A A A A A
हिंदी बाइबिल Mizo Bible

यहोशू 8



1

  Tin, LALPA'n Josua hnenah, "Hlau suh la, zam hek suh: ral kap mi zawng zawng i hnenah hruai langin, tho la, Ai khuaah han kal rawh: ngai teh, Ai khaw lal leh, a mite leh a khua leh a ram chu i kutah ka pe tawh e:

2

  Jeriko leh an lal chunga i tih ang khan Ai khua leh an lal chungah pawh i ti dawn nia; rallak leh rante chauh chu nangmahni pualah nei ang che u: khawpui chang ru tur a hnung lamah dah ang che," a ti a.

3

  Chutichuan Josua leh ral kap mi zawng zawngte chu Ai khaw lama han kal tur chuan an thawk ta a: tin, Josua'n mi chak huaisen singthum a thlang chhuak a, zanah a kaltir a.

4

  An hnenah, "Ngai teh u, khawpui hnung lamah khawpui bei turin chang ru ang che u: khawpui atanga hla takah chuan kal suh u la, inpeih rengin awm ngawt mai rawh u,

5

  tin, kei leh ka hnena awmho zawng zawngte chuan khawpui chu kan rawn hnaih ang a: tin, heti hi a ni ang a, hman ang bawk amin rawn bei tura an lo chhuah veleh, an hmaah kan tlanchia ang a;

6

  tichuan min um turin an chhuak ang a, khua ata thui fe kan thlem chhuah thlengin; anni chuan, 'Hman ang bawk khan kan hmaah an tlanchhe leh ta le,' an ti dawn nia; tichuan an hmaah kan tlanchhia ang a;

7

  tin, chan rukna ata in lo chhuak ang a, khawpui chu in la dawn nia: LALPA in Pathianin in kutah a pe dawn e.

8

  Tin, heti hi a ni ang a, khawpui chu in lak veleh, khawpui chu hal ang che u: LALPA thu ang zelin in ti tur a ni: ngai teh u, thu ka pek tawh che u hi," tiin thu ape a.

9

  Tin, Josua chuan a kaltir ta a: tichuan chan rukna hmunah chuan ankal a, Ai khaw thlang lamah Bethel leh Ai khaw inkarah chuan an awm a: Josua erawh chu chu mi zan chuan mipuite zingah a riak a.

10

  Tin, Josua chu zing takah a tho a, mipuite chu a kai khawm a, tin, amah leh Israel-ho upate chu mipuiho hmaah chuan Ai khaw lamah an han kal ta a.

11

  Tin, mipuiho zawng zawng, a hnena ral kap mi awmte chu an han kal a, an han hnaih a, khawpui bulah chuan an han kal a, Ai khaw hmar lampangah an han riak a: Ai khua nena an inkarah chuan ruam a awm.

12

  Tin, mi sangnga lai a hruai a, khawpui thlang lampang Bethel leh Ai khaw inkarah chuan a chan ruktir a.

13

  Chutichuan mipui, khawpui hmar lampanga sipaihote tanhmun leh khawpui thlang lampanga a changrutute tanhmun chu an han ruat fel a; tin, Josua chu chu mi zan chuan ruam lai takah a kal a.

14

  Tin, heti hi a ni a, Ai khaw lalin chu chu a lo hmuh veleh, hmanhmawh takin zing takah a tho a, chu mi khuaa mite chu amah leh a hote zawng zawng nen, a hmun ruat Araba zawnah chuan Israel-hote chu beio turin an chhuak ta a, nimahsela khaw hnung lamah chuan amah bei turin an chang ru tih a hre lo a.

15

  Tin, Josua leh Israel-ho zawng zawngte chu dawl ta ni awm takin an awm a, thlaler lam kawngah an tlan chiam a.

16

  Tin, khawpuia awm zawng zawngte chu anmahni um turin an ko khawm a: tichuan Josua chu an um a, khawpuia ta chu thui fe thlem chhuahin an awm ta a.

17

  Tin, Ai khuaah leh Bethel khuaah chuan Israel-hote um lo chu pakhat mah an awm ta lo va: khawpui chu khar lohin an chhuahsan ta mai a, Israel hote chu an um ta a.

18

  Tin, LALPA'n Josua hnenah, "I fei ken kha Ai khaw lam hawiin lek rawh; i kutah ka pe dawn a ni a," a ti a. Tichuan Josua chuan a fei ken chu khawpui lam hawiin a han lek ta a.

19

  Tin, changrututekha an awmna ata chu an lo chhuak thuai a, tin, a kut a han phar veleh an tlan a, khawpuiah chuan an lut a, an la ta a; tin, khua chu an hal ta thuai a.

20

  Tin, Ai-hote chuan an hnung lam chu an han thlir chuan, ngai teh, khawpui chu van lama khu chho ngut ngutin an hmu ta a, khawii lam mah maha tlan theihna reng reng an nei ta lo mai a: tichuan thlalera tlante khan a umtute chu an lo let ve ta thung a.

21

  Tin, Josua leh Israel-ho zawng zawngte chuan changrututen khawpui an lak a, khawpui khu chu a chho ngut ngut an han hmuh chuan an let leh a, Ai hote chu an that ta a.

22

  Tin, midangte chu a bei turin khaw chhung ata an lo chhuak a; chutichuan Israel-hote chuan an karcheh ta a, then a lehlamah an awm a, a then a lehlamah: tichuan an that a, pakhat mah zuah leh chhuah reng reng pawh an nei lo a.

23

  Tin, Ai khaw lal chu anungin an man a, Josua hnenah an hruai a.

24

  Tin, heti hi a ni a, Israel hote chuan Ai khuaa mi phula awm zawng awng chu thlaler rama an va umna hmuna an thah zawh a, an zaa khandaiha an thah chimih vek hnu chuan, Israel-ho zawng zawngte chu Ai khaw lamah an kir leh a, khandaihin an han bei a.

25

  Tin, chu mi nia thi zawng zawngte chu a hmei a pain singkhat leh sanghnih an ni. Ai khuaa mi zawng zawngte chu.

26

  Josua'n a fei lekna kut chu Ai-ho zawng zawng a tihboral der hma loh chuan a la thla si lo a.

27

  LALPA'n Josua thu a pek a, tih tur a tih ang ngei khan chu khawpuia rante leh rallakte chauh chu Israel-hote chuan anmahni pualah an nei a.

28

  Chutichuan Josua'n Ai khua chu a hal a, kumkhua atan leipawngah a siam a, tun thleng hian tihtiau alo ni ta.

29

  Tin, Ai khaw lal chu tlai thlengin thing lerah a khai a: tin, ni tlak dawnin Josua'n thu ape a, tichuan a ruang chu thingler ata an la thla a, khawpui kulh kawngka luhnaah an paih a, a chungah lung an tiang vum thur a, tun thlengin a la awm.

30

  ,31 Tin, Mosia dan lehkhabua ziak tawh angin, LALPA chhiahhlawh Mosia'n Israela thlahte thu a lo pek tawh ang khan, Josua'n Ebal tlangah LALPA Israelte Pathian atan maicham an siam aL chutah chuan LALPA tan halral thilhlante an hlan a. remna inthawiin an inthawi a.

31

  ,30 Tin, Mosia dan lehkhabua ziak tawh angin, LALPA chhiahhlawh Mosia'n Israela thlahte thu a lo pek tawh ang khan, Josua'n Ebal tlangah LALPA Israelte Pathian atan maicham an siam aL chutah chuan LALPA tan halral thilhlante an hlan a. remna inthawiin an inthawi a.

32

  Tin, chutah chuan Israela thlahte hma ngeiah Mosia'n dan a ziak kha lungahte chuan a ziak chhawng a.

33

  Tin, Israel-ho zawng zawng, an upate leh hotute, an roreltute nen, Levi chi puithiamho, LALPA thuthlung bawm zawntute hmaah, bawm leh lampangah chuan hnam dang pawh, chumi rama piang pawh an ding za vek a; a zatve chu Gerizim tlang pangah an awm a, a zatve chu Ebal tlang pangah an awm a; lalpa chhiahhlawh Mosia'n israel hote chu mal a sawmsak phawt tur a ni tih thu a pek tawh ang kha.

34

  Tin, chu mi zawhah chuan dan thu zawng zawng, malsawmna thu leh anchhe dawn thu chu a chhiar a, dan lehkhabua chuang zawng zawng ang kha.Mosia thupek zawng zawng chu Israel-ho pungkhawm zawng zawng leh, hmeichhiate leh naupang te te teleh, an zinga hnam dang cheng vete hriatah chuan Josua'n chhiar loh reng reng a nei lo.

35

  Mosia thupek zawng zawng chu Israel-ho pungkhawm zawng zawng leh, hmeichhiate leh naupang te te teleh, an zinga hnam dang cheng vete hriatah chuan Josua'n chhiar loh reng reng a nei lo.

Mizo Bible
Copyright: Mizo ?