A A A A A
Facebook Instagram Twitter
Kurukh Bible 2014 Kurux

इब्रानियों 2



1
औंगे नाम एका मानी कत्‍थन मेंजकादत अबड़न नमा बॆस लगे चिहुंक ती नन्ना र'ई। एन्ने अम्‍बन मना का ना‍म अबड़ा मानी ती बेहड़ार'ओत कालोत।
2
एन्‍देरगेका एका कत्‍था मेर्ख़ा पैकर ती बातारकी रहचा आद मानिम बन्चकी रहचा, अरा एका ओर्तर अदिन मल नंजर अरा मल पॆस्रर आर गे ठौका दंडे ख़क्‍खरा।
3
औंगे नाम ई कोड़हे कोहाँ नाड़रनन हींड़'ओत होले, नाम एकासे दंडे ती बछर'ओत? ई नाड़रना गा मुन्‍द उर्बस ती तेंगतारा अरा नॆ नॆ इदन मेंजर आर ती ईद नमा गे मानिम अख़तारा।
4
धर्मेस हूँ चिन्‍हा अरा अजगुत नलख अरा रकम रकम ही हैकट नलख गुट्ठी ती अरा तंग्‍है मने लेक्‍खा नेम्‍हा बॊलतासी बरदानन ख़ट्टना ती इदही गोवाह चिच्‍चस।
5
आ बरना पुना सौंसे ही पत्त नू नाम कछनख्र'आ लगदत, अदिन राजी नना गे मेर्ख़ा पैकारिन धर्मेस मल चज्‍जियस।
6
एक‍अम ओर्तस नेम्‍हा पुथी नू ओन अड्डा नू एन्‍ने ब'‍‍अदस, “अना धर्मे! आलस नॆ तंग्‍है का नीन आसी फिकिर नन्‍दय अरा मनवा ख़द्दस नॆ तंग्‍है का नीन आसिन ऎरदय ख़ोजदय?
7
जुक्‍किम गे नीन आसिन मेर्ख़ा पैकर ती सन्नी कमचकय, आसिन महबा दरा म‍ईन आबोन टुपरी अत्ताचकय।
8
उर्मी जिनिसन आसी आकुस नू चिच्‍कय।” धर्मेस उर्मी जिनिसन आसी आकुस नू नंजस चिच्‍चस ख़ने, एन्‍द्रन हूँ आसी आकुस ती मल अम्‍बियस। लिकिन अक्‍कु गूटी नाम उर्मी जिनिसन आसी आकुस नू मल ऎरदत।
9
लिकिन नाम येसुसिन ऎरदत का आस जोक्‍क बेड़ा गे मेर्ख़ा पैकर ती कटी गुना सन्नी कम्रकाचस, अरा आस दुक्‍खे चॊदना ती खे'अना ही चड्डे आस गे महबा अरा म‍ईन आबोन टुपरी अत्तारा केरा, अरा नम्‍है म‍इय्याँ ता धर्मेसी मया ती उर्मी आलर गे आस केच्‍च ख़च्‍चियस।
10
धर्मेस उर्मी जिनिसन कमचस, अरा अबड़ा उर्मी आसी महबा गे र'ई। आस मने नंजस का आसी महबन बग्‍गे ख़द्दर हिसा मनोर। औंगे आस आलर ही नाड़रना ही उर्बस मसीसिन आसी दुक्‍खे चॊदना ती ओन्‍टा पखड़ मुद्धस कमचस।
11
येसुस एकास आलारिन नेम्‍हा नन्‍दस अरा नॆ नेम्‍हा नन्‍तारनर, अबड़ा ओर्मर ही बंगस ओन्‍टेम र'अदस। औंगे येसुस गे आरिन तंग्‍है भ‍ई ब'आ गे लज्‍जे मल मनी।
12
आस ब'अदस, “ऎन एंग्‍है भ‍ईर गे निंग्‍है पत्त नू तेंगोन, अरा गोड़हा एड़पा ही मुन्‍दहारे निंग्‍है ओहमन पाड़ोन।”
13
आस अउरिम ब'अदस, “ऎन धर्मेस म‍इय्याँ असरा ननोन।” अरा आस अउरिम ब'अदस, “ऎन धर्मेस एंगा गे चिच्का ख़द्दर गने इसन र'अदन।”
14
एन्‍देरगेका धर्मेसी ख़द्दर अहड़ा अरा ख़ॆंस ती कम्रका मनवा आलॊ हिकनर, औंगे येसुस हूँ आर लेक्‍खा अहड़ा अरा ख़ॆंस नू मंजस। तंग्‍है खे'अना ती खे'अना ही अदिया उइय्यू सैतान आबोन नास नना गे आस एन्ने मंजस।
15
अरा आलर खे'अना ही इल्‍चका ती बिट्ठी ननू जॊंख़ लेक्‍खा तम्‍है गोट्टा उज्‍जना नू र'अनर आरिन अम्‍बत'आ गे आस एन्ने मंजस।
16
एन्‍देरगेका येसुस मानिम नू मेर्ख़ा पैकर गे मला लिकिन अब्राहमसी जंईपुंईर गे संगरा नना गे बरचस।
17
ई चड्डे आस गे जम्मा नू तंग्‍है भ‍ईर लेक्‍खा मन्ना चाड़ रहचा। औंगे आस धर्मेसी सुसर नन्ना नू आर ही सोग्‍गे ईरू अरा पत्त'अना जॊगे कोहाँ नैग मना ओंगोस, अरा आस आर ही पाप गुट्ठिन छमा नना गे दाँड़े नना ओंगोस।
18
आस गे बिढ़्रना मंजा ख़ने, आस तानिम दुक्‍खे सारचस। औंगे आस बिढ़्रना नू दुक्‍खे सार'उर ही सहाड़ा नना ओंग्‍दस।











इब्रानियों 2:1
इब्रानियों 2:2
इब्रानियों 2:3
इब्रानियों 2:4
इब्रानियों 2:5
इब्रानियों 2:6
इब्रानियों 2:7
इब्रानियों 2:8
इब्रानियों 2:9
इब्रानियों 2:10
इब्रानियों 2:11
इब्रानियों 2:12
इब्रानियों 2:13
इब्रानियों 2:14
इब्रानियों 2:15
इब्रानियों 2:16
इब्रानियों 2:17
इब्रानियों 2:18






इब्रानियों 1 / इब्रानि 1
इब्रानियों 2 / इब्रानि 2
इब्रानियों 3 / इब्रानि 3
इब्रानियों 4 / इब्रानि 4
इब्रानियों 5 / इब्रानि 5
इब्रानियों 6 / इब्रानि 6
इब्रानियों 7 / इब्रानि 7
इब्रानियों 8 / इब्रानि 8
इब्रानियों 9 / इब्रानि 9
इब्रानियों 10 / इब्रानि 10
इब्रानियों 11 / इब्रानि 11
इब्रानियों 12 / इब्रानि 12
इब्रानियों 13 / इब्रानि 13