A A A A A
Facebook Instagram Twitter
Ewe Bible 1913

5 Mose 28



1
Ne eɖo to Yehowa, wò Mawu ƒe gbe pɛpɛpɛ, eye nèlé eƒe se, siwo katã meɖe na wò egbe la me ɖe asi hewɔ wo dzi la, ekema Yehowa, wò Mawu, atsɔ wò aɖo gã ɖe anyigba dzi dukɔwo katã nu.
2
Ne eɖo to Yehowa, wò Mawu ƒe gbe la, ekema yayra siawo katã ava dziwò, eye woaɖi na wò.
3
Woayra wò le ɖu me, eye Woayra wò le agble me.
4
Woayra wò dɔmevi, wò agblemenukuwo, wò lãwo ƒe viwo, kpakple wò nyinɔwo kple wò alẽnɔwo.
5
Woayra wò kusi kple wò amɔwɔze.
6
Ne eva aƒe la, Woayra wò, eye ne edo go la, woayra wò.
7
Yehowa, wò Mawu, asiwò futɔ, siwo ho aʋa ɖe ŋuwò la, le ŋgɔwò; mɔ ɖeka dzi woato aho ɖe ŋuwò, ke mɔ adre dzi woato asi le nuwo.
8
Yehowa ana yayra nanɔ wò ava kple nusiwo katã netsɔ asi wɔ ɖɔ kpɔ la dzi, eye woayra wò le anyigba, si Yehowa, wò Mawu, le na wò ge la dzi.
9
Ne èlé Yehowa, wò Mawu ƒe seawo me ɖe asi, eye nèzɔ eƒe mɔwo dzi la, ekema Yehowa aɖo wò nanye eƒe dukɔ kɔkɔe, abe alesi wòka atam na wò ene.
10
Eye anyigba dzi dukɔwo katã akpɔe bena, Yehowa ƒe ŋkɔ le ŋuwò, eye woayɔ wò.
11
Eye Yehowa ana wò kesinɔnuwo kple wò dɔmevi, wò lãwo ƒe viwo kple wò agblemenukuwo nasɔ gbɔ ɖe dzi le anyigba, si ŋu Yehowa ka atam ɖo na fofowòwo be, yeatsɔe na wò la dzi.
12
Yehowa aƒo eƒe nu nyuiwo nu ƒu na wò, aʋu dziƒo nu, be tsi nadza ɖe wò anyigba dzi le edzaɣi, eye woayra wò asinudɔwɔwɔwo katã, ale be nado nu na dukɔ geɖewo, ke wò ŋutɔ mado nugbana o.
13
Yehowa atsɔ wò awɔ tae, eye menye asike o, wòado wò ɖe dzi ɖaa, eye mava anyi o, elabena èse Yehowa, wò Mawu ƒe se, siwo mede na wò egbe, eye nele wo me ɖe asi hewɔ wo dzi,
14
medze le nya, siwo katã megblɔ na wò egbe la ŋu ɖe ɖusi alo mia me o, eye medze mawu bubuwo yome hesubɔ wo o.
15
Ke ne mèɖo to Yehowa, wò Mawu ƒe gbe o, eye melé se kple ɖoɖo, siwo katã megblɔ na wò egbe la me ɖe asi hewɔ wo dzi o la, ekema fiƒode siawo katã ava dziwò, eye woaɖi ŋuwò.
16
Aɖi ŋuwò le du me, eye aɖi ŋuwò le agble me.
17
Aɖi wò kusi kple wò amɔwɔze ŋu.
18
Aɖi wò dɔmevi kple wò agblemenukuwo kpakple wò nyinɔwo kple wò alẽnɔwo ŋu.
19
Ne èva aƒe la, aɖi ŋuwò, eye ne edo go la, aɖi ŋuwò.
20
Yehowa ana fiƒode, ʋunyaʋunya kple dzɔgbevɔ̃e nava wò nusiwo katã netsɔ wò asi wɔ dɔ kpɔ la dzi, vaseɖe esime naku atsrɔ̃ avɔ xoxoxo, le nu vɔ̃ɖi, siwo nèwɔ, eye negblẽm ɖi la ta.
21
Yehowa akplɔ dɔvɔ̃ aƒu wò, eye woatsrɔ̃ wò avɔ le anyigba, si dzi yim nèle, be naxɔe la dzi.
22
Yehowa akplɔ kpetri, kpokpo, asrã kple ŋuɖuɖui kpakple kuɖiɖi aƒu wò, wò bli adze heteku, eye wò nukuwo ahlɔ̃; woanɔ ŋuwò vaseɖe esime natsrɔ̃ avɔ.
23
Dziƒo azu akɔbli ɖe tawò me, eye anyigba azu ga ɖe tewò.
24
Yehowa ana kekui kple ʋuʋudedi nadza tso dziƒo ɖe tsi, si dzana ɖe wò anyigba dzi la teƒe.
25
Yehowa ana wò futɔwo nasi wò, mɔ ɖeka dzi nato aho aʋa ɖe wo ŋu, ke mɔ adre dzi nato asi le wo nu, ale bena natrɔ zu bibi na anyigba dzi fiaɖuƒewo katã.
26
Wò ame kukuwo anye nuɖuɖu na dziƒoxe dzodzoewo katã kple anyigba dzi lãwo, eye amea ɖeke manyã wo ɖa o.
27
Yehowa akplɔ Egiptetɔwo ƒe zubo, ƒoƒoe, anyi kple akpa aƒu wò, eye mahaya akpɔ o.
28
Eye Yehowa akplɔ tamedada, ŋkuagbã kple tsukuku aƒu wò,
29
eye atsa asi le ŋdɔ, abe alesi ŋkuagbãtɔ tsaa asi le viviti me ene; wò mɔwo madze edzi na wo o, ke boŋ woasẽ ŋuta le ŋuwò ɣesiaɣi, eye woada adzo wò, ke xɔnametɔa ɖeke manɔe na wò o.
30
Abia nyɔnu ta, ke ŋutsu bubu agblẽe; atu xɔ, ke manɔ eme o, ade weingble, ke mawɔ eŋu dɔ o.
31
Woawu wò nyitsu le ŋkuwo me, ke makpɔ ɖeke aɖu o, wòalé wo tedzi le ŋkuwò me, eye maganɔ va na wo o; woatsɔ wò alẽwo ana wò tutɔwo, ke xɔnametɔa ɖeke manɔe na wò o.
32
Woatsɔ viwòŋutsuwo kple viwònyɔnuwo na dukɔ bubuwo, wò ŋkuwo akpɔe, eye woano dzrowòm ŋkeke blibo la katã, gake womelé wò ŋusẽ te o.
33
Dukɔ, si menya o la, aɖu wò agblemenuwo kple nusiwo katã nèwɔ dɔ kpɔ, wòase ŋuta le ŋuwò ɣesiaɣi, eye woate wò ɖe anyi.
34
Eye nusiwo katã teƒe nakpɔ la, ana wò tame aɖa.
35
Yehowa ana nuƒoƒo vɔ̃ɖia ɖe naƒo klo kple sobo na wò, tso afɔƒome vaseɖe ta me, eye màhaya akpɔ o.
36
Yehowa akplɔ wò kple fia, si nava ɖo na ɖokuiwò la, ayi dukɔ, si mia kple fofowòwo mienyã o la dome, eye nasubɔ mawu bubuwo, siwo nye ati kple kpe.
37
Eye dukɔ, siwo katã dome Yehowa anyẽ wò aɖo ɖo la, aɖe ao ɖe ŋuwò, woatsɔ wò awɔ lodonya kple alɔmeɖenui.
38
Àƒã nuku geɖe ɖe agble me, ke ʋeea ɖe ko naŋe, elabena ʋetsuviwo aɖui avɔ.
39
Àde weingble, eye awɔ dɔ le eŋu, ke makpɔ wein ano o, eye màgbe kutsetsea ɖeke hã o, elabena ŋɔwo aɖui.
40
Amitiwo anɔ wò anyigba blibo la dzi, ke makpɔ ami asi o, elabena wò amititsetsewo adudu.
41
Adzi ŋutsuviwo kple nyɔnuviwo, ke womanye tɔwò o, elabena woaɖe aboyo wo.
42
Adogowo aɖu wò atiwo kple wò agblemenuwo.
43
Amedzro, si le dowòme la ŋkɔ ade dzi, ke wò la àyi to gbidigbidi.
44
Ado nu na wò, ke wò la màdo nugbana nɛ o; atrɔ zu ta, ke wò la azu asike.
45
Fiƒode siawo katã ava dziwò, woanɔ ŋuwò, eye woaɖi ŋuwò, vaseɖe esime natsrɔ̃ avɔ, elabena mèɖo to Yehowa, wò Mawu ƒe gbe o, eye mèlé se kple ɖoɖo, siwo wògblɔ na wò la me ɖe asi o;
46
eye dzesiwo kple nukunuwo adze le mia kple wò dzidzimeviwo ŋu tegbee.
47
Esi nu do sɔ gbɔ ɖe asiwò, eye mèkɔ mo hesubɔ Yehowa, wò Mawu la faa tso dzi me o la,
48
eyata dɔ kple tsikɔ awu wò, atsi amama, eye hiã atu wò le nu geɖewo me, gake hafi nagasubɔ wò futɔ, siwo Yehowa dɔ ɖe ŋuwò la, eye woade gakɔkuti kɔ na wò, vaseɖe esime woatsrɔ̃ wò avɔ.
49
Yehowa akplɔ dukɔ, si ƒe gbe mèsena o la, tso didiƒe le anyigba seƒe ke, abe alesi hɔ̃ dzona ene, ava de wò;
50
dukɔ, si ƒe mo kplala, menya nusi nye amegã ɖeɖi o, eye mevea ɖekakpui nu hã o.
51
Aɖu wò lãwo kple wò agblemenuwo, vaseɖe esi natsrɔ̃ avɔ, eye bli, wein kple ami kpakple wò nyinɔ kple wò alẽnɔa ɖeke masusɔ na wò vaseɖe esime natsrɔ̃ avɔ o.
52
Woaxaxa wò ɖo ɖe wò duwo katã me, vaseɖe esime wò gli kɔkɔ sesẽ, siwo ŋu nèle ŋu ɖom ɖo la, namũ adze anyi le wò anyigba blibo la dzi. Woaxaxa wò ɖo ɖe wò ɖu, siwo katã Yehowa, wò Mawu, na wò la me.
53
Ne wò futɔwo ɖe to ɖe wò, eye woxaxa wò ɖo la, ekema aɖu wò ŋutɔ wò dɔmevi, viwòŋutsu kple viwònyɔnu, siwo Yehowa, wò Mawu, na wò la ƒe lã.
54
Mia dome ŋutsu, si wɔa nu ɖe fewu me, eye wòɖua ve me vivi la, abia ŋku ɖe nɔviaŋutsu kple srɔ̃a, si le egbɔ, kpakple via mamlea, siwo kpɔtɔ ɖi la ŋu,
55
eye mana via, siwo ƒe lã ɖum wòle la, wo dometɔa ɖeke o; elabena wò futɔ, siwo aɖe to ɖe wò, eye woaxaxa wò ɖo ɖe wò duawo katã me la, magblẽ naneke ɖi nɛ o.
56
Mia dome nyɔnu, si wɔa nu ɖe fewu me, eye wòɖua ve me vivi, ewɔa atsyɔnu kple fewunu, eye mete kpɔ ɖo eƒe afɔƒome anyigba kpɔ o la, abia ŋku ɖe srɔ̃a, si le egbɔ, viaŋutsu kple vianyɔnu ŋu,
57
ɖe amenɔ, si le eƒe atawo domee, kpakple via, siwo wòdzi la ŋu, eye woaɖu wo le adza me le hiã, si tui le nuwo katã me la la, elabena wò futɔwo aɖe to ɖe wò, eye woaxaxa wò ɖo ɖe wò duwo katã me.
58
Ne mèlé se sia ƒe nyawo katã, siwo woŋlɔ ɖe agbalẽ sia me la me ɖe asi hewɔ wo dzi o, eye mèvɔ̃ Yehowa, wò Mawu ƒe ŋkɔ, si ŋu bubu kple ŋɔdzi le o la,
59
ekema Yehowa akplɔ fuwɔame tiatia, siwo nu sẽ, eye woanɔ anyi didie kple dɔléle vɔ̃ɖi, siwo anɔ anyi didie la, aƒu wò ŋutɔ kple wò dzidzimeviwo,
60
eye wòakplɔ Egipte-dɔvɔ̃, siwo katã dzi ŋɔ na wò tsã la, aƒu wò.
61
Eye Yehowa akplɔ dɔlélewo tsyo ƒomevi kple fuwɔamewo tsyo ƒomevi, siwo womeŋlɔ ɖe se sia ƒe agbalẽa me o la, aƒu wò, vaseɖe esime natsrɔ̃ avɔ.
62
Eye miatrɔ zu ʋee, ɖe esi miasa gbɔ abe dziƒoɣletiviwo ene la teƒe, elabena meɖo to Yehowa, wò Mawu ƒe gbe o.
63
Abe alesi Yehowa kpɔ dzidzɔ le mia ŋu be, wòawɔ nyui na mi, eye wòana míadzi ɖe dzi ene la, nenema ke Yehowa akpɔ dzidzɔ le mia ŋu be, wòawu mi, eye wòatsrɔ̃ mi; eye wòaɖe mi ɖa le anyigba, si dzi yim miele, be míaxɔe la dzi.
64
Yehowa aka wò ahlẽ ɖe dukɔwo katã dome, tso anyigba ƒe go ɖeka vaseɖe go keme, eye àsubɔ mawu bubu, siwo nye ati kple kpe, eye mia kple fofowòwo mienyã o la, le afima.
65
Makpɔ gbɔdzɔe le dukɔ mawo dome o, eye wò afɔƒome magbɔ ɖe me o, Yehowa ana natsi dzi le afima, wò ŋku anɔ aƒe dzi, eye vɔvɔ̃ aɖo lãme na wò.
66
Wò agbe atsi segesege me le ŋkuwò me, ànɔ dzodzom nyanyanya zã kple keli, eye maɖo ŋu ɖe wò agbe ŋu o.
67
Ŋdi la agblɔ be: Ao, zã maɖo dzroa! Eye fiẽ la agblɔ be: Ao, ŋu make dzroa! Elabena wò dzi le dzodzom nyanyanya le nu, siwo teƒe wò ŋkuwo le kpɔkpɔm la ta.
68
Yehowa akplɔ mi ade ʋu agbugbɔ aɖo ɖe Egipte ato mɔ, si megblɔ na mi be, migato o la dzi, eye woadzra mi le afima na miaƒe futɔwo mianye kluviwo kple kosiviwo, eye womakpɔ mia ƒlelawo gɔ̃ hã o.
69
Esiawo nye nubabla ƒe nya, siwo Yehowa ɖe asi na Mose, be wòagblɔ na Israel-viwo le Moab-nyigba dzi hekpe ɖe nusi wòbia kpli wo le Xoreb gbɔ la ŋuti.











5 Mose 28:1
5 Mose 28:2
5 Mose 28:3
5 Mose 28:4
5 Mose 28:5
5 Mose 28:6
5 Mose 28:7
5 Mose 28:8
5 Mose 28:9
5 Mose 28:10
5 Mose 28:11
5 Mose 28:12
5 Mose 28:13
5 Mose 28:14
5 Mose 28:15
5 Mose 28:16
5 Mose 28:17
5 Mose 28:18
5 Mose 28:19
5 Mose 28:20
5 Mose 28:21
5 Mose 28:22
5 Mose 28:23
5 Mose 28:24
5 Mose 28:25
5 Mose 28:26
5 Mose 28:27
5 Mose 28:28
5 Mose 28:29
5 Mose 28:30
5 Mose 28:31
5 Mose 28:32
5 Mose 28:33
5 Mose 28:34
5 Mose 28:35
5 Mose 28:36
5 Mose 28:37
5 Mose 28:38
5 Mose 28:39
5 Mose 28:40
5 Mose 28:41
5 Mose 28:42
5 Mose 28:43
5 Mose 28:44
5 Mose 28:45
5 Mose 28:46
5 Mose 28:47
5 Mose 28:48
5 Mose 28:49
5 Mose 28:50
5 Mose 28:51
5 Mose 28:52
5 Mose 28:53
5 Mose 28:54
5 Mose 28:55
5 Mose 28:56
5 Mose 28:57
5 Mose 28:58
5 Mose 28:59
5 Mose 28:60
5 Mose 28:61
5 Mose 28:62
5 Mose 28:63
5 Mose 28:64
5 Mose 28:65
5 Mose 28:66
5 Mose 28:67
5 Mose 28:68
5 Mose 28:69






5 Mose 1 / 5Mo 1
5 Mose 2 / 5Mo 2
5 Mose 3 / 5Mo 3
5 Mose 4 / 5Mo 4
5 Mose 5 / 5Mo 5
5 Mose 6 / 5Mo 6
5 Mose 7 / 5Mo 7
5 Mose 8 / 5Mo 8
5 Mose 9 / 5Mo 9
5 Mose 10 / 5Mo 10
5 Mose 11 / 5Mo 11
5 Mose 12 / 5Mo 12
5 Mose 13 / 5Mo 13
5 Mose 14 / 5Mo 14
5 Mose 15 / 5Mo 15
5 Mose 16 / 5Mo 16
5 Mose 17 / 5Mo 17
5 Mose 18 / 5Mo 18
5 Mose 19 / 5Mo 19
5 Mose 20 / 5Mo 20
5 Mose 21 / 5Mo 21
5 Mose 22 / 5Mo 22
5 Mose 23 / 5Mo 23
5 Mose 24 / 5Mo 24
5 Mose 25 / 5Mo 25
5 Mose 26 / 5Mo 26
5 Mose 27 / 5Mo 27
5 Mose 28 / 5Mo 28
5 Mose 29 / 5Mo 29
5 Mose 30 / 5Mo 30
5 Mose 31 / 5Mo 31
5 Mose 32 / 5Mo 32
5 Mose 33 / 5Mo 33
5 Mose 34 / 5Mo 34