A A A A A

रहस्य: [कैंसर]


२ कुरिन्थियों 4:16-19
[16] औंगे ऎम पछली मल किर्दम। बहरी ता एम्‍है मॆद गा खे'आली, लिकिन भितरी ता एम्है बॊलता उल्‍लन ती पत्ती पुना मन्नुम क'ई।[17] बग्गे उल्ला मल र'अना अक्‍कु ता एम्‍है कट्टी गुसर खिलपत गा एमा गे अकय कोहाँ अरा कोड़हे जनमजुग महबन कुन्द्रत'ई।[18] औंगे ऎम ऎथ्रना आलॊ गुट्ठी नू मला, लिकिन मल ऎथ्रना आलॊ गुट्ठिन ऎरते र'अदम। एन्देरगेका ऎथ्रना आलॊ गुट्ठी जुक्‍की उल्ला गे र'ई, लिकिन मल ऎरना आलॊ गुट्ठी जनमजुग गे र'ई।[19] नाम अख़दत का नम्है मॆद एकदा इसन ई ख़ॆख़ेल नू नाम उज्जना एड़पा धस्‍तार'ओ कालो, लिकिन नमा गे धर्मेस तरती मेर्ख़ा नू आलर ती मल कम्रका ओन्टा एड़पा र'ई, आद जनमजुग र'ओ।

मत्ती 11:28-29
[28] अना उर्मी अर्ज'ऊ अरा ओत्‍था ती कज्रका आलारो! एंग्‍है गुसन बरा, ऎन निमा ख़न्‍न ऎख़्रत'ओन।[29] एंग्‍है पगसिन नीम चेड़'आ अरा एंग्‍है ती सिख्र'आ, एन्‍देरगेका ऎन नर्मियाँ अरा जिया ती लुदऊ र'अदन, औंगे नीम निम्‍है जिया नू ख़न्‍न ऎख़्र'ओर।

यूहन्ना 14:1-4
[1] येसुस तंग्‍है चेलारिन बाचस, “निम्‍‍है जिया उकुल बुकुल अम्‍बो मना। धर्मेस मइय्याँ पत्त'आ, एंग्‍है मइय्याँ हूँ पत्त'आ।[2] एम्‍बासी एड़पा नू ढ़ॆर बग्‍गे र'आ गे अड्डा र'ई, अन्ने मल रहचका होले, ऎन निमन बाचका र'ओन दने। ऎन असन निमा गे ओन्‍टा अड्डा सपड़'आ कालदन।[3] ऎन असन कालरकी निमा गे ओन्‍टा अड्डा सपड़ारका ख़ॊख़ा, अउरिम बर'ओम ती नीम एंग्‍है गने र'आ गे निमन हो'ओन क'ओन। ख़ने ऎन एसन र'ओन असन नीम हूँ र'ओर।[4] ऎन एसन कालदन आ अड्डा काना ही डहरेन नीम अख़दर।”

रोमियों 8:16-25
[16] नाम धर्मेसी ख़द्द-ख़र्रा एन्ने नेम्‍हा बॊलतस नम्‍है बॊलता गने मेसर'अरकी तेंगदस।[17] अरा नाम धर्मेसी ख़द्द-ख़र्रा होले नाम आसी पुंजी हूँ हिकदत। अरा मसीस गने धर्मेसी ख़क्ख्र'ऊ म‍ईन आबोन ख़क्ख'ऊ पुंजी हिकदत। नाम गा मसीस गने दुक्‍खे चॊददत होले मसीस गे ख़क्ख्रना आ म‍ईन नू हूँ आसी गने र'ओत। [18] ऎन बुझ्रदन का नाम एका महबा हुल्‍लो नू ख़क्‍ख'ओत, अदही जोक्‍खा नू ई परिया ता नमा दुक्‍खे र'अम मलकी बेसे र'ई।[19] एन्‍देरगेका गोट्टा ख़ॆख़ेल ता गढ़र्रका आलॊ कोहाँ असरा ती धर्मेस नॆ नॆ तंग्‍है ख़द्दस एन्ने दहदर ननोस अदिन ऎरा गे पाब ऎरा लगी।[20] ई गढ़र्रका ओर्मा तंग्‍है जॊगे नू ती पयहा मंजा केरा। इबड़ा तम्‍है मने ती मला, लिकिन धर्मेसी चिताबुता ती एन्ने पयहा मंजा। लिकिन ई असरा हूँ र'ई का, [21] इबड़ा गढ़र्रका ओर्मा एकदा नठारनन ओन्‍द्र'ई अदही तबे ती नाड़र'ओ ती धर्मेसी ख़द्दर ही ख़क्ख्र'ऊ म‍ईन नू मेस्र'ओ।[22] एन्‍देरगेका नाम अख़दत का गोट्‍टा गढ़र्रका अक्‍कु गूटी ख़द्द नेब्‍बना ही बेड़ा नू मन्ना नुंजना लेक्‍खा नुंजना ती रेक'आ लगी।[23] ई ख़ॆख़ेल लेका मला, लिकिन नाम हूँ पाब ऎरना ती भितरी भितरी रेक'आ लगदत। नाम गा नेम्‍हा बॊलतासिन ख़क्‍खकादत एकदा धर्मेसी गच्छरका ही पहिल ख़ंजपा हिके। औंगे नाम धर्मेसी गोद होच्चका ख़द्द मंज ख़च्‍चना ही पाब ऎरा लगदत। इदही माने का नम्‍है कया पाप अरा खिलपत ती नाड़रना। [24] ई असरा ती दिम नम्‍है नाड़रना मंजकी र'ई। एकदन नाम पाब ऎरा लगदत अदिन नाम ऎरदत होले आद मानिम नू असरा मल्‍ली। नॆ हूँ तंग्‍है गुसन एका जिनस र'ई अदही असरा मल ननी।[25] लिकिन अक्‍कुन गूटी नमा एकदा मल्‍ला अदही असरा नन्‍दत होले नाम कयास गने अदही पाब ऎरा लगदत।

१ पतरस 1:3
नम्है उर्बस येसु मसीसी बंगस धर्मेस गे उर्मी ओहमा मनन नेकअन। आस तंग्‍है कोड़हे सोग्‍गे ही चड्डे येसु मसीसिन केच्‍चकर ती उज्‍जत'अना ती नमा गे ओन्टा पुना कुन्द्रनन चिच्कादस। इदही चड्डे नाम कोड़हे असरा गने उज्‍जदत।

२ कुरिन्थियों 1:3-6
[3] नम्‍है उर्बस येसु मसीसी धर्मे अरा बंगस गे ओहमा मनन नेकअन। आस सोग्‍गे ही बंगस अरा उर्मी रकम ही जिया सालना चि'ऊ धर्मेस हिकदस।[4] आस दिम उर्मी कलपारना ती नमन जिया सालत'अदस। औंगे ऎम धर्मेस तरती ख़क्ख्रका जिया सालना ती, एकअम कलपारना नू र'उरिन जिया सालत'आ ओंग्‍दम।[5] एन्‍देरगेका एकासे ऎम मसीस गे बग्‍गे सस्‍ती गुट्ठिन सारदम, अन्नेम धर्मेस मसीस तरती आसी जिया सालनन बग्‍गेम एमा गे ऎद्ददस।[6] ऎम कलपारनन ख़क्‍खदम होले, आद निम्‍है जिया सालना गे अरा नाड़रना गे र'ई। अरा एमा गे जिया सालना मनी होले, आद हूँ निमा जिया सालना गे दिम र'ई। आ जिया सालना, नीम हूँ एम्‍है लेक्‍खा सस्‍ती सारना बेड़ा नू निम्‍है नू खतिर नन्नन बड़ियर ननी।

Kurukh Bible 2014 Kurux
No Data