A A A A A

Good Character: [Self-Control]


1 Corinthefue 9:25
Nyor⧾ :an dhobo-a dih, 'do deh-a' dhih bo, an torne-uh deh 'weh deh 'jeh, on 'ye an-a' 'jeh wlu 'ken :korn. An no-eh', 'de on 'ye :gale' :kornu:⧾ :gblaa' 'ye, :or :se-a' 'o :gwle i, :or 'ye-a' 'kor. Jorwor: :a-a' :neh :mleheh', :a no-eh', :a 'ye 'kmo :sie: :gblaa' 'ye.

1 Corinthefue 10:13
Eh se dih 'dhen-eh :korn, :eh 'ye-a 'o nyor bo yi, :eh 'ye :ao', :eh 'see-a 'o nyor :noror' bo mu :zai'. 'De Nyorsoa no :dhehehn-nyor:. 'De dih 'dhen-eh: :on se-a worn 'i 'beh-dih:, Nyorsoa se 'beh-dih: or 'ye-eh 'yli-eh dih :za, eh 'ye 'o :on bo yi. Jorwor: :mor eh 'dhu, dih 'dhen-eh yi 'o :on bo, or mu :ka :noror' 'bhorn-: :chio'lo: :on 'ye-eh 'yi :nyna-a' 'beh-dih:.

1 Thessaloniquefue 5:6
:Yee' eh-a' dhih, a 'bor 'mo-a' :ka nyor⧾ :noo'-a no-a. A 'nyi :a :sorn-'. A 'nyi :a :korn :a-a' 'jeh wlu 'ken, :a :ne-' deh-zon no.

2 Timothée 1:7
Deh no-eh, Nyorsoa :se-' or-a' :Zulu :a-uh 'nyi, :a 'ye :fano ple. Jorwor: or-a' :Zulu: :dao', mo-: 'nyi :a 'kpih-: :ybeh-dih-eh-: 'dekorn: :a-a' 'jeh wlu 'ken :korn-eh, :a :ne-' deh-zon no-:.

Philippesfue 4:13
'On 'beh-dih: deh⧾-a' klehkpeh worn 'i 'weh, 'do 'kpih 'Klae 'nyi-a 'on bo.

Tite 1:8
Jorwor: or :korn or 'ye or-a'a: 'gbu 'kwla :za 'do 'duhba⧾ bo. Or :korn or 'ye deh 'jeh-' :ybeh. Or :korn or 'ye or-a' 'jeh wlu 'ken :korn, or :ne-' deh-zon no. Or :korn or 'ye 'yi 'sleh-nyor no, :or :dhe-dih-eh 'for 'i 'do Nyorsoa bo. Or :korn or 'ye :gwluhuh' dih :florn.

Romefue 12:1-2
[1] :Yee' 'do eh-a' dha, 'an 'Klae :de-di'-boi'-a:, 'an bale a 'weh, :ka Nyorsoa 'ye-a a :wehlih, :yee' a :za a-a' yau 'kwla 'de or bo, :eh gweh-a :ka nyor⧾-a za-dih-a 'kmo :ne-deh: :eh :dhe-dih-eh 'for 'i 'slaa, 'do or-a' :koan-a' no-a' bo, 'de :eh 'pehn-dih:-a or-a' :porluh dih. Eh-: 'dhu or-a' :weheh' :za-eh: 'jeh neh-' 'de or-a' deh 'di.[2] :Yee' deh⧾ 'kmo bo-nyor⧾-a ne-dih-a 'kmo, a-a' :ne-dih:-' 'kmo :ke. Jorwor: a 'nyi Nyorsoa 'nyi a 'dlu 'di dih :na-dih-deh: :dele', :eh mu-a a-a' :gwlor-nyor-tu-a' klehkpeh-' dih 'bili: 'de a 'di. :Yee' :mor eh no :ao', :yee' a mu deh :eh :korn-a Nyorsoa 'ton yubo:, :eh 'dhu-a deh 'jeh-: deh :eh 'pehn-dih:-a or-a' :porluh dih-: 'dekorn: deh :eh gweh-a 'kwla-:.

Philippesfue 4:8-9
[8] :Yee' eh-a' klehkpeh-a' 'dlu-' :jla 'da, 'an 'Klae :de-di'-boi'-a:, a :na-dih: deh⧾ :daa :gwluhuh' dih, :en 'dhu-a, deh⧾ :en no-a dhih-a' 'yor-eh-: deh⧾ :en no-a deh-' 'ye-deh⧾-: deh⧾ :en 'sleh-a 'i-: deh⧾ :en :gweh-a :vlehehn'-: deh⧾ :en :nmor-a 'yli-eh ken dih-: 'dekorn: deh⧾ :en 'ble-a 'nyne 'jeh-:. Deh⧾-a' klehkpeh :en :nmor-a 'yi dih-: 'dekorn: deh⧾ nyor⧾ 'beh-dih:-a on 'ye-a' dhih bo po-: me-: a :korn a 'ye :gwluhuh' dih :na-dih:.[9] :Yee' deh⧾ a 'chean'-a-: a :za 'noror 'on 'kwa-: 'de deh⧾ a 'worn-a 'noror 'on bo-: 'dekorn: :yih a 'ye-a 'on, 'an no-a-: me-: a 'ye no. :Yee' Nyorsoa :or 'nyi-a nyor⧾ :porluh-a' dih 'pehn-eh, or mu 'o a bo :ne.

Jacques 1:19-21
[19] :Yee' 'an 'Klae :dhih :kma :de-di'-boi'-a:, a :korn a 'ye deh :daa yubo:. Nyor⧾-a' klehkpeh, on 'dhobo: on 'ye dih 'worn. Jorwor: on 'wla :gwluhuh' dih 'de on 'ye :wlu. On 'wla :gwluhuh' dih, 'de on 'ye 'chehn-' 'kpa.[20] Deh no-eh, :gwlor-nyor⧾-a' 'chehn-' 'kpa-eh :se-eh' :no i, 'de on 'ye 'yi 'sleh-kplen: Nyorsoa-a 'bhorn-a on 'ye-a' no, on 'ye-ih' no.[21] :Yee' eh-a' dhih, 'nyi a 'tali: a-a' gu-kplen-: 'dekorn: a-a' deh⧾-zon:⧾ :doru' :dao'-: dih. :Yee' a :ya a-a' 'jeh ya, 'de a 'ye wlu⧾ Nyorsoa po-a 'o a :porluh⧾ ken dih kpon, :en 'beh-dih:-a :en 'ye-a a 'puh-dih:.

1 Pierre 5:6-8
[6] :Yee' 'do eh-a' dha, a :ya a-a' 'jeh ya 'do Nyorsoa-a' dhih-a' 'i 'beh-kpih 'zorn. :Yee' :mor ti or 'bhorn-a, or 'ye a ya-' 'duo:, en nyni 'o, or mu-eh :no.[7] Deh⧾-a' klehkpeh :en 'beh-dih-a a-a' :porluh⧾ 'worn dih, a 'nyi-ih or-uh, or 'ye-ih' kpa. Deh no-eh, or :kma a-a' dhih 'weh.[8] A :korn a-a' 'jeh wlu 'ken, a :ne-' deh-zon no. :Yee' a 'dhu :gbeheh. Deh no-eh, 'ku :on 'nyeh-a a-uh', mo-: :an na-dih, :ka :gbolo: :or klu-a, or no-a, 'de an 'bhorn nyor on 'ye-a' bo pa.

1 Corinthefue 9:24-27
[24] A se-eh yubo: :ka nyor⧾-a' klehkpeh :an dhobo-a dih 'do ple-a' bo, :mor an-a' klehkpeh ple, :yee' nyor :due' 'wluh-a 'de on 'nyne-', or du-uh-a, 'de or 'ye-a geli' :za-dih-deh :e? A-a' ple-a' a mu-a :ple, a ple deh 'jeh neh, 'de a 'ye geli' :za-dih-deh 'ye.[25] Nyor⧾ :an dhobo-a dih, 'do deh-a' dhih bo, an torne-uh deh 'weh deh 'jeh, on 'ye an-a' 'jeh wlu 'ken :korn. An no-eh', 'de on 'ye :gale' :kornu:⧾ :gblaa' 'ye, :or :se-a' 'o :gwle i, :or 'ye-a' 'kor. Jorwor: :a-a' :neh :mleheh', :a no-eh', :a 'ye 'kmo :sie: :gblaa' 'ye.[26] :Yee' 'do eh-a' dha, 'an-a' 'worn, 'an-a' ple :eh gweh-a :ka nyor :or ple-a dih zeh zeh. 'An-a' 'worn, 'an-a' vorn :eh gweh-a :ka nyor :or vorn-a 'gbu :gwlii' :zulu bo.[27] Jorwor: 'on 'ye-dih: 'an 'jeh-a' yau 'kle, 'de mor 'on korn-uh wlu 'ken :ke. Deh no-eh, :mor 'on gweh Nyorsoa-a' tubo-wlu⧾-a' po-a' 'i 'de nyor⧾ bo, 'de or :ne-' 'on 'zorn sie, 'do 'an-a: geli' :za-dih-deh bo.

1 Corinthefue 6:12-20
[12] A-a' nyor⧾ :noo'-a mu :ao', 'on :bleh-dih-eh: 'i, 'on 'ye deh⧾-a' klehkpeh no. Keen' :mloror', jorwor: eh :se deh⧾-a' klehkpeh, me-: :nmor 'yi dih 'do a bo :deh. 'De 'on :se-eh' ken dih 'worn-dih: i deh 'ye 'on 'ge-yu-' no.[13] Nyor⧾ :noo'-a mu :ao', Dii-deh :korn 'de 'kwli 'di, 'de 'kwli :korn 'de dii-deh bo :ke. Keen'. Jorwor: Nyorsoa-a mu en-' klehkpeh :daa 'borboa' 'i :po. Nyorsoa :se-' :a yau: :daa 'nyi, :a 'ye-uh 'tmeor:⧾ :korn-dih:. Jorwor: or 'nyi-uh' :a 'weh, :a 'ye :Gwlor :baa' :weheh' :za-dih:. 'De mor :Gwlor :baa'-a' 'jeh :dao', or-: :korn 'de :a-a' yau-a' deh bo.[14] Nyorsoa :or :za-a: 'de :Gwlor :baa' 'de nma-dih-deh 'di, or mu or-a' 'kpih :due' :dao' :no, or 'ye 'de :a nma-dih-deh 'di :za :ke.[15] A se-eh yubo: :ka a-a' yau 'dhu-a 'Klae-a' yau-a' 'for-' ke :e? 'On 'beh-dih: 'on 'ye 'Klae-a' 'for 'duo:, 'on 'ye-uh :bhaa'-nynor 'nyi :e? 'Kei:. Eh se-eh 'beh-dih:.[16] A se-eh yubo: :ka nyor-kpalu: :or :ne :bhaa'-nynor: :dao' 'tmo-a, :yee' or :ne or 'gba-a yau :due' :e? 'Ka :wor Nyorsoa-a' 'chlee-deh no eh-a' :za-a', eh 'da, Mo-: :on :ne-a 'sororn', an mu nyor :due' :no.[17] Jorwor: nyor :or 'nyi-a or-a' 'jeh :Gwlor :baa', :yee' or-: :Gwlor :baa'-: on 'ble :porluh :due'.[18] A :tehn-dih: 'tmeor:⧾ :korn-eh bo dih. Deh⧾-zon⧾-a' klehkpeh nyor⧾-a no-a, :en :sie:-a 'o, en se 'o yau 'bhun :ne. Jorwor: :mor eh 'dhu :on :taa 'tmeor⧾ :korn, :yee' :an-a' 'jeh 'yor-eh-a' yau :oo' :an no deh-zon 'bhun.[19] A se-eh yubo: ke :e, :ka a-a' yau 'dhu-a Gban 'i :ne :Zulu-a' 'sla-' :e, or 'nyi-a a-uh, :on :ne-a a-uh'? A se 'de a-a' 'jeh bo :korn, jorwor: a :korn 'de Nyorsoa bo.[20] Deh no-eh, Nyorsoa :po-dih: :Yusu' 'Klae-a' nyomor 'pehluh', 'de or dhen a-uh. :Yee' eh-: :korn dhih :oo', a 'ye a-a' yau no, a 'ye Nyorsoa dhih-a' 'i 'beh-a' 'nyi.

2 Pierre 1:3-11
[3] :Yee' :Yusu' 'Klae-a' 'kpih :en 'wluh-a 'de Nyorsoa bo, me-: or no, 'de or 'nyi :a deh⧾-a' klehkpeh, :a :korn :a 'ye-a 'ye, 'de :a 'ye 'kmo :an 'pehn-dih-a Nyorsoa-a' :porluh dih, 'kmo-' :ne-dih:, :eh :yi-dih:-a or-a' deh-' dih 'worn-eh-'. Or 'da :a-uh 'weh, :a 'ye 'for 'ble 'de or-a' dhih-a' 'i 'beh-a'-: 'dekorn: or-a' deh⧾ 'jeh ne-a' no-a'-: 'di.[4] Deh⧾ :daa, me-: or :yi-dih:-', 'de or po deh⧾ :klaba'⧾ :en 'kpa-a deh ken, en-' wlu⧾ :dhama'-' 'noror :a bo, 'de en 'ye-eh' no, 'de :a 'ye nyor⧾ 'kor-dih-deh:⧾ :en :ne-a dha yao 'zorn, :en 'wluh-a 'de :gwlor-nyor⧾-a' 'bhororn'-deh⧾-zon⧾ bo, 'de :a 'ye 'o en 'zorn 'wluh, 'de :a 'ye 'for 'ble 'de or-a' Nyorsoa-tu 'di.[5] :Yee' eh-a' dhih, :ka a po-eh dhih 'jeh-' :naa, :yee' a po 'de 'kpih, a 'ye 'o eh ken deh⧾ 'jeh ne-a' no-a' po. :Mor a 'ble deh⧾ 'jeh ne-a' no-a', :yee' a po 'o eh ken, deh-' dih 'worn-eh.[6] :Mor a 'ble deh-' dih 'worn-eh, :yee' a po 'o eh ken, a-a' 'jeh wlu 'ken :korn-eh, a :ne-' deh-zon no. :Mor a :korn a-a' 'jeh wlu 'ken, :yee' a-a' :sea:-'. :Mor a se sea, :yee' a po 'o eh ken, 'kmo :an 'pehn-dih-a Nyorsoa-a' :porluh dih.[7] :Yee' :mor a-a' 'kmo 'pehn-dih Nyorsoa-a' :porluh dih, :yee' a po 'o eh ken, 'Klae :de-di'-boi'-a' :dhih :kma-eh. :Mor a :kma 'Klae :de-di'-boi'-a' dhih, :yee' a po 'o eh ken, nyor⧾-a' klehkpeh-a' :ybeh-eh-'.[8] :Mor eh 'dhu a no deh⧾-a' klehkpeh :daa, 'de a 'ye-ih' no, en 'ye 'o 'dlu dih :zi, :yee' en mu-eh :no, a 'ye deh 'i 'si, 'de a 'ye 'bi :dhulu' po, 'de a-a' :Gwlor :baa' :Yusu' 'Klae-a' deh-' dih 'worn-eh 'di.[9] Jorwor: nyor-beh: :or se-a deh⧾ :daa no, :yee' 'de or 'yli :kpe-' 'weh, or-a' 'ye 'de nya dih. :Yee' or 'ma-dih: bo 'weh, :ka Nyorsoa worlor:-a or-a' deh⧾-zon:⧾ or no-a :zai'.[10] :Yee' eh-a' dhih, 'an 'Klae :de-di'-boi'-a:, a vorn :naa, a 'ye 'de 'kpih po, eh 'ye 'o :zai' neh-' :zi, 'de a-a' 'da-a'-: 'dekorn: a-a' gan-a'-: en 'ye dih ku 'do Nyorsoa ybei'. :Yee' :mor eh 'dhu a no deh⧾ :daa, :yee' a :se-' dih 'ga-: i klehkpeh klehkpeh.[11] :Yee' Nyorsoa-a mu a :kpaa' 'i :za vuwor, 'de or 'bli yai', 'do :dha :Yusu' 'Klae :or no-a :a-a' :Gwlor :baa'-: 'dekorn: :a-a' 'puh-dih-nyor-: or :korn-a wlu 'ken, :ka ti-a mu-a 'dlu-' :tehn.

ÉphÈsefue 6:10-20
[10] :Yee' eh-a' klehkpeh-a' 'dlu-' :jla 'da, a :ku-dih: a-a' 'kpih dih 'do :Gwlor :baa'-a' :ne-a' bo. 'Nyi or-a' dhih-a' 'i 'beh-kpih :ku-dih: a dih.[11] A pa Nyorsoa-a' ta-tiei-a' klehkpeh or 'nyi-a a-uh, 'de a 'ye 'ku-a nyor⧾ dih :bo-dih-eh 'i :nyna.[12] Deh no-eh, eh :se :gwlor-nyor⧾-a' nyior-tu: :a :se-' bo vorn. Jorwor: :a vorn 'kwla 'ye-dih-deh:⧾ :en :ne-a 'o yao :gwlii'-: :yih :en :korn-a :kule wlu 'ken dha yao 'zorn-: 'dekorn: :yih :en :korn-a 'kpih-:.[13] :Yee' 'do eh-a' dha, a pa Nyorsoa-a' ta-tiei-a' klehkpeh :naa. 'De :mor 'kulu-we-eh 'yle, 'de a :ne-' ken :za-dih:. :Yee' :mor a vorn :chio'lo:, 'de a 'ye :ao', a se sea, 'de a 'ye-eh' 'dlu-' jla, :yee' a mu 'o :dha a :nyna-a dih :nyna 'gboror:.[14] :Yee' a :nyna dih deh 'jeh, 'de dhih-a' 'yor-eh 'di, eh 'ye 'behleh no, a 'ye-eh' bo 'dhu. 'Yi 'sleh-deh:, eh-: 'ye a-a'a: :gwlii' :kan-dih-deh no.[15] A :ne buh⧾ ken a 'ye Nyorsoa-a' tubo-wlu:⧾ 'jeh :en 'ble-a wlu-' dih 'worn-eh :po 'da mu. 'Nyi a-a' buh⧾ ken :ne-eh: :dao', eh no buh⧾-' :po-deh 'do a bo.[16] :Yee' 'do ti-a' klehkpeh bo, a kpa dhih 'jeh-' :po-eh, eh 'ye a-a'a: 'yi :kan-dih-deh no. Deh no-eh, eh-: a mu :no, 'de a 'ye neh-a' klehkpeh :eh mu-a 'o 'ku-a'a: pluh-sehn mlai' 'wluh-: 'mo-dih:.[17] A 'worn-dih: 'puh-a' Nyorsoa 'nyi-a a-uh or-a' dhih ken dih. Or-: no deh nyor⧾-a 'dhu-a 'dlu 'de deh-a' tba-a nyor⧾. 'De mor a 'worn-dih: Nyorsoa-a' wlu :on no-a or-a' :Zulu-a' :bhla 'jlehn-a' dhih ken dih :ke.[18] A no deh⧾-a' klehkpeh :daa 'de Nyorsoa-a' bo :wlu-eh 'di. A dhele-or dih, or 'ye a-uh' :za-dih:. A :wlu 'de or bo 'do ti-a' klehkpeh bo 'de or-a' :Zulu-a' 'kpih 'di, :ka an no-a a-a' :na-dih-eh. :Yee' eh-a' dhih, a-a' 'mo-:-', 'de mor a-a' :sea:-'. A :wlu 'de or bo 'do ti-a' klehkpeh bo 'do or-a' nyor⧾-a' klehkpeh, an-a' dhih bo.[19] 'De mor a :wlu 'de or bo, 'do 'an dhih bo :ke, or 'ye 'on tubo-wlu⧾ 'nyi, :mor 'on :taa or-a' dhih-' :za 'da mu. 'De 'on 'ye 'slan :or kor-a Nyorsoa-a' tubo-wlu:⧾ 'jeh 'i, 'on 'ye-or ken dih zela:, 'de :gwluhuh' :ku ka 'di.[20] :Yee' :koan: :daa 'on no-a, eh-: no-eh, 'de 'on :ne :kasue 'di :naa. Jorwor: a bale: Nyorsoa, 'on 'ye :gwluhuh' :ku, :ka 'on :korn-a 'on 'ye-a' :ne, :mor 'on :taa tubo-wlu:⧾ 'jeh :daa po.

Galatiefue 5:13-26
[13] :Yee' 'an 'Klae :de-di'-boi'-a:, a :mor :mloror', Nyorsoa 'da a 'weh, a 'ye 'de 'gegeye 'wluh. :Yee' :ka a 'wluh-a 'de 'gegeye :naa, :yee' a-a' :yi-dih-eh:-' 'i, 'de a-a' no deh⧾-zon:⧾ a-a' :gwlor-nyor-tu-a 'bhorn-a. Jorwor: a no a 'bei'-a' 'bhoi-nynuu, 'de :ybeh-dih: ka 'di.[14] Deh no-eh, :Mose'-a' 'tele'⧾-a' klehkpeh 'wluh 'noror 'tele' :due' :daa 'di, :eh 'dhu-a, :Ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'.[15] :Yee' :mor a :taa-' 'memeh, 'de a 'ye a 'bei' 'kle 'ye-dih: :eh gweh-a 'dle-: ji-:, :yee' a 'dhu-eh :dhororn' :mor a se :gwluhuh' dih 'wla, a-a' :dha :due' 'kpa-eh mu ya :gba 'tene' :kpeen:.[16] Deh 'an za-a-', eh-: :dhe dih. A 'nyi Nyorsoa-a' :Zulu :korn a-a' 'kmo :ne-eh wlu 'ken. :Yee' deh⧾-zon:⧾ a-a' :gwlor-nyor-tu-a 'bhorn-a a 'ye-a' no, a :se-' :no i.[17] Deh no-eh, deh⧾-zon:⧾ a-a' :gwlor-nyor-tu-a 'bhorn-a-: 'dekorn: deh Nyorsoa-a' :Zulu-a 'bhorn-a-: en se :gwie :due' kpa. 'De mor wlu-' dih 'worn-eh se 'o en 'nyne bo :ne. Eh-: no-eh, 'de a-a' no deh a 'bhorn-a a 'ye-a' no.[18] :Yee' :mor eh 'dhu Nyorsoa-a' :Zulu :taa a na-dih, :yee' a se 'o :Mose'-a' 'tele' 'zorn :ne.[19] Deh⧾-zon:⧾ :en 'wluh-a 'de :gwlor-nyor⧾-a' 'bhororn'-deh⧾ bo, nyor⧾ yubo-ih', me-: 'dhu, 'tmeor:⧾ :korn-eh-: se :vlehehn'-' :gweh-deh⧾-: 'pebe' 'i 'kpa-eh-:[20] nyor⧾ :an za-a zuu⧾-a' :weheh'-: :yuh :on no-a 'gwiorn⧾-: nyor⧾ :on 'nyeh-a on 'bei'-: 'dekorn: :yuh :korn-a wlu⧾-a vorn-a 'de an-a' 'jeh 'nyne-: :gwlehehn' :korn-nyor⧾-: 'chehn-' :gwlii' :ne-nyor⧾-: nyor⧾ :an zi-a on :due' dhih-:, a :za a-a' 'jeh 'sororn'-: 'de a 'kpuhba: ya dih-: :korn mor 'cheh 'ya 'cheh 'ya-:[21] :porluh-a' sin-a' 'do deh⧾-a' klehkpeh bo-: nomor 'na-eh-: 'nynor⧾ :zie-dih-eh-a' gor⧾ deh⧾-' dih-: 'dekorn: noo-deh:⧾ :nee' :en :ne-a :yih :daa en-' goor-dih:-a-: :ke. 'On 'dhu a 'slen 'weh :zai'. Jorwor: 'an za-ih-' de :neheh', nyor⧾ :an no-a deh⧾ :en :ne :ao', on :se-' Nyorsoa-a' nyor⧾ wlu 'ken :korn-eh 'zorn :pa i.[22] Jorwor: Nyorsoa-a' :Zulu-a: no-eh, 'de nyor⧾-a ybeh-dih, 'de 'mona 'yi-dih nyor⧾-' dih, 'de on 'ble wlu-' dih 'worn-eh-: :porluh-a' dih :kpon-eh-: :porluh-a' 'yi dih :nmor-eh-: deh⧾ 'jeh :no-eh-: 'dekorn: :dhehehn-nyor⧾-:.[23] 'De :Zulu: :ne-a :due', an no-eh, 'de nyor⧾-a kpon-eh 'i, 'de an korn an-a' 'jeh wlu 'ken, on :ne-' deh-zon no. Eh se 'tele' :korn :eh 'ye deh-zon-' :za, 'do deh⧾ :daa 'bhun.[24] 'De mor nyor⧾ :on :korn-a 'de :Yusu' 'Klae bo, an-a' 'worn an-a' :gwlor-nyor-tu-a' 'bhororn'-deh⧾-zon:⧾ :en an 'bhorn-a on 'ye-a' no 'gabaa, en-' korn-uh wlu 'ken :neheh'.[25] Nyorsoa-a' :Zulu: no-eh, 'de :a :ne 'kmo. :Yee' 'nyi on :korn :a-a' 'kmo :ne-eh wlu 'ken.[26] :Yee' a 'bor a-a' 'jeh 'i 'beh-dih-eh, 'de mor a 'bor a 'bei' 'chehn-' dih :po-eh-: 'dekorn: a 'bei' :gwlehehn' bo :no-eh-:.

Tite 2:1-15
[1] :Yee' Talor', :mor :mloror', :ka nyor⧾ deh :torne-eh: 'jeh-a' :gwie⧾ no-a mu-a', 'ka-: :on 'ye nyor⧾ deh :torne-eh no.[2] :Torne: nyor⧾ :bholuh⧾ deh, on 'ye 'de 'yli 'de dih tba, 'de on 'ye an-a' 'jeh deh-' 'ye, 'de on 'ye an-a' 'jeh wlu 'ken :korn, on :ne-' deh-zon no, 'de on 'ye 'kwla :gweh 'de 'Klae-a' dhih 'jeh-' :po-eh-: :ybeh-dih-eh-: 'dekorn: :an-a' sea-: 'di.[3] 'Ka :wor :on 'ye no :ke, 'do 'nynor⧾ :bholuh⧾ bo. :Torne-eh on :ka Nyorsoa-nynor⧾-kpao'⧾ :korn on 'ye-a' 'kmo :ne-eh no, 'de on :ne-' nyor⧾ deh⧾-zon⧾ 'bhun dih :za-dih:, 'de on :ne-' nomor 'na-nyor⧾ no. Jorwor: 'nyi on :torne: nyor⧾ deh⧾ :en 'sleh-a 'i,[4] 'de on 'ye 'nynor⧾ :gbolo'⧾ deh :torne: :ke, :ka on 'ye-a' an-a'a: yibeor-boi'-: 'dekorn: an-a'a: 'nynuu-: an-a' dhih :kma-eh no.[5] :Torne-eh on, on 'ye an-a' 'jeh wlu 'ken :korn, on :ne-' deh-zon no, on 'ye :vlehehn'-' :gweh-nyor⧾ no, 'de on 'ye 'nynor⧾ 'jeh no no, :an 'dhu-a 'gbu 'yli-eh bo deh 'jeh, 'de an-a' :porluh⧾ 'ye 'yi dih :nmor, on 'ye an-a' 'jeh ya :ya 'do an-a'a: yibeor-boi' 'zorn, 'de nyor⧾ :ne-' Nyorsoa-a' wlu 'bhun dih :wlu-dih:.[6] 'Ka :wor :on 'ye no :ke, 'do nyor⧾-kpalu⧾-nynuu: :gbolo'⧾ bo. :Wlu 'de on bo, on 'ye an-a' 'jeh wlu 'ken :korn, on :ne-' deh-zon no.[7] :Mor an mu ya pobo:, 'do deh⧾-a' klehkpeh :an mu-a :no bo, :yee' deh⧾ :en :nmor-a 'yi dih, me-: :on 'ye no. :Mor :on :taa nyor⧾ deh torne, :yee' 'nyi eh tba 'de :on 'di dih, 'de mor :an-a' 'wluh-dih:-' :goba'-dhih ken dih.[8] :Mor :on :taa-eh no, :dha wlu :korn-a, 'do :wor :on 'ye-uh' :po-dih:, 'de nyor⧾ :ne-' ka 'ye, 'do :an-a' dhih 'bhun dih :za-dih: 'da, 'de dhen 'ye nyor⧾ :an vorn-a :on bo no. Deh no-eh, deh-zon:, on 'ye-a' :za 'do :a 'bhun, eh se :ne.[9] :Yee' :torne: 'ge-nynuu deh, on 'ye an-a' 'jeh ya :ya 'do an-a'a: nyor⧾ :klaba'⧾ :on korn-uh-a wlu 'ken, 'zorn, 'de deh⧾-a' klehkpeh 'di, 'de on 'ye 'de 'kpih po, on 'ye an-a'a: nyor⧾ :klaba'⧾ :dao'-a' :porluh⧾ dih 'pehn-dih:. On se :korn on 'ye-uh' worn 'i 'si.[10] 'De mor on se :korn on 'ye-uh' bo 'yli. Jorwor: on :korn on 'ye-eh on :torne: :ka on 'beh-dih:-a on 'ye-uh'-a :gwlii' dhe 'do deh⧾-a' klehkpeh bo. 'De on 'ye-eh' no, on 'ye Nyorsoa :or no-a :a-a' 'puh-dih-nyor, or-a' nyor⧾ deh :torne-eh 'nyne 'nyi, 'do deh⧾-a' klehkpeh bo.[11] Deh no-eh, Nyorsoa :to-dih: or-a' mla nyor⧾-a' klehkpeh-: 'i, 'de an-a' klehkpeh 'ye 'puh-a' 'beh-dih:.[12] Nyorsoa-a' mla :daa, or-: :torne-eh :a-uh, :ka :a 'ye-a se Nyorsoa deh-' 'ye-kplen-a' 'kpuh ya :to-eh no-: 'dekorn: :porluh-a' sin-a' 'do 'kmo bo deh⧾-a' 'bhorn-a' bo-:. Or-: :ne-a :due', or-: :torne-eh :a-uh :ka :a 'ye-a :a-a' 'jeh wlu 'ken :korn-eh no, 'de :a :ne-a' deh-zon no-: 'yi 'sleh-deh-a' no-a'-: 'dekorn: 'kmo-' :ne-eh: :eh 'pehn-dih-a Nyorsoa-a' :porluh dih-: 'noror ti :a :ne-a ken :naa 'di.[13] Deh⧾ :daa, me-: :a :korn :a 'ye no, :ka :a fuo-a :bhorlie'-we-eh: :a-a' klehkpeh :a dhe-a :gwlii', :eh mu-a 'de :yi 'ken. 'Do 'we-eh: :dao' 'di, :Yusu' 'Klae :or no-a :a-a' 'yi 'beh-Nyorsoa-: 'dekorn: :a-a' 'puh-dih-nyor-: or mu :a 'i 'wluh-dih:, 'de or-a' dhih-a' 'i 'beh-a' 'di.[14] Or :za or-a' 'jeh 'kwla 'weh, 'do :a-a' dhih bo, or 'ye :a zelie:, or 'ye :a 'de deh⧾-zon⧾-a' klehkpeh 'di :za, or 'ye-eh' no, 'de :a 'ye :vlehehn'-' :gweh-nyor⧾ no, :on :korn-a 'de or :due' bo, 'de :on :korn-a :porluh⧾-a: sin-a, :on 'ye-a deh⧾ 'jeh ne no.[15] :Yee' deh⧾ :daa, me-: :on 'ye nyor⧾ :torne:. :Mor :on :taa-eh no, :yee' po 'de an-a' 'kpih. No Nyorsoa-a' 'kpih, :on 'ye-uh' 'o :gwie 'i po. :An-a' 'worn-:-', an-a' nyor-beh-nyor-beh:-' :vlehn-' :on.

Jacques 3:1-18
[1] :Yee' 'an 'Klae :de-di'-boi'-a:, a-a' :dha :dhulu'-a' :no-' nyor⧾ deh :torne-nyor⧾. Deh no-eh, a yubo-eh', :a :mor no-a nyor⧾ deh :torne-nyor⧾, Nyorsoa-a mu :a-a' zabe :zi 'gabaa, eh 'ye 'o nyor⧾ :noo' :zi.[2] :A-a' klehkpeh, :a no deh⧾ :dhulu' 'i :zi-nyor:⧾. Jorwor: :mor nyor 'see deh 'i zi 'de or-a' :zaa-dhih 'di, :yee' or no nyor :or :gweh-a 'kwla 'de Nyorsoa-deh 'di, 'de or 'beh-dih: or-a' 'jeh-a' yau wlu 'ken :korn-eh 'weh.[3] :A ya-dih dubu' 'de :soo'o 'worn. Eh-: no-eh 'de :a 'beh-dih: or-a' 'gbono-a' klehkpeh-' dih 'bili-eh.[4] A pobo: 'ni ken-meheh: 'kawehn: :daa ya :ke, :ka eh no-a 'yi 'beh-eh, 'de :kmuu-pobor'-a kpa-eh. Jorwor: 'dho :bli-dih-deh-yu: eh-: 'sleh-dih-eh 'i, 'de eh mu :dha eh-a' :janbe-a 'bhorn-a eh 'ye-a' mu.[5] 'Ka-: 'o :meo :ne :ke. On no deh-yu-beh: 'do :gwlor-nyor⧾ 'bhun, jorwor: an za-' deh⧾ :klaba'⧾ an mu-a :no. A pobo: 'kwlae-gle: 'kpulu'eh: :daa ya, :nane'-eh-yu-a po-a 'yli.[6] :Meo gweh neh :ke. 'Kpih on 'ble-a, en 'wluh 'de 'kulu-deh⧾ bo. On no :a-a' yau-a' deh, 'de an 'kor-dih :a-a' nyior-tu-a' klehkpeh. Neh :eh 'wluh-a 'de 'ku 'bli, eh-: an no, 'de nyor-a' :febeh'-a' klehkpeh gweh :ka deh :ne-a 'de neh-'.[7] Nimi⧾-: neme-: 'dekorn: zimi-: :gwlor-nyor 'beh-dih: en-' klehkpeh-a' :dhaa-a' :za-eh 'weh, 'de mor or :gwle 'o, eh-a' no-a' 'weh.[8] Jorwor: eh se nyor :korn, :or 'ye-a' :meo deh :torne:. :Meo no 'kulu-deh:. Nyor se an-a' wlu 'ken :korn-eh 'beh-dih:, :on gweh-a deh :eh 'yi-dih:-a gu-ni-' dih.[9] :Meo: :ne-a :due', mo-: :a no :a po :a-a' :Gwlor :baa' :or no-a :a :Baa'-a' 'nyne ya. :Meo-a' 'jeh :dao', mo-: :a no, 'de :a po nyor⧾ Nyorsoa no-a 'de or-a' 'jeh-a' nyior-tu 'di 'chlo bo.[10] 'De worn :due' :dao' 'di, 'do :wor Nyorsoa-a' 'nyne ya :po-eh-: 'dekorn: nyor⧾ 'chlo bo :po-eh-: 'do :wor en 'wluh. 'An 'Klae :de-di'-boi'-a:, deh⧾ :daa en se-eh 'i :bleh-dih: en 'ye :ao' :ne.[11] 'Ni 'jeh neh-: 'dekorn: 'torn-ni-: en 'beh-dih: en 'ye 'de tluh-a' 'jun :due' 'di 'wluh :e?[12] 'An 'Klae :de-di'-boi'-a:, yuh 'beh-dih: on 'ye :nyami'eh-bi :tlo :e? :Ae' 'nyoeh' 'ye gwehn :tlo ke? 'Kei:. 'De mor 'torn-ni-jun se 'de 'ni 'jeh neh-a' :ya-a' 'beh-dih: :ke.[13] :Yee' nyor :or no-a :toror' :korn-nyor, 'de :or no-a deh-' dih 'worn-nyor 'de a 'klu-', 'nyi or-a' kplen 'jeh po eh-a' kuna', :en no-a deh⧾ or no-a 'de :toror' :korn-eh-: 'dekorn: 'de or-a' 'jeh ya :ya-eh 'di-:.[14] Jorwor: :mor eh 'dhu, a-a' :porluh⧾ 'yi-dih: :gwlehehn' dih, 'de a 'ye a-a' 'jeh-a' dhih zi, 'do a :porluh⧾ ken, :yee' a 'bor a-a' 'jeh 'i 'beh-dih-eh, :eh :mor a :korn :toror'. :Mor a no-eh, :yee' a 'tmo sih.[15] :Toror' :korn-eh-a' :yeh :dao', eh :se 'de Nyorsoa 'bli yai' 'wluh, jorwor: 'kmo-a' :toror' :korn-eh: 'o. Eh :se Nyorsoa-a' :Zulu-a' :neh, jorwor: 'ku-a' :neh 'o.[16] :Dha :gwlehehn'-: :korn a-a' 'jeh-a' dhih :zi-eh-: en :ne-a, 'do :wor :zaa'za-: 'dekorn: deh⧾-zon⧾-a' klehkpeh-a' no-a' :gweh-dih:.[17] Jorwor: :zai'-deh:, nyor⧾ :on 'ble-a :toror' :or 'wluh-a 'de Nyorsoa 'bli yai', on no nyor⧾ :on :gweh-a :vlehehn'-', 'de on se :zaa'za 'ble, on no 'yi :kpoehn-nyor:⧾, 'de an 'ye nyor⧾ bo. On 'yi-dih: nyor⧾ :wehlih 'ye-eh dih. Kplen 'jeh-a' klehkpeh, me-: :korn 'bi an tlo. An-a' :za :gwie-for :due'. 'De deh⧾ an za-a-', 'de an no-a, en tba 'de on 'di-: dih.[18] Nyor⧾ :on no-a nyor⧾ 'yi zela-nyor⧾, se :zaa'za 'ble-a' 'yor :oo', an gba. :Yee' an mu 'yi 'sleh-deh⧾-a' 'bi 'kpan-:.

Baoule Bible 1996
© Bible Society in Liberia, 1996