A A A A A

मठ के संकेत: [नंबर 5]


प्रकाशित वाक्य 13:5-18
[5] अरा आ मेक्खो गे फुलई ही कत्था गुट्ठिन अरा धर्मेसिन हींड़ना ही कत्था गुट्ठिन ब'आ गे ओन्टा बई चीरा। अरा अदगे बियालीस चन्दो गूटी इन्द्रिइम नना गे अदिया चीरा।[6] अरा आद धर्मेसी बिड़दो नू हींड़ना कत्था गुट्ठिन ब'आ गे तंग्है बइय्यन चलख़ा। आद आसी नामेन, अरा आसी ओक्रना अड्डन, अरा मेर्ख़ा नू ओक्रना आलारिन हींड़'आ हेलरा।[7] अरा अदगे नेम्‍हा आलर गने लड़'आ ती जित'आ गे अदिया चीरा। अरा उर्मी गोतोर अरा आल खोंड़हा अरा भखा अरा राजी ही मइय्याँ हूँ अदगे अदिया चीरा। [8] अरा ख़ॆख़ेल ही गढ़्रना बेड़ा तिम पिटतारकी र'ई आ भेंडो ख़द्द मसीसी उज्‍जना ही पुथी नू नामे मल्‍ला लिख्रका ख़ॆख़ेल नू ओक्रना ओर्मा आलर आ मेक्‍खोन महबा ननोर। [9] नॆखअय मेना गे ख़ेबदा र'ई आस मेन्दस ती बुझुरदस नेकअन। [10] नेकईम गुड़रना र'ई होले, आस गुड़र'ओस दिम। नेकईम तलवार ती पिटरना र'ई होले, आस तलवार ती पिटतार'ओस दिम। इदही मने ईद हिके का, नेम्‍हा आलर खिलपत आबोन खतिर गने सहना ती पत्त'अना नू जिटजिटने र'अना र'ई।[11] इदही ख़ॊख़ा ऎन अउर ओन्टा मेक्‍खोन ख़ॆख़ेल ती उरखना ईरकन। अदगे भेंडो ख़द्द ही मरग लेक्‍खा दुई गोटा मरग रहचा। लिकिन आद ओन्टा डेना र'ऊ नेर्रे ही लेक्खा कछनख्र'आ लगिया।[12] अरा ईद मुन्द ता मेक्‍खो ही उर्मी अदियन अदही मुन्दहारे नलख नू ओन्‍द्रा। अरा ईद खे'अना लेक्‍खा कोहाँ जखम ती कोड़े मंज ख़च्चका आ मुन्द ता मेक्खोन ख़ॆख़ेल अरा अइय्या ओक्रना आलर अदिन महबा नना गे नंजा।[13] अरा ई दुसर मेक्‍खो कोहाँ कोहाँ अजगुत नलख गुट्ठिन नंजा। ईद आलर ही ईरनुम मेर्ख़ा ती चिच्‍ची ख़ॆख़ेल नू खत्रताचा।[14] अरा ईद मुन्द ता मेक्खो ही मुन्दहारे ई अजगुत नलख गुट्ठिन नना गे तंगा चीरका अदिया ती ख़ॆख़ेल नू ओक्रना आलारिन ठकचा। अरा ईद तलवार ती जखम ख़क्खका ती अक्कु गूटी उज्जना आ मुन्द ता मेक्खो गे ओन्टा मूर्ती कम'आ गे ख़ॆख़ेल नू ओक्रना आलारिन आनिया।[15] अरा ई दुसर मेक्खो गे आ मुन्द ता मेक्‍खो ही मूर्ती गे साँस चि'आ गे सवंग चीरा का, आ मेक्‍खो ही मूर्ती कछनख्र'ओ, अरा एवंदा आलर आ मेक्खो ही मूर्तिन महबा मल ननोर आरिन पिटत'ओ चि'ओ।[16] अरा आ दुसर मेक्खो सन्नी अरा कोहाँ, उरुब अरा कीड़ा, छछिन्‍द अरा बिट्ठी ननू जॊंख़ ओर्मर ही तीना ख़ेक्खा मलता कपड़े नू ओन्टा मरका नन्त'आ गे बड़पेलहा नंजा।[17] अरा आ पहिल मेक्खो ही नामे मलता आ नामे ही गनती ही मरकन नॆ नॆ लग्गनर, आरिन अम्‍बरकी नॆ हूँ ख़ॆन्दा पिटा पोल्‍लोर।[18] इदन बुझ्र'आ गे लूर ही चाड़ र'ई। नॆका लूर र'ई आस ई मेक्‍खो ही गनतिन बेद्द ऎरोस नेकअन, एन्‍देरगेका आद आलासी गनती दिम हवे। अरा अदही गनती छै सौ छियासट हवे

मत्ती 19:9
अरा ऎन निमन ब'अदन का एकअम ओर्तस नन्‍ना आलस गुसन काना पाप ती नन्‍ना चड्डे तंग्‍है आलिन अम्‍दस ती नन्‍ना आलिन बेंज्रदस होले, आस नन्‍ना आली गुसन काना ही पाप नन्‍दस।”

प्रकाशित वाक्य 11:2-3
[2] लिकिन मन्दिर बहरी ता चालिन अमा ख़ोया अम्‍बा चि'आ, एन्‍देरगेका आद नन-यहूदीर गे चीतारकी र'ई, अरा आर नेम्‍हा नगरेन बयालीस महिना गूटी राजी ननोर। [3] अरा ऎन एंग्‍है दुई गोवाह आलर गे अदिया चि'ओन का आर बोरा झपर'ओर ती ओन हजार दुई सौ साठ उल्ला धर्मेसी कत्थन मुन्द तेंगोर।”

मत्ती 5:32
लिकिन ऎन निमन ब'अदन का ‘नन्ना आलस गुसन काना पाप ती एकअम नन्ना पाप चड्डे एकास तंग्‍आलिन अम्‍बरनख्रना नन्‍दस, आस अदिन नन्ना आलस गुसन काना ही पाप नन्‍त'आदस, अरा एकास आ अम्‍बका आलिन बेंज्रदस आस हूँ नन्ना आली गुसन काना ही पाप नन्‍दस।’

२ तीमुथियुस 3:16
धर्मेसी उर्मी नेम्‍हा कत्‍था धर्मेसी रस्‍सका लिख्रकी र'ई। आद आलारिन मानिम आबोन सिखाब'आ गे, अरा आलारिन तम्‍है उज्‍जना ही मलदौ आबोन बुझाब'आ गे, अरा आलर तम्‍है मलदौ आबोन अम्‍बत'आ गे, अरा एकासे उजगो उज्‍जना र'ई अदन सिखाब'आ गे सहाड़ा ननू र'ई।

प्रकाशित वाक्य 4:6-8
[6] अरा बॆल-गदिया ही मुन्दहारे काँच ही समुदर लेक्खा ओन्टा रहचा, एकदा बिल्लौर लेक्खा फटफट ने रहचा। बॆल-गदिया ही मझी अरा चरियो तरा चार गोटा उज्जना आलॊ रहचा। अबड़ा ही ख़ॊख़ा दरा मुन्दहारे ख़न्न ख़न्न ती निंदकी रहचा। [7] पहिल उज्जना आलॊ ओन्टा लकड़ा लेक्‍खा रहचा, अरा दोसर उज्जना आलॊ ओन्टा साँड़ लेक्‍खा रहचा, अरा तिसर उज्जना आलॊ गे आलासी लेक्खा मुही रहचा, चौथा उज्जना आलॊ ओन्टा उढियारना गरूंड़ लेक्‍खा रहचा।[8] अरा चरियो उज्जना आलॊ गे ओर्त ओर्त गे छै छै गोट डेना रहचा, अरा भितरी बहरी ख़न्न ख़न्न ती निंदकी रहचा। अरा अबड़ा उल्‍ला अरा माख़ा बिगर ठकरका एन्ने ब'अतेम र'आ लगिया, “उर्मी ती सवंगिय धर्मे उर्बस नेम्‍हा र'अस, नेम्‍हा र'अस, नेम्‍हा र'अस, नॆ रहचस, अरा र'अदस, अरा बर'ऊ र'अदस।”

१ कुरिन्थियों 10:13
आलर गे बर'ई आ बिढ़्रना ती नन्‍ना बिढ़्रना निमा गे मल बर'ई। धर्मेस पत्त'अना जॊगे र'अस। आस निमन चॊद'आ पोलना बिढ़्रना नू मल मना चि'ओस, अरा बिढ़्रना ही गने अइय्या ती उरखना ही डहरे हूँ ऎद'ओस, एकत्रु नीम अदिन सह'आ ओंगोर।

Kurukh Bible 2014 Kurux
No Data