Kurukh Bible 2014 Kurux

रोमियों 16

ऎन नम्‍है बहिन फीबॆ ही पत्त नू निमन आन्‍दन, एकाद केंख़्रेया कलीसिया ता ईरू-ख़ूजू र'ई।

नीन अदिन उर्बस नू इंझ्र'आ एकासे नेम्‍हा आलर गे म‍ईन नन्ना मनी। अरा एकअम कत्‍था नू अदगे निम्‍है चाड़ मनो, अदही सहाड़ा नना। एन्‍देरगेका आद कुदहा आलर ही अन्नेम एंग्‍है हूँ सहाड़ा नंजकी र'ई।

प्रिसका अरा अकुलास गे एंग्‍है मोंजरा चि'आ। ईर म‍सी येसुस नू एंग्‍है गने तेतर-सुसर ननू रहचर।

आर एंग्‍है जिया गे तम्‍है जियन अपलोक नू नंजका चिच्का रहचर। ऎन लेका मला अन्नेम नन-यहूदीर ही गोट्टा कलीसिया हूँ आर ही धन्‍यवाद ननी।

आर ही एड़पा ता कलीसिया गे हूँ एंग्‍है मोंजरा। एंग्‍है बॆस संगेस एपैनेतोस गे मोंजरा एकास आसिया राजी नू मसीस गे पहिल पत्त'ऊ आलस रहचस।

मरियम गे मोंजरा, आद निमा गे कोड़हे चिहुट नलख नंजकी रहचा।

अन्‍द्रोनिकोस अरा यूनिया नॆ एंग्‍है जातियर हिकनर अरा एंग्‍है गने गुड़ुरका रहचर अरा त‍इरक‍र ती नामे ख़क्ख्रका र'अनर। अरा एंग्है ती मुन्‍द मसीसिन इंझ्रका रहचर, आर गे मोंजरा।

अम्‍पलियातोस गे मोंजरा एकास उर्बस नू एंग्‍है बॆस संगेस र'अदस।

उरबानोस गे एकास मसी नू नम्‍है गने तेतर-सुसर ननू र'अदस। अरा एंग्‍है बॆस संगेस स्‍ताख़ुस गे मोंजरा।

अपेल्‍लॆस गे मोंजरा एकास मसी नू पोकता उरखस। अरिस्‍तोबुलोसी एड़पातर गे मोंजरा।

एंग्‍है जातियस हॆरॊदियॊन गे मोंजरा। नरकिस्‍सोसी एड़पाता आलर नू नॆ उर्बस नू र'अनर आर गे मोंजरा।

त्रूफैना अरा त्रूफॊसा गे मोंजरा, इबड़ा मुक्कर उर्बस नू बग्‍गे नलख नंजका र'अनर। एंग्‍है बॆस संगेस पेरसिया गे मोंजरा, ईद उर्बस नू कोड़हे चिहुट नंजकी र'ई।

रूफोस गे एकास उर्बस नू चज्‍जरका र'अस अरा आसी अयंग गे नॆ एंग्‍है हूँ अयंग हवे इरबर गे मोंजरा।

असुंक्रितोस अरा फिलेगॊन अरा हेरमॆस अरा पत्रोबास अरा हेरमास अरा आर ही गने र'ऊ ओर्मा भइय्योर गे मोंजरा।

फिलोलोगोस अरा यूलिया अरा नॆरेयुस अरा आसी बहिन अरा ओलुम्‍पास अरा आर ही गने उर्मी नेम्‍हा आलर गे मोंजरा।

अपन ती नन्नर नू नेम्‍हा चोंखना ती मोंजरा नना। निमा मसीसी उर्मी कलीसिया तरती मोंजरा।

अना भ‍ईरो! निमन ऎन गोहरारदन का नीम एन्‍देर सिखाब'अना ख़क्‍खकर अदही बिड़दो नू निमन ख़ाँड़नर‍ अरा निम्‍है डहरे ती मूड़त'अनर आर ही ती चिहुंक अरा तरकूटी र'आ।

एन्‍देरगेका का एन्ने आलर नम्‍है उर्बस मसीसी मला तम्‍है कूल ब'ई ही तेतर-सुसर नन्नर। अरा एम्‍बा एम्‍बा अरा भुरिय'अना कत्‍था ती बोको जिया आलारिन बेड़ाब'अनर चि'अनर।

निम्‍है मनना ही पत्त ओर्मा आलर नू बीड़रकी किरकी र'ई, औंगे ऎम निम्‍है पत्त नू रिझ्रदन। लिकिन ऎन बेद्ददन का नीम दौ गे लूरगर अरा मलदौ गे भ‍कुवा मना।

कोड़े ही धर्मेस लॆम सैतान आबोन निम्‍है ख़ेड्डे किइय्या गेंजत'ओस चि'ओस। नम्‍है उर्बस येसु मसीसी मया निम्‍है म‍इय्याँ मन्‍तेम र'ओ।

एंग्‍है गने तेतर-सुसर ननू तीमोथियुस अरा एंग्‍है जातियर लूकियोस अरा यासॊन अरा सॊसीपत्रोस निमन मोंजरा नन्नर। (

ऎन तेरतियोस ई चिठी ही लिख'ऊ उर्बस नू निमन मोंजरा नन्‍दन।)

गायोस एकास एंग्‍है अरा गोट्टा कलीसिया ही पाही ईरू र'अदस, आस निमन मोंजरा नन्‍दस। एरस्‍‍तोस नॆ नगरे ता भंडारी र'अदस अरा एम्‍है भ‍ई क्वार्तोस निमन मोंजरा नन्‍दर।

[नम्‍है उर्बस येसु मसीसी मया नीम ओर्मर गने र'आ नेकअन। आमेन।]

धर्मेस गे ओहमा मनन नेकअन। आस दौ कत्‍था ती निमन पत्त'अना नू बड़ियर नना ओंग्दस, एका कत्‍थन ऎन येसु मसीसी पत्त नू निमन तिंकन। ई कत्‍था ही गम हुल्‍लो ती नूख़्रकी रहचा।

ईद गा अक्‍कुन जनमजुग धर्मेसी पॆसका ती धर्मेसी कत्‍था तिंगुर ही पुथी गुट्ठी ती ईद उर्मी जातियर नू चलख़रा अरा अख़तारा, औंगे उर्मी जातियर इदिन पत्त'अना ती आस गे मन'आ ओंगनर।

ओर्त लेका लूरगर धर्मेस गे येसु मसीस ती जनमजुग गूटी ओहमा मनन नेकअन। आमेन।

Kurukh Bible 2014 Kurux

No Data