A A A A A
Facebook Instagram Twitter
Kurukh Bible 2014 Kurux

रोमियों 14



1
एकास पत्त'अना नू पयहा र'अदस आसिन इंझ्र'आ, लिकिन आसी जिया ही ठुकठुकरना म‍इय्याँ अमा नग्‍गानखर'आ।
2
ओर्तोस पत्त'अदस का उर्मी ओन्ना-मॊख़नन ओन्ना दौ र'ई, लिकिन नन्नस एकास पयहा र'अदस आस पत्त'अदस का अड़ख़ा-चॆख़ेल लेका ओन्ना दौ र'ई।
3
उर्मी ओन्ना-मॊख़नन उनू मूख़ू आलर मल मूख़ू आलारिन अम्‍बोर ख़ाँड़'आ। अन्नेम उर्मी ओन्ना-मॊख़नन मल उनू मूख़ू आलर मूख़ू आलर म‍इय्याँ बदी अम्‍बोर नना। एन्‍देरगेका धर्मेस आरिन इंझ्रका र'अदस।
4
नन्नर ही जॊंख़स म‍इय्याँ बदी नना गे नीन एका ओर्तय हिकदय? उर्बस आर ही नेंव‍ई ननोस का आर दौ नन्नर महले मलदौ नन्नर। आस दौ ननोस दिम एन्‍देरगेका उर्बस आसिन दौ नना गे सहाड़ा ननोस।
5
ओर्तस एका उल्‍लन नन्ना उल्‍ला ती बॆस मनदस। अरा नन्नस उर्मी उल्‍लन ओन्‍टम मनदस। ओर्मर ई पत्त नू तम्‍है तम्‍है जिया नू पोकता र'अना र'ई।
6
एका ओर्तस एका उल्‍लन नन्ना उल्‍ला ती बॆस मनदस आस उर्बस गे मनदस। अरा एका ओर्तस उर्मी ओन्ना-मॊख़नन ओन्दस मॊख़दस आस उर्बस गे इदिन नन्‍दस, एन्‍देरगेका आस धर्मेसी धन्‍यवाद नन्दस। अरा एकास मल ओन्दस मॊख़दस आस उर्बस गे इदिन नन्‍दस। अरा आस धर्मेसी धन्‍यवाद नन्‍दस।
7
एन्‍देरगेका नम्‍है ती नीक‍ईम तंगा गे लेका मल उज्‍जदस अरा तंगा गे लेका मल खे'अदस।
8
नाम उज्‍जा लगदत होले उर्बस गे उज्‍जा लगदत, अरा नाम खे'अदत होले उर्बस गे खे'अदत। औंगे नाम उज्‍जदत मलता खे'अदत नाम उर्बासी दिम हिकदत।
9
एन्‍देरगेका ई चड्डेम मसीस केच्‍चस अरा उज्‍जा हूँ चॊचस का केचका आलर अरा उज्‍जना आलर इरबर ही दिम उर्बस मनोस।
10
एन्‍देरगे नीन निंग्‍है भ‍ईस म‍इय्याँ बदी ठेकाब'अदय? मलता एन्‍देरगे नीन निंग्‍है भ‍ईसिन लेड़पोयहा ब'अदय? नाम ओर्मत गा धर्मेसी नेंव‍ई नन्ना अड्डा नू इज'ओत।
11
एन्‍देरगेका नेम्‍हा पुथी नू लिख्रकी र'ई, “उर्बस ब'अदस, ‘ईद मानिम का ऎन उज्‍जदन, अन्ने ईद हूँ मानिम का ओर्मर एंग्‍है मुन्‍दहारे मूकलिदर'ओर अरा ओर्मर ब'ओर का ऎन धर्मे हिकदन।’”
12
औंगे नाम ओर्मत धर्मेस गे तम्‍है तम्‍है लेखा चि'ओत।
13
औंगे नाम अपन ती नन्नर नू बदी मल ठेकाब'अना र'ई। ऊजी नू नीम फरिय'आ का निम्‍है भ‍ईसिन आसी डहरे नू मूड़ना पखना अम्‍बोर मना महले आसिन मूड़ना ही चड्डे अम्‍बोर मना।
14
ऎन उर्बस मसीस नू र'अना चड्डे, ऎन मानिम अख़दन का उर्मी ओन्ना-मॊख़ना तमा नू सोतबोड़'आ मलकी। लिकिन एकास एकअम ओन्ना-मॊख़नन सोतबोड़'आ पत्त'अदस होले आद आस गे सोतबोड़'आ दिम र'ई।
15
नीन निंग्‍है भ‍ई महले बहिन आबोन निंग्‍है ओन्ना-मॊख़ना ती हेन्‍दवारदय होले नीन चोन्‍हा ही डहरे नू मानिम गने मल ऎकदय। नीन निंग्‍है ओन्ना-मॊख़ना चड्डे आसी पत्त'अनन अमा नठाब'आ एकदन आस मलदौ सोचदस। एन्‍देरगेका मसीस आस गे हूँ केच्‍चस।
16
औंगे नीम एकदन बॆस ब'अदर, अदिन नीम नन्ना ती नन्नर निमन हींड़'ओर होले, अदिन अमा नना।
17
एन्‍देरगेका धर्मेसी राजी ओन्ना-मॊख़ना ही पत्त ता मला, लिकिन ईद नेम्‍हा बॊलतस नू उजगो मन्ना अरा कोड़े अरा रिझ्रना ही पत्त नू र'ई।
18
एका ओर्तस ई लेक्‍खा मसीसी तेतर-सुसर नन्‍दस, आस धर्मेसिन रिझाब'अदस अरा आलर आसिन सहरारनर।
19
औंगे नाम एकदा कोड़े आबोन उन्‍द्र'ई अरा अपन ती नन्नर नू मेसरनन बड़ियर ननी अदिन नना गे चिहुट नन्‍दत नेकअन।
20
ओन्ना-मॊख़ना धर्मेस म‍इय्याँ नाम नंजका पत्त'अना आबोन अम्‍बन बगड़'आ नेकअन। उर्मी ओन्ना-मॊख़ना बॆस गा र'ई, लिकिन एका ओर्तस ओन्ना-मॊख़ना चड्डे नन्नारिन पाप नू मूड़त'अदस होले आद आस गे मलदौ र'ई।
21
अहड़ा मॊख़ना महले अरखी झरा ओन्ना महले नन्ना इन्द्रिइम नन्ना निंग्‍है भ‍ई महले बहिन आबोन पाप नू मूड़त'ई होले अदिन अमके नना।
22
इबड़ा ही पत्त नू नीन एन्‍देर पत्त'अदय अदिन धर्मेसी अरा निंग्‍है मझी नू उइय्या। एकदन एकास बॆस बुझ्रदस अदही पत्त नू तान तंगानिम बदी मल ठेकाब'अदस होले आस बरकत ख़क्‍खू र'अदस।
23
लिकिन एकास एका ओन्ना-मॊख़नन ठुकठुकी मनदस ती ओन्दस मॊख़दस होले आस तान तंग्‍गानिम बदी ठेकाब'अदस। एन्‍देरगेका आस अदिन बॆस मल पत्ताचस। अरा इन्द्रिइम ईद दौ एन्ने मल पत्त'अना ती नन्नर होले आद पाप हवे।











रोमियों 14:1
रोमियों 14:2
रोमियों 14:3
रोमियों 14:4
रोमियों 14:5
रोमियों 14:6
रोमियों 14:7
रोमियों 14:8
रोमियों 14:9
रोमियों 14:10
रोमियों 14:11
रोमियों 14:12
रोमियों 14:13
रोमियों 14:14
रोमियों 14:15
रोमियों 14:16
रोमियों 14:17
रोमियों 14:18
रोमियों 14:19
रोमियों 14:20
रोमियों 14:21
रोमियों 14:22
रोमियों 14:23






रोमियों 1 / रोमियों 1
रोमियों 2 / रोमियों 2
रोमियों 3 / रोमियों 3
रोमियों 4 / रोमियों 4
रोमियों 5 / रोमियों 5
रोमियों 6 / रोमियों 6
रोमियों 7 / रोमियों 7
रोमियों 8 / रोमियों 8
रोमियों 9 / रोमियों 9
रोमियों 10 / रोमियों 10
रोमियों 11 / रोमियों 11
रोमियों 12 / रोमियों 12
रोमियों 13 / रोमियों 13
रोमियों 14 / रोमियों 14
रोमियों 15 / रोमियों 15
रोमियों 16 / रोमियों 16