A A A A A
Facebook Instagram Twitter
Kurukh Bible 2014 Kurux

प्रकाशित वाक्य 20



1
फेन ओर्त मेर्ख़ा पैकासिन ऎन मेर्ख़ा ती एत्तना ईरकन, नॆख'आ ख़ेक्खा नू भयभयान ख़ोड़ख़ा गड्डी ही कुची अरा ओन्टा कोहाँ सिकड़ी रहचा।
2
आस आ नगदे कोहाँ डेना र'ऊ नेर्रेन धरचस। ईदिम नाद अरा सैतान बारना आ पच्चा नेर्रे हवे। अरा आस अदन ओन हजार बछर गे हॆंचस।
3
अरा आस अदिन भयभयान ख़ोड़ख़ा गड्डी नू हेब्ड़ियस ती मुच्‍चियस चिच्‍चस, अरा अइय्या मरका लौचस चिच्‍चस का हजार बछर मन्ना गूटी आद जाती जाती ता आलारिन अउर अम्‍बो ठग'आ। इदही ख़ॊख़ा चाड़ रई का आद जोक्‍क बेड़ा गे तिसिगतार'ओ कालो।
4
फेन ऎन बॆल-गदिया गुट्ठिन अरा नेंवई नना गे अदिया चीतारका आलारिन अइय्या उक्का ईरकन। अरा नॆख'आ कुक्‍कु येसुसी पत्त नू गोवाह चि'अना चड्डे अरा धर्मेसी कत्‍थन तेंगा कुद्दना चड्डे एड़बताचका आलर ही बॊलता गुट्ठिन हूँ ऎन ईरकन। आर आ मेक्‍खो ही मलता अदही मूर्ती ही ऒड़ मल नंजकाचर, अरा तम्है कपड़े नू मलता ख़ेक्खा नू अदही छपा मल होच्‍चका रहचर। आर उज्‍जा चोचर ती बॆलर लेक्खा मसीस गने ओन हजार बछर गे राजी नंजर।
5
बछ्रका केचका आलर आ ओन हजार बछर मल मुंज्रना गूटी उज्‍जा मल चोचर। ईदिम पहिल उज्‍जा चो'अना हवे।
6
एकार ई पहिल उज्‍जा चो'अना नू मेस्रनर, आर आसीस ख़क्‍खू अरा नेम्‍हा आलर र'अनर। एन्ने आलर ही मइय्याँ दुसर खे'अना ही अदिया मल मनी। आर धर्मेसी अरा मसीसी नैग मनोर, अरा आर आसी गने ओन हजार बछर गे राजी ननोर।
7
ओन हजार बछर मुंज्र'ओ ख़ने, सैतान जेहेल ती बिछिर'ओस चि'ओस।
8
अरा आस ख़ॆख़ेल ही ओनबेंड़र'आ र'अना जाती जाती ता आलारिन ठग'आ गे उरखोस। इबड़ा जातियारिन धर्मेसी कत्था तिंगू एजेकिऎलस गोग अरा मगोग एन्ने ब'अदस। ईरिन आस लड़ई गे ख़ोजोस। आर ही गनती समुदर पिंडी ता चलकुर लेक्‍खा र'ई।
9
अरा आर सौंसे ख़ॆख़ेल नू बींड़र'ओर क'ओर, अरा नेम्‍हा आलर ही डीहन अरा धर्मेसी चोन्‍हा नगरेन बेंढ'ओर चि'ओर। लिकिन चिच्‍ची मेर्ख़ा ती एत्तो ती आरिन बस्‍सो चि'ओ।
10
अरा अबड़ा आलारिन ठकचका आ नाद गन्धक लघरना चिच्‍ची ही समुदर नू हेबड़तार'ओस क'ओस, एकइय्या आ मेक्‍खो अरा ठकवा धर्मेसी कत्था तिंगुस र'अनर। अइय्या आर उल्‍ला माख़ा जनमजुग कलपार'ओर।
11
फेन ऎन ओन्टा कोहाँ पंड़रु बॆल-गदियन ईरकन, अरा अइय्या उक्‍कादस आसिन हूँ ईरकन। आसी मुन्दहारे ती मेर्ख़ा अरा ख़ॆख़ेल गुछरा केरा, अरा अबड़ा गे अड्डा मल ख़क्‍खरा, उर्मी धंसरा केरा।
12
अरा ऎन सन्नी कोहाँ ओर्मा केचकारिन बॆल-गदिया ही मुन्दहारे इज्‍जका ईरकन। अरा पुथी गुट्ठी चलख़रा, अरा अउर ओन्टा पुथी चलख़रा, एकदा उज्‍जना ही पुथी हवे। अरा आर एन्देर एन्देर नंजकाचर एन्ने अबड़ा पुथी नू लिख्रकी रहचा, अदही लेक्‍खा आर ही नेंवई नन्तारा।
13
समुदर तंग्है नू ता केचकारिन सोंपचा, अरा खे'अना अरा नरक गड्डी तम्है नू ता केचकारिन सोंपचा। अरा ओर्मर ताम नंजका नलख गुट्ठी ही लेक्‍खा नेंवई नन्तारर।
14
फेन खे'अना अरा नरक गड्डी चिच्‍ची ही समुदर नू हेबड़तारा। ई चिच्‍ची ही समुदर दिम दुसर खे'अना हवे।
15
अरा एका एका ओर्तासी नामे उज्‍जना ही पुथी नू लिख्रका मल ख़क्‍खरा, आस चिच्‍ची ही समुदर नू हेबड़तारस केरस।











प्रकाशित वाक्य 20:1
प्रकाशित वाक्य 20:2
प्रकाशित वाक्य 20:3
प्रकाशित वाक्य 20:4
प्रकाशित वाक्य 20:5
प्रकाशित वाक्य 20:6
प्रकाशित वाक्य 20:7
प्रकाशित वाक्य 20:8
प्रकाशित वाक्य 20:9
प्रकाशित वाक्य 20:10
प्रकाशित वाक्य 20:11
प्रकाशित वाक्य 20:12
प्रकाशित वाक्य 20:13
प्रकाशित वाक्य 20:14
प्रकाशित वाक्य 20:15






प्रकाशित वाक्य 1 / प्रकवा 1
प्रकाशित वाक्य 2 / प्रकवा 2
प्रकाशित वाक्य 3 / प्रकवा 3
प्रकाशित वाक्य 4 / प्रकवा 4
प्रकाशित वाक्य 5 / प्रकवा 5
प्रकाशित वाक्य 6 / प्रकवा 6
प्रकाशित वाक्य 7 / प्रकवा 7
प्रकाशित वाक्य 8 / प्रकवा 8
प्रकाशित वाक्य 9 / प्रकवा 9
प्रकाशित वाक्य 10 / प्रकवा 10
प्रकाशित वाक्य 11 / प्रकवा 11
प्रकाशित वाक्य 12 / प्रकवा 12
प्रकाशित वाक्य 13 / प्रकवा 13
प्रकाशित वाक्य 14 / प्रकवा 14
प्रकाशित वाक्य 15 / प्रकवा 15
प्रकाशित वाक्य 16 / प्रकवा 16
प्रकाशित वाक्य 17 / प्रकवा 17
प्रकाशित वाक्य 18 / प्रकवा 18
प्रकाशित वाक्य 19 / प्रकवा 19
प्रकाशित वाक्य 20 / प्रकवा 20
प्रकाशित वाक्य 21 / प्रकवा 21
प्रकाशित वाक्य 22 / प्रकवा 22