A A A A A
Facebook Instagram Twitter
Kurukh Bible 2014 Kurux

गलातियों 3



1
अना बोया गलातिया ता आलारो! नॆ निमन नस्‍सा? येसु मसीसिन क्रुस नू ठोकचर अदिन निम्‍है ख़न्न ही मुन्‍दहारे ऎदका रहचा।
2
ऎन निम्‍है ती ओन्‍टा कत्‍था ही पत्त नू अख़'आ बेद्ददन का एकासे नेम्‍हा बॊलतासिन नीम इंझ्रकर? मूसासी नॆगन नन्ना ती निमा गे बॊलतस ख़क्‍ख्रस का महले नीम मेंजका येसु मसीसी दौ कत्‍थन पत्त'अना ती ख़क्‍खरस का?
3
अना लूर मलका आलारो! एन्‍देर नीम नेम्‍हा बॊलतस ती ऒड़ नंजकर आ नलखन अक्‍कु नीम कया ही मने लेक्‍खा नना बेद्दा लगदर?
4
नीम ई कोड़हे सस्‍तिन सिथियम चॊदकर, अरा दौ कत्‍थन ख़क्‍खकर। अबड़ा उर्मी सस्ती अनभनियाँ अम्‍बो मना।
5
धर्मेस निमा गे तंग्‍है बॊलतासिन चि'अदस ती निम्‍है नू अजगुत नलख नन्‍त'अदस, आद नॆग ही नलख गुट्ठी ती का महले दौ कत्‍थन पत्त'अना ती एन्ने नन्‍दस का?
6
अब्राहमस धर्मेसिन पत्ताचस, ख़ने आस धर्मी लेक्‍ख्रस।
7
औंगे नीम अख़'आ हो'आ का नॆ पत्त'अनर आरिम अब्राहमसी ख़द्दर।
8
नेम्‍हा पुथी नू मुन्‍द तिम लिख्रकी र'ई, “धर्मेस पत्त'अना ती नन-यहूदीरिन उजगो आल कम'ओस। औंगे आस अब्राहमस गे ई दौ कत्‍थन मेन्ताचस, ‘उर्मी आलर निंग्‍है ती आसीस ख़क्‍खोर।’”
9
औंगे नॆ पत्त'अना नू र'अनर, आर पत्त'ऊ अब्राहमस संगे आसीस ख़क्‍खनर।
10
औंगे एवंदा आलर नाड़र'आ गे नॆग नू असरा नन्नर, आर ओर्मर सर्पारनर। एन्‍देरगेका नेम्हा पुथी नू लिख्रकी र'ई, “नॆ नॆग ता लिख्रका उर्मी कत्‍था ही बेसे मल मन्‍नर, आस ओर्त ओर्त सर्पारदस।”
11
अक्‍कुन ईद गा दहदर र'ई का नॆ हूँ नॆग ही चड्डे धर्मेसी ऎरना नू उजगो मलकर, एन्‍देरगेका नेम्हा पुथी नू लिख्रकी र'ई, “उजगो आलस पत्त'अना चड्डे उज्‍जोस।”
12
लिकिन नॆग ही पत्त'अना गने एन्‍देर नता हूँ मलकी, एन्‍देरगेका नॆ उर्मी नॆग आबोन मन'ओस, आस गे इत्रुम उज्‍जना ख़क्‍ख्र'ओ।
13
मसीस नमा गे सर्पारस अरा ई लेक्‍खा नॆग ही सर्पारना ती नाड़ियस। एन्‍देरगेका नेम्हा पुथी नू लिख्रकी र'ई अन्ने मंजा, “नॆकन कंक नू ठोकतार'ई, आस सर्पारकादस।”
14
ईद इदगे मंजा का मसी येसुस ती अब्राहमसी आसीस नन-यहूदीर गे हूँ ख़क्‍ख्र'आ गे आस नमन नाड़ियस। अरा नम्‍है पत्त'अना ती ई बॊलतस नमा ख़क्‍‍ख्र'आ ओंग्‍दस एकासी पत्त नू गच्‍छरकी रहचा।
15
अना भईरो! उर्मी उल्‍ला ता उज्‍जनन जोखदन ती तेंगदन। आलर नू गच्‍छरना बड़ियर कम्रकी र'ई होले अत्रु नॆ हूँ जोड़'आ पोलनर महले अइय्या एन्‍देर हूँ घटाबआ पोलनर।
16
गच्‍छरना गुट्ठी अब्राहमस गे अरा आसी जंईपुंई गे चीरकी र'ई। धर्मेस एन्ने मल बाचस का “निंग्‍है जंईपुंईर गे” इदही मने बग्‍गेर गे एन्ने र'ई। लिकिन धर्मेस बाचस, “निंग्‍है जंईपुंई गे” इदही मने ओर्तोस गे एन्ने र'ई। आ आलस येसुस हिकदस।
17
ऎन आनदन, एका गच्‍छरकन धर्मेस अब्राहमस गने पोकता नंजकाचस। अदिन नॆग चार सौ तीस बछर ख़ॊख़ा बर'अरकी तरकूटी नना पुल्‍ली का गच्‍छरना अनभनियाँ मनो।
18
एन्‍देरगेका अब्राहमसी आसीस नॆग आबोन नन्ना ती ख़क्‍ख्रकी र'ई होले गच्‍छरना ती मल्‍ला ख़क्‍ख्रा। लिकिन धर्मेस अदिन मया ती अब्राहमस गे गच्‍छरका ती चिच्‍चस।
19
ईगे नॆग ही चाड़ एन्‍द्रा रहचा? ख़ॆख़ेल ता आलर गे अक्‍का-बलकन अख़त'आ गे का? ईद अब्राहमसी पिड़ही ही बरना गूटी र'ओ, अदगे गच्‍छरका रहचा, अरा धर्मेस तंग्‍है नॆगन मेर्ख़ा पैकर ती मूसासिन चिच्‍चस। एकास धर्मेस अरा आलर ही चिलकठवा रहचस।
20
चिलकठवा ओर्तो तरती मल मनी, लिकिन धर्मेस ओर्त लेका र'अस, आस अब्राहमस गने गच्‍छरका बेड़ा नू एक‍अम चिलकठवासिन मल ब‍उराचस।
21
होले नॆग धर्मेसी गच्‍छरना गुट्ठी ही बिड़दो नू र'ई का? कईहो मला! एन्ने नॆग चीरकी रहचा एकदा उज्‍जना चि'आ ऊंगी होले, नाम नॆगन पॆस्रना ती धर्मेसी मुन्‍दहारे उजगो आल मनोस दने।
22
लिकिन नेम्हा पुथी ब'ई का नाम ओर्मत पाप ही आकुस नू र'अदत। एकत्रु येसु मसीस नू पत्त'अना ती पत्त'उर धर्मेसी गच्‍छरना आबोन ख़क्‍खनर नेकअन।
23
लिकिन पत्त'अना ही बरना ही मुन्‍द अदही दहदर मन्‍ना बेड़ा गूटी नाम नॆग ही ऎरना ख़ॊजना नू खुटरका उइरका रहचकत।
24
औंगे नॆग नमन मसीस हेद्दे ओन्‍द्र'आ गे नम्‍है ईरू-ख़ूजू मंजा का नाम पत्त'अना ती उजगो आल मनोत।
25
लिकिन अक्‍कु पत्त'अना बरचा, ख़ने नाम नॆग ही आकुस नू मलकत।
26
अरा नीम ओर्मर गा मसी येसुस म‍इय्याँ ता पत्त'अना ती धर्मेसी ख़द्दर मंजकादर।
27
निम्‍है ती नॆ नॆ मसी नू नॊड़रकानर, अबड़र तम्‍है उज्‍जना नू मसीसिन ऎदनर।
28
अक्‍कु नॆ हूँ यहूदी मला महले नन-यहूदी मला, बिट्ठी ननू जॊंख़ मला महले छछेम मला, नॆ हूँ मॆत मला महले मुक्‍का मला। अक्‍कु नीम ओर्मर मसी येसुस नू ओन्‍टा मंजकर केरकर।
29
नीम मसीसी हिकदर होले अब्राहमसी बनस हिकदर। अरा धर्मेस अब्राहमस गने नंजका गच्‍छरना चड्डे नीम धर्मेसी आसीस ख़क्खोर।











गलातियों 3:1
गलातियों 3:2
गलातियों 3:3
गलातियों 3:4
गलातियों 3:5
गलातियों 3:6
गलातियों 3:7
गलातियों 3:8
गलातियों 3:9
गलातियों 3:10
गलातियों 3:11
गलातियों 3:12
गलातियों 3:13
गलातियों 3:14
गलातियों 3:15
गलातियों 3:16
गलातियों 3:17
गलातियों 3:18
गलातियों 3:19
गलातियों 3:20
गलातियों 3:21
गलातियों 3:22
गलातियों 3:23
गलातियों 3:24
गलातियों 3:25
गलातियों 3:26
गलातियों 3:27
गलातियों 3:28
गलातियों 3:29






गलातियों 1 / गलाति 1
गलातियों 2 / गलाति 2
गलातियों 3 / गलाति 3
गलातियों 4 / गलाति 4
गलातियों 5 / गलाति 5
गलातियों 6 / गलाति 6