Ghomala New Testament 2002

EBRAIKA 1

Si lə ghɔmnwə bi mtǎ cwədzə mcʉm mcʉ̌m, nthi nthi shyə m̀ nə mghɔm ghɔ̀m Si.

A piŋ bɑ nə cwə jʉ̀m yəŋ yə pɑ̌ nə a, e ghɔmnwə bi pɑ, kwa' bi pɑ shyə m nə ta' Mú yə e jap e, e pɑ dzʉ́ mcʉ̌' guŋ ywə awɛ, yə e lə cyə m nə e gə guŋ dzʉ awɛ a.

Pu shyə m̀ nə Mú bɔ jɔ dəŋ pa' ghu' Si nə dəŋnyə a, ba pa' Si nə bɑ a. E dɑ́ gʉ' ghɔm tsyə́ ŋkwa dzʉ́. E lě shu' pɔ nə mhɔnwə, shwə nə ghəŋ tʉɔ mo yə a bɑ e zhi a tə́ thə́.

E bɑ ě cyə pɑ aŋgəle. Si hɑ tso tsyə́, la' a pɑ pa' tsap a.

Si fɑ́ gɔm bi yá aŋgəle gɑ: O bɑ mú a, myə, gɑ̌ tsə o tyɛ' ɔ? Kɑ nə kwi' gɔm gɑ: Myə, gɑ̌ gɔ pɑ bi e pɑ́ tá e pɑ bəm bɑ mu?

A piŋ nə pɑ̌ po'o, bɑ cwə yə e shya thə́sə mú nthʉm dzʉ́ a, gɔm gɑ: A guŋ pɑ aŋgəle Si awɛ kam mkwi'tə dzə e.

A sɔ' m̀ nə pɑ aŋgəle bɑ ě ghə tsɔ ghɔm gɑ: Mo yə e dɑ pɑ aŋgəle pyə́ gə mzhwenyə, biŋ dɑ mghɛ fa' pyə́ gə mgwa mɔk a.

Da' gɑ sɔ' m nə Mu, a pɑ́ bɑ pu ghɔm gɑ: Leŋ fò o m Si bɑ mama! Ba m gɑ: O dɑ pɑ dəŋdəŋ tə nə sá' yu nəfò.

O lə kuŋ dəŋdəŋ, bɔ cwəpùŋ. A po'o m̀ Si tə Si o bɑ e lě jwɔ' o. Dɑ mwɑ ŋwɛnyə tə nə jwɔ' o, mwɑ nə ŋkhuŋ o shyə́ mso pǔ.

Ba m gɑ: Nə nə́ to' m Cyəpɔ, wə nə lə gə dəmcǎ' ba kɛbə̀ŋ bɑ mfa' bú mǔ.

Tsə bɔ gɔ sɔ' pfʉtə da' gɑ wə! O bɑ màmà. Ə̌ŋ, guŋ yap awɛ gɔ sɔ' vo pa' dzə a.

O piŋ dzʉm wap nə o pa' dzə bəŋ a. Piŋ kwyəpnyə wap pa' pu ŋkwyəpnyə dzə a. Da' gɑ́ wə̀, o tə ŋkwyəpnyə pɑ. Mgu'dzú mǔ lə pɑ gɔ la' mi.

E lə̌ fɑ gɔm bi ya nə pɑ aŋgəle gɑ: Cwə nə ghəŋ tʉɔ a. Gɑ̌ gɔ lɑ mghɛ bò pǔ ghə tʉ́ mkwə o?

Guŋ yap awɛ tə́ bɑ́ pɑ́ mzhwenyə, bɑ mghɛ fa' Si, bɑ ě təm gɑ wap fa' po' bi pɔ pyə wap gɔ sɔ' kwi ywə vɔk pa' mcʉ' a pɑ a?

Galacian Bible 2002

Nouveau Testament Ghomala © Bible Society of Cameroon, 2002