A A A A A

Church: [Birth Of Jesus]


Mateo 1:18-23
[18] Ke Yesu Kristo ƒe dzidzi le ale: Esime wodo dadaa Maria ŋugbe na Yosef, eye hafi wova kpe la, wokpɔ bena, efɔ fu tso Gbɔgbɔ kɔkɔe la me.[19] Ke srɔ̃a Yosef, si nye ame dzɔdzɔe, eye mele didim be, yeado ŋukpee o la, do tame bena, yeagblẽe ɖi le aɖaŋu me.[20] Ke esi wòle nu siawo ŋuti bum la, kpɔ ɖa, Aƒetɔ ƒe dɔla ɖe eɖokui fiae le drɔ̃eƒe gblɔ nɛ bena: Yosef, Dawid vi, megavɔ̃ srɔ̃wò Maria kpɔkplɔ va gbɔwò o, elabena fu, si ke wòfɔ la, Gbɔgbɔ kɔkɔe la mee wòtso.[21] Adzi ŋutsuvi, eye nayɔ eƒe ŋkɔ be Yesu; elabena eyae laɖe eƒe dukɔ la tso woƒe nuvɔ̃wo me.[22] Ke esia katã va me, bene woawu nya, si Aƒetɔ la gblɔ ɖi to nyagblɔɖila dzi la nu bena:[23] „Kpo da, ɖetugbi, si menya ŋutsu o la, le fu fɔ ge, eye wòadzi ŋutsuvi, eye woayɔ eƒe ŋkɔ be Imanuel, si gome ènye: Mawu li kpli mi.“

Luka 2:7-21
[7] Eye wòdzi ŋutsuvi, si nye eƒe ŋgɔgbevi, eye wòxatsa avɔ ɖe eŋu, eye wòtsɔe mlɔ lãnuɖunu me; elabena womekpɔ teƒe le amedzrodzeƒe o.[8] Eye alẽnyilawo le nuto ma ke me le gbedzi, eye wole woƒe alẽha ŋuti dzɔm le zã me.[9] Eye Aƒetɔ ƒe dɔlaa ɖe tsi tre ɖe wo gbɔ, eye Aƒetɔ ƒe ŋutikɔkɔe klẽ ƒo xlã wo, eye wovɔ̃ ŋutɔŋutɔ.[10] Eye dɔla la gblɔ na wo bena: Migavɔ̃ o! Elabena kpɔ ɖa, meva dzidzɔ gã ŋutinya gblɔ ge fia mi, esi lanye na dukɔ blibo la katã;[11] elabena wodzi xɔla, si nye Kristo, Aƒetɔ la, na mi egbe le Dawid dua me.[12] Eye esia anye dzesi na mi: Míakpɔ vidzĩe, si woxatsa avɔ ɖe eŋu, eye wòmia lãnuɖunu me.[13] Eye kasia dziƒoʋakɔha gãa ɖe kpe ɖe mawudɔla la ŋuti, wole Mawu kafum le gbɔgblɔm bena:[14] Ŋutikɔkɔe woana Mawu le dziƒo boo, eye ŋutifafa ava anyigba dzi; amegbetɔwo ŋu woakpɔ ŋudzedze nyui le.[15] Eye wòva me, esime mawudɔlawo dzo le wo gbɔ heyi dziƒo la, alẽnyilawo gblɔ na wo nɔewo bena: Mina ne miayi Betlexem, aɖakpɔ nusia, si va dzɔ, esi Aƒetɔ la na mienya.[16] Eye woɖe abla va, eye wokpɔ Mana kple Yosef kpakple vidzĩe, si le anyimlɔƒe le lãnuɖunu me.[17] Esi wokpɔe la, wokaka nya, si wogblɔ na wo le ɖevi sia ŋuti.[18] Eye amesiwo katã see la, woƒe mo wɔ yaa le nya, siwo alẽnyilawo gblɔ na wo la ŋuti.[19] Ke Mana lé nya siawo katã ɖe ta me, eye wobu wo ŋuti le eƒe dzi me.[20] Eye alẽnyilawo gbugbɔ, eye wole ŋutikɔkɔe kple kafukafu tsɔm na Mawu le nusiwo katã wose, eye wokpɔ la ŋuti, abe alesi wogblɔ na wo la ene.[21] Eye esi wotso aʋa nɛ le ŋkeke enyilia dzi la, wotsɔ ŋkɔ nɛ be Yesu, abe alesi mawudɔla yɔe ɖi, hafi wòfɔ eƒe fu ene.

Mateo 2:1-12
[1] Ke esi wodzi Yesu le Betlexem le Yudea, le fia Herodes ŋɔli la, kpɔ ɖa, nunyalawo tso ɣedzeƒe va Yerusalem va bia bena:[2] Afika Yudalawo ƒe fia, si wodzi la le? Elabena miekpɔ eƒe ɣletivi le ɣedzeƒe, eye mieva ta de ge agu na eyama esi.[3] Ke esi fia Herodes se esia la, dzika tso eya kple Yerusalem katã ƒo.[4] Eye esi wòƒo dukɔ la ƒe nunɔlagãwo kple agbalẽfialawo katã nu ƒu la, edzro me bia wo afisi wodzi Kristo la le.[5] Eye wogblɔ nɛ be: Le Betlexem le Yudea, elabena nenema woŋlɔ ɖi to nyagblɔɖila dzi bena:[6] „Eye wò Betlexem le Yuda-nyigba dzi, menye suetɔ nènye le Yuda ƒe fiaduwo dome kura o; elabena wò me fia, si le nye dukɔ Israel nyi ge la, ado atso.“[7] Tete la Herodes yɔ nunyalawo yi ɖe adzame, eye wòbia ɣeyiɣi, si dzi ɣletivi la do la wo tsitotsito.[8] Eye esi wòdɔ wo ɖo ɖe Betlexem la, egblɔ bena: Miheyi ɖadi ɖevi la vevie; eye ne miekpɔe la, migava ka eta nam bena, nye hã mayi aɖade ta agu nɛ.[9] Ke woawo la, esi wose fia ƒe nya la, woto edzi heyi; eye kpɔ ɖa, ɣletivi, si wokpɔ le ɣedzeƒe la, zɔ wo ŋgɔ laa keke va tɔ ɖe aƒe, si me ɖevi la le la ƒe tame.[10] Ke esi wokpɔ ɣletivia la, dzi dzɔ wo geɖe ŋutɔ.[11] Eye esi woyi ɖe aƒea me la, wokpɔ ɖevi la kple dadaa Maria; tete wodze klo de ta agu nɛ, eye woʋu woƒe nuwo nu hetsɔ nunanawo, sika, kotoklobo kple lili nɛ.[12] Eye esi Mawu gbe nya na wo le drɔ̃eƒe be, womagagbugbɔ ayi Herodes gbɔ o la, woto mɔ bubu gbugbɔ yi wo de.

Galatiatɔwo 4:4
Ke esi azãgbe la ɖo vo la, Mawu dɔ ye ŋuta Via ɖo ɖa, eye nyɔnua ɖe dzii, eye wodzii ɖe se la te,

Luka 2:1-4
[1] Eye wòva ve me le ŋkeke mawo me be, sedede tso kaisaro Augusto gbɔ bena, woaxlẽ xexeame katã aŋlɔ.[2] Ŋɔŋlɔ gbãtɔ sia va me, esime Kirenio le mɔ̃mefia ɖum le Siria.[3] Eye amewo katã dze mo heyi be, wòaŋlɔ woƒe ŋkɔwo, amesiame yi ɖe ye ŋuta ƒe du me.[4] Eye Yosef hã dzo le Galilea, tso Nazaret-du la me heyi Yudea ɖe Dawid du, si woyɔna be Betlexem la me, elabena etso Dawid ƒe me kple eƒome la me,

Nyaɖeɖefia 12:1-5
[1] Eye wokpɔ dzesi gãa ɖe le dziƒo: Nyɔnua ele do ɣe, eye ɣleti le eƒe afɔ te, eye ɣleti wuieve ƒe fiakuku le eta,[2] eye fu le eƒo, eye wòle ɣli dom le fuɖuame ŋuti, eye vidzidzi nye do nɛ.[3] Eye wokpɔ dzesi bubua ɖe le dziƒo, eye kpɔ ɖa, ʋɔ driba dzi gãa ɖe, si ta adre kple dzo ewo li na, eye fiakuku adre le eƒe tawo.[4] Eye eƒe asike he dziƒoɣletiviwo ƒe akpa etɔ̃lia, eye wotsɔ wo ƒu gbe ɖe anyigba. Eye ʋɔ driba la tsi tre ɖe nyɔnu, si le vi dzi ge la, ƒe ŋku me, bena ne edzi via ko la, ne yeatsɔe ami.[5] Eye wòdzi ŋutsuvi, si latsɔ gatikplɔ akplɔ dukɔwo katã; eye wotsɔ via yi Mawu kple eƒe fiazikpui la gbɔ.

Ewe Bible 1913
Public Domain