A A A A A
Facebook Instagram Twitter
Kurukh Bible 2014 Kurux

रोमियों 3



1
यहूदी र'अना ती बग्‍गे एन्‍देर ख़क्‍खरा? अरा खतना ती एन्‍देर फैदा?
2
उर्मी तरती ढ़ॆर बग्‍गे ख़क्‍खरा। उर्मी ती मुन्‍द धर्मेसी कत्‍था गुट्ठी यहूदीर गे थोपरा।
3
जोक्‍क यहूदीर धर्मेसिन मल पत्ताचकर। होले ईर ही मल पत्त'अना ती धर्मेस तंग्‍है गच्छरका आबोन अम्‍बोस चि'ओस का?
4
कहियों मला! ओर्मा आलर ठकवा मनोर क'ओर होले हूँ धर्मेस मानिम ब'अतेम र'ओस। एकासे का नेम्‍हा पुथी नू धर्मेसी पत्त नू लिख्रकी र'ई, “नीन निंग्‍है कत्‍था गुट्ठी ती उजगो बार'ओय, अरा निंग्‍है नेंवई बारी नीन जित'ओय।”
5
एकाबारी नाम बिड़दो नन्‍दत, आद फरीफरी ईद'ई का धर्मेस उजगो र'अदस। औंगे जोक्‍कोर ब'आ ओंग्दर का धर्मेसी नमा गे दंडे चि'अना ठौका मलकी। ईद आलर ही सोचना लेक्‍खा र'ई।
6
ईद एन्ने मला का, धर्मेस ईर गे दंडे चि'अना नू मानिम मल र'अदस होले आस ई ख़ॆख़ेल ही नेंवई नना पोलदस।
7
ओर्तोस ब'आ ओंग्दस, “एकाबारी ऎन ठक‍दन, ईद मानिम नू धर्मेसी महबा चि'ई, एकासे का एंग्‍है ठकवा धर्मेसी मानिम आबोन ईद'ई। होले एन्‍देरगे ऎन नेंवई नू पपहा टूड़र‍तारदन?”
8
एन्ने होले “दौ ख़क्‍खा गे मलदौ ननोम” एन्ने एन्‍देरगे मल ब'ओम? जोक्‍क आलर ऎम हूँ एन्ने ब'अदम ब'अनर ती निं‍दा नन्नर। औंगे एन्ने आलारिन पपहा ठेकाब'अना बॆस र'ई।
9
होले नाम एन्‍देर ब'ओत? नाम यहूदीयत नन्ना आलर ती बॆस र'अदत का? कहियों मला। ऎम मुन्‍द दिम बाचकादत का यहूदीर अरा नन-यहूदीर ओर्मर पाप ही तबे नू र'अनर।
10
एकासे नेम्‍हा पुथी नू लिख्रकी र'ई, “नॆ हूँ धर्मेसी ऎरना नू उजगो मल्‍ला, ओर्त हूँ मला।
11
नॆ हूँ धर्मेसी पत्त नू बुझ्र'ऊ मल्‍ला, नॆ हूँ धर्मेसिन बिद्दू मलनर।
12
ओर्मर बेहड़ारका केरका र'अनर, ओर्मर अनलोगा मंजका केरका र'अनर, नॆ हूँ दौ मल ननू र'अनर, ओर्त हूँ मला।”
13
“आर ही ब'अना गुट्ठी चलख़रका मसड़ा लेक्‍खा र'ई, आर ही ततख़ा गुट्ठी लबरा हिके। आर ही लेवटो गुट्ठी नू नेर्रे ही बिक्‍ख र'ई।”
14
“आर ही ब‍ईय्यद सर्प'अना दरा ख़ड़ख़ा ती निन्‍दकी र'ई।”
15
“आर पिटा गे बोंग्‍गनर।
16
आर ही डहरे नू नठारना दरा कलपारना र'ई।
17
आर एकासे कोड़े उज्‍जना र'ई अदिन बलनर।
18
आर गे धर्मेसी इल्चका दिम मलकी।”
19
नाम अख़दत का धर्मेसी पॆसका एन्‍देर ब'ई, इबड़ा पॆसका ही तबे नू र'ऊ आलर गे तिंगी। औंगे नाम उर्मी यहूदीर गे एन्‍द्रा हूँ ब'अना ही ओदहा मलकी। एन्ने गोट्टा ख़ॆख़ेल ता आलर गे धर्मेसी रायबड़ी नू तम्‍है लेखा चि'अना र'ई।
20
औंगे नॆ हूँ पॆसकन पॆस्रना ती धर्मेसी ऎरना नू उजगो मना पोलनर। पॆसका नमन नम्‍है पापन लेका अख़त'ई।
21
अक्‍कु बिगर पॆसका ती नमन धर्मेसी ऎरना नू उजगो मना गे धर्मेस डहरे ऎद्ददस। इदगे मूसासी पॆसका अरा धर्मेसी कत्‍था तिंगुर ही कत्‍था हूँ गोवाह र'ई।
22
धर्मेस ती बर'ऊ ई उजगो पत्त'ऊ ओर्मर गे येसु मसीस नू ता पत्त'अना ती बर'ई। ईद यहूदीर अरा नन-यहूदीर ओर्मर गे ओन्‍टा दिम र'ई।
23
एन्‍देरगेका ओर्मर पाप नंजका र'अनर अरा धर्मेसी महबा ही जॊगे मल र'अनर।
24
लिकिन अक्‍कु मसी येसुस ती बरचका नाड़रना ती धर्मेसी मया ती सिथियम आर उजगो मन्नर कानर।
25
धर्मेस येसुसिन ई ख़ॆख़ेल नू नम्‍है पाप गे पाप ही दाँड़े गे त‍इय्यस। येसुस तंग्‍है जियन दाँड़े चिच्‍चस अरा तंग्‍है ख़ॆंसन तरपाचस, इदिन इकला नाम पत्त'अदत अउला उजगो मन्‍तारदत। ई दाँड़े ऎद्ददस का येसुस तंग्‍है जियन दाँड़े चि'अना ही मुन्‍द ता आलर ही पाप गुट्ठिन धर्मेस सहचस ती बिगर दंडे चि'अम छमा नंजस ती तंग्‍है उजगो आबोन ऎदस।
26
ई परिया नू तंग्‍है उजगो आबोन ऎद'आ गे धर्मेस येसुसिन चिच्‍चस। धर्मेस इदिन एन्ने ऎद'आ गे नंजस का आस ठौका ती नेंव‍ई नना ओंग्दस, अउर हूँ आस येसुस म‍इय्याँ पत्त'उरिन उजगो कमदस।
27
औंगे नॆका हूँ फुल‍ई नना गे अड्डा र'ई का? अदगे अड्डा मल‍की। एन्‍देरगे एन्‍ने मलकी? उजगो मनरकी धर्मेस ती इंझ्रतारना पॆसका आबोन पॆस्रना ती मला लिकिन पत्त'अना ती मनी।
28
एन्‍देरगेका नाम मनदत का आलर पॆसकन पॆस्रना ती मला पत्त'अना ती उजगो मन्नर।
29
ईद मानिम का धर्मेस यहूदीर ही लेका धर्मेस हिकदस का? आस नन-यहूदीर ही धर्मेस मल्‍दस का? आस मानिम नन-यहूदीर ही हूँ धर्मेस हिकदस।
30
एन्‍देरगेका ओर्त लेका धर्मेस र'अदस। आसिन इंझ्रना ही ओन्‍टे लेका डहरे र'ई। आस खतना नंजका आलारिन पत्त'अना ती आरिन उजगो मन्‍दस। अरा बिगर खतना नंजका आलारिन हूँ पत्त'अना ती लेका उजगो मन्‍दस।
31
होले नाम ई पत्त'अना ती पॆसकन मेटदत का? कहियों मला। नाम पॆसकन कोड़हे बड़ियर नन्‍दत।











रोमियों 3:1
रोमियों 3:2
रोमियों 3:3
रोमियों 3:4
रोमियों 3:5
रोमियों 3:6
रोमियों 3:7
रोमियों 3:8
रोमियों 3:9
रोमियों 3:10
रोमियों 3:11
रोमियों 3:12
रोमियों 3:13
रोमियों 3:14
रोमियों 3:15
रोमियों 3:16
रोमियों 3:17
रोमियों 3:18
रोमियों 3:19
रोमियों 3:20
रोमियों 3:21
रोमियों 3:22
रोमियों 3:23
रोमियों 3:24
रोमियों 3:25
रोमियों 3:26
रोमियों 3:27
रोमियों 3:28
रोमियों 3:29
रोमियों 3:30
रोमियों 3:31






रोमियों 1 / रोमियों 1
रोमियों 2 / रोमियों 2
रोमियों 3 / रोमियों 3
रोमियों 4 / रोमियों 4
रोमियों 5 / रोमियों 5
रोमियों 6 / रोमियों 6
रोमियों 7 / रोमियों 7
रोमियों 8 / रोमियों 8
रोमियों 9 / रोमियों 9
रोमियों 10 / रोमियों 10
रोमियों 11 / रोमियों 11
रोमियों 12 / रोमियों 12
रोमियों 13 / रोमियों 13
रोमियों 14 / रोमियों 14
रोमियों 15 / रोमियों 15
रोमियों 16 / रोमियों 16