A A A A A
Facebook Instagram Twitter
Ewe Bible 1913

Mateo 27



1
Ke esi ŋu ke la, nunɔlagãwo kple dumegãwo katã de adaŋu le Yesu ŋuti, bena yewoawui;
2
eye wobiae, kplɔe yi ɖade asi na Pontio Pilato, mɔ̃mefia la.
3
Tete esi Yuda, amesi fia eyome mɔ, kpɔ bena, wotso kufia nɛ la, evee, eye wògbugbɔ klosalo, blaetɔ̃ la yi na nunɔlagãwo kple amegãwo gblɔ bena:
4
Mewo nuvɔ̃ be, mede ʋu maɖifɔ asi. Ke woawo gblɔ bena: Mía gbɔ nya kae wotsoa? Wò ŋutɔ kpɔ edzi!
5
Eye wòtso klosalo la ƒu gbe ɖe mawuxɔ la me hedzo, eye wòyi ɖade ka ve na eɖokui.
6
Ke nunɔlagãwo fɔ klosalo la gblɔ bena: Womeɖe mɔ bena, woatsɔe ade nudzɔdzɔ me o; elabena ʋuƒlegae.
7
Eye wode adaŋu, eye wotsɔe ƒle zemela ƒe abɔ, ne wòanye amedzrowo ƒe ɖiƒe.
8
Eyaŋuti woyɔ abɔ ma be ʋubɔ vaseɖe egbegbe.
9
Ale wowu nya, si nyagblɔɖila Yeremya gblɔ ɖi la nu bena: „Eye wotsɔ klosalo blaetɔ̃, si enye amesi ŋu Israel-via ɖewo do asi ɖo la, ƒe tanu,
10
eye wotsɔ wo na ɖe zemela ƒe abɔ ta, abe alesi Aƒetɔ la ɖo nam ene.“
11
Eye Yesu le tsitre ɖe mɔ̃mefia la ƒe ŋku me, eye mɔ̃mefia la biae bena: Wòe nye Yudatɔwo ƒe fia la mahã? Yesu gblɔ nɛ bena: Wòe gblɔe.
12
Eye esi nunɔlagãwo kple dumegãwo tso enu la, meɖo nyaa ɖeke ŋu o.
13
Tete Pilato gblɔ nɛ bena: Ɖe mèle ɖase, si ɖim wole le ŋutiwò la, sem o mahã?
14
Eye meɖo nyaku ɖeka hɔ̃ hã ŋu nɛ o, ale bena mɔ̃mefia la ƒe mowɔ yaa ŋutɔ.
15
Eye le ŋkekenyuie sia dzi ɖaa la mɔ̃mefia la lɔ̃a asiɖeɖe le gatɔ ɖeka ŋuti na ameha la, amesi ke wolɔ̃.
16
Ke le ɣemaɣi me la gatɔa ɖe, si ameawo nya la, le wo si, si woyɔna be Baraba.
17
Eyaŋuti esi woƒo wo ɖokui nu ƒu la, Pilato gblɔ na wo bena: Ameka ŋue mielɔ̃ bena, maɖe asi le na mia? Baraba loo alo Yesu, si woyɔna be Kristo la mahã?
18
Elabena ènyae bena, ŋuʋaʋã ŋutie wotsɔe de asi ɖo.
19
Ke esi wòbɔbɔ nɔ ʋɔnuɖrɔ̃zikpui la dzi la, srɔ̃a dɔ ɖo ɖe egbɔ gblɔ bena: Megawɔ naneke kple ame dzɔdzɔe ma o; elabena eto ƒe zã me la mekpe fu geɖe le drɔ̃eƒe le eta.
20
Ke nunɔlagãwo kple amegãwo ƒoe ɖe amehawo nu bena, woabia Baraba, eye woawu Yesu.
21
Eye mɔ̃mefia la xɔ edzi gblɔ na wo bena: Ame eve la dometɔ ka ŋuti miele didim bena, maɖe asi le na mi mahã? Ke woawo gblɔ bena: Baraba ye!
22
Pilato gblɔ na wo bena: Ekema nuka mawo Yesu, si woyɔna be Kristo la mahã? Wo katã wogblɔ bena: Na woaklãe ɖe ati ŋuti!
23
Ke egblɔ bena: Ekema vɔ̃ ka gɔ̃ wòwɔ mahã? Ke woawo do ɣli sesĩe wu bena: Na woaklãe ɖe ati ŋuti!
24
Eye esi Pilato kpo bena, wɔwɔa ɖeke megali o, ke zi tɔ hoo boŋ la, etsɔ tsi klɔ asi le ameha la ƒe ŋku me gblɔ bena: Nye la, ʋu sia mele asinye me o; mia ŋutɔwo mikpɔ edzi!
25
Eye dukɔ blibo la katã xɔ dzi bena: Eƒe ʋu neva mía kple mía viwo dzi!
26
Tete wòɖe asi le Baraba ŋu na wo; ke Yesu la, eƒoe kple atam, eye woɖee asi, bena woakpe de ati ŋuti.
27
Tete mɔ̃mefia la ƒe asrafowo tso Yesu, eye wokplɔe yi ɖe ʋɔnudrɔ̃ƒe, eye asrafoha blibo la katã ƒo ƒu ɖe eŋuti.
28
Eye woɖe awu le eŋuti, eye wotsɔ awu dzi ʋlaya hedo nɛ.
29
Eye wotsɔ ŋu he tsihe ɖɔ nɛ, eye wotsɔ ayeti de nuɖusi me nɛ, eye wodze klo ɖe eƒe ŋku me, ɖu fewu le eŋuti gblɔ bena: Mieɖo gbe na wò, Yudatɔwo ƒe fia!
30
Eye woɖe ta ɖe eŋuti, eye woxɔ ayeti la ƒo tame nɛ.
31
Eye esi woɖu fewu le eŋuti vo la, woɖe awu ʋlaya la le eŋu, eye wogatsɔ ye ŋuta ƒe awuwo do nɛ, eye wokplɔe yina kaklã ge ɖe ati ŋuti.
32
Ke esi wodo go yina la, wokpɔ ŋutsua ɖe, si tso Kirene, amesi ƒe ŋkɔ enye Simon, eye wozi eyama dzi bena, wòatsɔ atitsoga la nɛ.
33
Eye esi woɖo afisi woyɔna be Golgata, si gɔme nye ametakoliƒe la,
34
wotsɔ aha tsitsi kple veve tɔtɔ ɖo nu nɛ; eye esi wòɖoe kpɔ la, egbe be, yemele eno ge o.
35
Ke esi woklãe ɖe ati ŋuti megbe la, womã eƒe awuwo me, eye wodzidze nu ɖe wo dzi, bena woawu nya, si nyagblɔɖila gblɔ ɖi la nu bena: „Wòmã nye awuwo ɖe wo nɔewo dome, eye wodzidze nu ɖe nye awu ʋlaya dzi.“
36
Eye wobɔbɔ nɔ anyi ɖe afima le eŋu dzɔm.
37
Eye woŋlɔ eƒe nutsonya ɖo tagbɔ nɛ bena; Yesu, Yudatɔwo ƒe fia la, enye esi!
38
Eye woklã adzodala eve ɖe ali ŋu kpe ɖe eŋuti, ɖeka le nuɖusi me, eye ɖeka le mia me.
39
Eye amesiwo le eŋuti tom le yiyim la, do ɖiŋu nɛ de ta ʋuʋum,
40
eye wole gbɔgblɔm bena: Wò, amesi le mawuxɔ la gbãm gale etum le ŋkeke etɔ̃agbe la, ɖe ɖokuiwò; nenye Mawuvi nènye la, ekema ɖi le atitsoga la ŋuti!
41
Nenema ke nunɔlagãwo kple agbalẽfialawo kple dumegãwo le fewu ɖum le eŋuti le gbɔgblɔm bena:
42
Eɖe ame bubuwo, eye mate ŋu aɖe ye ŋutɔ ɖokui o; nenye Israel ƒe fia wònye la, ekema neɖi le atitsoga la ŋuti azɔ, eye miaxɔ edzi ase.
43
Eɖo dzi ɖe Mawu ŋuti; eya naɖee azɔ, ne elɔ̃nɛ, elabena egblɔ be, Mawuvi yenye.
44
Nenema ke adzodala, siwo woklã ɖe ati ŋu kpe ɖe eŋuti la, hã dzui.
45
Ke tso gaƒoƒo adelia dzi la zãdokeli do de anyigba la katã dzi vaseɖe gaƒoƒo asiekelia dzi.
46
Eye le gaƒoƒo asiekelia dzi Yesu do ɣli kple gbe sesĩe bena: Eli, eli, lama sabaxtani! si gome enye: Nye Mawu, nye Mawu, nukaŋuti nègblẽm ɖi mahã?
47
Ke esi amesiwo le tsitre de afima dometɔa ɖewo see la, wogblɔ bena: Amesia le Eliya yɔm.
48
Eye enumake wo dometɔ ɖeka ƒu du yi ɖatsɔ ƒumekutsa, eye wòkɔ aha tsitsi ɖe eme fũ, eye wòtsɔe ɖo ayeti nu hekpe ne.
49
Ke ame mamleawo gblɔ bena: Ɖe asi le eŋu! Na ne míakpɔe, abe Eliya ava ɖee ene.
50
Eye Yesu gado ɣli kple gbe sesĩe, eye wòtso eƒe gbɔgbɔ la hena.
51
Eye kpo ɖa, mawuxɔmetsovɔ la dze ɖe eve tso tagba vaseɖe egɔme, eye anyigba ʋuʋu, eye kpe gbadzawo wo,
52
eye yɔdowo nu ʋu, eye ame kɔkɔe geɖe, siwo ɖo alɔ̃ la, ƒe ŋutilãwo tsi tre,
53
eye esi wodo go tso yɔdowo me le eƒe fɔfɔ megbe la, woyi ɖe du kɔkɔe la me, eye woɖe wo ɖokui fia ame geɖewo.
54
Ke esi aʋafia la kple amesiwo kpe ɖe eŋuti hele Yesu dzɔm la, kpɔ anyigbaʋuʋu kple nusiwo va dzo la, wovɔ̃ ŋuta hegblɔ bena: Nyateƒe, Mawuvie nye esia!
55
Eye nyɔnu geɖewo le afima le nu kpɔm le adzɔge, amesiwo dze Yesu yome tso Galilea le esubɔm;
56
amesiwo dome Maria, Magdalatɔ, kple Maria, si nye Yakobo kple Yosef dada, kple Zebedeo ƒe viwo dada wole.
57
Eye esi fiẽsi ɖo la, ŋutsu kesinɔtɔa ɖe tso Arimatia, si ŋkɔ nye Yosef, amesi ŋutɔ hã nye Yesu ƒe nusrɔ̃la,
58
amesia yi Pilato gbɔ ɖabia Yesu ƒe kukua. Tete Pilato ɖo bena, woatsɔe nɛ.
59
Eye Yosef tso ame kuku la, eye wòtso aklala, si fu tititi la xatsa ɖe eŋuti:
60
eye wòtsɔe mlɔ ye ŋuta ƒe yɔdo yeye, si wòna woɖe ɖe kpe gbadza me la me; eye esi wòmũ kpe gãa ɖe ɖo yɔdo la nu la, edzo.
61
Eye Maria, Magdalatɔ la, kple Maria keme la wole afima, eye wobɔbɔ nɔ anyi hedze ŋgɔ yɔdo la.
62
Eye le dzadzraɖoŋkeke ƒe ŋufɔke dzi la nunɔlagãwo kple farisitɔwo va kpe ta ɖe Pilato gbɔ gblɔ bena:
63
Aƒetɔ, mieɖo ŋui bena, esi ameblela ma le agbe la, egblɔ bena: Le ŋkeke etɔ̃ megbe la magatsi tre.
64
Eyata de se bena, woadzo yɔdo la ŋu vaseɖe ŋkeke etɔ̃agbe, bene eƒe nusrɔ̃lawo magava afii ayii, eye woagblɔ na amewo bena: Etsi tre tso ame kukuwo dome, eye beble megbetɔ la nagavɔ̃ɖi wu ŋgɔgbetɔ la o.
65
Pilato gblɔ na wo bena: Dzɔlawo nye ekem, miheyi ne miadzɔe, abe alesi mienya ene.
66
Eye wodzo heyi ɖatre kpe la ɖe enu, eye woɖo dzɔlawo afima.










Mateo 27:1
Mateo 27:2
Mateo 27:3
Mateo 27:4
Mateo 27:5
Mateo 27:6
Mateo 27:7
Mateo 27:8
Mateo 27:9
Mateo 27:10
Mateo 27:11
Mateo 27:12
Mateo 27:13
Mateo 27:14
Mateo 27:15
Mateo 27:16
Mateo 27:17
Mateo 27:18
Mateo 27:19
Mateo 27:20
Mateo 27:21
Mateo 27:22
Mateo 27:23
Mateo 27:24
Mateo 27:25
Mateo 27:26
Mateo 27:27
Mateo 27:28
Mateo 27:29
Mateo 27:30
Mateo 27:31
Mateo 27:32
Mateo 27:33
Mateo 27:34
Mateo 27:35
Mateo 27:36
Mateo 27:37
Mateo 27:38
Mateo 27:39
Mateo 27:40
Mateo 27:41
Mateo 27:42
Mateo 27:43
Mateo 27:44
Mateo 27:45
Mateo 27:46
Mateo 27:47
Mateo 27:48
Mateo 27:49
Mateo 27:50
Mateo 27:51
Mateo 27:52
Mateo 27:53
Mateo 27:54
Mateo 27:55
Mateo 27:56
Mateo 27:57
Mateo 27:58
Mateo 27:59
Mateo 27:60
Mateo 27:61
Mateo 27:62
Mateo 27:63
Mateo 27:64
Mateo 27:65
Mateo 27:66






Mateo 1 / Mat 1
Mateo 2 / Mat 2
Mateo 3 / Mat 3
Mateo 4 / Mat 4
Mateo 5 / Mat 5
Mateo 6 / Mat 6
Mateo 7 / Mat 7
Mateo 8 / Mat 8
Mateo 9 / Mat 9
Mateo 10 / Mat 10
Mateo 11 / Mat 11
Mateo 12 / Mat 12
Mateo 13 / Mat 13
Mateo 14 / Mat 14
Mateo 15 / Mat 15
Mateo 16 / Mat 16
Mateo 17 / Mat 17
Mateo 18 / Mat 18
Mateo 19 / Mat 19
Mateo 20 / Mat 20
Mateo 21 / Mat 21
Mateo 22 / Mat 22
Mateo 23 / Mat 23
Mateo 24 / Mat 24
Mateo 25 / Mat 25
Mateo 26 / Mat 26
Mateo 27 / Mat 27
Mateo 28 / Mat 28