Aymara Bible 1997

Juan 9

Mä cheka pascasinjja Jesusajj nacïwipatpacha mä juyqhu jakeruw uñjäna.

Discipulonacapasti jisct'apjjänwa: —Yatichiri, ¿cunatsa aca jakejj uqham juyqhu naci? ¿Awquinacapan juchap laycuti, jan ucajj jupan juchapa laycucha aqham naciñapataquejja? —sasa.

Jesusasti saraquïnwa: —Janiw jupan juchap laycuti, awquinacapan juchap laycusa, jan ucasti Diosan luräwinacapajj jupa toke uñstañapataquiwa ucajj uqhama.

Urüquïpanjja lurañajjawa qhititejj qhitanquitu ucan lurañanacapa. Arumajj jutasquiwa, ucansti janiw qhitis irnakcaspati.

Acapachanccasinjja nayajj acapachan khanapätwa —sasa.

Uc arsusinsti Jesusajj pamparuw thusnokäna, ucatsti thusonkayampi ñek'echt'araquïna, ñik'empisti juyqhun nayraparuw jawt'äna.

Ucatsti saraquïnwa: —Saram, Siloé estanquer jarekasiri —sasa. (Ucajj qhitanita, sañ muni.) Juyqhusti sarasinjja jarekasïnwa; cutt'anjjän ucqhasti uñj-jjänwa.

Ucatsti uta jac'anacapajj uqhamarac nayratpach juyqhütapa uñt'irinacajj sapjjänwa: —¿Janit acajj kont'asis limosna mayisirïcän ucäqui? —sasa.

Mayninacajj sapjjänwa: “Jïsa, jupäscapuniwa.” Mayninacasti sapjjaraquïnwa: “Janiw jupäquiti, ucampis jupjamaraquiwa” sasa. Ucampis jupa pachpaw arsüna: —Jïsa, nayapunïsctwa —sasa.

Ucatsti jisct'apjjaraquïnwa —¿Cunjämatsa uñj-jjta? —sasa.

Jupasti sänwa: —Uca Jesús sat jakewa ñek'e luri, uca ñek'empisti nayraruw jawt'itu, ucatsti saraquituwa: ‘Saram Siloé estanqueru jarekasiri’ sasa. Nayasti sartwa, jarekasjjasinsti, uñj-jjtwa —sasa.

Ucatsti juparojj jisct'apjjaraquïnwa: —¿Cawquincasquisa uca jakejja? —sasa. Jupasti —Janiw yatcti —sänwa.

Ucatsti fariseonacan ucaruw irpapjjäna juyqhücäns uca jakeru.

Cunürutejj Jesusajj ñek'e lurcatayna ucat juyqhuru kollcaraquitayna ucürojja, samarañ urünwa.

Fariseonacajj wasitatwa jisct'apjjäna uca jakerojja, cunjämatsa kollatäna uca. Jupasti saraquïnwa: —Ñek'empiw nayrat jawt'itu, ucatsti jarekasiractwa, jichhasti uñj-jjtwa —sasa.

Ucatsti mayni fariseonacajj sapjjaraquïnwa: —Ac lurqui uca jakejj janiw Diosanccaspati, jan samarañ uru ajjsart'atap laycu —sasa. Mayninacasti sapjjaraquïnwa: —Mä juchararajj, ¿cunjämsa aca milagronac luraspa? —sasa Uqhamasti jupanac taypinjja jaljtañanacaw utjäna.

Wasitampiw jisct'apjjäna juyqhücäns uca jakerojja: —Jumajj ¿camstasa nayram kollctam uca jaketjja? —sasa. Jupasti saraquïnwa: —Mä profetäpachaw —sistwa, sasa.

Ucampis judionacajj janiw iyawsañ munapcänti, jupan juyqhütapat, jichhasti uñj-jjatapa. Juyqhut kollatäcän ucan awquiparuw jawsayapjjäna.

Ucatsti jisct'apjjaraquïnwa: —¿Acati: ‘Juyqhupuniw naci’ sapcta uca yokamajja? ¿Cunjämatsa jichhajj uñjjjejja? —sasa.

Awquipampi taycapampisti sapjjänwa: —Yatipjjtwa acajj wawajjawa, juyqhupuniw nacisqui.

Ucampis janiw yatipcti cunjämat jichhajj uñjatapsa ucjja, ni qhitin nayrapat kollatapsa yatipcaracti. Juparuy jisct'apjjam, jupajj walja maranacanëjjewa, jupa pachpawa yatiyasipjjätam —sasa.

Acjj awquinacapajj sapjjänwa judionacar ajjsarasina, jupanacan qhititejj “Jesusajj Cristowa” sisqui ucaru sinagogat jaksuña amtapjjatap laycu.

Ucatwa awquinacapajj säna: “Jupar jisct'apjjam, jupajj walja maranacanëjjewa” sasajja.

Ucatsti judionacajj wasitampiw juyqhücän uca jakerojj jawsapjje, ucatsti sapjjaraquiwa: —Diosan nayrakatapan chek arsum, nanacajj yatipjjtwa uca jakejj juchararätapa —sasa.

Ucjjarojj jupajj saraquïnwa: —Janiw nayajj yatcti juchararäscchi jan juchararäscchi ucjja. Nayajj juyqhüyätwa, jichhajj uñjtwa, ucacwa yatta —sasa.

Wasitampiw jisct'apjjäna: —¿Cuns lurtam? ¿Cuns luri nayram kollañataquejja? —sasa.

Jupasti ucjjarojj saraquïnwa: —Niya sapjjsmawa, jumanacajj janiw ist'apquistati. ¿Cunatsa wasitamp parlayañ munapjjesta? ¿Jumanacajj arcañjj munapjjaractacha? —sasa.

Ucatsti jisc'achapjjänwa: —Jumajj uca jakeruw arcta, ucampis nanacajj Moisesaruw arcapjjta.

Nanacajj yatipjjtwa Diosajj Moisesaru parlatapa, ucampis uca jaketjja janiw cawquit jutatapsa yatipcti —sasa.

Uca jakesti ucjjarojj saraquïnwa: —¡Acajj muspharcañawa! Jumanacajj janiw yatipctati cawquit jutatapsa, ucampis nayarojj uñjayituwa.

Yattanwa Diosajj janiw qhiti jucharararus ist'quiti, jan ucasti qhitinacatejj juparu yupaychapjje, uqhamarac munañap lurapqui ucanacaruquiwa Diosajj ist'i.

Janiw cunapachas aqham ni qhititsa ist'asirïquiti: ‘Nacïwipatpach juyqhu jakeruw kollatayna’ siri.

Aca jaketejj jan Diosat jutcaspajja, janiw cuns lurcaspati —sasa.

Ucatsti sapjjaraquïnwa: —Jumajj juchan phokt'ataw naciwayta, ¿ucattï yatichañ munapjjesta? —sasa. Uc sasinsti sinagogatjja jaksupjjänwa.

Jesusajj juyqhur jaksupjjatapjja yatïnwa. Jicjjatasinsti juparojj sänwa: —¿Iyawstati jumajj Diosan Yokaparojja? —sasa.

Uca chachasti saraquïnwa: —Tata, sita ¿qhitis ucajja, nayan juparu iyawsañataquejja? —sasa.

Jesusasti ucjjarojj sänwa: —Niya uñjtawa; nayätwa, qhitimpitejj parlcta uca —sasa.

Uc ist'asinsti uca jakejj quillt'asïnwa Jesusan nayrakataparu, ucatsti saraquïnwa: —Iyawstwa Tata —sasa.

Ucatsti Jesusajj sänwa: —Nayajj acapacharu juchañchañataquiw jutta, juyqhunacajj uñjapjjañapataqui, qhitinacatejj uñjapqui ucanacan juyqhu tucupjjañapataquiraqui —sasa.

Jupampïcän uca mayni fariseonacajja, uc ist'asinjja jisct'apjjänwa: —¿Nanacasti juyqhüpjjaractti? —sasa.

Ucjjarojj Jesusajj saraquïnwa: —Jumanacatejj juyqhüpjjasmajja janiw juchanïpcasmati. Ucampis ‘Uñjapjjtwa” sapjjatam laycuw juchanïpjjtajja —sasa.

Aymara Bible 1997

Biblia Aymara ©Sociedad Bíblica Boliviana 1997