A A A A A
हिंदी बाइबिल Mizo Bible

निर्गमन 10



1

  Tin, LALPA'n Mosia hnenah, "Pharaoa hnenah va lut rawh: a thinlung leh a chhiahhlawh thinlung chu ka tihkhauhsak tawh e, he'ng ka chhinchhiahnate hi an zingah ka entir theihna turin;

2

  tin, nang pawhin i fa leh i fa fate benga Aigupta ram chunga thil ka tihzia leh, an zinga ka chhinchhiahnate ka tihzia hi i hrilh theihna turin; kei LALPA chu ka tih in hriat theih nan," a ti a.

3

  Tin, Mosia leh Arona chu Pharaoa hnenah an va lut a, a hnenah, "LALPA, Hebraite Pathianin, 'Ka hmaah eng chen nge inngaithlawm duh loa awm i tum ni? Ka mite hian ka rawng an bawl theihna'n chhuahtir rawh.

4

  Chutia ka mite i chhuahtir phal loh zawngin, ngai teh, nak tukah i ram chhungah hian khaukhuapte ka rawn lentir ang a:

5

  tin, lei chung hi an dap vek ang a, tumahin lei reng reng hi an hmu thei lo vang: tin, rialin a tihchhiat bak, in hnena la awmate hi an ei ang a, phula in thing to apiangte chu an ei vek ang:

6

  tin, i inte leh I chhiahhlawh zawng zawng inte leh Aigupta mi zawng zawng inte chu a khat vek ang; i thlahtute leh i thlahtute thlahtute pawhin khawvela an lo awm achin tun thleng pawhin chutiang chu an la hmu ngai lo a ni,' a ti e," an ti a. Tin, a lehhawi a, Pharaoa hnen ata chu a chhuak ta a.

7

  Tin, Pharaoa chhiahhlawhte chuan a hnenah, "Hei hi kan tan eng chen nge maw thanga a awm dawn le? Hengho hian LALPA an Pathian rawng an bawl theihna'n kaltir ta mai che maw le: Aigupta ram hi tihchhiat a nih tawh hi i la hre lo em ni?" an ti a.

8

  Tin, Mosia leh Arona chu Pharaoa hnenah an hruai leh a; tin, an hnenah, "Kal ula, LALPA in Pathian rawng chu va bawl tawh u: amaherawhchu tute nge ni kal tur chu?" a ti a.

9

  Tin, Mosia'n, "Apui apangin kan kal ang, kan fapate leh kan fanute nen, kan beram rualte leh kan bawng rualte nen kan kal ang: LALPA hnenah kan kut ngei tur a ni si a," a ti a.

10

  Tin, ani chuan an hnenah, "LALPA chu in hnenah awm ang hmiang! In fanu te tete nen chuan ka kaltir mawlh ang che u le; inngaihtuah rawh u khai, thil sual tih in tum a nih hi le.

11

  Hnai lo e! nangi mipaho erawh chu kal u la, LALPA rawng chu bawl rawh u' chu chu alawm in duh," a ti a. Tin, Pharaoa hnen ata chu an hnawt chhuak ta a.

12

  Tin, LALPA'n Mosia hnenah, "Aigupta ramchungah hian khaukhuapte rawn lentir turin i kut phar rawh, Aigupta ramah hian an lo chhoh a, he rama thlai tinreng, rial den chhiat bak zawng zawngte nen lam pawha an ei theihna turin," a ti a.

13

  Tin, Mosia'n Aigupta ramchungah chuan a tiang chu a han lek a, tin, LALPA'n chu mi ni, nileng leh zankhuain chu mi ramah chuankhawchhak thli a rawn tlehtir a; tin, atukah chuan khawchhak thli chuan khaukhuap a rawn len a.

14

  Tin, khaukhuapte chu Aigupta ram zawng zawng chungah chuan an leng a, tin, Aigupta ram chhung zawng zawngah chuan an fu a; an tam em em mai a; tun hmain khaukhuap chutiang reng reng a la awm ngai lo a, tun hnuah pawh chutiang reng reng chu a awm leh tawh lo ang.

15

  Lei chung zawng zawng hi an dap vek mai si a, tichuan ram chu a thimin a thim mup mai a ni; tin, rial den chhiat bak, chu mi rama thlai tinreng leh theirah zawng zawngte chu an ei vek a: tichuan Aigupta ram chhung zawng zawngah chuan lovah thil hring reng reng, thing pawh thlai pawh a awm ta hauh lo mai a.

16

  Tin, Pharaoa chuan Mosia leh Arona chu hmanhmawh takin a kohtir a, an hnenah. "LALPA in Pathian chungah leh nangmahni chungah thil ka lo tisual ta e.

17

  Chutichuan ka sual hi tun tumah chauh hian ngaidam ang che, ka ngen a che, he thihna hi mi lak bosak phawt mai turin, LALPA in Pathian hnenah ngen ang che," a ti a.

18

  Tin, Pharaoa hnen ata chu a kal chhuak a, LALPA hnenah chuan a ngen ta a.

19

  Tin, LALPA chuan khawthlang thli na tak mai a rawn tlehtir a, chu chuan khaukhuapte chu a len a, Tuifinriat Senah a len thla ta vek a; Aigupta ramri chhung zawng zawngah chuan khuakhuap pakhat mah a awm ta lo a.

20

  Nimahsela LALPA'n Pharaoa thinlung chu a tihkhauhsak a, tichuan Israela thlahte chu a chhuahtir phal ta lo a.

21

  Tin, LALPA'n Mosia hnenah, "Van lamah i kut han lek rawh, Aiguptachungah hian a lo thim khup a, ai mit thlawn ang maia a lo thimna turin," a ti a.

22

  Tin, Mosia chuan a kut chu van lamah an han lek a; tin, Aigupta ram chhung zawng zawng chu ni thum chhung zet a thim mup a;

23

  tumah reng reng an inhmu thei ta lo a, tumah mahni hmun ata ni thum chhung zet chu an tawlhsawn thei lo bawk a: Israela thlahte zawng zawng awmna erawh chu a eng vek a.

24

  Tin, Pharaoan Mosia a kohtir a, a hnenah, "Kal ta u la, LALPA rawng chu va bawl tawh u; in beram rualte leh in bawng rualte erawh chu awm se la: in fanau te tete pawh in hnenah kal ve rawh se," a ti a.

25

  Tin, Mosia'n, "LALPA kan Pathian hnena kan inthawi theihna turin inthawina turte leh halral thilhlan turte chu nangin kan kutah min pe tel ve bawk tur a ni.

26

  Kan rante chu kan hnenah an kal ve bawk tur a ni; ran reng reng chu pakhat mah kan hnutchhiah lo ang; chung zinga mi chu LALPA kan Pathian rawng kan bawlna'n kan hman ngei ngei tur a ni si a; chu mi hmun kan va thlen hma loh chuan engin nge LALPA rawng kan bawl ang tih kan la inhre lo a ni," a ti a.

27

  Nimahsela LALPA'n Pharaoa thinlung chu a tihkhauhsak a, tichuan a chhuahtir phal ta lo a.

28

  Tin, Pharaoan a hnenah, "Ka hnen ata hi chhuak daih la, fimkhur rawh khai, ka hmel reng reng rawn hmu tawh hlek suh; ka hmel i hmuh ni la la chuan i thi ngei tur a ni," a ti a.Tin, Mosia chuan, "I sawi dik zet mai; i hmel zawng hmuh ni ka nei leh tawh lo vang e," a ti a.

29

  Tin, Mosia chuan, "I sawi dik zet mai; i hmel zawng hmuh ni ka nei leh tawh lo vang e," a ti a.

Mizo Bible
Copyright: Mizo ?