A A A A A
Facebook Instagram Twitter
Ewe Bible 1913

Filipitɔwo 1



1
Paulo kple Timoteo, Yesu Kristo ƒe dolawo, ŋlɔ ɖo ɖe ame kɔkɔe, siwo katã le Kristo Yesu me le Filipi la, kple dzikpɔlawo kple subɔlawo hã:
2
Amenuveve kple ŋutifafa, si tso Mawu, mía Fofo, kple Aƒetɔ Yesu Kristo gbɔ la, woana mi!
3
Meda akpe na Mawunye le nye ŋkuɖoɖo, siwo katã meɖoa mia dzi la me —
4
ɖaasi le nye kukuɖeɖe, siwo katã meɖena le mi katã mia ta la me, eye metso dzidzo ɖea kuku —
5
le miaƒe hadede, si le nyanyuie la me tso ŋkeke gbãtɔ dzi vaseɖe fifi la ŋuti,
6
esia ke ŋuti meɖoa ŋu ɖo bena, amesi dze do nyui wɔwɔ gɔme le mia me la, eya ke awu enu vaseɖe Yesu Kristo ƒe ŋkeke la dzi,
7
abe alesi wòdzo nam bena, masusu esia le mi katã mia ŋuti ene; elabena miele nye dzi me le nye kɔsɔkɔsɔwo kple nyanyuie la taʋiʋli kpakple kakaɖedzi la me; elabena mi katã míenye nye hagomekpɔlawo le amenuveve la me.
8
Elabena Mawue nye nye ɖaseɖila, alesi mi katã miele dzroyem vevie le Yesu Kristo ƒe dɔmetɔtrɔ la me.
9
Eye esia ŋuti medoa gbe ɖa ɖo, bena miaƒe lɔlɔ̃ la nana agbɔ sɔm ɖe dzi wu le sidzedze kple dzimenusese katã me,
10
bena miate ŋu ade vovo nyui kple vɔ̃ dome, ne mianye ame dzadzɛwo kple nuɖiaɖia manɔŋuitɔwo ɖe Kristo ƒe ŋkeke la ŋu,
11
bene dzɔdzɔenyenye ƒe ku, si wotsena to Yesu Kristo dzi la, nayɔ mi fũ hena Mawu ƒe ŋutikɔkɔe kple kafukafu.
12
Ke mele didim bena, mianyae, nɔviwo, bena nusiwo va dzo ɖe dzinye la, tra zu nyanyuie la ƒe dziyiyi nyui la boŋ,
13
ale bena nye bablawo dze ƒã le Kristo me ɖe asrafomɔ̃ blibo la katã me kple ame mamleawo katã gbɔ,
14
eye nɔviwo dome ame geɖeawo ɖo ŋu ɖe nye bablawo ŋu le Aƒetɔ la me, eye wowɔa kalẽ geɖe wu tsã le mawunyagbɔgblɔ me mavɔ̃mavɔ̃e.
15
Hafi amea ɖewo ɖea gbe ƒã Kristo le ŋuʋaʋã kple dzrewɔwɔ ŋuti; ke amea ɖewo hã ɖea gbe ƒãe le tameɖoɖo nyui ŋuti:
16
Amesiawo gblɔnɛ tso lɔlɔ̃ me; elabena wonyae be, nyanyuie la taʋiʋli ŋuti mele afisia ɖo.
17
Ame kemeawo gblɔa Kristo fiana tso dzrewɔwɔ me, menye tso dzadzɛnyenye me o; elabena wosusuna be, yewoatsɔ xaxa akpe ɖe nye bablawo ŋuti.
18
Ekema nukae ma? Ne wowɔe le mo sia mɔ dzi, eɖanye le alakpa alo nyateƒe me o, nenye Kristo koe wogblɔna fiana la, dzi le dzɔyem le esia ŋuti. Ẽ, dzi agadzɔm hã;
19
elabena menyae bena, esia atrɔ zu agbexɔxɔ nam to miaƒe kukuɖeɖe kple Yesu Kristo ƒe Gbɔgbɔ la ƒe kpekpeɖeŋu me,
20
le nye lala vevie kple mɔkpɔkpɔ la nu be, ŋu nagakpem le naneke me o, hafi boŋ metsɔa dzideƒo blibo la katã bena, alesi wònɔna ɖaa la, nenema ke wòano fifia hã, be woawɔ Kristo gã ɖe nye ŋutilã ŋuti, eɖanye agbe me alo ku me o.
21
Elabena nye la Kristo enye agbe nam, eye ku enye viɖe nam.
22
Ke ne nye agbenɔnɔ le ŋutilã me na nye dɔwɔwɔ tsea ku la, nyemenya nusi matia le eme o.
23
Elabena mexaxa ɖe nusiawo kpakple eve dome: Ele dzroyem be, madzo ayi aɖana Kristo gbɔ, elabena esia nyo wu sã;
24
gake la anyinɔnɔ le ŋutilã me la ele vevie wu le mia ta.
25
Eye esia ke ŋuti meɖoa ŋu ɖo, eye menyae bena, manɔ anyi, eye mía kpli mi katã míanɔ anyi hena miaƒe xɔse ƒe ŋgɔgbedede nyui kple dzidzɔ,
26
bena miaƒe adegbeƒoƒo la nasɔ gbɔ ɖe dzi le Kristo Yesu me le tanye to esia me, bena magava mia gbɔ.
27
Ɖeko mizɔ, abe alesi wòdze na Kristo ƒe nyanyuie la ene, bena ne mava, eye makpɔ mi ɖa, alo ne nyemele mia gbɔ o, eye mase mia ŋkɔ la, bena miano tsitre le gbɔgbɔ ɖeka me, eye miatso luʋɔ ɖeka aʋli nyanyuie ƒe xɔse la ta hekpe ɖe mia nɔewo ŋuti;
28
eye migaɖi vo le naneke me le miaƒe adikãtɔwo ŋuti o, esi nye gbegblẽ ƒe dzesi na wo, ke miawo la agbexɔxɔ ƒe dzesi wònye na mi, eye esia tso Mawu gbɔ;
29
elabena eɖi na mi le Kristo ta bena, menye ɖe miexɔ Kristo dzi se ɖeɖeko o, ke boŋ miekpea fu le eta hã;
30
elabena ʋiʋli ma ke, si miekpɔ le ŋunye, eye azɔ miesenɛ le ŋutinye la, le miawo hã mia si.











Filipitɔwo 1:1
Filipitɔwo 1:2
Filipitɔwo 1:3
Filipitɔwo 1:4
Filipitɔwo 1:5
Filipitɔwo 1:6
Filipitɔwo 1:7
Filipitɔwo 1:8
Filipitɔwo 1:9
Filipitɔwo 1:10
Filipitɔwo 1:11
Filipitɔwo 1:12
Filipitɔwo 1:13
Filipitɔwo 1:14
Filipitɔwo 1:15
Filipitɔwo 1:16
Filipitɔwo 1:17
Filipitɔwo 1:18
Filipitɔwo 1:19
Filipitɔwo 1:20
Filipitɔwo 1:21
Filipitɔwo 1:22
Filipitɔwo 1:23
Filipitɔwo 1:24
Filipitɔwo 1:25
Filipitɔwo 1:26
Filipitɔwo 1:27
Filipitɔwo 1:28
Filipitɔwo 1:29
Filipitɔwo 1:30






Filipitɔwo 1 / Fil 1
Filipitɔwo 2 / Fil 2
Filipitɔwo 3 / Fil 3
Filipitɔwo 4 / Fil 4