A A A A A
हिंदी बाइबिल Mizo Bible

यहेजकेल 10



1

  Tichuan ka han en a, ngai teh, cherub-ho lu chunga van dum awmah khian sapphir lung ni awm tak, lal thutthleng ang taka lang hi a lo lang a.

2

  Tin, a ni chuan puan zai sin sin hnenah khan, : Cherub hnuaia tawlailir virte karah sawn va lut la, cherub ho inkara meivam saw i kut khinghnih khat in va lawk la, khawpui chungah thehdarh rawh," a ti a. Tin, ka mit hmuh lai ngeiin a kal ta a.

3

  Tin, mi a luh lai khan, cherub-ho chu in pui dinglam pangah an ding a; tin, hung chhungnung chu chhumin a khat ta a.

4

  Tin, LALPA ropuina chu cherub-ho atang chuan a chho a, biakin kawngka chungah chuan a han ding ta a, in chu chhumin a khat a, hung chhung chu LALPA ropuina eng chuan a khat ta a.

5

  Tin, cherub-ho thlazap ri te chu hung chhung pawnta zawkah te pawh chuan Pathian engkimtitheian mi a biak laia a aw ang maiin a hriat a.

6

  Tin, heti hi a ni a, puan zai sin sin hnena,"cherub-ho inkara tawlailir vir inkar ata mei va la rawh," tia thu a pek in, a ni chu a va lut a, tawlailir ke bulah chuan a ding ta a.

7

  Tin, cherub chuan, cherub-ho inkar atang chuan, cherub-ho inkara mei awm chu a han ban a, a la a, puan zai sin sin kutah chuan a pe a, ani chuan a lo la a, a chhuak ta a.

8

  Tin, cherub-ho chu an thla hnuaiah mihring kut ang mai hi a lo lang a.

9

  Tin, ka han en a, ngai teh, cherub-ho sirah chuan tawlailir ke pali, cherub pakhat kiangah, tawlailir ke pakhat, cherub dang kiangah tawlailir dang ka hmu a; tin, tawlailir ke landan chu Tarsis lung zia ang hi a ni a.

10

  Tin, an lanziaah chuan an paliin ang khat an ni a tawlailir ke pakhat chhunga tawlailir ke dang awm ang mai hi a ni a.

11

  An kal chuan sir liah an kal thei a, An kal pawhin an her ngai lo; amaherawhchu a hmasa hawi lam apiang an zui a ni, an kalin an her chuang lo.

12

  Tin, an taksa pum chu an hnungte, an kutte, an thlate leh tawlailir kete pawh kha a velin mitin a khat a, an palia tawlailir kete pawh kha.

13

  A tawlailir kete kha chu ka beng hriat ngeiah, "tawlailir ke vir' tih a ni.

14

  Tin, mittinin hmel pali theuh an nei a, hmel pakhat chu cherub hmel a ni a, pahnihna chu mihring hmel a ni a, pathumna chu sakeibaknei hmel, palina chu mupui hmel a ni a.

15

  Tin, cherub-ho chu an chho ta a;hei hi Kebar lui kama thilnung ka hmuh chu a ni.

16

  Tin, cherub-ho an kal chuan tawlailir kete chu an kiangah a kal ve a; tin, cherub-ho khan lei ata chho tur a an thlate an zar chuan tawlailir kete chuan a hransan ngai lo a.

17

  An din chuan hengte hi an ding ve a, An chhoh chuan hengte hi an chho ve thin a, thilnung thlarau chu anmahniah a awm si a.

18

  Tin, LALPA ropuina chu in pui kawngka chung atang chuan a chhuak a, cherub-ho chungah chuan a ding ta a.

19

  Tin, cherub-ho chuanan thla an zar a, an chhuahin ka mithmuh ngeiah lei ata an chho a; tawlailir kete chu an kiangah a awm zel a: tin, LALPA in luhna chhaklam kawngkhar bulah chuan an ding ta a; Israel Pathian ropuina chu an chungah a awm a.

20

  Hei hi Kebar luia Israel Pathian hnuaia ka thilnung hmuh chu a ni; cherub-ho an ni tih ka hria.

21

  Mittinin hmel hrang pali leh thla pali an nei theuh a, an thla hnuaiah chuan mihring kut ang mai hi a awm a.Tin, an hmel lam thu-ah chuan Kebar luia ka hmuh hmelte ang bawk kha, an landan leh anmahni ngeite pawh an ni a; tin, an hmazawng zelin an kal theuh a.

22

  Tin, an hmel lam thu-ah chuan Kebar luia ka hmuh hmelte ang bawk kha, an landan leh anmahni ngeite pawh an ni a; tin, an hmazawng zelin an kal theuh a.

Mizo Bible
Copyright: Mizo ?