A A A A A

Kilsə: [İsanın doğuşu]


Matta 1:18-23
[18] عئسا مسئحئن آنادان اولماسي بله اولدو؛ آناسي مريم يوسئفه نئشانلانميش اولان زامان، نئکاه کسئلمه​مئشدن، آشکار اولدو کي، موقدّس روحدان حامئله​دئر.[19] اونون اَري يوسئف، صالح بئر آدام اولدوغونا گؤره، ائسته‌مئردي کي، اونو روسواي اتسئن و بو نئيّتده ائدي کي، گئزلئجه اونو بوشاسين.[20] لاکئن بونلاري دوشونَن زامان، ربّئن بئر مَله‌يي رؤيادا اونا ظاهئر اولوب، ددي: "داوود اوغلو يوسئف، مريمي اؤزونه آروادليغا قبول اتمکدن قورخما، چونکي اونون بطنئنده​کي موقدّس روحداندير.[21] مريم بئر اوغول دوغاجاق و اونون آديني عئسا قوياجاقسان. چونکي او، اؤز خالقيني گوناهلاريندان خئلاص اده​جک."[22] بوتون بونلار اوندان اؤتري باش وردي کي، ربّئن پيغمبر واسئطه​سئله ددئيي سؤز يرئنه يتئشسئن:[23] "باخ، باکئره قيز بويلو اولوب، بئر اوغول دوغاجاق و اونون آديني عِمانوئل قوياجاقلار کي، معناسي بودور: تاري بئزئمله‌دئر."

Luka 2:7-21
[7] مريم ائلک اوغلونو دوغدو. اونو قونداغا سرئب آخوردا ياتيرتدي. چونکي اونلار اوچون مهمانخانادا ير يوخ ائدي.[8] او اؤلکه​ده چوبانلار وار ائدئلر کي، چؤلده ياشاييب سورولرئني قوروماق اوچون گجه اونلارين کشئيئني چکئردئلر.[9] ربّئن بئر مله‌يي اونلارين يانيندا ظاهئر اولدو و ربّئن جلالي اونلارين اطرافيني نورلا دولدوردو و اونلاري بؤيوک بئر دهشت بورودو.[10] ملک اونلارا ددي: "قورخمايين. باخين، من سئزه اله خوش خبر گتئرمئشم کي، هامي مئلّتلري چوخ سوئندئره​جک.[11] چونکي بو گون داوود شهرئنده سئزئن اوچون بئر قورتاريجي دوغولدو کي، رب مسئحدئر.[12] و سئزه علامت بودور؛ قونداغا سرئلمئش و آخوردا ياتميش بئر کؤرپه تاپاجاقسينيز."[13] بئردن بئره ملکله گؤي لشکرئنئن فوجو گؤروندو. اونلار تارييا حمد اده‌رک ديئردئلر:[14] "لاپ اوجالاردا اولان تارييا عئزّت، ير اوزونده اونون مرحمتي آلتيندا اولان ائنسانلار آراسيندا باريش اولسون."[15] ملکلر چوبانلارين يانيندان گؤيه قالخاندان سونرا، اونلار بئربئرلرئنه ددئلر: "گلئن بِيت‌لِخِمه گدک و ربّئن بئزه بئلدئردئيي بو واقئعه​ني گؤرک."[16] چوبانلار تله‌سئک بِيت‌لِخِمه گلدئلر و مريمي، يوسئفي و آخوردا ياتميش کؤرپه​ني تاپديلار.[17] و گؤره‌ندن سونرا کؤرپه حاقّيندا اونلارا خبر ورئلن سؤزو يايديلار.[18] چوبانلارين دانيشيقلاريني اشئدنلرئن هاميسي تعجّوبدن مات قالميشدي.[19] آمّا مريم بو سؤزلرئن هاميسيني اوره‌يئنده ساخلاييب دوشونوردو.[20] چوبانلار قاييتديلار و اشئتدئکلري و گؤردوکلري شيلر اوچون تارييا حمد و ثنا ادئردئلر.[21] سکّئزئنجي گون تامام اولاندا، اوشاغي ختنه اتدئلر و آديني عئسا قويدولار، او آد کي، ملک اونا آناسينين بطنئنده قويولماميشدان ورمئشدي.

Matta 2:1-12
[1] عئسا هئرود پادشاهين گونلرئنده، يهودئيه​نئن بيت‌لحمئنده آنادان اولان زامان، شرقدن موغلار اورشلئمه گلئب ددئلر:[2] "آنادان اولموش يهودئلرئن پادشاهي هارادادير؟ چونکي اونون اولدوزونو شرقده گؤردوک و گلمئشئک کي، اونا پرستئش ادک."[3] هئرود پادشاه بونو اشئدن واخت پرئشان اولدو و بوتون اورشلئم اهالئسي ده اونونلا پرئشان اولدولار.[4] هئرود خالقين بوتون باش کاهئنلر و دئن عالئملرئني بئر يره ييغيب، اونلاردان مسئحئن هارادا دوغولاجاغيني سوروشدو.[5] اونلار دا اونا ددئلر: "يهودئيه​نئن بِيت‌لِخِمئنده، چونکي پيغمبرئن واسئطه​سئله بله يازيليب:[6] و سن، اي بِيت‌لِخِم، يهودا دئياري، يهودا رَيئسلرئنئن آراسيندا، هچ ده کئچئک ديئلسن. چونکي سندن بئر رَيئس ظوهور اده​جک کي، منئم خالقيم ائسرايئله چوبان اولاجاقدير."[7] او زامان هئرود موغلاري گئزلئجه چاغيريب، اونلاردان اولدوزون نه واخت چيخديغيني بئلدي.[8] و اونلاري بِيت​لِخِمه گؤنده‌رئب، ددي: "گدئن و اوشاغين حاقّيندا دئقّتله آختارين. اونو تاپديغينيز زامان منه خبر ورئن کي، من ده گلئب، اونو پرستئش ادئم."[9] اونلار پادشاهين سؤزونو اشئدئب، يولا دوشدولر. شرقده گؤردوکلري اولدوز اونلارين قاباغيندا گدئردي؛ او قدر کي، گلئب اوشاغين اولدوغو يرئن اوستونده دوردو.[10] اونلار دا اولدوزو گؤردوکلري زامان بؤيوک سوئنجله حددن آرتيق شادليق اتدئلر.[11] و اوه گئرئب، اوشاغي آناسي مريمله گؤردولر و يره دوشوب، اونو پرستئش اتدئلر. و خزئنه​لرئني آچيب اونا قيزيل، بوخور و مور هدئيّه وردئلر.[12] و رؤيادا اونلارا تاري طرفئندن ائخطار ورئلدي کي، هئرودون يانينا قاييتماسينلار. اونلار دا آيري يوللا اؤز مملکتلرئنه گتدئلر.

Qalatiyalılara 4:4
لاکئن زامان تامامينا چاتديقدا، تاري آرواددان دوغولموش و شرئعت آلتيندا دونيايا گلمئش اؤز اوغلونو گؤنده‌ردي کي،

Luka 2:1-4
[1] او گونلرده قيصر اوغوسطوسدان امر گلدي کي، ير اوزونده اولان نوفوسون ساييسي انجام اولوب دفترلره کچسئن.[2] بو نوفوس ساييسي ائلک نوفوس ساييسي ائدي کي، کرئنئيوسون سورئيه اؤلکه​سئنده والي اولدوغو زامان باش وردي.[3] و هر کس آديني دفتره کچئرتمک اوچون اؤز شهرئنه گدئردي.[4] اونون اوچون يوسئف ده داوودون نسلئندن اولدوغونا گؤره، جلئلئن ناصئره شهرئندن چيخيب، يهودئيه وئلايتئنئن بِيت‌لِخِم چاغيريلان داوود شهرئنه گلدي کي،

Yəhyanın Vəhyi 12:1-5
[1] آرواد بويلو ائدي؛ دوغماق آغريسيندان آغري و درد چکه‌رک قيشقيردي.[2] سونرا گؤيده آيري بئر علامت ظاهئر اولدو: و باخ، يدّي باشلي و اون بوينوزلو بئر بؤيوک قيرميزي اژداها! باشلارينين اوستونده ده يدّي تاج وار ائدي.[3] اونون قويروغو گؤي اولدوزلارينين اوچده بئرئني سوپوروب، ير اوزونه آتدي. اژداها دوغماق حاليندا اولان آروادين قاباغيندا دوردو، اله کي، آرواد دوغدوقدا، اونون اوشاغيني اودسون.[4] آرواد بئر اوغلان اوشاغي دوغدو کي، دمئر عصا ائله بوتون مئلّتلره حؤکمرانليق اده​جک ائدي. آروادين اوشاغي تارينين يانينا و اونون تختئنئن يانينا گؤتورولدو.[5] او واخت آرواد چؤله قاچدي. اونون اورادا تاري طرفئندن حاضيرلانميش بئر يري وار ائدي کي، اونو مئن ائکي يوز آلتميش گون بسله​سئنلر.

Azerbaijan Bible 2008
Southern Azeri translation. Copyright © 2008 Elam Ministries