Aymara Bible 1997

Juan 11

Betania marcanjj mä usut chachaw utjäna Lázaro sutini. Uca marcasti Mariampina, Marta cullacapampina marcaparaquïnwa.

Aca Lazaron cullacapawa, María satäqui ucapï suma k'apquir kollampi Tatitun cayuparu warjjatataynajja, ucatsti ñic'utapampiraquiw phisqhuratayna.

Aca pani cullacawa Jesusaru yatiyäna. —Tata, amigomaw usuta —sasa.

Jesusasti uc ist'asinjja sänwa: —Aca usojj janiw jiwañataquïquiti, ucampis acajj Diosan jach'a ch'amapa uñacht'ayañataquiwa, uqhamarac uca usu toket Diosan Yokapan jach'a ch'amapajj uñacht'ayasiñapataquiraqui —sasa.

Jesusajj Martarusa cullacaparusa, uqhamarac Lazarorusa, wal munascchïna ucasa,

cunapachatejj yatiyapjjäna: ‘Lazarojj usutaw’ siri, ucqhajja pä urumpiw kheparäna cawqhanccäntejj ucqhana.

Ucatsti discipulonacaparojj sänwa: —Wasitampi Judearu sarañäni —sasa.

Discipulonacapasti sapjjaraquïnwa: —Yatichiri, mayüruquiwa judionacajj kalamp c'upjasin jiwayañ munapjjtam. ¿Wasitampit ucaru sarañ munta? —sasa.

Jesusasti jupanacarojj saraquïnwa: —¿Mä urojj tunca payani horanejjaya? Qhititejj urunjj sarnakqui ucajj janiw lanctasquiti, aca oraken khana uñjatap laycu.

Ucampis maynitejj aruma sarnakejja, khana jan utjatap laycojj lanctasiwa —sasa.

Uca pasatatsti Jesusajj jupanacarojj sänwa: —Lázaro amigosajj iquisquiwa, ucampis nayajj sartayanïwa —sasa.

Discipulonacapasti ucjjarojj sapjjaraquïnwa: —Tata, iquiscchi ucajja, waliptascaniwa —sasa.

Ucampis Jesusajj uc sasajja, Lazarojj jiwataw sañ munäna, discipulonacapasti amuyapjjänwa chekpach iquiscatapa.

Ucatwa Jesusajj jupanacarojj khan saraquïna: —Lazarojj jiwatäjjewa.

Cusistwa jan ucancatajjata, uqhamaw wali jumanacataquejja, iyawsapjjañamataqui. Ucampis uñjiri sarañäni —sasa.

Ucatsti Tomás, cawquïrirutejj Mellizo sas sutichapjjaraquïna, ucajj mayni discipulonacaparojj sänwa: —Sararaquiñäni jiwasanacasa, jupamp chica jiwañataqui —sasa.

Purisinsti Jesusajj pusüru imantatwa Lazarorojj jicjjatäna.

Betaniajj Jerusalén jac'ancänwa, chica tupunjama.

Walja judionacaw Martaru uñjiri sarapjjatayna, Mariampir cuna, jilapan jiwatapat chuymachiri.

Martajj Jesusan puritap yatisinjja, jupajj catokeriw mistüna, ucampis Mariajj utaruw kheparäna.

Martasti Jesusarojj sänwa: —Tata, jumatejj acancasamänjja jilajjajj janiw jiwcasapänti.

Ucampis nayajj yattwa cuntejj Diosaru maycäta ucjja churätamwa —sasa.

Jesusasti ucjjarojj saraquïnwa: —Jilamajj jactaniwa —sasa.

Martasti saraquïnwa: —Jïsa, jiwatanacan khepa urun jactañapjja yattwa —sasa.

Ucjjarojj Jesusajj sänwa: —Nayätwa jactañasa, jacañasa. Qhititejj nayaru iyawsaraquitu ucajja jiwatäcanisa, jacaniwa.

Take qhititejj jacqui, nayaru iyawscaraquitu ucanacajj, janiw jiwcaniti cunapachasa. ¿Iyawstati ucjja? —sasa.

Martasti saraquïnwa: —Jïsa Tata, nayajj iyawstwa jumajj Cristötama, Diosan Yokapa, acapachar jutañapäcän uca —sasa.

Martajj ucanac arsusinjja María cullacaparu jawsiriw saräna, ucatsti jamasatwa yatiyaraquïna: —Yatichirejj acanquiwa, jawsasctamwa —sasa.

Mariajj ist'asinjj ucspachaw Jesusar uñjiri saräna.

Jesusajj janïraw marcaru mantcataynati, cawqhantejj Martajj jicjjatcatayna ucqhancascänwa.

Mariaru jalsuwayiri uñjasinjja, chuymachapcäna uca judionacajj Mariaruw arcapjjäna: “Imäwiruch jachir sarpacha” sasa.

Mariajj Jesusan ucaru purisinsti, Jesusan cayunacaparuw quillt'asi ucatsti saraquiwa: —Tata, jumatejj acancascasamäna ucajja, jilajjajj janiw jiwcasapänti —sasa.

Jesusajj Mariaru jachiri uñjasinjja, uqhamarac jupamp chica jutiri judionacar jachir uñjasinsa, llaquitaw uñjasïna, chuymapsti ch'alljjtayasiraquïnwa.

Ucatsti Jesusajj jisct'änwa: —¿Cawquïrus imapjjta? —sasa. Jupanacasti sapjjänwa: —Tata, jutamay uñjiri —sasa.

Jesusasti jachänwa.

Judionacasti sapjjaraquïnwa: —Uñtapjjam cunjsa munasitayna —sasa.

Jupanacat maynïrinacasti sapjjaraquïnwa: —Aca jakejj juyqhurojj kollaraquisä. ¿Janit cuns lurcaraquisapänjja Lazaron jan jiwañapataquejja? —sasa.

Jesusajj wasitampiw wali ch'alljjtata, imäwiru jac'achasi. Imäwejj mä putuncänwa, mä jach'a kalampi puncut atcatataraquïnwa.

Jesusasti sänwa: —Atekapjjam uca kala —sasa. Martasti Jesusarojj sänwa: —Tata, niya k'aptatäjjpachawa, pusürojjchejjay jiwatapatjja —sasa.

Ucampis Jesusajj sascaquïnwa: —¿Janit nayajj siscsma, jumatejj iyawsäta ucajja, Diosan jach'a ch'amapjja uñjätawa —sasajja?

Ucatwa kaljja nuqhokapjjäna. Jesusasti alajjpacha uñtasinwa arsu: —Awquiy, yuspagarsmawa nayar ist'atamata.

Yattwa jumajj nayarojj ist'apunistawa, ucampis nayajj ucjja sistwa aca jakenacan asquipataqui, jumajj nayaru qhitanquista uc iyawsapjjañapataqui —sasa.

Ucanac sasinsti jach'atwa art'äna: —¡Lázaro, mistunim! —sasa.

Jiwatasti mistunïnwa amparanacapas, cayunacapas ch'okäñanacamp ñach'antata, uqhamarac ajanupas mä tucuyompi imantataraqui. Ucjjarojj Jesusajj saraquïnwa: —Jararapjjam, sarnakpan sam —sasa.

Mariaru chuymachiri sarapcatayna uca judionacatjja waljaniw Jesusan luräwinacap uñjasina juparojj iyawsapjjäna.

Ucampis judionacat mayninacajj fariseonacan ucaruw saräna cuntejj Jesusajj lurcatayna uc yatiyiri.

Uc yatisinsti fariseonacampi sacerdotenacan jilïrinacapampejj Jach'a Tantachäwiruw jawsthapipjjäna, ucansti sapjjaraquïnwa: —¿Cuns lurañäni? Aca jakejj walja unañchanaca milagronacampwa luri.

Uqhamactejj jaytañäni ucajja, takeniw juparu iyawsapjjani; romanonacajj jutasin templosa t'unjani uqhamarac marcasa —sasa.

Ucampis jupanacat maynïri Caifás satäcäns ucajj uca marajj sacerdotenacan jilïripänwa. Ucasti jupanacarojj saraquïnwa: —Jumanacajj janiw cuns yatipctati,

ni amuyasipctasa jiwasataquejj walïspawa mä sap chachaqui marcpachat jiwañapajja, takeni jiwarañat sipansa —sasa.

Ucampis Caifasajj janiw amuyupatacti acjja siscäna, jan ucajj jupajj uca marajj sacerdotenacan jilïripätap laycojja, Diosaw uqham arsuyäna: “Jesusaw jiwañapa Judea marcpachatjja” sasa.

Janiw aca marcatacti, jan ucasti Diosan wawanacapajj yakha marcanacancquis ucanac mayar jawsthapiñapataqui.

Uqhamajj ucürutpachawa jilïrinacajj Jesusar jiwayañ amtapjjäna.

Uc yatisin Jesusajj janiw judionac taypin khan sarnakcjjänti, jan ucasti Judeatjj mistuwayjjänwa, ucatsti wasar jac'ancquis uca Efraín sat marcaruw sarawayjjäna. Ucanwa discipulonacapampi kheparapjjäna.

Mä juc'a urunacaquejjänwa judionacan Pascua fiestapan puriñapajja. Walja jakenacaw marcanacatjja Jerusalenaru sarapjjäna, janïr Pascua purinquipana k'omachasiñ culto lurañataqui.

Jesusaru thakasaw sarnakapjjäna. Templo mankhansti jisct'asipjjänwa maynit maynicama: —¿Cuns amuyapjjta? ¿Fiestarojj jutpachänit janicha? —sasa.

Fariseonacampi sacerdotenacampejj sapjjataynawa: ‘Qhititejj Jesusan cawquincatapsa yatchi ucajja, yatiyapjjetpan, nanacajj preso catupjjañajjataqui’ sasa.

Aymara Bible 1997

Biblia Aymara ©Sociedad Bíblica Boliviana 1997