A A A A A
हिंदी बाइबिल Mizo Bible

ओबद्याह 1



1

  Obadia inlarna hmuh chu. Lalpa PATHIAN chuan Edom chung changah heti hian a ti: LALPA hnen ata thu kan hria a, hnamte zingah palai tirh a ni, Tho u la, indonaah amah do turin i thawk ang u, tiin.

2

  Ngai teh, hnamte zingah ka tite tawh che a ni: nasa taka hmusitin i awm ta.

3

  Aw nang, lungpui keh kara chenga, hmunsang luahtu, Tuin nge leiah mi tithla ang? ti rilrutu, i thinlung chaponain a bum ta che a ni.

4

  Mu angin sang takah thlawkchho mah la, i bu chu arsi zinga chheh pawh ni mah sela, chuta ta chu ka la thla ang che, LALPA'n a ti.

5

  I hnenah rukrute, phil hmangte zanah lo kal se la, (tihboral i va ni dawn nasa em!) an duh tawkin an ru lo ang em ni? I hnenah Grep sengkhawm tute lo kal sela,grep seng tur thenkhatte an hnutchhiah lo ang em ni?

6

  Esauva thilte zawnchhuah a nih tak chu! A ro bawm thuhrukte dapchhuah a nih tak chu!

7

  I lam a tang ho te zawng zawngin ramri hial an rawn thlen che a: mi in rem taka i awmpuite khan an bum che a, an hneh tawh che a ni; i chhang eitute khan i hnuaiah thang an kam a: amah ah chuan hriatthiamna reng a awm lo a ni.

8

  Chumi niah chuan Edom ata mi fingte ka tiboralin, Esauva tlang ata hriat thiamna ka tiboral lo ang em ni? LALPA'n a ti.

9

  Aw Teman, Esauva tlang ata mitin thah borala an awm vekna turin, i mi chakte chu nasa takin an zam ang.

10

  I unaupa Jakoba chunga i pawngnekna avangin zahnain a khuh ang che a, kumkhuaa tih boralin i awm ang.

11

  Lehlama i din nia, mikhualten a sum an lak bo nia, hnamdang mite a kulh kawngkhara an lo luh a, Jerusalem chunga thum an vawr lai khan, nang pawh an mahni zinga tel angin i awm kha.

12

  Amaherawhchu i unaupa a chhiat laia a chhiatna ni chu thlir suh la, Juda fate chungah an boral niin lawm suh la; hreawm niin chapo takin tawng hek suh.

13

  Ka mite an vanduai niin an kulh kawngkaah lut suh; a ni, an van duai niin an tuarnate thlir suh la, an vanduai niin an sum leh paite chungah in kutte nghat hek suh u.

14

  A mi thenkhat tlan chhuakte that turin kawng thuamah ding suh la; hreawm nia a mi la awm chhunte chu mantir suh.

15

  Hnam zawng zawng chungah LALPA ni chu a hnai si a: i lo tih tawh ang bawkin i chungah tih a ni ang; i tih dan chu i lu chung ngeiah a lo let ang.

16

  Ka tlang thianghlima in in tak ang khan, hnam zawng zawngte chuan an in fo dawn si a, a ni an in ang a, an lem ang a, piang lo ang maiin an awm ang.

17

  Zion tlangah erawh chuan, tlan chhuakte chu an awm ang a, a thianghlim ang; tin, Jakoba chhungte chuan an rochante chu an chang ang.

18

  Jakoba chhungte chu mei an ni ang a, Josefa chhungte chu meialh an ni ang a, Esauva chhungte chu buhpawl an ni ang a, an mahni zingah an alh ang a, an kang ral vek ang: Esauva chhungte chu a bang reng an awm lo ang; LALPA chuan a ti si a.

19

  Chhim lam mite chuan Esauva tlang chu an chang ang a; ram phaia mite chuan Philistia ram an chang ang: Ephraim lo leh Samari lo chu an chang ang: Benjamina chuan Gilead ram a chang ang.

20

  Kanaan mite zinga he Israela thlah sal tang mipuite hian Zarephath ram thlengin an chang ang a; Sepharad rama Jerusalem khaw mite sal tang chuan Chhim lam khawpuite chu an chang ang.Zion tlangah chuan Esauva tlang relsak tura chhan chhuaktute an lo chho ang a;tin, ram chu LALPA ta a ni ang.

21

  Zion tlangah chuan Esauva tlang relsak tura chhan chhuaktute an lo chho ang a;tin, ram chu LALPA ta a ni ang.

Mizo Bible
Copyright: Mizo ?