Əhdi-Ətiq
Əhdi-Cədid
Azərbaycan Müqəddəs Kitab 2008

Nəğmələr Nəğməsi 5

1

باغيما گلمئشم، باجيم، گلئنئم! مورّومو عطئرلرئمله دَرمئشم، باليمي شان باليملا يمئشم، شرابيمي ائچمئشم، سودومو ائچمئشم. ای دوستلار، ييئن، ائچئن، ای سِوگئلئلر مست اولون!

2

ياتميشديم، آمّا اوره‌يئم اوياق ائدي. اشئت! سِوگئلئم قاپيني دؤيور: قاپيني آچ، باجيم، سِوگئلئم، گؤيرچئنئم، تَک کامئلئم! چونکي باشيم شبنمله، تِل‌لرئم گجه‌نئن داملالاري ائله دولودور.

3

پالتاريمي چيخارتميشام، اونو نجه تزه‌دن گِيئم؟ آياقلاريمي يوموشام، اونو تزه‌دن نجه باتيريم؟

4

سِوگئلئم قاپينين دَلئيئندن اَلئني اوزاتدي، قلبئم ائچئمده هيجانلاندي.

5

قاپيني سِوگئلئمه آچماغا قالخديم؛ قيفيلينين دسته‌سي اوستونه اَللرئمدن مور داميردي، بارماقلاريمدان مور شئره‌سي.

6

قاپيني سِوگئلئمه آچديم، آمّا سِوگئلئم دؤنوب گتمئشدي. اونون گتدئيئندن اوره‌يئم اوزولدو. اونو آختارديم، آمّا تاپماديم، اونو چاغيرديم، آمّا جاواب ورمه‌دي.

7

شهرده دولانان قوروجولار منی تاپديلار، منی ووردولار، منی يارالاديلار. دئوار قوروجولاري شاليمي اَينئمدن آلديلار.

8

ای اورشلئم قيزلاري، سئزي آند ورئرم- اگر سِوگئلئمي تاپاسينيز، اونا نه دئيه‌جکسئنئز؟ اونا ديئن کي، من سِوگي ناخوشويام.

9

سنئن سِوگئلئنئن اؤزگه سِوگئلئلردن نه‌يي آرتيقدير، ای قيزلارين لاپ گؤزَلي؟ سنئن سِوگئلئنئن اؤزگه سِوگئلئلردن نه‌يي آرتيقدير کي، بئزي بله آند ورئرسن؟

10

سِوگئلئم پارلاقدير، قيرميزي‌دير. اون مئنلر ائچئندن سِچئلمئش اولان اودور.

11

باشي خالئص قيزيل؛ بئربئرئنه توخونوب تِل‌لري، قارادير قارا قارغا کئمي.

12

گؤزلري سو آرخلارينين يانينداکي گؤيرچئلنلر کئمي‌دئر، سود ائچئنده يويونموش، جواهئر کئمي بَزَنمئش.

13

ياناقلاري عطئر گولوستاني، شئرئن ائيلي بئتکئلر ييغيني. دوداقلاري زانباقلاردير، مور داملادير.

14

اَللري زومورّودله بَزَنمئش قيزيل آغاج‌دير. بودلاري عاجدان قايريلميش، ياقوتلا بَزَنمئشدئر.

15

باجاقلاري خالئص قيزيل پاياسي اوستونده مرمر سوتونلاري‌دير. گؤرونوشو لوبنان کئمي، سئدر آغاجلاري کئمي عظمتلي‌دئر.

16

آغزي چوخ شئرئن، هر شيي گؤزَل. ای اورشلئم قيزلاري، بودور منئم سِوگئلئم، منئم دوستوم.

Azerbaijan Bible 2008
Southern Azeri translation. Copyright © 2008 Elam Ministries