A A A A A

Ewe Bible 1913

Marko 3

Eye wògayi ɖe ƒuƒoƒe, eye amea ɖe le afima, si titi lé asi na.

Eye wole ŋudzɔ nɛ be, aɖa gbe le eŋu le Sabat dzi loo, bena yewoatso enu.

Eye wògblɔ na amesi titi lé asi na la bena: Tsi tre ɖe titina.

Eye wòbia wo bena: Ɖe woɖe mo bena, woawo nu nyui alo woawo nuvɔ̃ le Sabat dzi, be woaɖe ame, alo woawui mahã? Ke woawo zi kpi.

Eye esi wòkpɔ wo godoo kple dziku la, exa nu le woƒe dzimesesẽ la ŋuti, eye wògblɔ na ame la bena: Mlo wò asi! Eye wòmloe, eye eƒe asi la gaɖɔ ɖo.

Tete farisitɔwo do go enumake kple Herodiahawo, eye wode adaŋu le eyama ŋuti, alesi woawɔ awui.

Eye Yesu kple eƒe nusrɔ̃lawo ɖe wo ɖokui ɖa yi ƒu la nu; eye ameha gã tso Galilea kple Yudea va dze eyome.

Eye esi wose nusiwo wòwɔ la, ameha gãa ɖe tso Yerusalem kple Idumea kple Yordan godo kpakple Tiro kple Zidon-nutoawo meva egbɔ.

Eye wògblɔ na eƒe nusrɔ̃lawo bena, woadzra ʋuvi la do na ye le ameha la ŋuti bena, ne woagamimi ye ɖo o;

elabena eda gbe le ame geɖewo ŋuti ale bena, ame geɖe alesinu le veve sem la, te ɖe edzi, bena yewoade asi eŋu.

Eye gbɔgbɔ makɔmakɔwo, ne wokpɔe ko la, wodzea klo ɖe ekɔ me, eye woɖoa ɣli gblɔna bena: Wòe nye Mawuvi la.

Eye wogbe nya na wo vevie ŋuta bena, ne woagana wòanya ye o.

Eye wòyi ɖe to la dzi, eye wòyɔ amesiwo ye ŋuta le didim la, va egbɔe, eye woyi egbɔ.

Eye wòɖo ame wuieve, bena woanɔ ye ŋuti, eye bena yeadɔ wo aɖo ɖa woaɖaɖe gbe ƒã,

eye bena ŋusẽ nanɔ wo si hena gbɔgbɔ vɔ̃wo nyanyà do goe.

Eye wòdo ame wuieveawo, Simon, eyae wòna ŋkɔe bena Petro,

Yakobo, Zebedeo vi la, kple Yohanes, Yakobo nɔvi la, eye wòna ŋkɔ woawo bena Boanerges, si gɔme enye dziɖegbeviwo;

Andrea kple Filipo, Bartolomeo kple Toma, Yakobo, Alfeo vi la, Tadeo, Simon, Kananitɔ la,

kpakple Yuda Iskariot, si fia eyome mɔ la hã.

Eye wòva aƒe me. Eye ameha la gale ƒu ƒom ale bena, womete ŋu ɖu abolo gɔ̃ hã o.

Eye esi etowo see la, wodo go yi ele ge; elabena wogblɔ be: Eƒe tame da!

Eye agbalẽfiala, siwo tso Yerusalem va la, gblɔ bena Beelzebul le eme, eye wònyã gbɔgbɔ vɔ̃wo do go to gbɔgbɔ vɔ̃wo ƒe fia la dzi.

Eye esi wòyɔ wo va egbɔ la, eƒo nu na wo le lododowo me bena: Aleke Satana ate ŋu anyã Satana ado goe mahã?

Eye ne fiaduƒe mã de ye ŋutɔ ɖokui ŋuti la, ekema fiaduƒe ma mate ŋu anɔ anyi o.

Eye ne aƒe mã ɖe ye ŋutɔ ɖokui ŋuti la, ekema aƒe ma mate ŋu anɔ anyi o.

Eye ne Satana tsi tre ɖe ye ŋutɔ ɖokui ŋuti la, ekema emã, eye emate ŋu anɔ anyi o, ke boŋ enu lava tsi.

Amea ɖeke mate ŋu ayi ɖe ŋusẽtɔ la ƒe me, eye wòaha eƒe aƒemenuwo o; negbe ɖeko woabia ŋusẽtɔ la gbã hafi aha eƒe aƒe.

Vavã mele egblɔm na mi bena: Woatsɔ amegbetɔviwo ƒe nuvɔ̃, siwo katã wòwɔna, kple busunya, siwo wogblɔna la, ake wo;

ke amesi agblɔ busunya ɖe Gbɔgbɔ kɔkɔe la ŋu la, makpɔ tsɔtsɔke vaseɖe mavɔmavɔ me o; ke boŋ enyi nuvɔ̃ mavɔmavɔ ƒe fe;

elabena wogblɔ be: Gbɔgbɔ makɔmakɔ le eme.

Eye dadaa kple nɔviawo va afima, eye wole tsi tre le xexe, da ame ɖe egbɔ be, woayɔe ɖa.

Eye ameha la le anyinɔƒe ƒo xlãe. Eye wogblɔ nɛ bena: Kpɔ ɖa, dawò kple nɔviwòŋutsuwo kpakple nɔviwònyɔnuwo le xexe le diwòm.

Eye wòɖo ŋu na wo bena: Amekawo nye danye kple nɔvinyewo mahã?

Eye esi wòkpɔ amesiwo le anyinɔƒe ƒo xlãe dzi godoo la, egblɔ bena: Mikpɔ danye kple nɔvinyewo ɖa!

Amesi ke awɔ Mawu ƒe lɔlɔ̃nu la, eya kee nye nɔvinyeŋutsu, ganye nɔvinyenyɔnu, ganye danye hã.

Ewe Bible 1913

Public Domain

Marko 1 / Mar 1

Marko 2 / Mar 2

Marko 3 / Mar 3

Marko 4 / Mar 4

Marko 5 / Mar 5

Marko 6 / Mar 6

Marko 7 / Mar 7

Marko 8 / Mar 8

Marko 9 / Mar 9

Marko 10 / Mar 10

Marko 11 / Mar 11

Marko 12 / Mar 12

Marko 13 / Mar 13

Marko 14 / Mar 14

Marko 15 / Mar 15

Marko 16 / Mar 16

Marko



00:00:00 00:00:00 0.5x 2.0x