gimoro amora; gionge gi mich moro machielo, kendo wich wil kodgi ma ok nyal pargi.[6] Hera margi, achaya margi kod nyiego margi noselal chon; ok ginichak gibed gi thuolo e gimoro amora matimore e piny.[7] Dhiyo, icham chiemo gi mor, kendo imadh divai mari gi chuny moil, nimar sani ema Nyasaye jakori kuom gik mitimo.[8] Kinde duto rwakri gi lewni marochere, kendo kinde duto wir wiyi gi mo.[9] Bed mamor gi chiegi mihero e ndalo duto mar ngimani maonge tiende ma Nyasaye osemiyi e piny e ndalogi duto maonge tiendgi, nimar mano ema niyudi kuom chandruokni duto e piny ka.[10] Gimoro amora ma lweti oyudo mondo otim, time gi tekri duto, nimar ei bur, kama ibiro idhiyoe, onge tich kata loso chenro kata ngʼeyo kata rieko.[11] Gimoro machielo ma bende aseneno e pinyni en ni jongʼwech maringo matek ok yomb e ngʼwech pile, kata joma thuondi e lweny ok lo lweny pile, joma riek ok yud chiemo ma gichamo pile kata joma nigi paro mariek ok bed jo-mwandu, kendo joma ongʼeyo tich ok bed jotelo; to kata kamano hawi marach mako ji duto.[12] Kuom mano, onge ngʼama ongʼeyo sa ma kindene chopoe: Mana kaka rech imako gi gogo, kata winy imako gi wino, e kaka dhano moko e obadho mar richo ka ok ongʼeyo.

Zaburi 10:2-12
[2] Ngʼat ma timbene richo goyo apedha ni joma onge nyalo kendo omakogi e otegu mage mosechiko.[3] Dwache maricho mopando e chunye omiyo osungore; jowuoche ema ogwedho to Jehova Nyasaye to ochayo.[4] Sunga omake ma ok onyal manye; onge thuolo kata matin mochiwo ne Nyasaye e chunye.[5] Yorene dhi maber kinde duto, okawore omiyo chikeni ni mabor moyombe; ojaro wasike duto.[6] Owacho ne en owuon niya, “Onge gima nyalo yienga; abiro dak gi kwe kinde duto kaonge gima thaga.”[7] Dhoge opongʼ gi miriambo kod weche mag kwongʼ; chandruok gi weche maricho ni e bwo lewe.[8] Okiyo ji e bath yore mag gwengʼ, onego ji apoya koa kuonde moponde, osiko ongʼicho mondo wangʼe omaki joma onge ketho mondo ohiny.[9] Okiyo ji kokichore ka sibuor mopondo; okichore mar mako joma ok nyal mondo ohinygi, omako joma ok nyal kendo oywayogi oko gi tonde mar meko.[10] Joma hapgi rach momako otieko kendo podho chuth, gipodho e bwo tekone.[11] Owachone en owuon niya, “Nyasaye wiye osewil; opando wangʼe kendo onge gima oneno.”[12] Aa malo yaye Jehova Nyasaye! Tingʼ badi malo, yaye Nyasaye. Kik wiyi wil gi joma ok nyal.

Ngeche 16:17-27
[17] Yor ngʼat moriere tir kwedore gi richo; ngʼat manono yorene orito ngimane![18] Sunga kelo masira, chuny mar ngʼayi kelo chwanyruok.[19] Ber bedo gi chuny mobolore e dier jochan, moloyo pogo gik moyaki gi josunga.[20] Ngʼato angʼata mawinjo puonj dhi maber, to ojahawi ngʼatno moketo genone kuom Jehova Nyasaye.[21] Ngʼat man-gi paro en ngʼat mariek, kendo weche mowacho gin mana puonj.[22] Winjo wach en soko mar ngima ne jogo man kode, to fuwo kelo kum ne joma ofuwo.[23] Ngʼat mariek rito weche mawuok e dhoge, kendo wechene mowinjore kelo puonj makare.[24] Weche mag mor chalo gi mor kich gimit ne chuny kendo gikelo ngima ni choke.[25] Nitie yo manenore ne dhano ni nikare, to gikone otero mana ngʼato e tho.[26] Miluma ma jatich nigo miyo otiyo matek, kendo kech makaye miyo omedo tiyo matek.[27] Ngʼat marach chano timo timbe maricho, to wechene chalo mach mager.

Zaburi 36:1-12
[1] Kuom jatend wer. Zaburi mar Daudi jatich Jehova Nyasaye. An-gi wach e chunya mowuok kuom Nyasaye, kuom gima joricho timo: Ok giluoro Nyasaye kata matin.[2] Nikech chunye wuonde kendo owuondore kende, chunye wuonde ma ok onyal neno richone mosin-go.[3] Weche mawuok e dhoge richo kendo gin miriambo; oseweyo bedo mariek kod timo maber.[4] Kata konindo e kitandane, to ochano timo gima rach; oseketo chunye mar luwo yor richo, kendo ok otamre gima rach.[5] Herani ochopo nyaka e polo malo, yaye Jehova Nyasaye; adierani chopo nyaka e polo,[6] Timni makare chalo gi gode madongo, ratiro mari chalo gi kut matut. Yaye Jehova Nyasaye, in ema irito ngima dhano gi le.[7] Mano kaka herani ma ok rum nengone tek, yaye Nyasaye! Joma idewo kaachiel gi joma ni piny yudo kar pondo margi e bwo tipo mar bwombeni.[8] Gichamo chiemo mangʼeny e hekalu mari ka gimor; imiyogi math moa e aorani mar mor.[9] Nimar in ema in gi soko mar pi mar ngima; kuom lerni ema wanenoe ler.[10] Med nyiso herani ni joma ongʼeyi, med nyiso timni makare ne joma gie chunygi ni kare.[11] Mad tiend joma sungore kik nyona, kata lwet joma timbegi richo gola kama antie.[12] Neye kaka joma timo gik maricho oriere piny kopodho osedirgi piny ma ok ginyal aa malo!

Ngeche 1:8-19
[8] Wuoda, chik iti ni puonj wuonu, kendo kik ijwangʼ puonj mar minu.[9] Ginibedni kaka kondo michwowo e wiyi, kendo kaka thiwni miketo e ngʼuti mondo ineri maber.[10] Wuoda, ka joricho hoyoi mondo itim marach, kik iyienegi.[11] Kagiwachoni niya, “Bi idhi kodwa; mondo wabuti ni ngʼato wanegi, kendo wamonj kayiem nono joma onge ketho;[12] mondo wamuonygi ngili ka bur liel mana ka joma omwony mangima gi bur;[13] wabiro yudo gik moko duto mabeyo ma nengogi tek, mi wapongʼ utewa gi gik moyaki.[14] In bende riwri kodwa e wachni, kendo wanapog gigo duto mwayako.”[15] Wuoda, kik idhi kodgi ngangʼ kendo kik iwuoth e yoregigo,[16] nikech tiendgi reto piyo piyo mar timo richo kendo gimwomore mondo gichwer remo.[17] Mano kaka en gima nono chiko obadho ka winy duto neno.[18] Jogi ochiko obadho ne gin giwegi, kendo gin ema ginimokie![19] Mano e giko jogo duto mohero yudo gimoro moyud e yo marach; gino kawo ngima jogo moyude.

Isaya 59:4-15
[4] Onge ngʼama dwaro tim makare; kata manyo bura miyalo gadiera. Gigeno mana kuom weche manono kendo giwacho miriambo, gimako ich mar chandruok kendo ginywolo mana richo.[5] Gibutno e tong thuonde, kendo gichweyo mbuyi mar otiengʼ-otiengʼ. Ngʼato angʼata mochamo tongʼ-gi biro tho kendo kamoro oto to nyathi fu ema wuokie.[6] Mbui margi ok nyal twangʼ-go nanga, bende ok ginyal umore giwegi gi gik ma giloso. Timbegi gin timbe richo; kendo timbe mag mahundu ni e lwetgi.[7] Tiendegi reto kadhi timo richo; giyot ahinya mondo gichwer remo maonge ketho. Paro manie chunygi gin paro maricho kendo kamoro amora ma gidhiyoe; masira gi chandruok ema dongʼie.[8] Ok gingʼeyo yo makelo kwe, onge tim makare e yoregi. Giseloko yorego obedo yore mogondore ogondore, kendo ngʼato angʼata mawuotho e yorego ok noyud kwe.[9] Omiyo ngʼado bura makare koro bor kodwa, kendo tim makare ok chop irwa. Wagombo ler, to mudho ema waneno; kendo wadwaro mondo piny oru, to mudho mandiwa ema wawuothoe.[10] Wamulo kor udi mana ka muofni, kendo wamulo kuonde ma wawuothe, mana ka joma onge wengegi. Wachwanyore godiechiengʼ, mana ka gima en otieno kendo wachalo joma otho e kind joma rateke.[11] Walak mana ka ondiegi kendo wadengo malit mana ka akuru. Wadwaro ngʼado bura makare to ok wayud kata achiel, kendo wamanyo ngʼama reswa to obor kodwa.[12] Nimar timbewa mamono opongʼo wangʼi kendo richowa elore e lela. Timbewa marichogo osiko kodwa kendo wayie timbewa mamonogo, ma gin:[13] ngʼanyo kendo ketho e nyim Jehova Nyasaye, loko ngʼewa ne Nyasachwa, chano timo tulo kendo paro weche mag miriambo ka chunywa opongʼ kod wuond.[14] Omiyo ngʼado bura makare ogol oko kendo tim makare ni mabor kodwa, adiera onge e yore matindo kendo tim makare ni kuma bor.[15] Adiera ok nyal yudi, kendo ngʼat motangʼ ne richo chuny ji ojokgo. Jehova Nyasaye norangogi kendo nokecho nikech ngʼado bura makare onge kuomgi.

Jeremia 18:8-20
[8] kendo ka ogandano mane asiemo olokore oweyo timbegi maricho, eka analok pacha mi ok anakelnegi masira mane asechano.[9] Kendo ka kinde machielo alando ni piny kata pinyruoth onego ger kendo gur motegno,[10] to kotimo tim marach e nyima kendo ok oluora, to anapar kendo kuom ber mane asechano mar timone.[11] “Emomiyo koro wachne jo-Juda kod jogo modak Jerusalem, ‘Ma e gima Jehova Nyasaye wacho: Neuru! Aiko masira nikech un kendo achano chenro marach nikech un. Omiyo weuru yoreu maricho, ngʼato ka ngʼato, kendo ulok yoreu gi timbeu.’[12] To gini dwoke ni, ‘Onge tiende. Wanadhi nyime gi chenro magwa wawegi; ngʼato ka ngʼato kuomwa noluw mana timbe mamono mar chunye marach.’ ”[13] Emomiyo ma e gima Jehova Nyasaye wacho: “Penjieuru ogendini: En ngʼa mosewinjo gima chalo kama? Gima lich mokadho osetim gi Nyako Ngili ma en Israel.[14] Bende pe mag Lebanon rumo ngangʼ koa kuondege maridore motimo lwendni? Bende pige mangʼich mokwe mamol, koa kuonde maboyo dwono?[15] To joga wigi osewil koda, giwangʼo ubani ne nyiseche mopa manono, manomiyo gichwanyore e yoregi kendo e yore matindo machon. Giseketogi gi wuotho e yore matindo mogondore, kendo e yore ma ok opa.[16] Pinygi nodongʼ gunda, mi enobedi gima inyiero manyaka chiengʼ; jogo duto makalo bute nobwogi kendo gini kin wigi.[17] Kaka yamo ma aa yo wuok chiengʼ, anakegi e nyim wasikgi; ananyisgi ngʼeya to ok wangʼa e kinde mar masichegi.”[18] Negiwacho, “Biuru, wangʼad rieko mar hinyo Jeremia; nimar puonj mar chik mikelo gi jadolo ok nolal, kata ngʼado rieko moa kuom joma riek, kata weche moa ir jonabi. Omiyo biuru, wahangne wach kendo kik wachik itwa ne gimoro amora mowacho.”[19] Winja, yaye Jehova Nyasaye; winj gima joma donjona wacho![20] Bende ber inyalo chul gi tim marach? To kata kamano gisekunyona bugo. Par nine achungʼ e nyimi kendo awuoyo ka akwayonegi, mondo kik iol mirimbi kuomgi.

Ngeche 11:6-27
[6] Tim makare mar joma kare resogi, to jogo ma ok jo-adiera imako gi gombogi maricho.[7] Ka jaricho otho, to genone duto tho kode, gigo duto mane ogeno kuom tekone bedo nono.[8] Ngʼat makare ireso kuom chandruok, to chandruok biro mana ni jaricho.[9] Ngʼat ma ok ja-Nyasaye hinyo jabathe gi dhoge owuon, to rieko miyo ngʼat makare tony.[10] Ka ngʼat makare mewo, dala maduongʼ bedo mamor, ka joricho otho, to nitie koko mar mor.[11] Gweth mar joma kare kelo pak ne dala, to kuom dho joricho dala kethore.[12] Ngʼat maonge gi rieko jaro jabathe, to ngʼat man-gi winjo rito lewe.[13] Kuoth ketho genruok, to ngʼat ma ja-ratiro rito wach malingʼ-lingʼ.[14] Oganda podho nimar onge puonj, to jongʼad rieko mangʼeny miyo loch mar adier bedo.[15] Ngʼat machungʼ e gowi ni ngʼat mokia biro hinyore adier, to ngʼat motamore chungʼ e gowi ni ngʼat mokia okonyore.[16] Dhako ma chunye ngʼwon yudo luor, to ji ma kitgi richo yudo mana mwandu kende.[17] Ngʼat mangʼwon yudo ohala mana ne en owuon, to ngʼat makwiny kelo chandruok ni en owuon.[18] Jaricho yudo ohala mar miriambo, to ngʼat machwoyo gima kare kayo pok mar adiera.[19] Ngʼat man-gi tim makare kendo ma ja-adiera nobed mangima, to ngʼat maluwo richo dhiyo e thone.[20] Jehova Nyasaye odagi jogo ma chunygi opongʼ gi richo, to omor gi jogo ma yoregi ler.[21] Bed ka ingʼeyo ni jaricho ok notony ma ok okume, to jogo makare nobed thuolo.[22] Mana ka tere mar dhahabu manie um anguro, e kaka dhako ma jaber maonge rieko chalo.[23] Dwaro mar joma kare gik mana e ber kende, to geno mar joricho gik mana e mirima.[24] Ngʼato achiel miyo ji ma ok odewo, to bende pod mwandu medorene moloyo, to ngʼat machielo kungo mokadhore, to ochopo mana e chan.[25] Ngʼat mangʼwon biro bedo gi mwandu; to ngʼat makweyo chuny ji ibiro kwe chunye bende.[26] Ji kwongʼo ngʼat mapando cham, to gweth bedo ni ngʼatno moyie golo chambe mondo ji ongʼiew kuome.[27] Ngʼat madwaro ber winjo maber, to kethruok biro ni ngʼatno madware.

Ayub 15:1-35
[1] Eka Elifaz ja-Teman nopenjo niya,[2] “Bende ngʼama riek nyalo dwoko ji gi paro manono kata pongʼo it ji gi weche ma ok nikare?[3] Bende onyalo mino wach gi weche maonge tiendgi, kata gi mbekni maonge gi konyruok?[4] In to inyoso chuny ji mondo kik giluor Nyasaye kendo imonogi lame.[5] Richo ma isetimo ema omiyo iwuoyo alanda kamano; kendo ilony e wacho miriambo.[6] Wecheni iwuon ema ngʼadoni bura, to ok an, kendo gik ma lewi wacho ema nyiso kiti marach.[7] “Iparo ni in e ngʼat mane okuong nywol e piny? Koso ne intie kapok Nyasaye ochweyo gode?[8] Bende ichiko iti ne rieko mar Nyasaye? Koso iloko rieko giri iwuon?[9] Angʼo mingʼeyo ma wan ok wangʼeyo? Paro matut mage ma in-go, ma wan waongego?[10] Joma yie wigi otwi lwar kod joma hikgi ngʼeny moingo kata mana wuonu gin jokorwa.[11] Hoch ma Nyasaye hoyigo kod weche mosebedo kinyisi gi ngʼwono, donge oromi?[12] Angʼo momiyo iseweyo chunyi oteri mabor, mi ibedo gi wangʼ teko,[13] momiyo koro iwuoyo gi Nyasaye ka in gi mirima kendo iwacho weche machalo kamano gi dhogi?[14] “Dhano to en angʼo madimi obed ngʼama ler, koso dhano ma dhako onywolo, to en angʼo madimi obed ngʼama kare?[15] Ka Nyasaye ok ogeno kata malaika mage, kendo kata mana polo bende ok ler e nyime,[16] to koro ere kaka dodew dhano adhana ma timbene richo kendo okethore, mamodho richo ka pi![17] “Chikuru itu uwinja mondo olernu tiend wach; we anyisu gik ma aseneno,[18] gik ma joma riek osehulo, ka ok gipando gimoro amora mane giyudo kuom kweregi,[19] ma gin jogo mane omi piny kendgi giwegi kinde mane onge jopinje mamoko mane kadho e diergi.[20] Ngʼat ma timbene richo kendo mathiro ji neno chandruok e kinde duto mag ngimane.[21] Koko mag masiche opongʼo ite kendo jomecho biro monje e kinde moparo ni gik moko dhi maber.[22] Ok onyal tony mowuogi e mudho; nikech okane ne ligangla.[23] Orundore koni gi koni nimar en chiemb achudhe adier; ongʼeyo ni odiechieng mudho ni machiegni.[24] Masiche malich ogoye gi kihondko, gigi duto omake, mana ka ruoth moikore mar dhi e lweny,[25] mano ema notimre ne ngʼat ma kamano nikech othiano ni Nyasaye kendo opiem gi Jehova Nyasaye Maratego,[26] koringo mondo odhi omonje kotingʼo kuot mapek kendo motegno.[27] “Kata obedo ni ngʼatni chwe kendo en jamoko,[28] to obiro dak e mier mokethore, kendo e udi maonge joma odakie, ma gin udi mosemukore molokore gunda.[29] Koro ok obi bedo gi mwandu, kendo gik ma en-go ok bi dongʼ ne nyikwaye.[30] Ok notony e masira, enochal gi yath ma mach owangʼo ite, kendo much Nyasaye biro keyo thiepene mi olal nono.[31] Kik ogalre koketo genone kuom gima onge tich nikech onge ohala mobiro yudo kuom timo kamano.[32] Obiro neno makne kapod ndalone oromo, kendo bedene ok bi siko ka ngʼich.[33] Obiro chalo gi yiend mzabibu motengʼ olembene mapok ochiek piny mana ka yiend zeituni ma maupege two kendo lwar piny.[34] Nikech riwruok mar joma ok lem ok nyal nyago gimoro kendo mach biro wangʼo hembe mag joma ohero asoya mitiek pep.[35] Gin joma kelo chandruok kendo timo timbe maricho; kendo chunygi opongʼ gi miriambo kinde duto.”

Luo Bible 2020
Copyright © 1980, 2002, 2003, 2020 by Biblica, Inc