A A A A A
Facebook Instagram Twitter
Ewe Bible 1913

1 Korintotɔwo 15



1
Ke, nɔviwo, mena mienya nyanyuie, si megblɔ fia mi, si miexɔ hã, esi me míetsi tre ɖo hã,
2
si me woxɔ mi ɖe agbe le hã, ne mielée ɖe asi, abe alesi metsɔ nyanyuie la gblɔ fia mi ene la; anye ne miexɔ edzi se dzodzo.
3
Elabena nusi nye hã mexɔ la, metsɔ de asi na mi gbãgbiagbã bena, Kristo ku le mia nuvɔ̃ ŋuti le ŋɔŋlɔ la nu,
4
eye bena woɖii, eye bena wogafɔe ɖe tsitre tso ame kukuwo dome le ŋkeke etɔ̃agbe le ŋɔŋlɔ la nu,
5
eye bena ede eɖokui fia Kefa, emegbe la ame wuieve la.
6
Eya megbe la eɖe eɖokui fia nɔvi, siwo wu ame alafa atɔ̃ la zi ɖeka, amesiwo dome geɖeawo le agbe vaseɖe fifi, ke amea ɖewo hã ɖɔ alɔ̃.
7
Emegbe la eɖe eɖokui fia Yakobo, emegbe da apostolowo katã.
8
Wo katã megbe la eɖe eɖokui fia nye hã abe fu gegee ene.
9
Elabena nye enye suetɔ le apostoloawo dome, amesi medze be, woayɔ be apostolo o, elabena meli Mawu ƒe hame la yome.
10
Ke Mawu ƒe amenuveve la ŋuti mezu nusi menye, eye eƒe amenuveve, si wotsɔ ve nunye la, menye dzodzro o, elabena medze agbagba geɖe wu wo katã; ke menye nyee o, hafi Mawu ƒe amenuveve, si le kpakplim la boŋ.
11
Azɔ la eɖanye nyee o, eɖanye ame kemewo o, nenema ke míeɖe gbe ƒã, eye nenema ke míexɔe se.
12
Ke ne woɖe gbe ƒã Kristo bena, etsi tre tso ame kukuwo dome la, aleke wo mia dome amea ɖewo gblɔ bena, ame kukuwo ƒe tsitretsitsia ɖeke meli o mahã?
13
Ke ne ame kukuwo ƒe tsitretsitsia ɖeke meli o la, ekema Kristo hã metsi tre o.
14
Ke ne Kristo metsi tre o la, ekema miaƒe gbeƒãɖeɖe enye dzodzro, eye miaƒe xɔse hã enye dzodzro.
15
Ke woakpɔ mi abe Mawu ƒe aʋatsoɖaseɖilawo hã ene, elabena míeɖi ɖase ɖe Mawu ŋuti bena, efɔ Kristo ɖe tsitre, amesi mefɔ ɖe tsitre hafi o, nenye be, ele me vavã bena, womefɔ ame kukuwo ɖe tsitre o la.
16
Elabena ɖe womefɔa ame kukuwo ɖe tsitre o la, anye ne Kristo hã metsi tre o.
17
Ke ne Kristo metsi tre o la, miaƒe xɔse enye yaka, eye miegale miaƒe nuvɔ̃wo me.
18
Ekema amesiwo dɔ alɔ̃ le Kristo me la, hã tsrɔ̃.
19
Ne míekpɔ mɔ na Kristo le agbe sia me ɖeɖeko la, ekema míenye nublanuitɔwo wu amewo katã.
20
Ke azɔ la Kristo tsi tre tso ame kukuwo dome, eye wòzu amesiwo dɔ alɔ̃ la dome ŋgɔgbetɔ.
21
Elabena esi wònye ame mee ku la to va ŋuti la, ame kukuwo ƒe tsitretsitsi la hã to ame ke me va.
22
Elabena alesi amewo katã ku le Adam me la, nenema ke woagbɔ agbe wo katã hã le Kristo me.
23
Gake amesiame le ye ŋutɔ ƒe ɖoɖo nu: Gbãtɔ enye Kristo; emegbe la amesiwo le Kristo me le eƒe vavagbe la;
24
emegbe la nuwuwu la ava, esime woatsɔ fiaɖuƒe la ade asi na Mawu Fofoa, esime wòava aɖe amegãnyenye katã kple ŋusẽ katã kple dziɖuɖu katã ɖa la.
25
Elabena ele ne be, wòaɖu fia, halase esime woatsɔ eƒe futɔwo katã ade eƒe afɔ te.
26
Futɔ mamletɔ, si woaɖe ɖa la, enye ku.
27
Elabena etso nuwo katã de eƒe afɔ te. Ke ne egblɔ bena, wotsɔ nuwo katã de ete la, edze ƒã bena, amesi tso wo katã de ete la, mele eme o.
28
Ke ne wotsɔ nuwo katã de ete la, ekema Vi la ŋutɔ hã atsɔ eɖokui ade amesi tso nuwo katã de ete la te, bene Mawu nanye wo katã le wo katã me.
29
Elabena nuka wotu amesiwo na wode mawutsi ta na wo le ame kukuwo ta lale? Ne womafɔ ame kukuwo ɖe tsitre kura o la, nuka wona wode mawutsi ta na wo le woamawo ta mahã?
30
Nukaŋuti miawo hã míeɖoa ŋɔdzi me le gaƒoƒo sia gaƒoƒo mea?
31
Meta miaƒe kafukafu, si le asinye le Kristo Yesu, mía Aƒetɔ me la bena, gbesiagbee mekuna.
32
Nenye ame ƒe susu nue mewo aʋa kple lã wɔadãwo le Efeso la, ekema viɖe ka wònye nam? Ne womefɔ ame kukuwo ɖe tsitre o la, ekema „minɛ míaɖu nu, eye miano nu, elabena etso miele kuku ge!“
33
Migana woable mi o! Habɔbɔ vɔ̃wo gblẽa nuwɔna nyuiwo.
34
Mizu mo xexee tɔwo vavã, eye migawɔ nuvɔ̃ o! Elabena simadzemadze Mawu le amea ɖewo me; ŋukpedodo mi ta megblɔe ɖo.
35
Ke ɖewo amea ɖe agblɔ be: Aleke ame kukuwo le fɔfɔ ge ɖe tsitre mahã? Eye ŋutilã ka wole tsɔtsɔ ge adoe mahã?
36
Wò bometsila, nusi nèƒã la, magbɔ agbe o, negbe ɖeko woaku hafi.
37
Eye nusi nèƒãna la, menye nɔnɔme blibo, si le dzɔdzɔ ge lae nèƒã o, hafi nuku gbɔloa ɖe, eɖanye bli alo nu mamleawo dometɔa ɖe o.
38
Ke Mawu na nɔnɔmee, alesi wòlɔ̃, eye nukuwo dome ɖesiaɖe la etsɔ nuku la ŋutɔ ƒe nɔnɔme nɛ.
39
Menye lãwo katãe nye lã ɖeka ƒomevi o: ke amegbetɔwo ƒe lã le vovo, lãfɔnewo ƒe lã le vovo, tɔmelãwo ƒe lã le vovo, xeviwo ƒe lã le vovo.
40
Eye dziƒoŋutilãwo li, eye anyigba dzi ŋutilãwo hã li; gake dziƒotɔwo ƒe ŋutikɔkɔe le vovo, eye anyigbadzitɔwo tɔ le vovo.
41
Ye ƒe ŋutikɔkɔe le vovo, eye ɣleti ƒe ŋutikɔkɔe hã le vovo, eye ɣletiviwo ƒe ŋutikɔkɔe hã le vovo; elabena vovo le ɣletivi kple ɣletivi dome le ŋutikɔkɔe gome.
42
Nenema ke ame kukuwo ƒe tsitretsitsi hã le: Woƒãa nu le gbegblẽ me, eye woafɔe ɖe tsitre le magblẽmagblẽ me;
43
woƒãɛ nu le bubu makpɔmakpɔe me, eye woafɔe ɖe tsitre le ŋutikɔkɔe me: woƒãa nu le gbɔdzɔgbɔdzɔ me, eye woafɔe ɖe tsitre le ŋusẽ me.
44
Woƒãa luʋɔŋutilã, eye woafa gbɔgbɔŋutilã ɖe tsitre. Luʋɔŋutilã li, eye gbɔgbɔŋutilã hã li.
45
Nenema ke woŋlɔ ɖi bena: „Ame gbãtɔ, Adam la, zu luʋɔ gbagbe;“ Adam mamletɔ la zu gbɔgbɔ, si na agbe.
46
Ke menye gbɔgbɔmetɔ enye gbãtɔ o, hafi luʋɔtɔ la boŋ, emegbe la gbɔgbɔmetɔ la.
47
Ame gbãtɔ, si tso anyigba me la, enye anyigbadzitɔ, ame evelia enye Aƒetɔ si tso dziƒo la.
48
Alesi ke anyigbadzitɔa le la, nenema ke anyigbadzitɔwo hã le; alesi ke dziƒotɔa le la, nenema ke dziƒotɔwo hã le;
49
eye alesi anyigbadzitɔa ƒe nɔnɔme le mia ŋu la, nenema ke dziƒotɔa ƒe nɔnɔme hã nanɔ mia ŋu.
50
Ke mele esia gblɔm, nɔviwo, bena ŋutilã kple ʋu mate ŋu anyi mawufiaɖuƒe la ƒe dome o, eye gbegblẽ mate ŋu anyi magblẽmagblẽ ƒe dome o.
51
Mikpɔ ɖa, mele nya ɣaɣla gblɔm na mi: Mí katã miele alɔ̃ dɔ ge o; gake woatrɔ mí katã míaƒe nɔnɔme,
52
kasia le aɖabaƒoƒo ɖeka me, le kpẽkuku mamlea me; elabena woaku kpẽ, eye woafɔ ame kukuwo ɖe tsitre magblẽmagblẽ, eye míawo la woatrɔ miaƒe nɔnɔme.
53
Elabena ele be, nu gbegblẽ sia nado magblẽmagblẽ, eye nu kuku sia nado makumaku.
54
Ke esime nu gbegblẽ sia lava ɖo magblẽmagblẽ, eye nu kuku sia lava ɖo makumaku la, ekema nya, si woŋlɔ ɖi la, ava ve me bena: „Womi ku le dziɖuɖu me.“
55
Wò ku, afika wò ti la le? Wò tsieƒe, afika wò dziɖuɖu la le?
56
Elabena ku ƒe ti enye nuvɔ̃, ke nuvɔ̃ ƒe ŋusẽ enye se la.
57
Ke woada akpe na Mawu, si na dziɖuɖu mi to mia Aƒetɔ Yesu Kristo dzi la!
58
Eyata, nɔvinye lɔlɔ̃tɔwo, minɔ te sesĩe, maʋãmaʋã, eye migba go ɖaasi le Aƒetɔ la ƒe dɔwɔwɔ me, esi mienyae bena, miaƒe agbagbadzedze menye dzodzro le Aƒetɔ la me o ŋuti la.











1 Korintotɔwo 15:1
1 Korintotɔwo 15:2
1 Korintotɔwo 15:3
1 Korintotɔwo 15:4
1 Korintotɔwo 15:5
1 Korintotɔwo 15:6
1 Korintotɔwo 15:7
1 Korintotɔwo 15:8
1 Korintotɔwo 15:9
1 Korintotɔwo 15:10
1 Korintotɔwo 15:11
1 Korintotɔwo 15:12
1 Korintotɔwo 15:13
1 Korintotɔwo 15:14
1 Korintotɔwo 15:15
1 Korintotɔwo 15:16
1 Korintotɔwo 15:17
1 Korintotɔwo 15:18
1 Korintotɔwo 15:19
1 Korintotɔwo 15:20
1 Korintotɔwo 15:21
1 Korintotɔwo 15:22
1 Korintotɔwo 15:23
1 Korintotɔwo 15:24
1 Korintotɔwo 15:25
1 Korintotɔwo 15:26
1 Korintotɔwo 15:27
1 Korintotɔwo 15:28
1 Korintotɔwo 15:29
1 Korintotɔwo 15:30
1 Korintotɔwo 15:31
1 Korintotɔwo 15:32
1 Korintotɔwo 15:33
1 Korintotɔwo 15:34
1 Korintotɔwo 15:35
1 Korintotɔwo 15:36
1 Korintotɔwo 15:37
1 Korintotɔwo 15:38
1 Korintotɔwo 15:39
1 Korintotɔwo 15:40
1 Korintotɔwo 15:41
1 Korintotɔwo 15:42
1 Korintotɔwo 15:43
1 Korintotɔwo 15:44
1 Korintotɔwo 15:45
1 Korintotɔwo 15:46
1 Korintotɔwo 15:47
1 Korintotɔwo 15:48
1 Korintotɔwo 15:49
1 Korintotɔwo 15:50
1 Korintotɔwo 15:51
1 Korintotɔwo 15:52
1 Korintotɔwo 15:53
1 Korintotɔwo 15:54
1 Korintotɔwo 15:55
1 Korintotɔwo 15:56
1 Korintotɔwo 15:57
1 Korintotɔwo 15:58






1 Korintotɔwo 1 / 1Ko 1
1 Korintotɔwo 2 / 1Ko 2
1 Korintotɔwo 3 / 1Ko 3
1 Korintotɔwo 4 / 1Ko 4
1 Korintotɔwo 5 / 1Ko 5
1 Korintotɔwo 6 / 1Ko 6
1 Korintotɔwo 7 / 1Ko 7
1 Korintotɔwo 8 / 1Ko 8
1 Korintotɔwo 9 / 1Ko 9
1 Korintotɔwo 10 / 1Ko 10
1 Korintotɔwo 11 / 1Ko 11
1 Korintotɔwo 12 / 1Ko 12
1 Korintotɔwo 13 / 1Ko 13
1 Korintotɔwo 14 / 1Ko 14
1 Korintotɔwo 15 / 1Ko 15
1 Korintotɔwo 16 / 1Ko 16