A A A A A
हिंदी बाइबिल Mizo Bible

यशायाह 1



1

  Amozaa fapa Isaian Juda-ho lal Uzia te, Jothama te, Ahazaa te, Hezekia te lal laia, Juda-ho leh Jerusalem chungchang thua inlarna a hmuh chu.

2

  Aw vante u, ngaithla u la, aw leilung, beng chhi rawh, LALPA chuan thu a sawi e: "Fanaute ka chawmin ka tiseilian a, ka chungah an hel ta si a.

3

  Bawngpain a neitu a hria a, sabengtung pawhin a pu chaw pekna a hre bawk a: Israelho erawh chuan an hre si lo a, ka mite chuan an ngaihtuah lo e," tiin.

4

  A! hnam sual, khawlohnaa khat, thi th alo tih ching, hnam nikhua lo an ni. LALPA chu an kalsan a, Israel-ho Mi Thianghlim chu hmusit a, intihrangin an hnung tawlh ta.

5

  Engati nge in hel zual deuh deuh a, vuaka in la awm cheu ni le? Lu chu a pumin a na a, thinlung pawh chu a pumin a chau ta.

6

  Kephah hnuai atanga lu thleng zakin dam lai reng reng a awm lo; pem te, vuak duk chur te, pan hnai late hlir a ni: chung chu an hmet ping lo a, an tuam hek lo a, sahriak an hnawih hek lo.

7

  In ram chu a tiau zo a; in khuate chu meiin a kang zo va: in ram chu ram dang miten in mithmuhah an ei zo a, ram dang mite tihchhiat angin a chhe zo ta.

8

  Zion fanu chu grep huana venbuk ang leh, fanghma huana thlam ang leh, khawpui hual vel anga hnutchhiahin a awm ta.

9

  Sipaihote LALPA chuan tihboral bang tlemte min lo zuahsak suh se la chuan, Sodom ang khan kan awm daih tawh ang a, Gomorra ang mai khan kan awm tawh ang.

10

  Sodom roreltute u, LALPA thu hi hre rawh u; Gomorra mite u, kan Pathian dan thu-ah hian beng chhi rawh u.

11

  LALPA chuan, "In inthawina zozai hi ka tan eng nge a tangkaina awm? Berampa halrala hlante leh ran chawm thaute thau chu ka hne ta; bawngpate leh bram note leh kalpate thisenah pawh ka lawm lo e.

12

  Ka hmaa inlan tura in lo kal hian, ka biak in hung chhung kawtlai rah hi tuin nge phut che u ni?

13

  Thilpek mai maite chu rawn keng tawh suh u; englo rimtui chu ka tan thil tenawm tak a ni; thla thar te, chawlhni te, khawmpuia insawm khawm te mai mai chu ka ngaithei tawp lo mai.

14

  In thla tharte leh in hun bi nei kutte chu ka rilru chuan a hua a ni: ka tan thil hnawksak tak a ni; tuar ka ning tawh e.

15

  Tichuan in kut in phar hunah pawh in lakah ka mit ka hup tawh ang a: a ni, vawi tam tak in tanwgtai hunah pawh ka ngaithla tawh lo ang: in kutte chu thisenin a khat si a.

16

  Insil u la, intifai rawh u; ka mithmuh phak loah in thiltihte hi a sualna chu dah bo rawh u; sual tih hi bang tawh u la:

17

  thil tha tih zir tawh rawh u; rorelna fel zawng u la, hnehchhiana tuarte chu tanpui u la, pa nei lote chu rorelsak u la, hmeithaite chu sawipui rawh u," a tih ni.

18

  LALPA chuan, "Hawh teh u, i ngaihtuah tlang teh ang u! In sualte chu sen lar angin awm tawh mah se la, vur angin a var ang; sen duk angin sen tawh mah se la, beram hmul angin a awm ang.

19

  Tihnuam tak leh thu awih taka in awm chuan, in rama thil thate hi in ei ang:

20

  nimahsela in duh loa in hel chuan, khandaihin a ei zo ang che u: LALPA ka chuan chu chu a sawi tawh a ni," a ti a.

21

  Engtizia nge khawpui rinawm tak chu nawhchizuarah a lo chan tak le aw! Rorel felnaa khatnu a nih thin vei nen! Amahah chuan felna a wm thin a, tunah erawh chuan tualthattute an awm tak zawk hi.

22

  I tangka chu a ekchhiaah a lo chang ta a, i uain chu tui nen pawlh a lo ni ta.

23

  I mi liante chu mi helhmang, rukrute thian an ni a; mi tinin tham an duh a, lawmman an um thin: pa nei lo te ro an relsak thin lo a, hmeithaite thute lah an hnenah a thleng ngai hek lo.

24

  Chuvangin, Lalpa, Sipaihote LALPA, Israel-ho Mi Chaka chuan heti hian a sawi a: "A! mi dotute hi ka tifikiang mai ang a, ka hmelmate chungah phuba ka la ang:

25

  tin, i chungah ka kut ka thlak leh ang a, i ekchhia chu fai takin ka tibo ang a, i suan zawng zawng chu ka la bo vek ang:

26

  tin, i chunga roreltute chu a tira an awm ang khan ka awmtir leh ang a, i chhunga remruattute chu a hmasa bera an awm ang khan ka awmtir leh bawk ang: chu mi hnuah chuan, 'Felna khawpui, khawpui rinawm tak,' an la ti ang che.

27

  Zion chu rorelna fela chhan chauh a ni tawh ang a, a chhunga mi hawikir lehte pawh felnaa chhan chhuah an ni ang.

28

  Nimahsela, bawhchhetute leh mi sualte tihchhiatna chu a awm rual ang a, LALPA kalsantute pawh tihboralin an awm ang.

29

  In sasaw duh takte chu in zahpui tawhin, in huan thlante avang chuan zak takin in awm dawn a ni.

30

  Sasua a hnah uai tawh leh huan tui hmu lo ang mai hi in ni dan si a.Tin, mi chak tak chu ziza tawm ang a ni tawh ang a, a hnathawh chu meisi ang a ni ang; tichuan an kang dun ang a, tuma'n an timit lo ang," tiin.

31

  Tin, mi chak tak chu ziza tawm ang a ni tawh ang a, a hnathawh chu meisi ang a ni ang; tichuan an kang dun ang a, tuma'n an timit lo ang," tiin.

Mizo Bible
Copyright: Mizo ?