A A A A A

Life: [Ethics]


Sa nga bé yôli'n 2:38
'De :Piteh' 'da, A-a' klehkpeh, a 'tali: a-a' deh⧾-zon⧾ dih, a 'ye 'de Nyorsoa bo 'bili:, 'de a 'ye 'ni 'dlu :po, 'de :Yusu' 'Klae-a' 'nyne 'di. :Yee' Nyorsoa-a mu a-a' deh⧾-zon⧾-a' dhih bo 'ma-dih:, 'de or 'ye a Gban 'i :ne :Zulu 'nyi.

Colossesfue 3:17-23
[17] :Yee' deh⧾-a' klehkpeh a mu-a-' :za-: a mu-a :no-: a no en-' klehkpeh, 'de :Gwlor :baa' :Yusu'-a' 'nyne 'di. A :yi-dih-or-' a 'ye :a :Baa' Nyorsoa-a' 'zio po.[18] :Yee' a :mor 'nynor⧾-kpao'⧾-a:, a :ya a-a' 'jeh ya 'do a-a'a: yibeor-boi' 'zorn. Deh no-eh, :ka a 'dhu-a :Gwlor :baa'-a' nyor⧾-', :yee' eh-: a :korn a 'ye no.[19] :Yee' a :mor yibeor-boi'-a:, a :ybeh a-a'a: 'nynor⧾-'. Nyor-a' :kma 'i 'do on ken.[20] :Yee' a :mor 'wluhuh'-nynuu-a:, a dhe a 'de-: 'dekorn: a :baa'-: an-a' wlu dih, 'de deh⧾-a' klehkpeh 'di. Deh no-eh, eh-: 'pehn-dih :Gwlor :baa'-a' :porluh dih.[21] :Yee' a :mor 'nynuu :bai'-a:, a-a' :chehn-' a-a' 'nynuu-a' 'kpih, 'de on :ne-' 'chehn-' 'kpa. Deh no-eh, eh mu-eh :no, an-a' :porluh⧾ 'ye 'zorn 'kpa.[22] :Yee' a :mor 'ge-nynuu-a:, a dhe 'o a-a'a: nyor⧾ :klaba'⧾-a' wlu dih, 'de deh⧾-a' klehkpeh 'di, :on :ne a :ne-a dha yao 'zorn. Eh :se :mor an-a' 'yli-eh :ne 'o a ken, 'de a 'ye-eh' no :deh, :eh gweh-a :ka a 'bhorn-a on 'ye a dhih bo po. Jorwor: 'nyi eh tba 'de a 'di dih, :ka a no-a :Gwlor :baa'-a' :fano: :ple-eh.[23] :Yee' deh⧾-a' klehkpeh a mu-a :no, a no-ih, 'do a-a' :porluh⧾-a' klehkpeh bo, :eh gweh-a :ka a no-a :koan 'do :Gwlor :baa' bo :eh :se-a 'o :gwlor-nyor bo.

Jean 16:13
Jorwor: Nyorsoa-a' :Zulu: :an torne-a nyor⧾ dhih-a' 'yor-eh: :en kor-a Nyorsoa 'i, :mor on 'yle, an mu-eh :no, 'de a 'ye dhih-a' 'yor-eh-a' klehkpeh :en kor-a Nyorsoa 'i yubo:. On :se 'de an-a' 'jeh-a' 'kpih 'di :wlu-dih: i. Deh on 'worn-a, eh-: an mu-' :za. :Yee' deh⧾ :en mu-a :no-eh 'de ybei', me-: an mu a :gwluhuh' zela:.

Luc 6:31
Deh a 'bhorn-a nyor⧾ 'ye-a' no 'do a bo, eh-a' 'jeh :dao', eh-: a 'ye no 'do nyor⧾ bo :ke.

Luc 16:10
Nyor :or no-a :dhehehn-nyor 'do deh-yu-a' dih :dhe-eh bo, :yee' or mu :dhehehn-nyor :no, 'do :klaba' neh-a' dih :dhe-eh bo :ke. 'De mor nyor :or se-a 'i 'sleh 'do deh-yu-a' dih :dhe-eh bo, :yee' or :se 'i 'sleh-: i, 'do :klaba' neh-a' dih :dhe-eh bo :ke.

Romefue 1:26
Eh-: :korn dhih :oo', 'de Nyorsoa 'tali-uh dih, on 'ye an-a' 'bhororn'-deh:⧾, an-a' :porluh⧾-a sin-dih-a bo :en no-a dhen-deh⧾, on 'ye-ih' no. An-a' 'nynor⧾-kpao'⧾ :sloror' :za-dih: kplen :gwliin', 'de an no :yih :en se-a 'de on bo :korn. An 'pehn on 'bei' 'nynor⧾-kpao'⧾ bo.

Romefue 2:1
:Yee' 'do eh-a' dha, :mor :mloror', :on :se 'o :bhor, :mor :or chehn-a nyor :noror'-a' zabe 'i 'suh. Deh no-eh, :ka :an no-a on 'bei'-a' zabe-a' 'i chehn-a', :yee' zabe kpon :on 'weh :ke. Deh no-eh, :mor :or chehn-a :on 'be-a' zabe 'i deh :dao', :an-a' 'jeh 'yor-eh no deh :ne-a :due' 'weh :ke.

Matthieu 7:12-21
[12] Deh a 'bhorn-a nyor⧾ 'ye-a' no 'do a bo, eh-a' 'jeh :dao', eh-: a 'ye no 'do nyor⧾ bo :ke. Eh-: :Mose'-a' 'tele'-: 'dekorn: Nyorsoa-a' wele-eh: :po-nyor⧾-a' nyor⧾ deh :torne-eh-: en 'dhu-eh:-'.[13] :Yee' a :yi-dih: 'do gba-dih-gba-a' worn :yor se-a bo dih 'beh ka. Deh no-eh, gba-dih-gba :or 'beh-a 'worn dih, 'de mor :gwie: :eh :ne-a bo dih bhou, eh-a' :sie: 'da, :wor 'dhu gbe :zie: 'da-'. Gba-dih-gba-a' 'jeh :dao', or-: :gwlor-nyor:⧾ :doru'-a yi-dih 'o 'worn.[14] Jorwor: gba-dih-gba-a' worn, :or se-a bo dih 'beh-: 'dekorn: :gwie: :eh :kma-a 'i 'do kpa 'da-: me-: kpa nyor⧾ 'de 'kmo :sie: :febeh' bo. Eh-a' 'jeh :wor :gwlor-nyor⧾-kpor-a 'ye, 'de an kpa.[15] :Yee' a 'dhu a-a' 'jeh :dhororn', 'do sih 'tmo :wele-eh: :po-nyor:⧾ :an yi-a 'o a bo, 'de :on pa-a 'blae'⧾-a' ku⧾-', jorwor: :on 'ble-a ji⧾-a' :porluh⧾.[16] An-a' 'bi an mu-a :tlo, me-: nyor⧾-a mu-uh yubo-dih:. 'Wu⧾-kwla :se-' 'nyoeh' :tlo i, 'de dlan :se-' gwehn :tlo i.[17] 'Ka-: 'o eh :ne, tu⧾-a' klehkpeh :en no-a tu⧾ 'jeh, en tlo 'bi 'jeh, jorwor: tu 'dhu-a tu-zon-', an tlo 'bi-zon:⧾.[18] Tu 'jeh se 'beh-dih: on 'ye 'bi-zon⧾ :tlo, 'de tu-zon se 'beh-dih: on 'ye 'bi 'jeh :tlo.[19] 'De tu⧾-a' klehkpeh :en :se-a 'bi 'jeh :tlo i, en mu :dba-eh:, 'de en 'ye 'de neh-' :po-eh:.[20] :Yee' 'do an-a' 'bi an tlo-a bo, 'do :wor a mu-uh yubo-dih:.[21] :Yee' eh :se nyor⧾-a' klehkpeh :an 'da-dih-a 'on, :Gwlor :baa', :Gwlor :baa', mo-: :an mu Nyorsoa-a' nyor⧾ wlu 'ken :korn-eh 'zorn :pa :deh. Jorwor: nyor :dao' :or mu-a 'On-ba: :or :ne-a 'de yai', or-a' 'ton :korn-deh :no, or :due' gbai, or-: mu-eh 'zorn :pa.

Jean 13:34-35
[34] 'An 'nyi a 'tele' :dele', a :ybeh-dih:. :Ka 'on no-a a-a' :ybeh-a', 'ka-: a 'ye :ybeh-dih-eh no :ke.[35] :Mor eh 'dhu a :ybeh-dih:, :yee' :gwlor-nyor⧾-a' klehkpeh, an mu-eh yubo:, :ka a 'dhu-a 'an-a: bo :na-nyor⧾-'.

2 Timothée 3:16-17
[16] Deh⧾-a' klehkpeh :en 'chle-eh 'de Nyorsoa-a' 'chlee-deh 'di, Nyorsoa :oo', or-: za-ih'. 'De en :korn :koan 'do nyor⧾ deh :torne-eh bo, 'do 'yi zi-deh⧾-a' 'bhun dih :wlu-dih-eh bo, 'do nyor⧾-a' :gwie-' :po-eh bo, 'dekorn: :ka nyor⧾ 'ye-a' 'yi 'sleh-deh⧾-a' 'kmo-' :ne-dih-eh no, eh-a' nyor⧾ :jii-eh 'i dih :po-eh-:.[17] 'De nyor :or :korn-a 'de Nyorsoa bo, or 'ye 'kpa :po-eh: deh 'jeh, 'do :koan: 'jeh-a' klehkpeh-a' no-a' bo.

Galatiefue 5:19-21
[19] Deh⧾-zon:⧾ :en 'wluh-a 'de :gwlor-nyor⧾-a' 'bhororn'-deh⧾ bo, nyor⧾ yubo-ih', me-: 'dhu, 'tmeor:⧾ :korn-eh-: se :vlehehn'-' :gweh-deh⧾-: 'pebe' 'i 'kpa-eh-:[20] nyor⧾ :an za-a zuu⧾-a' :weheh'-: :yuh :on no-a 'gwiorn⧾-: nyor⧾ :on 'nyeh-a on 'bei'-: 'dekorn: :yuh :korn-a wlu⧾-a vorn-a 'de an-a' 'jeh 'nyne-: :gwlehehn' :korn-nyor⧾-: 'chehn-' :gwlii' :ne-nyor⧾-: nyor⧾ :an zi-a on :due' dhih-:, a :za a-a' 'jeh 'sororn'-: 'de a 'kpuhba: ya dih-: :korn mor 'cheh 'ya 'cheh 'ya-:[21] :porluh-a' sin-a' 'do deh⧾-a' klehkpeh bo-: nomor 'na-eh-: 'nynor⧾ :zie-dih-eh-a' gor⧾ deh⧾-' dih-: 'dekorn: noo-deh:⧾ :nee' :en :ne-a :yih :daa en-' goor-dih:-a-: :ke. 'On 'dhu a 'slen 'weh :zai'. Jorwor: 'an za-ih-' de :neheh', nyor⧾ :an no-a deh⧾ :en :ne :ao', on :se-' Nyorsoa-a' nyor⧾ wlu 'ken :korn-eh 'zorn :pa i.

1 Corinthefue 6:9-11
[9] A se-eh yubo: :ka nyor⧾ :an no-a deh⧾-zon⧾, on se-a 'beh-dih: on 'ye-a 'de Nyorsoa-a' nyor⧾ wlu 'ken :korn-eh 'zorn pa :e? A 'bor, a-a' :bo-dih:-' a-a' 'jeh dih. Nyor⧾ :an korn-a 'tmeor⧾-: :yuh :an za zuu⧾-a' :weheh'-: :yuh :an no-a 'nyne :zaan'-: nyor⧾-kpalu:⧾ :an no-dih-a an-a' 'jeh 'nynor⧾-' 'wlii-dhih-: 'dekorn: nyor⧾-kpalu:⧾ :an po-a on 'bei'-nyor⧾-kpalu⧾ 'nynor⧾-: eh-a' nyor⧾-tu: :dao', on :se 'de Nyorsoa-a' nyor⧾ wlu 'ken :korn-eh 'zorn :pa i.[10] 'De mor 'ylii'-nyor⧾-: deh⧾-a' 'klan :korn-nyor⧾-: nomor 'na-nyor⧾-: nyor⧾ :an wlu-dih-a on 'bei' 'bhun dih-: 'dekorn: nyor⧾ :an 'yli-a on 'bei' ken-:. An-a' nyor-beh:, or-: :se 'de Nyorsoa-a' nyor⧾ wlu 'ken :korn-eh 'zorn :pa i :ke.[11] A-a' nyor⧾ :noo' :noo', mo-: :ne :ao' :zai'. Jorwor: :Gwlor :baa' :Yusu' 'Klae-: 'dekorn: :a-a' Nyorsoa-a' :Zulu-: mo-: worlor: a-a' deh⧾-zon⧾-a' klehkpeh, 'de a :dhe-dih-eh 'for 'i 'do Nyorsoa bo, 'de or 'da-dih a 'yi 'sleh-nyor⧾.

Romefue 13:8-10
[8] :Yee' nyor-a' kpa-a' :sie: 'o a ken. Deh :due' a 'ye-a' no, eh-: 'dhu, a :ybeh-dih: 'do ti-a' klehkpeh bo. Deh no-eh, nyor :or :ybeh-a or 'be :gwlor-nyor-', :yee' or no :Mose'-a' 'tele'⧾-a' klehkpeh or 'da-a 'weh.[9] 'Tele'⧾-a' klehkpeh :daa, :en no-a, Nyor-a' :no-' 'nyne :zaan', nyor-a' 'dba-:-' nyor, nyor-a' 'yli-:-', :gwlehehn' :sin-dih:-' a 'di dih, 'dekorn: 'tele'⧾ :nee' :en :sie:-a 'o, en-' klehkpeh en :ne 'noror 'tele' :due' :daa 'di, :eh no-a, :Ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'.[10] :Mor :on :ybeh :an-a' :dha :due' 'ti-nyor-', :yee' :on :se-or' deh-zon 'bhun :no-dih: i. :Yee' eh-a' dhih, :mor :on 'ble :ybeh-dih-eh, :yee' :Mose'-a' 'tele'⧾-a' klehkpeh or 'da-a, me-: 'o :an no.

Jacques 1:12-15
[12] :Yee' :bhorlie' 'do nyor :or ku-a dih, 'de :or se-a sea, :mor nyor⧾ 'worn dih 'beh-dih-deh⧾ yi 'o or bo. Deh no-eh, :mor eh 'dhu or :nyna dih 'dhen-eh: :daa 'i, :yee' or mu 'kmo :sie: :febeh' :gblaa', :eh 'dhu-a geli' :za-dih-deh: :eh :korn-a wlu Nyorsoa po-a :dhama'-' or mu-a nyor :or ybeh-or' 'nyi-:, :yee' or mu-eh 'ye-:.[13] :Mor nyor 'dhen-eh: dih, or 'ye deh-zon no, or-a' :no-', Nyorsoa :oo', or-: 'dhen 'on-' dih, 'on 'ye deh-zon no. Deh no-eh, Nyorsoa se deh-zon-' :ne. 'De mor Nyorsoa-a' 'dhen nyor-' dih, or 'ye deh-zon no :ke.[14] Jorwor: :mor nyor 'dhen-eh: dih, or 'ye deh-zon no, :yee' or-a' 'jeh 'yor-eh-a' 'bhororn'-deh⧾-zon:⧾, me-: 'o :en jli-or, 'de :en 'da-dih-or 'yi, or 'ye deh-zon no.[15] :Yee' or-a' 'bhororn'-deh⧾-zon:⧾ :dao', :mor or dhe 'o en-' 'tele' dih, me-: ya 'de deh⧾-zon⧾-a' no-a'. :Yee' :mor deh⧾-zon⧾ ku deh 'jeh, :yee' en ya 'de 'meh-a'.

Marc 12:28-31
[28] :Yee' :yeh :Yusu'-: 'dekorn: :Sayusi'i-nyor⧾-: an no :ao', :yee' nyor⧾ 'tele' :torne-nyor⧾-a' nyor :due' yi-: 'de. :Yeh or 'ye-eh, 'de :mor on dhele:-a :Yusu' deh dih, 'de or za-eh gbor deh 'jeh neh, :yee' eh-: no-eh, 'de or dhele-or dih :ke, or 'da, 'Tele' :yeheh :eh no 'tele'⧾-a' klehkpeh-a' 'dlu :eh?[29] 'De :Yusu' 'da, 'Tele'⧾-a' klehkpeh-a' 'dlu, :wor 'dhu, A :to :dou'⧾, a :mor 'Ezlea-nyor:⧾, :a-a' :Gwlor :baa' Nyorsoa, or :due', or-: 'dhu :Gwlor :baa'-'.[30] :Yee' :ybeh :an-a' :Gwlor :baa' Nyorsoa-', 'do :an-a' :porluh⧾-a' klehkpeh-: :an-a' :febeh'-a' klehkpeh-: 'dekorn: :an-a' 'kpih-a' klehkpeh-: bo.[31] 'Tele'⧾-a' 'sororn' :neh :eh :kma-a 'gabaa :neheh', :eh tba-a 'o :tehn 'i neh 'de dih, eh-: :dhe dih. :Ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'. 'Tele' :neheh' se 'i 'beh, eh se 'o 'tele'⧾ 'sororn' :daa-' :zi.

Luc 10:10-28
[10] Jorwor: :mor a 'si :gwlor-' dih, 'de nyor 'ye :ao', or se a dih kpon, :yee' a 'si 'de 'kpa ken dih, a 'da,[11] :Bhuhbuh' :a 'si-a dha :gwlor-' dih, :on 'ya-a :a buh⧾ dih, an-a' 'jeh :sloror', mo-: :a 'gbabo 'noror :a-a' :buhbuh⧾ 'zorn dih, eh 'ye a 'i :to-dih: :ka Nyorsoa :za-a a-a' deh son 'di. Jorwor: a :korn a 'ye-eh' yubo:, :ka Nyorsoa-a' nyor⧾ wlu 'ken :korn-eh 'koan'-: bo.[12] 'An zela a :gwluhuh', :eh :mor 'do Nyorsoa-a' zabe: :zi-we-eh 'di, Nyorsoa-a mu :wehlih 'ye-: 'do 'Salor-nyor⧾ bo, eh 'ye 'o nyor⧾ :on :ne-a 'o :gwlor :dao' 'di-' :zi.[13] :Yee' :Yusu'-a 'kpa or-a' wlu 'dlu bo, or 'dae:, 'Chlo 'do a :mor :Kola'zin-nyor⧾ bo. 'Chlo 'do a :mor :Behse'la-nyor⧾ bo. Deh no-eh, deh⧾ :kolu'⧾ 'on no-a 'do a bo, :mor 'on no-ih 'do 'Taya-gwlor-: 'dekorn: 'Saedorn-gwlor-: bo :dee', :yee' an mu an-a' deh⧾-zon⧾ dih 'tali:, 'de on 'ye 'de Nyorsoa bo 'bili: :dee' see, 'de on 'ye 'tiei-zon⧾-' pa, on 'ye 'de :bhuhbuh' 'nyne-' dih :dhe, on 'ye-eh' nyor⧾ 'i :to-dih: :ka on 'bili:-a-' dih.[14] 'Do eh-a' dha, :yee' 'do Nyorsoa-a' zabe: :zi-we-eh 'di, Nyorsoa-a mu :wehlih 'ye-: 'do nyor⧾ :dao' bo, eh 'ye a-uh' :zi.[15] :Yee' a :mor :Kapa'nior-nyor:⧾, 'do a bo. A 'bhorn a 'ye a-a' 'jeh 'i 'beh-dih: a 'ye 'de yai' nyni :e? 'Kei:. Nyorsoa-a mu a 'de 'ku 'bli :po.[16] :Yee' :Yusu' :wlu-' :neheh' 'de or-a'a: bo :na-nyor⧾ bo, or 'dae:, Nyor :or to-a a-a' wlu :dou'⧾ bo, 'mor-: 'o or to :dou'⧾ bo. 'De nyor :or se-a a-a' dhih 'worn-dih:, :yee' 'an dhih :oo', or :se-' 'worn-dih:. :Yee' nyor :or se-a 'an dhih 'worn-dih:, :yee' nyor :or dbo-a 'on, or-a' dhih :oo', or :se-' 'worn-dih:.[17] :Yee' nyor⧾-a' :kwlaa :meheh' 'sorn 'yor 'sororn' :Yusu' dbo-a, mo-: yi de, 'de 'mona: ka 'di. 'De on po :Yusu' kuna', on 'da, :Gwlor :baa', :mor :a no :an-a' 'nyne, :yee' 'kwla 'ye-dih-deh:⧾ :sloror', en :ya en-' 'jeh-: ya, 'do :a 'zorn.[18] :Yeh on :za-a deh :daa-' 'de or bo, :yee' or :wlu-', or 'da, 'On 'ye 'ku, on 'wluh 'de Nyorsoa 'bli yai', on 'kpa 'zorn, eh gweh :ka dhehn 'kpa-a.[19] A :gbee'e:. 'On 'nyi a 'kpih 'weh, a 'ye sehn-: 'dekorn: 'jaan'-: ken 'si. 'De 'on 'nyi a 'kpih 'weh, 'do 'ku :on 'nyeh-a a-uh', an-a' 'kpih-a' klehkpeh 'dlu bo, 'de deh :se-' a :no i.[20] Jorwor: a-a' 'kpa-:-' 'mona-', :ka 'kwla 'ye-dih-deh⧾-a ya-a en-' 'jeh ya 'do a 'zorn. Jorwor: a 'kpa 'mona-', :ka a-a' 'nyne 'chle-eh 'de Nyorsoa 'bli yai'.[21] :Yee' 'do ti :dao' 'di, Gban 'i :ne :Zulu: mo-: no-eh 'de 'mona 'yi-dih: :Yusu' dih. 'De or :wlu, or 'dae:, 'On-ba:, :mor :or 'dhu-a :Gwlor :baa' 'de yai'-: 'dekorn: 'noror 'zorn-: 'on po :on 'zio. Deh no-eh, :on 'zile: deh⧾ :daa, :toror' :korn-nyor⧾-: 'dekorn: 'chlee-deh: yubo-nyor⧾-: dih, 'de :on :to-dih-ih 'nynuu: :nyene' 'i. Keen', 'On-ba:, eh 'pehn-dih: :an-a' :porluh-: dih, :on 'ye-eh' no.[22] :Yee' or :wlu-' 'de nyor⧾ bo, or 'dae:, 'On-ba 'nyi 'on 'kpih 'weh, 'do deh⧾-a' klehkpeh bo. Eh se nyor :korn, :or 'ye-a Nyorsoa-a' 'Yu yubo:. Jorwor: or :Baa' :due' gbai, or-: yubo-or. 'De eh se nyor :korn, :or 'ye-a nyor or :Baa' 'dhu-eh:-' yubo:. Jorwor: or-a'a: 'Yu :due' gbai, or-: yubo: nyor or 'dhu-eh:-' 'dekorn: :yuh or-a'a: 'Yu-a 'bhorn-a, or 'ye-a or :Baa' 'i :to-dih:.[23] :Yeh :Yusu' :za-a deh :daa-', :yee' or 'bili:-'-: dih, 'de or-a'a: bo :na-nyor⧾ bo. 'De or :wlu 'de on bo, 'de 'slan :pa ka 'di, or 'dae:, :Bhorlie' 'do 'yli :dao' bo, :en 'ye-a deh a 'ye-a.[24] 'An zela a :gwluhuh', Nyorsoa-a' wele-eh: :po-nyor:⧾ :dhulu'-: 'dekorn: 'keen-boi' :dhulu'-: an 'bhorn deh⧾ a 'ye-a, on 'ye-ih' 'ye :dee', jorwor: on :se-ih' 'ye. 'De an 'bhorn deh⧾ a 'worn-a, on 'ye-ih' 'worn :dee', jorwor: on :se-ih' 'worn.[25] Eh :korn 'we-eh :due', 'de :Mose'-a' 'tele' yubo-yu :due', :nyna dih 'de :gwlor-nyor⧾ 'klu-'. 'De or dhele: :Yusu' dih, deh no-eh, or 'bhorn-dih: :Yusu' wlu 'worn dih, or 'da, Nyor⧾ deh :torne-nyor:, deh 'on 'ye no 'de 'on 'ye 'kmo :sie: :febeh' 'ble :eh?[26] 'De :Yusu' 'da, Deh 'i-deh: :eh 'chle-eh 'de :Mose'-a' 'tele'-chlee-deh 'di :eh? :Kaa :an no eh-a' zlo-a' :eh?[27] :Yeh or 'da :ao', :yee' 'yu :dao', or 'dae:, :Ybeh :an-a' :Gwlor :baa' Nyorsoa-', 'do :an-a' :porluh⧾-a' klehkpeh-: :an-a' :febeh'-a' klehkpeho-: 'dekorn: :an-a' 'kpih-a' klehkpeh-: bo. :Yee' :ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'.[28] 'De :Yusu' 'dae:, 'Ka-: eh :ne 'jeh ka. Dhih 'jeh :oo', :an za-a-'. :Mor :on no-eh, :yee' :an mu 'kmo :sie: :febeh' 'ble-:.

ÉphÈsefue 6:5-9
[5] :Yee' a :mor 'ge-nynuu-a:, a dhe 'o a-a'a: nyor⧾ :klaba'⧾-a' wlu dih, :on :ne-a dha yao 'zorn, 'de deh-' 'ye ka 'di-: 'dekorn: an-a' :fano: :ple-eh 'di-:. 'De mor 'nyi eh tba 'de a 'di dih, :ka a mu-a 'Klae-a' dhih :no :ke.[6] Eh :se :mor an-a' 'yli-eh :ne 'o a ken, 'de a 'ye-eh' no :deh, :eh gweh-a :ka a 'bhorn-a on 'ye-a' a dhih bo po :deh. Jorwor: 'do a-a' :porluh⧾-a' klehkpeh bo, a no deh Nyorsoa 'bhorn-a a 'ye-a' no, :ka a no-a 'ge-nynuu :naa 'do 'Klae bo :ke.[7] A no a-a'a: 'ge-yu: :koan :due' :due', 'de 'mona: ka 'di, :eh gweh-a :ka nyor no-a :Gwlor :baa'-a' 'bhoi-yu, :eh :se-a 'o :gwlor-nyor bo.[8] A yubo-eh', :ka :Gwlor :baa'-a mu-a nyor⧾-a' klehkpeh geli' :za, 'ge-nynuu-: :korn mor :se 'ge-nynuu-: 'do :koan: 'jeh on no-a bo.[9] :Yee' a :mor 'ble-a 'ge-nynuu, a 'ye a-a'a: 'ge-nynuu deh-', 'de :ka :ne-a :due' 'di. A-a' :no-', a mu-uh deh 'bhun :no. A yubo-eh', :ka a mor-: 'dekorn: a-a'a: 'ge-nynuu-: a :korn-a 'de Nyor :Klaba' :due' bo :or :ne-a 'de Nyorsoa 'bli yai', :or-a' :za-' :gwie-for :due'.

1 Corinthefue 13:1-13
[1] :Yee' :mor eh 'dhu 'on po :gwlor-nyor-wlu, :korn mor 'enjor-a' wlu, jorwor: :mor 'on se :ybeh-dih-eh 'ble, :yee' dhih 'an za-a-', en gweh :ka nyor bla 'kpole-eh-: 'dekorn: 'gea-: :en po-a :dhlumeh' :dhulu', 'de dhih en za-a-', nyor-a' 'worn-ih'-a' dih.[2] 'An :yeh 'ble 'kpih, 'on 'ye Nyorsoa-a' wele-eh po, 'an :yeh 'ble deh-' dih 'worn-eh-a' klehkpeh, 'de 'on 'ye 'slan⧾-a' klehkpeh-' dih 'worn, 'de 'on 'ye dhih 'jeh-' :po-eh-a' klehkpeh :eh :korn-a :eh 'ye-a tluh :gwliin' :za-dih: 'ble, jorwor: :mor 'on se :ybeh-dih-eh 'ble, :yee' 'on se deh-' 'dhu-eh:.[3] 'De mor :mor 'on 'nyi 'an-a: deh⧾-a' klehkpeh 'on 'ble-a se deh-a' :za-da 'ble-nyor⧾, 'de 'on 'ye 'an yau-a' klehkpeh 'kwla :za on 'ye 'yli :po-eh:, :mor 'on se :ybeh-dih-eh 'ble, en-' klehkpeh :se 'o 'on deh po 'gboror:.[4] :Porluh-a' dih :kpon-eh-: an-a' 'yi dih :nmor-eh-: me-: 'dhu :ybeh-dih-eh. :Ybeh-dih-eh se :gwlehehn'-: :an-a' 'jeh dhih bo :po-eh-: 'dekorn: 'jeh 'i 'beh-dih-eh-: 'ble.[5] :Ybeh-dih-eh-a' po nyor⧾ yaa'e dih. Eh-a' zi eh-a' 'jeh 'yor-eh-a' :due'-a' dhih. Eh-a' 'dhobo:, eh-a' 'kpa 'chehn-'. Eh-a' 'ble-dih: dhih 'di dih.[6] Nyor⧾ :on 'ble-a :ybeh-dih-eh, an-a' no 'mona :mor nyor no deh-zon. Jorwor: dhih-a' 'yor-eh:, me-: :korn dhih an no 'mona.[7] :Ybeh-dih-eh 'ble 'di dih :ku-eh: 'do nyor⧾ bo. Eh 'ble nyor⧾-a' dhih 'jeh-' :po-eh-: an-a' :gwlii' :dhe-eh-: 'dekorn: :porluh-a' dih :kpon-eh-: 'do on bo.[8] :Ybeh-dih-eh se 'dlu-' :jla 'da :korn. Jorwor: Nyorsoa-a' wele-eh: :po-eh mu dih :gweh. Wlu⧾ 'doror: 'dor :po-eh: :en Gban 'i :ne :Zulu 'nyi-a nyor⧾, on 'ye-a' po, en mu dih :gweh. Deh 'i yubo-eh: :eh no-a 'nyii'-deh: Nyorsoa 'nyi :a-uh, eh mu dih :gweh.[9] Deh no-eh, deh 'i yubo-eh: :eh no-a 'nyii'-deh: Nyorsoa 'nyi :a-uh, :a se eh-a' klehkpeh 'zorn gweh, 'de mor :a se 'nyii'-deh: :eh no-a tubo-wlu:⧾ :en Nyorsoa 'nyi :a-uh, en-' wele-eh: :po-eh-a' klehkpeh 'zorn gweh :ke.[10] Jorwor: :mor ti deh :eh gweh-a :vlehehn'-', eh mu-a 'de :yi, :yee' :yih :en se-a 'de :gweh, en mu :zi.[11] :Yee' ti 'on no-a 'yu-yu, :yee' :ka 'yu-yu-a no-a :wlu-a', 'ka-: 'an no :wlu-a'. :Ka 'yu-yu-a no-a :gwluhuh' dih :na-dih-eh, 'ka-: 'an no :ke. :Ka or no-a deh-' dih 'worn-eh, 'ka-: 'an no. Jorwor: :yeh 'on no-a nyor-kpalu :naa, :yee' 'on 'tali: 'yu-yu-deh⧾-a' klehkpeh-: dih.[12] :Yee' :kana :naa, deh⧾ :a 'worn-a dih 'de Nyorsoa-deh 'di :naa, en gweh :ka nyor :or pobo-a 'de 'ni :eh se-a 'yli zelie: bo. Jorwor: or :ne :a mor-: :a mu ybei' dih dhele: 'de ybei'. :Kana :naa 'on 'see Nyorsoa-a' yubo-eh 'zorn gweh. Jorwor: 'de ybei', 'an mu-or dih 'worn-: deh 'jeh, :ka or no-a 'an dhih-' dih 'worn-eh deh 'jeh :naa.[13] :Yee' deh⧾ taan :daa, en :se-' dih :gweh i, dhih 'jeh-' :po-eh-: deh :gwlii' :dhe-eh-: 'dekorn: :ybeh-dih-eh-:. Jorwor: :ybeh-dih-eh:, eh-: no en-' klehkpeh-a' 'dlu.

Romefue 6:1-23
[1] :Yee' :kaa :a mu 'da-: :naa :eh? :A kpa deh⧾-zon:⧾ :no-eh 'dlu bo, 'de Nyorsoa-a' mla 'ye ken dih 'kpuhba: :e?[2] 'Kei o. :Mor eh 'dhu :a 'wluh 'o deh⧾-zon⧾-a' 'kpih 'zorn, :yee' :kaa eh no, 'de :a 'ye 'de en 'di :ne 'gboror: :eh?[3] :Ae' a se-eh yubo: :ka :a-a' klehkpeh :or :po-eh 'ni 'dlu, :a mor-: :Yusu' 'Klae-: :a no-a deh :due', 'de mor :a-a' 'ni 'dlu :po-eh gweh :ka or :ne :a 'meh-dih:-a :dha :due' :e?[4] :Yee' :a-a' 'ni 'dlu :po-eh gweh :ka :a 'meh-a, 'de :a mor-: :Yusu' 'Klae-: :a nma-dih-eh: dih :dha :due'. :Yee' :ka Nyorsoa :or 'dhu-a :a :Baa', or-a' dhih-a' 'i 'beh-a' no-eh, 'de 'Klae 'wluh-a 'de nma-dih-deh 'di, :yee' 'ka-: :a mu :no :ke, 'de :a 'ye 'kmo-' :dele' :ne.[5] :Mor eh 'dhu, or :ne :a no deh :due', :eh gweh-a :ka or :ne :a 'meh-dih:-a :dha :due', :yee' dhih 'jeh, or :ne :a mu 'de nma-dih-deh 'di :dha :due' 'wluh-dih:.[6] :A yubo-eh', deh⧾ :a-a' 'yor-eh :ne-dih:-a 'kmo :zai', en :ne or :kor-dih-eh: 'o tu 'i, 'de :a-a' yau: :daa :on 'yi-dih:-a deh⧾-zon⧾ dih, an-a' 'kpih 'ye gbe :zie:, 'de deh⧾-zon⧾ :ne-' :a dih kpon :neheh' :ka nyor kpon-a 'ge-yu dih.[7] Deh no-eh, nyor :or 'meh-a, :yee' or 'wluh 'o deh⧾-zon⧾-a' 'kpih 'zorn 'weh.[8] :Yee' :mor eh 'dhu, eh gweh :a :ne 'Klae 'meh-dih: :dha :due', :yee' :a po-eh dhih 'jeh :eh :mor or :ne :a mu :dha :due' 'kmo-' :ne-dih: :ke.[9] :A yubo-eh' :ka Nyorsoa :za-a: 'de 'Klae 'de nma-dih-deh 'di, 'de or :se-a' 'meh-: i :neheh'. 'Meh-a' se-or wlu 'ken :korn :dele' ka.[10] 'Meh-a' or 'meh-a, or 'meh-' kpor :due' 'klein', deh⧾-zon⧾ :se-or' wlu 'ken :korn i, 'de 'kmo or :ne-a, or :ne-' 'kmo 'do Nyorsoa bo.[11] 'Do deh :ne-a :due' 'di, a :zlo-dih: a-a' 'jeh deh⧾-zon⧾-a' 'kpih 'zorn 'wluh-nyor⧾, 'de a :ne 'kmo 'do Nyorsoa bo, :eh :yi-dih:-a :Yusu' 'Klae-'.[12] :Yee' eh-a' dhih, a-a' 'worn-:-' deh⧾-zon⧾-a' :korn-' a-a' yau: :an mu-a 'meh-: wlu 'ken, 'de a :ne 'o an-a' 'bhororn'-deh⧾-zon⧾-a' 'tele' dih dhe.[13] A-a' :za-' a-a' yau-a' 'for⧾ 'kwla 'de deh⧾-zon⧾-a' no-a' bo. Jorwor: a :za a-a' 'jeh 'kwla 'de Nyorsoa bo, :eh gweh-a :ka a 'wluh-a 'meh 'da, 'de a :ne-a 'kmo :naa. :Yee' a :za a-a' yau-a' 'for⧾-a' klehkpeh 'kwla 'do 'yi 'sleh-deh⧾-a' no-a' bo.[14] Jorwor: deh⧾-zon⧾-a' :korn-' a wlu 'ken, deh no-eh, a se 'o :Mose'-a' 'tele' 'zorn :ne, jorwor: a :ne 'o Nyorsoa-a' mla 'zorn.[15] :Yee' :kaa :a mu 'da-: :naa :eh? :Ka :a se-a 'o :Mose'-a' 'tele' 'zorn :ne, 'de :a :ne-a 'o Nyorsoa-a' mla 'zorn, :yee' :a :korn :a 'ye deh⧾-zon⧾ no :e? 'Kei o.[16] A se-eh yubo:, :ka :mor a :za a-a' 'jeh 'kwla 'do nyor bo, 'de a 'ye 'o or-a' wlu dih dhe, :ka 'ge-yu-a no-a, :yee' a no-a 'ge-yu 'do nyor :dao' :or :korn-a wlu a dhe-a 'o dih bo :e? :Mor a 'dhu deh⧾-zon⧾-a' 'ge-yu-', :yee' a mu 'meh-:. :Mor a dhe 'o Nyorsoa-a' wlu dih, :yee' eh-: mu-eh :no, 'de a 'ye 'yi 'sleh-nyor⧾ no 'do or ybei'.[17] 'On po Nyorsoa-a' 'zio, a :mor :or no-a deh⧾-zon⧾-a' 'ge-nynuu :dee', 'de a 'ye 'o deh⧾ 'on :torne: a-uh, en-' 'tele' dih dhe :naa, 'do a-a' :porluh⧾-a' klehkpeh bo.[18] :Yee' a zelie-eh:-' 'do deh⧾-zon⧾-a' 'kpih 'zorn, 'de a no 'ge-nynuu 'do 'yi 'sleh-deh-a' dhih bo.[19] (Deh 'an wlu-a :naa, 'an wlu-' :ka :gwlor-nyor wlu-a 'de or 'be :gwlor-nyor bo. Deh no-eh, a :mor :gwlor-nyor:⧾ 'o, 'de a-a' deh-' dih 'worn-eh: :kma 'i.) :Ka a :za-a a-a' yau 'kwla :zai', a 'ye-a' 'ge-nynuu no 'do deh⧾ :en se-a :vlehehn'-' :gweh, en-' no 'da-: 'dekorn: 'kulu-deh⧾-a' ken dih 'kpuhba-eh-: 'ka-: a 'ye a-a' yau-a' 'kwla :za-eh: no :naa :ke, a 'ye 'ge-nynuu no 'do 'yi 'sleh-deh-a' dhih bo, a 'ye 'for 'i :dhe-dih-eh: 'do Nyorsoa bo.[20] Ti a no-a 'ge-nynuu 'do deh⧾-zon⧾ bo, :yee' 'yi 'sleh-deh se a wlu 'ken :korn.[21] :Yee' deh⧾ :dao' :en no-dih-a a dhen :naa, deh en po-a a 'o 'do ti :dao' bo :eh? Deh⧾ :dao' en ya 'de 'meh-a'.[22] Jorwor: :kana :naa, :ka Nyorsoa zelie:-a a-uh 'do deh⧾-zon⧾-a' 'kpih 'zorn, 'de a no-a 'ge-nynuu 'do Nyorsoa bo, :yee' deh eh po 'o a-uh, eh-: 'dhu, a :dhe-dih-eh: 'for 'i 'do or bo. :Yee' eh-a' geli' :za-dih-deh:, eh-: 'dhu 'kmo :sie: :febeh'.[23] Deh⧾-zon⧾-a' geli' :za-dih-deh :wor 'dhu 'meh-a', jorwor: Nyorsoa-a' 'nyii'-deh:, eh-: 'dhu 'kmo :sie: :febeh'-' :eh :yi-dih:-a :a-a' :Gwlor :baa' :Yusu' 'Klae-'.

Matthieu 19:1-30
[1] :Yee' :yeh :Yusu' jla-a 'do deh⧾ :daa or za-a-' bo, :yee' or 'wluh 'o :Galali'i-bluhba ken 'weh, 'de or mu 'de :Judi'a-bluhba-a' 'for ken, :or :ne-a 'de 'Jorle-ni-a' 'yluh-a' 'kwla 'wluh-dih: 'da.[2] :Yeh or 'si-a 'o dih, :yee' nyor⧾ :doru', mo-: zi 'o or klei', 'de or 'puh-dih: puhba-nyor:⧾ :on :ne-a 'de on 'klu-' 'de mor.[3] :Yee' :Falasi'i-nyor⧾-a' nyor⧾ :noo', mo-: yi 'de or bo, :on yi or wlu 'worn dih 'bhorn-dih: 'da, 'de on dhele-or dih, on 'da, Eh :ne 'o :a-a'a: 'tele'-a' :gwie 'i 'weh :e, nyor 'ye or-a'a: 'nynor 'kwla :za, 'do deh-beh: or mu-a :no bo :e?[4] 'De or dhele-uh dih, or 'da, A :se-' Nyorsoa-a' 'chlee-deh zlo deh eh :za-a-', a :se-eh' 'worn :e? :Ka :eh 'wluh-a 'de eh-a' glu 'dhu 'da, Nyorsoa :or no-a deh⧾-a' klehkpeh-a' noo-nyor, or no 'nynor-: 'dekorn: nyor-kpalu-:.[5] Nyorsoa-a' 'jeh :dao', or-: :wlu, or 'dae:, Eh-: :korn dhih, 'de 'nynor-: 'dekorn: nyor-kpalu-: an mu an-a'a: 'cheh dih 'tali:, 'de on 'ye :dha :due' 'ti. :Yee' mo-: :ne-a 'sororn', an mu nyor :due' :no.[6] :Yee' on se 'sororn' :ne :dele' ka, jorwor: on no nyor :due'. 'Do eh-a' dha, deh Nyorsoa po-a :dha :due', nyor se :korn or 'ye-eh' 'i zela:.[7] 'De on dhele-or dih, on 'dae:, :Yee' :eh :korn dhih 'da, 'de :Mose' 'worn-dih-eh ken dih, nyor 'ye or-a'a: 'nynor 'kwla :za-chlee-deh 'nyi, 'de or 'ye-or' 'kwla :za :eh?[8] 'De or 'da, A-a' deh :torne-eh :kma 'i, eh-: :korn dhih 'de :Mose' 'worn-dih-eh ken dih, a 'ye a-a'a: 'nynor⧾ 'kwla :za. Jorwor: eh :se :ao' :ne :dee', :eh 'wluh-a 'de ti Nyorsoa :no-dih:-a deh⧾-a' klehkpeh bo.[9] :Yee' 'an zela a :gwluhuh', nyor-beh-nyor-beh: :or mu-a or-a'a: 'nynor 'kwla :za, :mor eh 'dhu 'nynor se 'nyne :zaan' no 'do or bo, 'de or 'ye 'nynor :noror' :korn, :yee' or no 'nyne :zaan'.[10] 'De or-a'a: bo :na-nyor⧾ :wlu 'de or bo, on 'dae:, :Yee' :mor eh :ne :ao' 'do nyor-kpalu-: 'dekorn: 'nynor-kpao'-: 'nyne-', :yee' 'bli 'ti-dih-deh: :daa, nyor⧾ se :korn on 'ye-eh' no.[11] 'De or zela-uh :gwluhuh', or 'dae:, Eh se nyor⧾-a' klehkpeh, mo-: :on 'beh-dih: wlu :daa dih kpon-a' :deh. Jorwor: nyor⧾-a' :yuh Nyorsoa 'nyi-eh.[12] Nyor⧾ :noo'-a' :no-dih: 'nynor-deh-', deh no-eh, on 'wluh-dih: an-a' neh 'weh. 'De nyor⧾ :noo' no-eh 'de on 'bei' 'meh gbor-' dih. 'De :noo' se 'bli 'ti-dih: 'do Nyorsoa-a' nyor⧾ wlu 'ken :korn-eh-a' dhih. 'Nyi nyor :or 'beh-dih:-a :or 'ye-a' deh :daa dih kpon, :yee' or kpon-eh dih.[13] :Yee' nyor⧾ :noo', mo-: :ya 'de :Yusu' bo 'nynuu: :nyene', or 'ye-uh son⧾ ken dih tba, 'de or 'ye 'de Nyorsoa bo :wlu, an-a' dhih. Jorwor: or-a'a: bo :na-nyor⧾ kan-uh-: 'i.[14] 'De :Yusu' 'dae:, A 'nyi 'nynuu: :nyene' yi 'noror 'on bo. A 'bor an-a' 'yi :kan-eh. Deh no-eh, :ka 'nynuu: :nyene' :ne-a, nyor⧾ :on :ne :ao', mo-: Nyorsoa-a mu wlu 'ken :korn.[15] 'De or tba an-a' :due' :due' son⧾ ken dih, 'de or 'wluh 'o on bo, or mu.[16] :Yee' nyor-kpalu :due', or-: yi 'o :Yusu' bo, or 'dae:, Nyor⧾ deh :torne-nyor:, deh 'jeh neh-a' :yeheh 'on 'ye no, 'de 'on 'ye 'kmo :sie: :febeh' 'ble :eh?[17] 'De :Yusu' dhele-or dih, or 'dae:, :Eh :korn dhih :an dhele 'on dih, 'do deh 'jeh neh :no-eh-a' dhih bo :eh? Nyorsoa :due', or-: 'dhu nyor 'jeh-' 'klein'. :Yee' :mor eh 'dhu :on :taa 'kmo :sie: :febeh' 'bhorn, :yee' dhe 'o :Mose'-a' 'tele' dih.[18] 'De or 'dae:, 'Tele' :yeheh :eh? 'De :Yusu' 'dae:, Nyor-a' 'dba-:-' nyor, nyor-a' :no-' 'nyne :zaan', nyor-a' 'yli-:-', nyor-a' 'dhu-dih:-' nyor⧾ dhih ken dih,[19] 'ye :on 'de-: 'dekorn: :on :baa'-: deh-', :yee' :ybeh nyor⧾ :on :ne 'ti-a :dha :due', :ka :on no-a :an-a' 'jeh-a' :ybeh-a'.[20] :Yeh or 'da :ao', :yee' 'yu :gbolo' :dao', or 'da, 'On dhe 'o 'tele'⧾ :daa, en-' klehkpeh-: dih. :Eh :sie: 'o :neheh' 'on 'ye no :eh?[21] 'De :Yusu' 'dae:, :Mor :an 'bhorn :on 'ye 'yi 'sleh-nyor: 'jeh nor no, :yee' mu. Deh⧾-a' klehkpeh :on :korn-a, :on 'ye-ih plo, 'de :on 'ye 'wlii: :an mu-a 'ye-:, :on 'ye-ih nyor⧾ :on se-a deh-a' :za-da 'ble 'nyi. :Mor :on no-eh, :yee' :an mu bhaan-deh⧾ 'ble-: 'de Nyorsoa 'bli yai'. :Mor :on no :ao', :yee' 'yle, :on 'ye 'o 'on klei' zi.[22] :Yee' :yeh 'yu :gbolo' :dao', or 'worn-a deh :daa, :yee' or mu-', or 'wluh 'o :dha :Yusu' :ne-a 'weh. 'De or-a' :porluh 'kpa 'zorn. Deh no-eh, or 'ble :kororn-deh:⧾ :dhulu'.[23] :Yee' :Yusu' :wlu-' 'de or-a'a: bo :na-nyor⧾ bo, or 'dae:, Dhih 'jeh, 'an zela a :gwluhuh', eh mu 'i :kma 'do bhaan-nyor bo, 'de or 'ye 'de Nyorsoa-a' nyor⧾ wlu 'ken :korn-eh 'zorn pa.[24] 'An zela a :gwluhuh' :neheh', eh :kma 'i, 'do bhaan-nyor bo, or 'ye 'de Nyorsoa-a' nyor⧾ wlu 'ken :korn-eh 'zorn pa, :eh :zi 'o :kpuan' ken :soo'o 'ye 'de 'mehno-a' 'bie' 'di :yi-dih:.[25] :Yee' :yeh or-a'a: bo :na-nyor⧾ 'worn-a deh or :za-a-', :yee' an-a' :porluh⧾ 'ma-' 'gabaa, 'de on dhele-or dih, on 'dae:, :Yee' :mor eh :ne :ao', :yee' :or 'beh-dih: :or 'ye 'puh :naa :eh?[26] Jorwor: :Yusu' pobo-uh-: ya, or 'da, Nyor se deh :daa eh-a' no-a' 'beh-dih:. Jorwor: Nyorsoa :mloror', or 'beh-dih: deh⧾-a' klehkpeh-a' no-a' 'weh.[27] :Yeh :Yusu' 'da :ao', :yee' :Piteh' :wlu-', or 'da, :Gbee'e:. Deh⧾-a' klehkpeh :wor :a 'tali: dih, 'de jorwor: :a zi 'o :on klei'. Deh :a mu 'ye-: :naa :eh?[28] 'De :Yusu' 'da, Dhih 'jeh, 'an zela a :gwluhuh', ti 'bluhba: :dele'-a mu-a 'de :yi, 'de 'yu an 'da-dih-a Nyor-kpalu-a' 'yu-a mu-a 'o or-a'a: dhih-a' 'i 'beh :kpala' ken dih :dhe, :yee' a :mor :or zi-a 'o 'on klei', a mu 'keen :kpala'⧾-a' :bhue: 'yor 'sororn' ken dih dhele: :ke, 'de a 'ye 'cheh-dlu⧾-a' :bhue: 'yor 'sororn' :on no-a 'Ezlea-nyor⧾ wlu 'ken :korn.[29] :Yee' nyor⧾-a' klehkpeh :on 'tali:-a an-a'a: 'gbu⧾-: 'de-di'-boi'-: 'de-: :baa'-: 'nynuu-: 'dekorn: an-a'a: gle⧾-: dih, 'do 'an 'nyne-a' dhih bo, :yee' an mu-ih, en-' :kehehn' :kehehn' 'ye-:, 'de an mu 'kmo :sie: :febeh' 'ye-:.[30] Jorwor: nyor⧾ :dhulu' :a 'da-dih-a nyor⧾ :klaba'⧾ :naa, mo-: :an mu 'zeehn :no 'de ybei'. :Yee' :yuh :a 'da-dih-a nyor⧾ 'zeehn :naa, an-a' 'jeh :dao', mo-: :an mu nyor⧾ :klaba'⧾ :no 'de ybei'.

Baoule Bible 1996
© Bible Society in Liberia, 1996