A A A A A
Facebook Instagram Twitter
Kurukh Bible 2014 Kurux

रोमियों 12



1
अना भ‍ईरो! ऎन निमन बिन्‍ती नन्‍दन का धर्मेस निमा गे नंजकादस आ नलखन सुरता उइय्यरकी नीम निमन धर्मेस गे उज्‍जना दाँड़े बेसे चि'आ, अरा नेम्‍हा उज्‍जना ती आसिन रिझ्रत'आ, इदिम आसी महबा नन्ना ही मानिम डहरे हिके।
2
ई ख़ॆख़ेल ता आलर ही लेक्‍खा अमा मना, लिकिन धर्मेस ती निम्‍है जिया सुबहन बदल'आ। होले नीम अख़'ओर का निमा एन्‍देर नन्‍ना र'ई एकन्ने धर्मेस बेद्ददस, अरा एन्‍देर दौ र'ई अरा एन्‍द्रा धर्मेसिन रिझतार'ई अरा एन्‍द्रा कोड़हे बॆस र'ई।
3
एन्‍देरगेका धर्मेस एंगा त‍इरका मन्ना ही मया चिच्‍चस, आ आकुस ती ऎन निमन ओर्मारिन आनदन, एकासे नीम निमन बुझ्रना र'ई अत्रु ती कोड़हे अमा सोच'आ। एकासे का धर्मेस निमा ओर्मर गे ऎ बग्‍गे पत्त'अना ही ख़ंजपा ख़ट्टिका चिच्का र'अदस अदही लेक्‍खा निमन लूरगर गने जोक्ख'आ।
4
एन्‍देरगेका एकासे नम्‍है ओन्‍टा कया नू बग्‍गे अंग र'ई, अरा उर्मी अंग ही उनिम लेक्‍खा नलख मलकी,
5
अन्ने नाम हूँ ओन कुदहा र'अदत, मसी नू ओन्टा कया मनरकी नम्‍है मझी नू ओरोत ओरोत ही अंग हिकदत।
6
नमा ख़क्ख्रका मया ही लेक्‍खा नमा गे नन्ना नन्ना ख़ंजपा ख़क्‍ख्रकी र'ई। नॆका धर्मेसी कत्‍था तेंगना ही ख़ंजपा ख़क्‍ख्रकी र'ई होले, आस आस गे ख़क्ख्रका प‍त्त'अना ही जोखना लेक्‍खा अदिन नन्‍दस नेकअन।
7
अन्नेम नॆका तेतर-सुसर नन्ना ही ख़ंजपा ख़क्ख्रकी र'ई होले, आस तेतर-सुसर नन्‍ना नू बोथ्रका र'अना र'ई। अरा नॆका सिखाब'अना ही ख़ंजपा ख़क्ख्रकी र'ई होले, आस सिखाब'अना नू बोथ्रका र'अना र'ई।
8
एकास गे रिझाब'अना ही ख़ंजपा र'ई, आस नन्नारिन रिझाब'अना नू बोथ्रका र'अना र'ई। अरा एकास गे दान चि'अना ही ख़ंजपा र'ई आस चि'अना नू हरकट मन्ना र'ई। एकास गे कड़हाब'अना ही ख़ंजपा र'ई आस गे अदिन मानिम गने नन्ना र'ई। एकास गे सोग्‍गे ऎदना ही ख़ंजपा र'ई, आस गे अदिन रिझ ती नन्ना र'ई।
9
निम्‍है चोन्हा मानिम चोन्‍हा मन्ना र'ई। मलदौ आबोन ख़ाँड़'आ अरा दौ नना गे मने नना।
10
अपन ती नन्नर गने भ‍ई बहिन बेसे चोन्‍हा नना। निम्‍है ती बग्‍गे नन्नारिन म‍ईन ननके।
11
लंडी अमके मना, कोड़हे नलख ननके, निम्‍है सौंसे जिया ती उर्बासी तेतर-सुसर ननके।
12
असरा नू खुसमार'आ, खिलपत नू सहनुम र'आ, गोहरारना नू बोथ्रका र'आ।
13
चाड़ नू र'ऊ धर्मेसी आलर गे निम्‍है गुसन एन्‍द्रा र'ई अदिन ख़ट्टा, पाही ऎरना नू बोथ्रका र'आ।
14
निम्‍है डाह'उरिन बरकत नना। आरिन अमा सरप'आ लिकिन बरकत नना।
15
खुसमार'ऊ आलर गने खुसमार'आ अरा चींख़ू आलर गने चींख़ा।
16
अपन ती नन्नर नू कोड़े गने उज्‍जा। अमा फुल‍ई नना, लिकिन टूटपुंजिया आलर गने मेस्र'आ ती र'आ। निमन लूरगर अमा सोच'आ।
17
मलदौ ही ऊजी नू मलदौ अमा नना। ओर्मा आलर ही ऎरना नू दौ नना गे चिहुट नना।
18
ऎ बग्‍गे मना ऊंगी आ गूटी ओर्मा आलर गने कोड़े गने र'आ।
19
दुलारो! अमके किर्त'अर बिड़द'आ, लिकिन धर्मेस तंग्‍है ख़ीस ती दंडे चि'आ गे आसी ख़ेक्खा नू अम्‍बा चि'आ, एन्‍देरगेका नेम्‍हा पुथी नू लिख्रकी र'ई, “उर्बस ब'अदस, ‘किर्त'अर बिड़द'अना एंग्‍है नलख हवे, ऎनिम किर्त'अर बिड़द'ओन।’”
20
ऊजी नू नेम्‍हा पुथी ब'अना लेक्‍खा, “निंग्‍है बैरीस कीड़ा सार'आ लगदस होले, आसिन मंडी ओन्‍त'आ, अरा ओन्‍क'आ र'अदस होले, आसिन ओन्‍त'आ। एन्‍देरगेका नीम एन्ने नन्ना ती आसिन लज्‍जे मॊख़त'ओय। ”
21
मलदौ ती अमा हार'आ, लिकिन दौ ती मलदौ आबोन जित'आ।











रोमियों 12:1
रोमियों 12:2
रोमियों 12:3
रोमियों 12:4
रोमियों 12:5
रोमियों 12:6
रोमियों 12:7
रोमियों 12:8
रोमियों 12:9
रोमियों 12:10
रोमियों 12:11
रोमियों 12:12
रोमियों 12:13
रोमियों 12:14
रोमियों 12:15
रोमियों 12:16
रोमियों 12:17
रोमियों 12:18
रोमियों 12:19
रोमियों 12:20
रोमियों 12:21






रोमियों 1 / रोमियों 1
रोमियों 2 / रोमियों 2
रोमियों 3 / रोमियों 3
रोमियों 4 / रोमियों 4
रोमियों 5 / रोमियों 5
रोमियों 6 / रोमियों 6
रोमियों 7 / रोमियों 7
रोमियों 8 / रोमियों 8
रोमियों 9 / रोमियों 9
रोमियों 10 / रोमियों 10
रोमियों 11 / रोमियों 11
रोमियों 12 / रोमियों 12
रोमियों 13 / रोमियों 13
रोमियों 14 / रोमियों 14
रोमियों 15 / रोमियों 15
रोमियों 16 / रोमियों 16