A A A A A
Facebook Instagram Twitter
Kurukh Bible 2014 Kurux

याकूब 2



1
अना एंग्हा भईरो, नम्‍है महबा जोक्खा उर्बस येसु मसीस नू पत्त'अना उइय्यू निमा तीना मल ख़ाँड़ना र'ई।
2
उदहारन नू एन्ने सोच'आ का, ओन्टा आलस निम्‍है गोड़हा एड़पा नू सोना ही मुद्दी अत्तका ती अरा बॆस किचरी अत्तका कुन्‍द्रका ती बरदस, अरा ओन्टा कीड़ा आलस हूँ मड़िख़का एट्रका किचरी अत्तका ती बरदस।
3
अरा नीम फबना किचरी अत्तका आलासिन कोड़हे मईन नन्दर ती ब'अदर, “नीन इसन दौ अड्डा नू ओक्‍का,” अरा आ कीड़ा आलासिन ब'अदर, “नीन असन इज्‍जका र'आ” मलता “एंग्‍है ख़ेड्डे गुसन ओक्‍का।”
4
एन्ने होले, नीम निम्‍है नू तीना ख़ाँड़ना ही अरा मलदौ सोच गुट्ठी ती नेंवई नन्ना ही बदी नन्दर।
5
अना एंग्‍है चोन्‍हा भईरो, मेना, एन्‍देर धर्मेस ई ख़ॆख़ेल ता कीड़ा आलारिन पत्त'अना नू उरुब मना गे, अरा तंग्है मइय्याँ चोन्हा ननुर गे तान गच्छरका राजी ही अदिया मना गे मल्ला चज्जिका का?
6
लिकिन नीम गा कीड़ारिन हींड़दर। एन्‍देर उरुबर निम्‍है मइय्याँ आकुस मल नन्नर, अरा आरिम निमन पंचायत नू नतगनर मल हो'अनर का?
7
नीम नॆख'आ बारदर आ येसु मसीसी बॆस नामे ही आर निंदा मल नन्नर का?
8
“नीन निंगन एकासे चोन्‍हा नन्‍दय, अन्ने निंग्‍है अरबा-परबारिन चोन्‍हा नना।” एन्ने नेम्‍हा पुथी नू लिख्रका ई कोड़हे मुध पॆसकन नीम मानिम गने नन्दर होले, नीम बॆस आबोन नन्दर।
9
लिकिन नीम तीना ख़ाँड़दर होले, पाप नन्दर। अरा नीम पॆसकन चाड़ुर एन्ने पॆसका ती गुन्हा ठेकाबातार'ओर।
10
एकासे का, एका ओर्तस गोट्टा पॆसकन पॆस्रदस, लिकिन ओन्टे कत्था नू झुकरदस होले, आस उर्मी कत्‍था नू बदी खत्रदस।
11
एन्‍देरगेका एकास “नन्ना आली गुसन अमके काला” बाचका रहचस, आसिम “आल अमके पिटा” एन्ने हूँ बाचस। औंगे नीन नन्ना आली गुसन गा मल काना ती हूँ आल पिटकय होले, पॆसका आबोन चाड़ना आल मंजकय।
12
औंगे छछिन्‍द चि'ऊ पॆसका तिम नीम नेंवई मन्तार'ऊ आलर र'अना ती, अदही लेक्‍खा कछनख्र'आ अरा अदही लेक्खा नलख नना।
13
एन्देरगेका नॆ सोग्‍गे मल ईरियस, आसी नेंवई बेगर सोग्‍गे गने मनो। नॆ नन्नर मइय्याँ सोग्‍गे ऎरदस, आस नेंवई उल्ला गे मल एलच्दस।
14
अना एंग्है भईरो, एकअम ओर्तस एंगा गे पत्त'अना र'ई एन्ने ब'अदस, लिकिन आस अदही लेक्खा मल नन्दस होले, आस गे एन्‍देर नफा? एन्‍देर आ पत्त'अना आसिन नाड़ा ओंगो का?
15
सैत ओर्त भई महले बहिन बने लगे अत्ता गे किचरी मलका नू, अरा रोज ओना गे ओन्ना-मॊख़ना मलका नू र'अना बेड़ा,
16
निम्‍है ती एकअम ओर्तस आरिन ब'अदस, “धर्मेस निम्है गने र'अदस, सान्ति गने कला, उदुम उदुम र'अके, अरा छचबच ओनके।” लिकिन आर गे एन्‍देर चाड़ मनी अदिन मल चि'अदस होले, एन्‍देर नफा?
17
अन्‍नेम पत्त'अना हूँ अदही लेक्खा नलख मल नन्ना ती तान लेका र'ओ होले, आद केच ख़च्चका पत्त'अना हवे।
18
लिकिन ओर्तस ब'आ ओंग्दस, “निम्है गुसन पत्त'अना र'ई, एंग्है गुसन नलख गुट्ठी र'ई।” लिकिन ऎन ब'अदन, “निंग्‍है पत्त'अनन बिगर दौ नलख गुट्ठी नन्ना ती ऎद'आ, लिकिन ऎन एंग्‍है पत्त'अनन एंग्है नलख गुट्ठी ती ऎद'ओन।”
19
नीन पत्त'अदय का, ओन्टे लेका धर्मेस र'अदस। आद दौ हिके। नाद गुट्ठी हूँ गा अदिन पत्त'ई, अरा इल्‍ची अरा असरी।
20
अना बयहा आलयो, एन्‍देर नीन बुझुर'आ पोलदय का, नलख बिगर पत्त'आना अनभनियाँ हवे?
21
नम्‍है पुर्खस अब्रा‍हमस तंग्दस इसाकसिन गोड़हा नू दाँड़े नना अरगस ख़ने, आस तंग्है नलख गुट्ठी ती धर्मेसी ऎरना नू उजगो मंजकाचस।
22
नीन ऎरदय का आसी पत्त'अना आसी नलख गुट्ठी ही गने गने नलख नंजा। अरा आसी नंजका नलख गुट्ठी ती आसी पत्त'अना पखड़ मंजा।
23
अरा ई लेक्खम, “अब्राहमस धर्मेसिन पत्ताचस, अरा धर्मेस ई पत्त'अना ती आसिन उजगो गनचस।” एन्ने नेम्‍हा पुथी नू बाचका कत्था पूरचा। अरा आस धर्मेसी सखी हूँ बारस।
24
औंगे नीन ऎरदय का ओर्तोस पत्त'अना ती लेका मला, आसी नन्ना नलख गुट्ठी ती हूँ उजगो गनरदस।
25
ई लेक्खम राख़ाब रन्‍डी इस्राऎलर ही भॆदियर गे तंग्है एड़पा नू र'आ गे अड्डा चिच्चा ती नन्ना डहरे ती आरिन दौ गने तइय्या, ई नलख गुट्ठी तिम धर्मेस अदिन उजगो गनचस।
26
बिगर बॊलता ही मॆद केचका मॆद हवे, अन्‍नेम बिगर नलख ही पत्त'अना केचका पत्त'अना दिम हवे।











याकूब 2:1
याकूब 2:2
याकूब 2:3
याकूब 2:4
याकूब 2:5
याकूब 2:6
याकूब 2:7
याकूब 2:8
याकूब 2:9
याकूब 2:10
याकूब 2:11
याकूब 2:12
याकूब 2:13
याकूब 2:14
याकूब 2:15
याकूब 2:16
याकूब 2:17
याकूब 2:18
याकूब 2:19
याकूब 2:20
याकूब 2:21
याकूब 2:22
याकूब 2:23
याकूब 2:24
याकूब 2:25
याकूब 2:26






याकूब 1 / याकूब 1
याकूब 2 / याकूब 2
याकूब 3 / याकूब 3
याकूब 4 / याकूब 4
याकूब 5 / याकूब 5