Kurukh Bible 2014 Kurux

रोमियों 11

तहाँ ऎन मेन्‍दन का धर्मेस तंग्‍है आलारिन अम्‍बियस चिच्चस का? कहियों मला! ऎन हूँ गा इस्राऎल आलन हिकदन, अब्राहमसी बनस तन अरा बेनियमिनसी गोतर तन।

धर्मेस तंग्‍‍है आलारिन एकदन आस मुन्द दिम चज्जिकाचस आरिन मल अम्‍बा ख़च्‍चियस। एन्‍देर नीम बलदर का? नेम्‍हा पुथी धर्मेसी कत्‍था तिंगू एलियसी पत्त नू एन्‍देर ब'ई, एकासे आस धर्मेसिन इस्राऎलर ही बिड़दो नू गोहरारस।

“उर्बायो! आर निंग्‍है कत्‍था तिंगुरिन पिटकानर आर निंग्‍है गोड़हा गुट्ठिन धंस्‍सकानर। ऎन ओर्त लेका बच्‍छ्रकादन अरा आर एंगन हूँ पिटा बेद्दा लगनर।”

लिकिन धर्मेस आसिन किर्त'अर बाचस, “ऎन सात हजार आलारिन एंगा गे बछाबाचका उइय्‍का र'अदन, एकार बाल नामे मूर्ती ही मुन्‍दहारे मूकलिद्रकर मलनर।”

ई लेक्‍खम ई परिया नू हूँ धर्मेसी मया ती चज्‍जरका जोक्‍क आलर बछरकर।

अन्‍ति आस आरिन तंग्‍है मया ती चा‍जदस होले ईद आर ही दौ नलख गुट्ठी ती मलकी। मला होले धर्मेसी मया मानिम मया मल र'ओ।

ईद एन्ने र'ई का, इस्राऎल आलर एका कत्‍थन बेद्दना नू रहचर अदिन उर्मीर गा पोल्‍लर ख़क्‍खा। लिकिन धर्मेसी ती चज्जिका जोक्‍क आलर अदिन ख़क्‍खियर। अरा बछ्रका आलर ही जिया बेड़हा मंजा केरा।

एकासे का नेम्‍हा पुथी नू लिख्रकी र'ई, “धर्मेस आर गे पयहा लूर आबोन चिच्‍चस। ख़ने आर इन्ना गूटी तम्‍है ख़न्न ती ऎरा पोल्‍लर अरा ख़ेबदा ती मेना पोल्‍लर।”

अरा दाऊद बॆलस एन्ने ब'अदस, “आर ही मदी आर गे फन्‍दा अरा जल्‍ली अरा मुड़ना पखना अरा दंडे ही जॊगे मनन।

आर ही ख़न्न धुधरा मनन एकत्रु आर ऎरा पोल्‍लोर। अरा आर ही कड़मा सदौ ख़ोलख़रका र'अन।”

औंगे ऎन मेन्‍दन, “एन्‍देर यहूदीर मूड़ना चड्डे सदौ गे नठार ख़च्चिकानर का?” कहियों मला! आर ही अक्‍का-बलका गुट्ठी ही चड्डे नन-यहूदीर गे नाड़रना ख़क्‍ख्रकी र'ई, एकत्रु यहूदीर नाड़रना ख़क्‍खा गे हराजीता मनोर।

अक्‍कुन यहूदीर ही अक्‍का-बलका सौंसे ख़ॆख़ेल ता आलर गे कोड़हे बरकत ओन्‍द्रा, आर ही फोकरना नन-यहूदीर गे अजगुत मनी। होले सौंसे यहूदीर दौ कत्‍थन इंझ्रका ती एवंदा अजगुत बरकत ओन्‍द्र'ई।

अक्‍कु ऎन नन-यहूदीर निमन ती ब'आलदन। ऎन गा नीम नन-यहूदीर ही त‍इरकन र'अना ती ऎन एंग्‍है ई नलख ती फुल‍ई नन्‍दन।

एकअम ‍अन्ने ऎन एंग्‍है जातियारिन हराजीता मन्ना ती अरा ई लेक्‍खा आर ती जोक्‍कोर ही नाड़रना ही हूँ असरा नन्‍दन।

एन्‍देरगेका आर ही अम्‍बरना ही चड्डे धर्मेसी ख़ॆख़ेल गने मेस्रना मंजकी किरकी र'ई, होले इकला आर ही इंझ्रना मनो, आद केच्‍कारिन उज्‍जना ओन्‍द्रना बेसे र'ओ दने।

लिंडका गुंडा ती पहिल दाँड़े चिच्का असमा नेम्‍हा र'ई होले गोट्टा लिंडका गुंडा नेम्‍हा र'ई। अरा पादा नेम्‍हा र'ई होले डाड़ा हूँ नेम्‍हा र'ई।

दौ जैतून मन्न ती जोक्‍क डाड़न एस'अरकी तरकूटी नन्‍तारकी किरकी र'ई। अरा नीम नन-यहूदीरो! जंगली जैतून ही डाड़ा हिकदर, अदही अड्डा नू कलम नंजका हिकदर। अरा दौ जैतून ही पादा ती बर'ऊ अदही उज्‍जना ही रासी ही हिसा मंजकर।

औंगे नीम खंड्रका आ डाड़ा गुट्ठिन ख़ाँड़ना ती नीम अमा फुल‍ई नना। एन्ने नीम सोचदर होले नीम सुरता उइय्या का नीम पादन मल सम्ड़'अदर, लिकिन पादा निमन सम्ड़'ई।

नीम ब'आ ओंगोर डाड़न खंडरकी इदगे तरकूटी नंजका र'ई का एंगन कलम लगा बातार'ओ।

मानिम दिम हिके। अबड़र मल पत्त‍'अना चड्डे खंडरकी तरकूटी नन्तारकी र'ई, अरा नीम पत्त'अना ही जोर ती दिम अक्‍कु गूटी बड़ियर र'अदर। औंगे ई चड्डे अमा फुल‍ई नना लिकिन चिहुंक र'आ।

एन्‍देरगेका धर्मेस दौ जैतून मन्न ही मूर डाड़न हूँ मल अम्‍बियस होले नीम कलम नंजका डाड़न सेब्‍बा ती अम्‍बोस।

औंगे धर्मेसी सोग्‍गे ऎदरना अरा बेड़हा सुबहन नीम सोच'आ। मल मनना ती खत्रका आलर म‍इय्याँ आसी सुबहा बेड़हा मनी, अरा नीम आसी सोग्‍गे म‍इय्याँ असरा नन्‍तेम ‍र'अदर होले आस निमन सोग्‍गे ऎरदस। मला होले नीम हूँ खंडत'अरकी तरकूटी नन्‍तार'ओर क'ओर।

अरा यहूदीर हूँ तम्‍है मल पत्त'अना नू मल बन्चका र'ओर होले, आर हूँ कलम लगा बातार'ओर। एन्‍देरगेका धर्मेस अबड़ारिन हूँ कलम नन्ना नू हूँ सवंगिय र'अदस।

नीम प्रकृति ती जंगली जैतून ही डाड़ा हिकनर अरा अत्रु खंडर'अरकी निम्‍है प्रकृति ही बिड़दो नू दौ जैतून ही कलम नन्‍तारका र'अदर। होले प्रकृति ती दौ जैतून ही डाड़ा बेसे यहूदीर तम्‍है अपन जैतून नू एवंदा सेब्‍बा ती असगतारोर।

अना भ‍ईरो! ऎन निमन ई भेद ही मनेन बुझुरत'आ गे बेद्ददन, होले नीम निमन कोड़हे लूरगर अम्‍बोर बुझ्र'ओर। इस्राऎल ता कुदहा आलर अक्‍कुन बेड़हा मंजका र'अनर। लिकिन गोट्टा नन-यहूदीर हूँ आसिन पत्त'अना गूटी लेका आर एन्ने र'ओर।

एन्ने मन्ना ती ख़ॊख़ा उर्मी इस्राऎलर नाड़र'ओर। एकासे का नेम्‍हा पुथी नू लिख्रकी र'ई, “नाड़ुस येरुसलॆम ती बर'ओस। अरा आस इस्राऎल ती महबा मलकन तरकूटी नंज ख़च्‍चोस।

ऎन आर ही पाप गुट्ठिन ख़ड'ओन। आद आर ही एंग्‍है गच्‍छरना हवे।”

यहूदीर दौ कत्‍थन इंझ्र'आ गे मने मल नन्नर, औंगे आर धर्मेसी बैरी हिकनर। इदही चड्डे नन-यहूदीर दौ ख़क्‍खियर। लिकिन चाजरना ही चड्डे अरा आर ही पूरखर अब्राहम, इसाक, अरा याकॊबस गे चिच्का गच्‍छरना ही चड्डे धर्मेस आर म‍इय्याँ अक्‍कु गूटी चोन्‍हा नन्‍दस।

धर्मेस गा तंग्‍है बरदान आबोन अरा तंग्‍है मॆख़नन कहियों मल किर्त'अर हो'अदस।

एकासे का नीम मुन्‍द धर्मेसी कत्थन मल पॆस्र'आ लिक्‍कर, अक्‍कु यहूदीर ही मल पॆस्रना ही चड्डे धर्मेसी सोग्‍गे ख़क्‍खकादर।

आ बेसेम यहूदीर अक्‍कु धर्मेसी कत्‍थन मल पॆस्रर। धर्मेस निम्‍है म‍इय्याँ ऎदका सोग्‍गे लेक्‍खा आर हूँ ख़ॊख़ा सोग्‍गे ख़क्‍खोर।

धर्मेस ओर्मारिन मल पॆस्रना नू बझर'आ चिच्‍चस, होले आस ओर्मर म‍इय्याँ सोग्‍गे ऎद'आ ओंग्दस।

बोह! धर्मेसी खुरजी अरा लूर अरा अकिल एवंदा गड्डी र'ई। आसी नेंव‍ई आबोन बेद्दरकी अख़'आ पोल्‍लना र'ई अरा आसी नन्ना ही घत आबोन बुझुर'आ पोल्‍लना र'ई।

नेम्‍हा पुथी एन्ने ब'ई, “उर्बासी जियन नॆ अक्‍की र'ई? आसी सलहा चि'ऊ नॆ मंजकी र'ई?

तंगा गे ऊजी नू फेन ख़क्‍खा गे नॆ आस गे मुन्‍द इन्द्रिइम चिच्‍की र'ई?”

एन्‍देरगेका उर्मी दिम धर्मेस तरती दिम बरचा। अरा उर्मी आसी तिम अरा आस गेम र'ई। आस गे महबा जनमजुग मनत र'अन नेकअन। आमेन।

English NET Bible 2005 (New English Translation)