A A A A A

Church: [Pastors]


2 Timothée 4:2
:on 'ye Nyorsoa-a' tubo-wlu⧾ po. :Ne buh⧾ ken, :on 'ye-eh' no, 'do ti-a' klehkpeh bo. :Mor nyor⧾ :taa-ih-a :dou'⧾ bo to-: 'de mor an-a' :yeh se-ih :dou'⧾ bo :to-: po-ih 'suh. Po 'o nyor⧾ :gwie 'i. :Wlu-dih: 'yi zi-deh⧾ 'bhun dih. Po 'de nyor⧾-a' 'kpih. :Mor :on :taa nyor⧾ deh torne, :yee' kpon :porluh dih.

Sa nga bé yôli'n 20:28
:Yee' eh-a' dhih, a 'dhu a-a' 'jeh 'yli-eh bo, 'de mor a 'dhu nyor⧾-a' klehkpeh Gban 'i :ne :Zulu po-a 'de a 'kwa, 'yli-eh bo :ke. A :mor :korn :or 'ye Nyorsoa-a' 'chore-nyor⧾ 'yli-eh bo 'dhu, :ka 'blae'⧾-a' 'yli-eh bo 'dhu-nyor⧾-a no-a. Or-a' 'yu-a' 'meh-a', eh-: no-eh, 'de 'chore-nyor:⧾ :dao', on no or-a'a: nyor⧾.

Hébreu 13:17
A dhe 'o nyor⧾ :an na-dih-a a-uh, an-a' 'tele' dih. :Yee' a :ya a-a' 'jeh ya 'do on 'zorn. Mo-: :an 'dhu a 'yli-eh bo 'do ti-a' klehkpeh bo. Deh no-eh, eh mu 'we-eh :korn, :koan: :or :po-eh 'de on 'kwa, an mu :ka on no-a or-a' no-a', eh-a' dhih bo zela: 'do Nyorsoa ybei'. :Mor a dhe 'o an-a' 'tele' dih, :yee' an mu an-a' :koan :no, 'de 'mona: ka 'di. Jorwor: :mor a se-eh no, :yee' an-a' :porluh⧾-a mu 'zorn 'kpa-:. 'De mor eh mu-eh :no, a :se 'o deh 'ye-: i.

Jacques 3:1
:Yee' 'an 'Klae :de-di'-boi'-a:, a-a' :dha :dhulu'-a' :no-' nyor⧾ deh :torne-nyor⧾. Deh no-eh, a yubo-eh', :a :mor no-a nyor⧾ deh :torne-nyor⧾, Nyorsoa-a mu :a-a' zabe :zi 'gabaa, eh 'ye 'o nyor⧾ :noo' :zi.

ÉphÈsefue 4:11-12
[11] Or-: :ne-a :due', or-: 'o, :or 'nyi :gwlor-nyor⧾ :koan: 'doror: 'dor. Or :za :noo', on 'ye or-a' dboo-nyor⧾ no, :noo' 'ye or-a' wele-eh: :po-nyor⧾ no, :noo' 'ye Nyorsoa-a' tubo-wlu:⧾ 'jeh deh⧾-' dih kpa, :noo' 'ye 'chore-a' nyor⧾ :na-dih-nyor⧾ no, 'de :noo' 'ye nyor⧾ deh :torne-nyor⧾ no.[12] Or no deh⧾ :daa 'weh or 'ye Nyorsoa-a' nyor⧾ 'kpa po, 'de on 'ye :koan: nyor⧾ :an zi-a 'o or klei' an no-a, on 'ye-or' no, 'de 'Klae-a' nyor⧾ :on 'dhu-a or-a' yau, on 'ye :kmu.

1 Pierre 5:1-4
[1] 'Mor :or 'dhu-a 'chore-a' nyor :klaba'-', 'mor-: wlu 'de 'chore-a' nyor⧾ :klaba'⧾ :on :ne-a 'de a 'klu-' bo. 'On 'ye :ka 'Klae no-a 'kle 'ye-eh 'weh, 'de 'on no nyor :or mu-a 'for 'ble-: 'de or-a' dhih-a' 'i 'beh-a' :or mu-a :a 'i :to-dih-eh 'di.[2] :Ka 'blae'⧾-a' 'yli-eh bo 'dhu-nyor⧾ no-a, 'ka-: a 'ye nyor⧾ Nyorsoa po-a 'de a 'kwa, an-a' 'yli-eh bo 'dhu-eh no. A 'dhu-uh' 'yli-eh bo, 'de :porluh-a' dih 'pehn ka 'di, :ka Nyorsoa 'bhorn-a, a 'ye-a' no, eh :se 'de a-a' 'kpih :kpa-dih: ka 'di. 'De mor a-a' :zi-' 'wlii-dhih 'suh, jorwor: 'nyi eh 'wluh 'o a :porluh⧾ ken.[3] Nyor⧾ Nyorsoa po-a 'de a 'kwa, a-a' :kpa-dih:-uh' 'kpih. Jorwor: a :mor an mu ya pobo:, 'do deh⧾-a' klehkpeh a mu-a :no bo.[4] :Yee' :mor 'Klae :or no-a Nyorsoa-nyor⧾-a' klehkpeh an-a' 'yli-eh bo 'dhu-nyor: :klaba', :mor or 'yle, :yee' a mu geli' :za-dih: :gblaa', :or :korn-a dhih 'beh-a' 'i, 'de :or :se-a' worn :gweh i 'ye-: 'de or 'kwa.

Tite 1:5-9
[5] :Yee' deh :korn-a dhih, 'de 'on :sie:-a 'de :on 'Klii-bluhba ken, 'an 'bhorn :on 'ye deh⧾ :en se-a 'i :gweh, :on 'ye-ih' 'i gweh, :on 'ye 'chore-nyor:⧾ :klaba'⧾ kpala'⧾ 'i po, 'de gwlor⧾ 'di dih, :ka 'on no-a :an-a' :gwluhuh' zela-eh.[6] 'Chore-a' nyor :klaba' se :korn or 'ye dhih 'bhun :ne. Or :korn or 'ye 'nynor :due' :korn 'klein'. Or-a'a: 'nynuu :korn on 'ye 'Klae-a' dhih dhih 'jeh-' po. On se :korn on 'ye 'nyne-zon⧾ 'ble, :eh :mor nyor se an-a' wlu 'ken :korn-eh 'beh-dih:, 'de mor an-a' dhe 'o on 'de-: 'dekorn: on :baa'-: an-a' wlu dih.[7] :Yee' :ka Nyorsoa-a' :koan :po-eh 'de 'chore-a' nyor⧾ :na-dih-nyor 'kwa, :yee' or se :korn or 'ye dhih 'bhun :ne. Or-a' :no-', or :due' or-: yubo: deh 'i. Or se :korn or 'ye 'chehn-' :ne. Or-a' :no-' nomor 'na-nyor. Or se :korn or 'ye deh⧾ 'kor-dih-nyor no. Or se :korn or 'ye 'wlii-dhih :due' zi.[8] Jorwor: or :korn or 'ye or-a'a: 'gbu 'kwla :za 'do 'duhba⧾ bo. Or :korn or 'ye deh 'jeh-' :ybeh. Or :korn or 'ye or-a' 'jeh wlu 'ken :korn, or :ne-' deh-zon no. Or :korn or 'ye 'yi 'sleh-nyor no, :or :dhe-dih-eh 'for 'i 'do Nyorsoa bo. Or :korn or 'ye :gwluhuh' dih :florn.[9] Or :korn or 'ye Nyorsoa-a' tubo-wlu:⧾ 'jeh, :en nyor⧾ dhe-a :gwlii', 'de on :torne:-a :a-uh, dih kpon :glii:, 'de or 'ye nyor⧾-a' 'kpih bo :po-eh 'beh-dih:, 'do nyor⧾ deh :torne-eh: 'jeh bo, 'de or 'ye :yuh :an vorn-a nyor⧾ deh :torne-eh: :daa bo, :gwluhuh' zela: :ka on se-a 'o :gwie 'i :ne.

1 Timothée 3:1-13
[1] :Yee' dhih :en no-a dhih 'jeh, me-: :dhe dih. :Mor nyor :taa 'bhorn or 'ye 'chore-a' nyor⧾ :na-dih-nyor no, :yee' :koan: or 'bhorn-a, or :nmor-: 'yi, 'de or 'kpa deh ken.[2] :Yee' eh-a' dhih, nyor⧾ se :korn on 'ye 'chore-a' nyor⧾ :na-dih-nyor dhih 'bhun 'ye. Or :korn or 'ye 'nynor :due' :korn 'klein'. 'De mor, or-a' 'jeh :dao', or :korn or 'ye nyor :or tba-a 'de 'yli 'de dih no. Or :korn or 'ye :gwluhuh' dih :florn. Or :korn or 'ye or-a' 'jeh deh-' 'ye. :Yee' or :korn or 'ye or-a'a: 'gbu 'kwla :za 'de 'duhba⧾ bo. Or :korn or 'ye nyor⧾ deh :torne-eh 'beh-dih:.[3] Or-a' :no-' nomor 'na-nyor-: 'dekorn: deh⧾ 'kor-dih-nyor-:. Jorwor: or :korn or 'ye 'yi :kpoehn:. Or-a' :no-' :wluu-nyor. Or-a' :no-' nyor :or :kma-a 'wlii-dhih.[4] Or :korn or 'ye 'de or 'bli 'gbu wlu 'ken :korn-eh 'beh-dih: deh 'jeh. Or :korn or 'ye-eh' no, or-a'a: 'nynuu 'ye 'o or-a' wlu dih dhe, 'do deh-' 'ye ka 'di.[5] :Mor nyor se 'de or 'bli 'gbu-a' wlu 'ken :korn-eh 'beh-dih:, :yee' :kaa or mu Nyorsoa-a' 'chore-a' 'yli-eh bo 'dhu-eh :no :eh?[6] Or se :korn or 'ye 'Klae-a' dhih 'jeh-' :po-nyor: :dele' no, 'de or :ne-' or-a' 'jeh 'i 'beh-dih:, 'de :ka Nyorsoa no-a 'ku-a' zabe: :zi-eh, or :ne-' :ao', or-a' zabe: :zi-eh no :ke.[7] :Yee' or :korn or 'ye 'nyne 'jeh 'ble, 'de nyor⧾ :on :se-a 'noror 'chore :ne bo, 'de or :ne-' yaa'e 'kpa, 'de or :ne 'de 'ku 'kwa dih 'si-dih:.[8] :Yee' 'de :ka :ne-a :due' 'di, nyor⧾ an 'da-dih-a 'dikeh-boi' 'de 'chore-', on :korn on 'ye an-a' 'jeh deh-' 'ye. Or se :korn or 'ye dhih 'kpuh ken :chehn-dih:. Or :korn or 'ye :porluh 'di dih tba, 'de or 'ye :wlu. An-a' :no-' nomor 'na-nyor⧾. 'De an-a' :no-' nyor⧾ :an zi-a 'wlii-dhih :due'.[9] On :korn on 'ye 'slan :or kor-a :a-a' 'Klae-a' dhih 'jeh-' :po-eh 'i, dih kpon :glii:, :eh :se-a 'de :porluh⧾-a' dhobo: ka 'di.[10] On :korn on 'ye-uh' bo dih yubo: :zai'. :Yee' :mor deh-zon se 'o on 'bhun :ne, 'de jorwor: on 'ye 'dikeh-boi' no 'de 'chore-'.[11] 'De :ka :ne-a :due' 'di, 'nynor⧾-kpao'⧾ :an no-a :koan 'de 'chore-', on :korn on 'ye an-a' 'jeh deh-' 'ye. On se :korn on 'ye nyor⧾ :chehn-nyor⧾ no. On :korn on 'ye nyor⧾ :on tba-a 'de 'yli 'de dih no. On :korn on 'ye :dhehehn-nyor⧾ no, 'do deh⧾-a' klehkpeh an mu-a :no bo.[12] :Yee' nyor :or no-a 'dikeh 'de 'chore-', or :korn or 'ye 'nynor :due' :korn 'klein'. 'De or :korn or 'ye or-a'a: 'nynuu-: 'dekorn: nyor⧾ :noo' :on :ne-a 'de or 'bli 'gbu-: an-a' wlu 'ken :korn-eh 'beh-dih: deh 'jeh.[13] :Yee' 'dikeh-boi' :on no-a :koan: 'jeh nor, :koan: 'jeh nor, on no-a, or-: mu-eh :no, 'de on 'ye 'nyne 'jeh 'ble, 'de or mu-eh :no :ke, on 'ye :gwluhuh' :ku, :mor on :taa dhih 'jeh-' :po-eh: on 'ble-a 'de :Yusu' 'Klae-', eh-a' dhih-' za.

Baoule Bible 1996
© Bible Society in Liberia, 1996