A A A A A
Facebook Instagram Twitter
Kurukh Bible 2014 Kurux

मत्ती 11



1
एकाबारी येसुस तंग्‍है बारो चेलारिन इबड़ा कत्‍थन पॆस'आ ख़च्‍चियस ती आस गलिलेया जिला ही नगरे गुट्ठी नू सिखाब'आ अरा तेंगा कुद्दा गे असले केरस।
2
यॊहन नूड़रत'उस जेहेल नू रहचस। आस मसीसी नलख ही हलन ख़क्खियस, अरा तंग्‍है चेलारिन येसुसिन इदन मेना तइय्‍यस।
3
“बर'ऊ ‘मसी’ नीनिम हिकदय का महले एकअम नन्‍नारिन ऎम पाब ऎरोम का?”
4
अरा येसुस आरिन किर्त'अर बाचस, “नीम एन्‍देर एन्‍देर मेन्‍दर अरा ऎरदर अदिन कला ती यॊहनसिन तेंगा चि'आ,
5
अन्‍धहर ऎरनर अरा लेंगड़र ऎकनर अरा खसरा रोगियर सफा नन्तारनर अरा भइरा आलर मेनालनर अरा केचका आलर उज्‍जतारनर अरा कीड़र गे दौ कत्‍था तेंगतार'आ लगी।
6
अरा यॊहनसिन तेंगा, ‘एंग्‍है चड्डे एका ओर्तोस तंग्‍है पत्त'अना नू मल मूड़दस आस आसीस ख़क्‍खोस।’”
यॊहनसी चेलर किर्रिम बिच्‍चियर अदही ख़ॊख़ा, येसुस यॊहनसी पत्त नू गोंहड़न ब'आ हेलरस, “नीम टोड़ंग नू एन्‍देर ऎरा केरका रहचकर? नॆखा सिखाब'अना ताका ती नुकुरना पोंड्रा बेसे र'ई आसिन का?
महले एन्‍देर ऎरा केरका रहचकर? लेपलेपे किचरी अत्तका आलासिन का? मला, नॆ लेपलेपे किचरी अत्तनर आर बॆल एड़पा नू र'अनर।
होले नीम एन्‍द्रन ऎरा केरका रहचकर? ओन्टा धर्मेसी कत्‍था तिंगुसिन का? हाँ, लिकिन ऎन निमन ब'अदन का यॊहन ओन्टा धर्मेसी कत्‍था तिंगुस ती कोहँस।
১০
ईसी पत्त नू नेम्हा पुथी नू एन्ने लिख्रकी र'ई, ‘ऎरा, ऎन एंग्‍है पैकासिन निंग्‍है ती मुन्‍द तइय्या लगदन, आस निंग्‍है मुन्‍द निंगा गे डहरेन सपड़'ओस।’
১১
ऎन निमन मानिम ब'अदन का नॆ मुक्‍कर ती कुन्‍द्रका र'अनर, अबड़र नू यॊहन नूड़रत'उस ती कोहाँ नॆ हूँ कुन्‍द्रका मल र'अनर। अन्नु हूँ नॆ मेर्ख़ा राजी नू सन्नी ती सन्नी र'अदस, आस आसी ती कोहाँ हिकदस।
১২
यॊहन नूड़रत'उसी बेड़ा ती इन्‍ना गूटी, आलर बड़पेलहा मेर्ख़ा राजी नू कोर'आ गे चिहुट नन्नर।
১৩
मूसासी नॆग अरा धर्मेसी कत्‍था तिंगुर ओर्मर यॊहन नूड़रत'उसी बरना बेड़ा गूटी एन्‍देर एन्देर मनो एन्ने मुन्‍द तिम बाचकानर।
১৪
अरा नीम इदन पत्त'आ मने र'ई होले, यॊहनस नूड़रत'उस दिम एलियस हवे नॆ धर्मेसी कत्‍था तिंगुर बाचका लेक्‍खा बर'ऊ रहचस।
১৫
नॆका मेना गे मने र'ई, आस मेन्‍दस ती बुझ्रना र'ई।
১৬
नॆ यॊहनसी सिखाब'अना अरा एंग्‍हैन मेन्नर अबड़ा आलर ही पत्त नू तेंगदन, आर बजार नू बीचू ख़द्दर लेक्‍खा र'अनर। आर तम्‍है संगेरिन चिच्चियारनर ती ब'अनर का
১৭
‘ऎम निमा गे बंसरी ऊरचकम, नीम मल नलकर। ऎम भोकरारकम नीम मल चींख़कर।’
১৮
यॊहन नूड़रत'उस गा मल मॊख़नुम अरा अंगुर रासी मल उन्नुम बरचस, लिकिन आर ब'अनर का आसी मइय्याँ नाद लक्‍की र'ई।
১৯
लिकिन मनवा ख़द्दस बने उन्नुम मॊख़नुम बरचस। ख़ने आर ब'अनर का ईस पेट पोसा अरा उंखुस अरा मलगुजारी ऊज'उर अरा पपहर ही संगेस हवे। लिकिन धर्मेसी लूर अदही लेक्‍खा ईकुर ही नलख ती आद मानिम एन्ने ईथर'ई।”
২০
अन्‍ति येसुस आ नगरे गुट्ठिन केबा हेलरस, एकइय्‍या आस उर्मिन्‍ती कोड़हे सवंग ही नलख नंजका रहचस, अन्‍नु हूँ आर जियन मल किर्ताचका रहचर।
২১
“ओहरे ख़ोराजिन नगरे ता आलारो, ओहरे बॆतसैदा नगरे ता आलारो! एका सवंग ही नलख निम्‍है नू मंजकी र'ई, अबड़ा तुरोस दरा सीदॊन नगरे नू मंजकी रहचा होले, आ उल्‍लम अइय्या ता आलर तमन सन्नी ऎद'आ गे बोरन झपर'अरकी अरा चिन्‍द नू ओक्‍करकी जियन किर्ताचका र'ओर दने।
২২
अन्‍नु हूँ ऎन निमन ब'अदन, रायबड़ी उल्‍ला नू तुरोस दरा सीदॊन नगरे ही दंडे ती निम्‍है दंडे बग्‍गे मलदौ मनो।
২৩
अरा अना कफरनहूम नगरे ता आलारो, नीम मेर्ख़ा म‍इय्याँ चॊदतार'ओर कालोर का? मला, नीम गा ख़ोड़ख़ा चिच्‍ची गड्डी नू टिड़तार'ओर कालोर। एका सवंग ही नलख गुट्ठी निम्‍है नू नंजका र'ई, ई नलख सोदोम नू मंजका होले आर तम्‍है पापन अम्‍बना ती धर्मेस तरा किर्रना ती इन्‍ना गूटी आ नगरे इज्‍जकी र'ओ दने।
২৪
अन्‍नु हूँ ऎन निमन ब'अदन, रायबड़ी उल्‍ला नू सोदोम नगरे ही दंडे ती निम्‍है दंडे बग्‍गे मलदौ मनो।”
২৫
आ बारी येसुस बाचस, “अना बबा होय! मेर्ख़ा दरा ख़ॆख़ेल ही उर्बायो! ऎन निंगन महबा नन्‍दन का नीन इबड़ा कत्‍था गुट्ठिन तमन अख़'उर अरा लूरगर आलर लेक्‍खा सोचनर आर ती नुड्डकादय, अरा तमन लुदऊ लेक्‍खा सन्नी ख़द्दर गे ऎदकय।
২৬
हाँ, अना बंग, निंगा ईदिम बॆस लग्‍गिया।
২৭
एम्‍बस एंगा गे उर्मी लूर अरा सवंगन सोंपचकादस। अरा नॆ हूँ बलनर का ऎन नॆ हिकदन एम्‍बस लेका अख़दस। अरा बंगस एकास अदिन नॆ हूँ बलनर ऎन लेका अख़दन, अरा ऎन नॆकन नॆकन बंगासिन ऎद'आ बेद्ददन आर अख़'ओर।
২৮
अना उर्मी अर्ज'ऊ अरा ओत्‍था ती कज्रका आलारो! एंग्‍है गुसन बरा, ऎन निमा ख़न्‍न ऎख़्रत'ओन।
২৯
एंग्‍है पगसिन नीम चेड़'आ अरा एंग्‍है ती सिख्र'आ, एन्‍देरगेका ऎन नर्मियाँ अरा जिया ती लुदऊ र'अदन, औंगे नीम निम्‍है जिया नू ख़न्‍न ऎख़्र'ओर।
৩০
एन्‍देरगेका एंग्‍है पगसी सेब्‍बा अरा एंग्‍है चिर्खी नेब्‍बा र'ई।”











मत्ती 11:1
मत्ती 11:2
मत्ती 11:3
मत्ती 11:4
मत्ती 11:5
मत्ती 11:6
मत्ती 11:7
मत्ती 11:8
मत्ती 11:9
मत्ती 11:10
मत्ती 11:11
मत्ती 11:12
मत्ती 11:13
मत्ती 11:14
मत्ती 11:15
मत्ती 11:16
मत्ती 11:17
मत्ती 11:18
मत्ती 11:19
मत्ती 11:20
मत्ती 11:21
मत्ती 11:22
मत्ती 11:23
मत्ती 11:24
मत्ती 11:25
मत्ती 11:26
मत्ती 11:27
मत्ती 11:28
मत्ती 11:29
मत्ती 11:30






मत्ती 1 / মথি 1
मत्ती 2 / মথি 2
मत्ती 3 / মথি 3
मत्ती 4 / মথি 4
मत्ती 5 / মথি 5
मत्ती 6 / মথি 6
मत्ती 7 / মথি 7
मत्ती 8 / মথি 8
मत्ती 9 / মথি 9
मत्ती 10 / মথি 10
मत्ती 11 / মথি 11
मत्ती 12 / মথি 12
मत्ती 13 / মথি 13
मत्ती 14 / মথি 14
मत्ती 15 / মথি 15
मत्ती 16 / মথি 16
मत्ती 17 / মথি 17
मत्ती 18 / মথি 18
मत्ती 19 / মথি 19
मत्ती 20 / মথি 20
मत्ती 21 / মথি 21
मत्ती 22 / মথি 22
मत्ती 23 / মথি 23
मत्ती 24 / মথি 24
मत्ती 25 / মথি 25
मत्ती 26 / মথি 26
मत्ती 27 / মথি 27
मत्ती 28 / মথি 28