A A A A A
Facebook Instagram Twitter
Kurukh Bible 2014 Kurux

रोमियों 1



1
ऎन म‍सी येसुसी जॊंख़न पौलुस धर्मेसी त‍इरका मना गे मॆख़रका र'अदन। अरा आसी दौ कत्‍थन तेंगा कुद्दा गे चजरका र'अदन।
2
धर्मेस ई दौ कत्‍थन मुन्‍द तिम नेम्‍हा पुथी नू तंग्‍है कत्‍था तिंगुर ती गच्‍छरका रहचस।
3
ई दौ कत्‍था तंग्‍है ख़द्दासी पत्त नू र'ई। आस आल कया ती गा दाऊद बॆलासी बनस नू कुन्‍द्रस।
4
आस नेम्‍हा बॊलतासी सवंग ती केचका ती उज्‍जा चो'अना ती धर्मेसी ख़द्दस नंज ऎदस। आसिम नम्‍है उर्बस येसु मसीस हवे।
5
धर्मेस येसुस ती एमा मया अरा त‍इरका मन्ना ही हदा चिच्‍चस का आसी नामे ही चड्डे उर्मी जातियर पत्त'ओर ती आसी पॆसकन ननोर।
6
अबड़र ती नीम हूँ येसु मसीसी आल मना गे मॆख़रकादर।
7
ऎन रोम नगरे नू र'ऊ निमा ओर्मर गे ई चिठिन लिखदन। धर्मेस निमन चोन्‍हा नन्‍दस अरा आसी आलर मना गे चज्जिका र'अदस। नम्‍है धर्मे बंगस अरा उर्बस येसु मसीस ती निमा मया अरा कोड़े ख़क्ख्रअन नेकअन।
8
मुन्‍द ऎन निमा ओर्मर गे येसु मसीस ती नम्‍है धर्मेसी धन्‍यवाद नन्‍दन का निम्‍है पत्त'अना ही हुही गोट्टा सौंसार नू मना लगी।
9
एका धर्मेसी ऎन आसी ख़द्दासी पत्त ता दौ कत्‍था तेंगना ती सौंसे जिया ती तेतर-सुसर नन्‍दन, आस अख़दस का ऎन सगरो एंग्‍है बिन्‍ती नू निमन सुरत'अदन।
10
ऎन एंग्‍है गोहरारना नू सगरो धर्मेस गुसन ने'अदन का आसी मने ती निमन ऎरा बर'आ गे बेड़ा ख़क्ख्र'ओ।
11
एन्‍देरगेका एंगा निम्‍है गने भेंटार'आ तुक्‍काली का ऎन निमन धर्मेसी बॊलता ती ख़क्ख्रका आसीस आबोन ख़ट्टा बेद्ददन का नीम निम्है पत्त'अना नू बड़ियर मना ओंगोर।
12
ऎन एन्‍देर ब'आलदन का नम्‍है नू र'ई आ पत्त'अना ती नाम नन्नारिन सहाड़ा नना ओंगोत।
13
अना भ‍ईरो! ऎन निमन अख़त'आ बेद्ददन का ऎन घड़ी घड़ी निम्‍है गुसन बर'आ गे चिता बुता नंजकन का निमन बॊलता ही उज्‍जना नू परदा गे सहाड़ा नना ओंगोन एकासे ऎन नन्ना नन-यहूदी आलर गे सहाड़ा नंजकन, लिकिन ऎन बर'आ पोलकन।
14
उज्‍जना बिज्‍जनन बड़ियर अख़'उर अरा बल्‍लुर अरा पढ़चकर अरा बिगर पढ़चका ओर्मर ही ऎन नहड़ा र'अदन।
15
औंगे ऎन नीम रोम नगरे ता आलारिन हूँ दौ कत्‍थन तेंगा गे सपड़ारकादन।
16
ऎन गा दौ कत्‍थन मेन्‍त'आ गे मल लज्‍जरदन। ईदिम पत्त'ऊ आलर ओर्मर गे मुन्‍द यहूदीर गे अरा ख़ॊख़ा नन-यहूदी आलर गे नाड़रना ही धर्मेसी सवंग ही डहरे हिके।
17
नेम्‍हा पुथी नू लिख्रकी र'ई, “उजगो आलर धर्मेस नू असरा नन्ना ती उज्‍जोर।” एन्ने ई दौ कत्‍था नमन ब'ई का एकासे धर्मेस नमन उजगो कमदस। ईद पत्त'अना ती दिम हुल्‍लो अरा हुल्‍लो गूटी मनी।
18
नॆ मलदौ ती मानिम आबोन अर्बनर उइय्‍नर आर ही मलदौ अरा धर्मेसिन महबा मल नना ही बिड़दो नू धर्मेसी खींस मेर्ख़ा ती दहदर म‍नी।
19
ईगेका धर्मेसी पत्त नू इन्द्रिइम लो अख़ना र'ई आद आर ही म‍इय्याँ दहदर र'ई। धर्मेस तानिम अदिन आर ही म‍इय्याँ दहदर नंजकादस।
20
इकला ती धर्मेस ख़ॆख़ेलन गढ़चस आसी मल ऎथ्रना गुन्न गुट्ठी, आसी जनमजुग ता सवंग अरा आसी धर्मे लेक्‍खा गुन्न ऎथ्रना नू बर'आ लगी। अबड़ा धर्मेसी कमचका ती अख़तार'ई। औंगे आलर धर्मेसिन बलदम ब'आ पोलनर।
21
आलर धर्मेसिन अक्‍खर, लिकिन आर आसिन धर्मे लेक्‍खा म‍ईन मल नन्नर महले धन्‍यवाद हूँ मल नन्नर। आर ही सोच अनभनियाँ मंजा केरा अरा आर ही मल लखरना ही जिया ऊख़ा मंजा केरा।
22
आर तमन लूरगर ब'अनर लिकिन आर बोया हिकनर।
23
आर सदौ उज्‍जना धर्मेसिन महबा मल नन्नर। ऊजी नू नठार'ऊ आल, ऒड़ा, मेक्‍खो अरा नेर्रे गुट्ठी लेक्‍खा मूर्ती गुट्ठी ही महबा नन्नर।
24
औंगे धर्मेस आरिन पाप नन्ना ही मने, जिया ही चिबाख़ारना गुट्ठी ती सोतबोड़'आ मना गे अम्‍बियस चिच्‍चस। ख़ने आर तम्है कयन ओरोत ईरीब नू लज्‍जे मलका सोतबोड़'आ नंजर।
25
आर धर्मेसी पत्त ता मानिमन अम्‍बियर ती ठकनन इंझ्रर। अरा आर सदौ सदौ ओहमा नन्ना जॊगे धर्मेसी ऊजी नू धर्मेस ती गढ़चका आलॊन महबा नंजर। आमेन!
26
ई चड्डेम धर्मेस आरिन आर ही मने ही घिनघिना लज्‍जे मलका नलख नना गे अम्‍बियस चिच्‍चस। आर ही मुक्‍कर हूँ मॆत उज्‍जनन अम्‍बियर ती अदही बिड़दो नू मुक्‍कर ताम ताम नू सोतबोड़'आ मना हेलरर।
27
अन्नेम मॆतर हूँ मुक्‍का उज्‍जनन अम्‍बियर ती ताम ताम सोतबोड़'आ मना गे कोड़हे बेद्दालियर। मॆत मॆतर लज्‍जे मलका नलख नंजर ती तम्‍है इबड़ा बोया नलख गुट्ठी ती तम्‍है मॆद नू दंडे भोघालनर।
28
आर धर्मेसिन चिन्‍ह'आ मल बिद्दयर। ख़ने धर्मेस हूँ आर ही बैड़ो बुधिन आर ही म‍इय्याँ राजी नना गे अम्‍बियस चिच्‍चस। औंगे आर इबड़ा उर्मी मलदौ नलखन नन्नर।
29
आर उर्मी बेसे कुचरहा नलख, मलदौ, चिबाख़ारना, ख़ाँड़ना ती निन्‍दयर केरर। अरा आर इस्‍गहा, पिटना, नग्‍गानख्रना, उत्तुरमाड़ना, चिड़गना पड़गना ती निन्‍दका र'अनर। अरा आर जलिय'अना
30
अरा निंदा नन्नर। अरा आर धर्मेसिन ख़ाँड़नर। अरा आर नन्नारिन कोड़े मल ब'उर र'अनर। अरा आर इतरार'ऊ अरा कोहाँ कोहाँ फुल‍ई मनू आलर र'अनर। अरा आर मलदौ मलदौ कत्‍था कम'ऊ र'अनर। अरा आर तंग्यो तम्‍बा ही पॆसकन मल मेन्नर।
31
अरा आर लखना मलका दरा गच्‍छरका मल उइय्युर र'अनर। अरा आर चोन्‍हा दरा सोग्‍गे ननू मलनर।
32
आर गा धर्मेसी ई नॆगन अख़नर का एन्ने एन्ने नलख ननुर खे'अना दंडे ही जॊगे र'अनर। अन्नु हूँ आर ताम लेका एन्ने मल नन्नर, लिकिन एन्ने नलख ननू आलर ती हूँ रिझ्रनर।











रोमियों 1:1
रोमियों 1:2
रोमियों 1:3
रोमियों 1:4
रोमियों 1:5
रोमियों 1:6
रोमियों 1:7
रोमियों 1:8
रोमियों 1:9
रोमियों 1:10
रोमियों 1:11
रोमियों 1:12
रोमियों 1:13
रोमियों 1:14
रोमियों 1:15
रोमियों 1:16
रोमियों 1:17
रोमियों 1:18
रोमियों 1:19
रोमियों 1:20
रोमियों 1:21
रोमियों 1:22
रोमियों 1:23
रोमियों 1:24
रोमियों 1:25
रोमियों 1:26
रोमियों 1:27
रोमियों 1:28
रोमियों 1:29
रोमियों 1:30
रोमियों 1:31
रोमियों 1:32






रोमियों 1 / रोमियों 1
रोमियों 2 / रोमियों 2
रोमियों 3 / रोमियों 3
रोमियों 4 / रोमियों 4
रोमियों 5 / रोमियों 5
रोमियों 6 / रोमियों 6
रोमियों 7 / रोमियों 7
रोमियों 8 / रोमियों 8
रोमियों 9 / रोमियों 9
रोमियों 10 / रोमियों 10
रोमियों 11 / रोमियों 11
रोमियों 12 / रोमियों 12
रोमियों 13 / रोमियों 13
रोमियों 14 / रोमियों 14
रोमियों 15 / रोमियों 15
रोमियों 16 / रोमियों 16