Aymara Bible 1997

Lucas 9

Jesusajj tunca payan discipulonacaparuw tantacht'äna, ucat ch'amampi munañanïñampwa churaraquïna take cast ñankha ajayunac alissuñataqui, uqhamarac usutanac waliptayañataquisa.

Jupanacarojj Diosan reinopat parlapjjañapataquiw qhitäna, uqhamarac usutanac waliptayapjjañapataqui.

Jupasti saraquïnwa: —Jan cuns thaquitaquejj apapjjamti, ni thujrsa, ni bolssa, ni t'ant'sa, ni kollksa. Mä camisac ekasipjjam, jan payjja.

Cawqui utarus puripjjätajja, ucan kheparapjjam uca chekat sarjjañcama.

Ucatsti cawqhantejj jan catokañ munapcätam ucqhajja, mistjjapjjam uca marcata, cayunacamat lak'a polvonacjja thalarasipjjaraquim jupanac toke arsuta uñacht'ayañataqui —sasa.

Jupanacasti mistusinjja take jisc'a marcanacaruw sarapjjäna khespiyasiñ arunac yatiyasa, uqhamarac usutanacar c'umaraptayasa.

Marca apnaker Herodesajj yatjjaraquïnwa take cuntejj Jesusajj lurcäna ucjja; ucatsti janiw yatcänti cunjäm amuyt'añsa, yakhepanacajj “Juanaw jiwatanac taypit jactanjjatayna” sapjjatap laycu.

Mayninacasti: “Elías profetaw uñstanpacha” sapjjänwa, yakhepanacasti: “Nayra profetanacat mayniw jactanpacha” sapjjaraquïnwa.

Herodesasti saraquïnwa: —Naya quicpaw Juanan p'ekep apakerejj qhitta. Uqhamasti ¿qhitëjjaracpach acasti, cunaymanracs jakejj jupjjatjja parlapjjejjä? —sasa. Herodesasti Jesusarojj wal uñjañ munäna.

Apostolonacapasti cuttanjjasinjja, cuntejj lurapcatayna uc Jesusarojj yatiyapjjäna. Ucjjarusti Jesusajj apostolonacapampejj mä wasar chekaruw sarapjjäna, Betsaida marca jac'aru.

Jakesti uc yatisinjja, arcapjjänwa; Jesusasti jupanacarojj catokaraquïnwa, Diosan reinopat yaticharaquïna, uqhamarac usutanacarus c'umaraptayaraquïna.

Niya jayp'öjjepansti tunca payan discipulonacapajj Jesusar jac'achasisin sapjjänwa: —Aca jakenacarojj qhitanucjjam, samarjjapjjañapataqui, uca jac'a utanacans mank'añ thakasipjjañapataqui, acansti janiw cunas utjquiti —sasa.

Jesusasti jupanacarojj sänwa: —Jumanacay mank'añjj churapjjamjja —sasa. Jupanacasti sapjjaraquïnwa: —Pheska t'ant'ampit pä chawllampit juc'ampejj janiw utjapquituti, taketac alir sarjjapjjerist ucqhajj inasa utjchispa —sasa.

Jakesti pheska waranka chachanacjamänwa. Jesusasti discipulonacaparojj saraquiwa: —Pheska tuncatcam konurayapjjam —sasa.

Uqhamwa lurapjjäna, takeniraquiw kont'asipjjäna.

Ucatwa Jesusajj pheska t'ant'ampi pä chawllampjja aptasina, alajjpachar uñtasinwa ucanacat Diosar yuspagararaqui. Pachjatatsti discipulonacaparuw churi jakenacar laquintapjjañapataqui.

Takeniw mank'apjjäna, sist'asipjjaraquïna, ucatsti tunca payan canastaracwa t'ant'a jilt'jja apthapipjjäna.

Mä urojj sapaquiw Jesusajj Diosat mayisiscäna; ucaruw discipulonacapajj jutapjje, ucat Jesusajj jupanacar jisct'äna: —Jakejj ¿qhitiw sapjjetus nayarojja? —sasa.

Jupanacajj sapjjewa: —Yakhepanacajj: ‘Bautisir Juanaw’ sapjjtamwa; yakhepanacasti: ‘Eliasaw’ sapjjaractamwa. Mayninacasti: ‘Nayra profetanacat mayniw jactanpacha’ sapjjaractamwa —sasa.

Ucjjarusti jupanacaruw jisct'araqui: —Jumanacasti, ¿qhitiw sapjjestasa? —sasa. Pedrosti juparojj sänwa: —Jumajj Diosan qhitanit Cristo Tatitütawa —sasa.

Jesusasti walpun ewjjt'äna jan qhitirus acjj yatiyapjjañapataqui.

Ucat saraqui: —Jaken Yokapajj wali t'akhesiñapapuniwa; jilïri jakenacans jisc'achataraquïniwa, sacerdotenacan jilïrinacapampisa, uqhamarac ley yatichirinacampisa. Jiwayapjjaniwa, ucampis quimsür jiwatatjja jactaniniwa.

Ucjjarusti takeniruw saraquïna: —Maynitejj nayar arcañ munchitu ucajja, jupa quicpat armt'aspan, crusap apt'at sapüru arquitpan, jacañap apt'asirjamächi ucasa.

Jacañap khespiyasiñ munirejj apt'asiniwa, ucampis naya laycu jacañap apt'asiristi khespiyasiniwa.

¿Cuna asquiraquïspa jaketaquisti aca orakpachajj jupancjjaspa, ucat jacañap apt'asispa ucasti?

Maynitejj nayat p'enkaschitu, uqhamarac arunacajjatsa ucajja, Jaken Yokapajj jupatjja p'enkasiraquiniwa cunapachatï Reyjam jutcani Awquipan jach'a cancañapampi, uqhamarac kollan angelanacampi ucqhajja.

Khanacwa sapjjsma, acancapqui ucanacat yakhepanacajj janiw jiwapcaniti janïr Diosan reinop uñjcasajja —sasa.

Acanac satapat quimsakallko uru sarakatarjamaw Jesusajj mä kollur oración lurir maqhatäna Pedrompi, Santiagompi, Juanamp cuna.

Ucatsti oración lurquipanwa Jesusan ajanupajj mayja tucuwayäna, wali jank'o lliphipquiri tucusa.

Ucapachaw pani chachanacajj uñstanisin jupamp parlapjjäna, ucanacasti Moisesampi Eliasampïnwa.

Mä jach'a alajjpach khanan muyuntataw jupanacajj uñjasipjjäna. Jupanacasti Jerusalén marcan Jesusan t'akhesis jiwañapjjatwa parlapjjäna.

Pedrompi chicäpcän ucanacajj wali iquimpi atipjatäpjjchïn ucasa uñnakasipcaraquïnwa, ucat jupanacajj Jesusan jach'a khanap uñjapjjäna, uqhamarac Jesusampi chicäcäns uca pani jakenacarusa.

Cunapachatï uca jakenacajj Jesusat jithektawayasipcäna ucqhawa, Pedrojj säna: —Yatichiri, sumaw acancatasajja. Quimsa chhujlla lurapjjä; mayjj jumataqui, mayrac Moisesataqui, maysti Eliasataqui —sasa. Pedrosti janiw cun satapsa amuyascänti.

Uqham parlquipanwa mä kenayajj jutasin jupanacarojj imantjjäna, ucat kenay taypincjjasina wal ajjsarapjjäna.

Ucapachaw kenay taypitjja mä arojj ist'asi, aqham sasa: “Acaw munat Wawajjajja, juparu ist'apjjam.”

Uca aru ist'atatsti Jesús saparuquiw uñj-jjapjjäna. Jupanacajj amuquïpjjänwa, janiw qhitirus cuns yatiyapcänti uñjapcataynas ucatjja.

Khepüru kollut sarakanjjapjjän ucqhasti, walja jakew Jesusar jicjjatiri jutapjjäna.

Ucat jakenac taypit mä chachajj jach'at jupar art'i: —Yatichiri, janiy uqhamämti, wawajjaruy uñjjatt'arapita, jupa sapaquiw wawajjajja.

Juparusti mä ñankha ajayuw catunti ucaw acatjamat warariyi, uqhamaraquiw wal thalayi, lacapatsti jopokow juti. T'akhesiyiwa ucatjja janiraquiw antutañ munquiti.

Discipulonacamarojj achict'asiractwa uca ñankha ajay alissupjjañapataqui, ucampis jupanacajj janiw ch'amanïpquiti —sasa.

Jesusajj saraquïnwa: —¡Ay, jan iyawsañan jan wali jakenaca! ¿Cunapachcamas jumanacampiquïscäjja, take acanac apjjäsisajja? Acar uca wawam irptanim —sasa.

Uca waynarusti niya Jesusar jac'achasinquipanwa, ñankha ajayojj pampar liwinucu. Ucat Jesusajj uca ñankha ajayurojja tokenoke. Uca waynarusti waliptayjjewa ucat awquipar catuyjjaraqui.

Takeniraquiw Diosan jach'a cancañapatjja muspharasipjjäna. Takeni Jesusan luratanacapat muspharatäsipquipansti, jupajj discipulonacaparojj sänwa:

—Ac sum ist'apjjam, ucatsti jan armapjjamti: Jaken Yokapajj jakenacan amparanacapar catuyatäniwa —sasa.

Ucampis discipulonacapajj janiw camsataps amuyt'apcänti, janiraquipï jupanacan amuyt'apjjañapataquejj churatäcäntejja. Ajjsarapjjaraquïnwa jupar mayiñjja uca arunacat khanañchañataquejja.

Ucqhanacajj discipulonacapajj: ¿Qhitis jiwasanac taypinjja jilïrïni?, sasaw ch'ajjwapjjäna.

Jesusasti amuyänwa cuntejj jupanacajj lup'ipcän ucjja, ucatwa mä wawa catusin jupanac jac'ar sayt'ayi.

Ucat saraqui: —Qhititejj aca wawar sutejjan catokqui ucajj nayaruw catoketu; qhititejj nayar catokquitu ucajj qhitanquitu ucaruw catokaraqui. Uqhamasti qhititejj jumanac taypinjj juc'amp jisc'äqui ucaw juc'amp jach'aru tucuyatänejja —sasa.

Ucat Juanajj jupar saraquïna: —Yatichiri, uñjapjjtwa mayni jakeru sutiman ñankha ajayunac jaksuri, ucarusti nanacajj jarc'apjjtwa jan jiwasamp chic sarnakatap laycu.

Jesusasti jupanacarojj sänwa: —Jan jarc'apjjamti, qhititejj jan jiwas conträqui ucajj jiwasampïsquiwa —sasa.

Cunapachatï Jesusan alajjpachar maqhatjjañapajj jac'ancjjäna ucqhajja, Jerusalenarojj jan ajjsarasaw sarjjäna.

Nayrakatapsti qhitanacwa qhitäna; jupanacasti Samaria jac'an mä jisc'a marcaruw sarapjjäna korpachasiña waquichiri.

Samaritanonacasti janiw catokañ munapcänti Jerusalenar sarascatap yatisina.

Santiagompi Juanampejj uc uñjasinjja, sapjjänwa: —Tata, ¿muntati nanacan alajjpachat nina sarakayaniñajj-jja, ucat jupanacar naqhantañapjja, [cunjämtejj Elías profetajj lurcän uqhama]? —sasa.

Ucatwa Jesusajj uñcatasin jupanacarojj toketatäna: [—Janiw jumanacajj amuyasipctati cuna casta ajayuncapjjatamsa.

Jaken Yokapasti janiw jakenacan jacañap t'unjiri jutquiti, jan ucasti khespiyiriw juti —sasa.] Ucatsti yakha jisc'a marcaruw sarjjapjjäna.

Jupanac thac sarquipanwa, mä jakejj Jesusar säna: —Tata, arcañ munsma cawquicamasa —sasa.

Jesusajj saraquiwa: —Kamakenacajj putunacaniw, jamach'inacas tapaniraquiwa, ucampis jaken Yokapanjj janiw cawqhar p'ekepa samart'ayañataquis utjquiti.

Jesusajj mayniruw saraqui: —Arquita —sasa. Jupasti sänwa: —Tata, nayrakat awquejjar imt'asinjjä ucat arcäma —sasa.

Jesusajj juparojj sascaquiwa: —Jiwatanacajj jiwat masiparojj imascpan sam. Jumasti saram, ucatsti Diosan reinopat yatiyanim —sasa.

Ucat maynejj saraquïna: —Tata, arcañ munsma, ucampis nayrakat utanquirinacat qhitharpayasinim sita.

Jesusasti juparojj sänwa: —Qhititejj arado catt'atäcasin khepar uñtqui ucajja, janiw Diosan reinopataquejj asquiquïti —sasa.

Aymara Bible 1997

Biblia Aymara ©Sociedad Bíblica Boliviana 1997