A A A A A

Additional: [Broken Heart]


1 Korintiyan 13:7
Piipl we av lov iina dem aat neva eva gi op no mata wa apm tu dem an dem neva tap biliiv iina Gad. Piipl we av lov iina dem aat chos Gad fi tek kier a dem an dem wi go chuu eniting we riich dem an no fos ar komplien.

1 Piita 5:7
Evriting we unu a wori an fret bout, gi it tu im, kaaz im kier bout unu.

2 Korintiyan 5:7
(An iivn duo wi kyaahn si it wi nuo wi a-go get it kaaz wi no liv wi laif bies pan wa wi kyan si wid wi yai dem bot pan wa wi biliiv.)

2 Korintiyan 12:9
Bot im tel mi se, “Mi wi gud tu yu, an dat a aal yu a-go eva niid, kaaz wen yu wiik, a da taim de yu wi riili si fi mi powa.” So mi api fi buos bout di sitn dem we mek mi wiik. Mi wi buos bout dem so dat Krais Jiizas powa wi kova mi an protek mi.

Libruu 13:5
Unu no fi lov moni. Unu fi satisfai wid wat-eva unu av, kaaz Gad se, “Mi naa go lef unu non at aal. Nuo mi naa lef unu fi fen fi unuself.”

Jan 3:16
“Kaa, yu si, Gad lov di worl so moch dat im gi op im wan dege-dege Bwai Pikni, so enibadi we chos iina im naa go ded bot a-go liv fi eva.

Jan 12:40
“Gad blain dem an im mek dem aat tof, so dem kyan niida si wid dem yai, ar andastan iina dem main, ar ton tu mi, Gad, an chienj dem wiez so mi go mek dem get beta.”

Jan 14:1
“No wori unuself. Chos iina Gad, an chos iina mi tu.

Jan 14:27
“Mi a lef go we, bot mi a-go mek unu av piis iina unu aat — di kain-a piis we mi av iina fi mi aat. A no di sed kain-a piis yu get fram di worl. No mek unu aat bada unu, an no kech unu fried.

Jan 16:33
“Mi tel unu dem sitn ya so dat unu kyan av piis iina unu aat kaa mi an unu a wan. Iina da worl ya, unu gweehn av chobl an sofarieshan. Bot no fret! Mi don win di fait wid di worl.”

Luuk 24:38
Jiizas se tu dem se, “Wa mek unu fraitn? Wa mek unu no biliiv?

Maak 11:23
Ier wa mi a se, an a chuu mi a taak, ef nobadi se tu da mountn ya, ‘Git op an go fling yuself iina di sii,’ ef im riili biliiv iina im aat an no staat wanda ef it riili a-go apm, it wi apm fi’im fi chuu.

Matyu 5:8
Aal a uu onggl waahn fi du di sitn dem we mek Gad api, Gad bles unu, kaaz wan die, wan die, unu a-go get fi si Gad.

Matyu 11:28
“Aal a unu we taiyad an bordn dong unu kom tu mi an mi wi mek unu get fi res.

Revilieshan 21:4
An mi did ier wan loud vais fram di chuon a se, “Fram nou aan Gad yaad a-go de mongks piipl. Im a-go liv wid dem an dem a-go bi fi’im piipl. Gad imself a-go de wid dem an im a-go bi fi dem Gad.

Ruoman 8:28
Wi nuo se aal di piipl we lov Gad an we Gad kaal fi tek paat iina im plan, wi nuo se Gad wok wid dem fi mek shuor se no mata wa apm, evriting wok out fi fi dem gud.

Ruoman 12:2
No mek di piipl we de iina di worl tel unu ou fi liv. Insted-a dat mek Gad chienj di wie ou unu tingk so dat im kyan chienj di wie ou unu a liv. Da wie de unu wi nuo aal a wa Gad waahn unu fi du — unu wi nuo we rait, unu wi nuo wa mek Gad api an unu wi nuo ou im waahn unu fi liv.

1 Korintiyan 6:19-20
[19] Unu no nuo se unu badi a di ous fi di Uoli Spirit we Gad gi unu? Unu no de pan unu uon.[20] Gad pie nof fi unu wen im sen im Bwai Pikni fi ded fi unu. So tek kier a unu badi an liv rait so dat piipl wi nuo se unu bilang tu Gad.

Filipiyan 4:6-7
[6] No wori wori op unuself bout notn. We unu fi du a prie tu Gad bout evriting, aks im fi we unu waahn, an gi im tangks fi evriting.[7] Wen unu du dat, Gad wi gi unu piis iina unu aat an main iina wan wie we unu kyaahn iivn andastan. Im a-go du it so unu no afi wori bout notn, kaaz unu an di Laad a wan.

Matyu 11:28-30
[28] “Aal a unu we taiyad an bordn dong unu kom tu mi an mi wi mek unu get fi res.[29] Jos laka ou di kou tek di wudn yuok pan dem shuolda, a so unu fi tek op di sitn dem we mi tel unu fi du, an tek iin wa mi a tiich, kaa mi wi tek taim wid unu, an mi riili ombl, an unu wi get fi res unu suol.[30] Kaaz di sitn dem we mi a tel unu fi du, dem iizi an di luod we mi de gi unu — lait.”

Jamaican Bible
© 2012 by The Bible Society of the West Indies