A A A A A

Həyat: [Ad günü]


Efeslilərə 2:10
چونکي بئز اونون صَنَتئيئک و مسئح عئسادا ياخشي عمل‌لر اوچون يارانديق. بو عمل‌لري تاري قاباقجادان حاضيرلادي کي، بئز اونلاردا رفتار ادک.

Yeremya 29:11
چونکي سئزئن باره‌نئزده اولان فئکئرلرئمي اؤزوم بئلئرم.» رب بويورور. «من سئزئن پئسلئيئنئز يوخ، سالاماتليغينيز باره‌ده دوشونورم، نئيّتئم بودور کي، سئزه بئر اومئد و بئر گله‌جک ورئم.

Yəhya 16:21
آرواد، اوشاغينين دوغوم واختي يتئشن زامان، آغري چکر، آمّا اوشاغيني دوغاندان سونرا، بئر ائنسان بو دونيايا گتئرمه‌سئنه گؤره، شادليغيندان آغري ياديندان چيخار.

Süleymanın Məsəlləri 9:11
چونکي گونلرئن منئم واسئطمله چوخالاجاق، و عؤمرونه ائل‌لر آرتاجاق.

Zəbur 16:11
حيات يولونو منه بئلدئرئرسن. شادليق دولولوقلا سنئن حوضوروندادير، صاغ طرفئنده ابدي کِفلردئر.

Zəbur 20:4
اوره‌يئنئن آرزوسونو سنه ورسئن، بوتون مورادلارينا چاتاسان.

Zəbur 27:4-7
[4] ربدن بئر شي آرزو ادئرم، اونو آختاريرام: کي، حياتيمين بوتون گونلرئنده ربّئن اوئنده ساکئن اولوم. کي، ربّئن گؤزل‌لئيئني گؤروم، اونون معبدئنده هئدايتئني آختاريم.[5] چونکي يامان گونده او، مني اؤز خيمه‌سئنده گئزلده‌جک؛ چاديرينين گئزلي يرئنده منه پناه وره‌جک، او مني قايا اوستونه اوجالداجاق.[6] اونا گؤره باشيم، دؤورمده اولان دوشمنلرئمئن اوستونه اوجالاجاق. اونون چاديريندا شادليقلا قوربانلاريمي تقدئم اده‌جيم. اوخوياجاغام، ربّه پرستئش نغمه‌سي اوخوياجاغام.[7] سني چاغيران واخت، سسئمي اشئت، يارب! منه يازيغين گلسئن، منه جاواب ور.

Zəbur 90:12
اونا گؤره ده گونلرئمئزي سايماغي بئزه اؤيرت کي، حئکمتلي بئر اوره‌يه صاحئب اولاق.

Zəbur 91:11
چونکي سنئن اوچون ملکلرئنه فرمان وره‌جک کي، بوتون يوللاريندا سني قوروسونلار.

Zəbur 91:16
اونو اوزون بئر عؤمورله دويوراجاغام، نئجاتيمي اونا گؤرسده‌جيم."

Zəbur 118:24
بو گون ربّئن ياراتديغي گوندور؛ اوندا سوئنئب شاد اولاجاغيق.

Sefanya 3:17
تارين رَب، قووّتلي قورتاريجين سنئن آراندادير! او سنئن اوچون سِوئنئب شادلاناجاق، سني محبّتي ائله آرام اده‌جک، سنئن اوچون شادليق ادئب اوخوياجاق!

Zəbur 37:4-5
[4] ربدن لذّتئني آل، او دا سنه اوره‌يئنئن موراديني ورر.[5] يولونو ربّه تاپشير، اونا توکّول ات؛ رب اونو يرئنه يتئرر.

Mərsiyələr 3:22-23
[22] ربّئن مهرئبانليغي دوغرودان اصلا تؤکَنمَز، چونکي اونون شَفقَتئنه نهايت يوخ.[23] بونلار هر سحر تزه‌له‌نئر، سنئن وفادارليغين بؤيوکدور.

Saylar 6:24-26
[24] «رب سئزه برکت ورئب، سئزي قوروسون؛[25] رب اؤز نورلو اوزونو سئزه ساچسين. سئزه عئنايت گؤرسدسئن؛[26] رب اوزونو سئزه طرف چِوئرسئن، سئزه باريش ورسئن.‎»

Zəbur 139:1-24
[1] يارب، مني ائمتئحانا چکئبسن و تاني‌ييبسان.[2] نه زامان اوتوردوغومو، نه زامان قالخديغيمي بئلئرسن: فئکرئمي اوزاقدان آنلاييرسان.[3] يولومو و ياتديغيم يري گؤز آلتينا آليرسان، منئم بوتون يوللاريمدان خبرئن وار.[4] دئلئمه بئر سؤز گلمه‌مئش، باخ، يارب، سن اونون هاميسيني بئلئرسن.[5] آرخادان و قاباقدان مني آرايا ساليب الئني اوستومه قويوبسان.[6] بو معلومات منئم اوچون چوخ عجايئبدئر؛ او قدر يوخاري کي، اونا چاتا بئلمئرم.[7] سنئن روحوندان هارايا گده بئله‌رم؟ سنئن حوضوروندان هارايا قاچا بئله‌رم؟[8] گؤيلره چيخسام، اوراداسان. دؤشه‌يئمي اؤلولر دئياريندا سالسام، اوراداسان.[9] اگر سحرئن قانادلاري ائله اوچوب گدم، دهنزئن او بئري باشيندا منزئل ادم،[10] اورادا دا سنئن الئن منه يول گؤرسه‌در، صاغ الئن مني توتار.[11] دسم: "قوي قارانليق مني اؤرتسون، قوي اطرافيمداکي ائشيق گجه‌يه دؤنسون"،[12] يقئن کي، قارانليق دا سنئن اوچون قارانليق ديئل، گجه ده گون کئمي ائشيقلانار، سنئن اوچون قارانليق و ائشيق بئردئر.[13] بؤيرکلرئمي سن ياراديبسان، آنامين بطنئنده سن مني توخويوبسان.[14] سنه شوکور ادئرم، چونکي هيبتلي و عجايئب بئر تَحَر يارانميشام! سنئن ائشلرئن قرئبه‌دئر؛ جانيم بونو ياخشي بئلئر.[15] گئزلي يرده ياراديلديغيم زامان، دونيانين درئن يرلرئنده قورولدوغوم زامان، بدنئم سندن گئزلي ديئلدي.[16] جنئن ائکن گؤزلرئن مني گؤردو؛ منئم اوچون تعيئن اولونان گونلرئن هاميسي، داها اونلاردان هچ بئري يوخ ائکن، سنئن کئتابيندا يازيلميشدي.[17] فئکئرلرئن منئم اوچون نه ديرلي‌دئر، اي تاري! ساييلاري نه قدر چوخدور![18] اگر اونلاري سايسام، قوم دنه‌لرئندن چوخ اولاجاق؛ اويانديغيم زامان حله ده سنئن يانيندايام.[19] کاشکي پئس آدامي اؤلدورسَيدئن، اي تاري! سئز، اي قاتئل‌لر، مندن اوزاق دورون![20] چونکي سنئن حاقّيندا کوفر دانيشيرلار، سنئن آدينين ضئدّئنه پئس سؤزلر ديئرلر.[21] يارب، سندن نئفرت ادنلردن مگر نئفرت اتمئرم؟! سنئن ضئدّئنه قالخانلاردان مگر ائير‌نمئرم؟![22] بوتون نئفرتئمله اونلاردان نئفرت ادئرم: اونلاري اؤزوم اوچون دوشمن ساييرام.[23] مني تفتئش ات، اي تاري، اوره‌يئمي بئل. مني ائمتئحانا چک و فئکئرلرئمي بئل.[24] باخ گؤر آيا قلبئمده پئسلئيه يول ورئرم؟ ابدي يولدا منه رهبر اول.

Azerbaijan Bible 2008
Southern Azeri translation. Copyright © 2008 Elam Ministries