Əhdi-Ətiq
Əhdi-Cədid
Azərbaycan Müqəddəs Kitab 2008

Nəğmələr Nəğməsi 4

1

نه گؤزَلسن، سِوگئلئم، سن نه گؤزَلسن. ياشماق آرخاسيندان گؤزلرئن گؤيرچئنلر کئمي‌دئر. ساچلارين گئلعاد داغيندان اِنَن کچي سوروسو کئمي‌دئر.

2

دئشلرئن تزه قيرخيلميش قويون سوروسو کئمي‌دئر کي، يويونماقدان چيخير. هاميسينين اِکئزلري وار، آرالاريندا بالاسيزي يوخ.

3

دوداقلارين قيرميزي قايتان کئمي‌دئر، آغزين دا نه گؤزَل! ياناقلارين ياشماق آرخاسيندا نار پارچاسي کئمي‌دئر.

4

بويونون داوودون بورجونه بَنزه‌يئر کي، سئلاح اوچون تئکئلمئش؛ اوندان مئن قالخان آسلانيب، هاميسي پهلوانلار قالخاني‌دير.

5

ائکي دؤشون ائکي جيران بالاسي کئمي‌دئر، زانباقلار آراسيندا اوتلايان اِکئز جيران بالاسي.

6

گون سَرئلَنجه، کؤلگه‌لر قاچانجا، مور داغينا گده‌جيم، بوخور تپه‌سئنه گده‌جيم.

7

تامامن گؤزَلسن، سِوگئلئم. سنده هچ ياوا بئر شي يوخ.

8

گلئنئم، منئمله لوبناندان گل! منئمله لوبناندان گل؛ آمانا تپه‌سئندن، سنئر و خَرمون تپه‌لرئندن، آصلانلارين يووالاريندان، پلنگلرئن داغلاريندان.

9

اوره‌يئمي قاپيبسان باجيم، گلئنئم! گؤزلرئنئن بئر باخيشي ائله، بويونباغينين بئر جواهئري ائله اوره‌يئمي قاپيبسان.

10

سنئن سِوگئن نه گؤزَلدئر باجيم، گلئنئم! سِوگئن نه قدر شرابدان خوشدور، عطئرئنئن گؤزَل ائيسي ده بوتون عطئرلردن.

11

دوداقلارين بال داملادير، گلئنئم! بال و سود دئلئنئن آلتيندادير. پالتارلارينين رايئحه‌سي لوبنانين رايئحه‌سي کئمي‌دئر.

12

منئم باجيم، منئم گلئنئم سن قاپيسي باغلي بئر باغسان، آغزي باغلي بئر بولاق، مؤهورلَنمئش بئر چشمه‌سن.

13

سنئن شاخلارين نار جَنّتي‌دئر، سِچئلمئش ميوه‌لرله، حَنا و ناردلا،

14

نارد و زعفرانلا، عطئرلي قاميش و دارچينلا، هر جور عطئر آغاجي ائله، مور و عؤد آغاجلاري ائله، بوتون خالئص اَدوئيه‌لرله.

15

سن باغلارين چِشمه‌سي‌سن، حيات ورن سولارين قويوسوسان، لوبناندان آخان سولارسان.

16

اويان، ای شئمال يلي! سن ده گل، ای جنوب يلي. منئم باغيما اَس کي، اونون رايئحه‌سي هر يري بوروسون. قوي سِوگئلئم باغينا گلسئن، اونون گؤزل ميوه‌لرئندن دادسين.

Azerbaijan Bible 2008
Southern Azeri translation. Copyright © 2008 Elam Ministries