Aymara Bible 1997

Lucas 13

Uca quicpa horasanraqui yakhepanacajj jac'achasisin Jesusarojj yatiyapjjäna, cunjämtï Pilatojj Galileanjj mä kawkha jakenacjja jiwayatayna, cunapachatï sacrificio loktasipcäna ucqha. Pilatosti uca animalanacan wilapampi, uca jakenacan wilapampwa quittäna.

Jesusasti jupanacarojj sänwa: —¿Jumanacajj amuyapjjtati uca Galileanquir jakenacajj marcapan mayninacat sipans juc'amp juchanïpjjatap laycu uqham pasatapjja?

Janiwa, ucampis jumanacatejj jan arrepientisipcätajja, take jumanacajj quicparaquiw jiwarapjjaraquïta.

¿Jan ucajj jumanacajj amuyapjjtacha, qhaya tunca quimsakallkonejj Siloé torremp tincjjatata jiwarapcän ucanacajj Jerusalenan mayni jaquirinacat sipans juc'amp juchanïpjjatapa?

Janiwa, ucampis jumanacatejj jan arrepientisipcätajja, take jumanacajj quicparaquiw jiwarapjjaraquïta —sasa.

Ucatwa Jesusajj aca uñtasïwita parli: “Mä jakew yapupana higo yapuchäna, ucat jupajj uca ali uñjir sari: ‘Inach achjjpacha’ sasa, ucampis janiw ni mä achups jicjjatcänti.

Ucat uca yap uñjirirojj säna: ‘Uñtam, quimsa marpachaw nayajj jutta aca alin achup uñjirejja, ucatsti janipuniw jicjjatcti. Phat'anucum. ¿Cunataquis inamayajj orakjj catjjäsinejja?’ sasa.

Ucampis uca yapu uñjirejj juparojj sänwa: ‘Tata, aca maramp suyt'aquim, nayajj orak lak'aptayä, uqhamarac wanump ucht'araquï.

Inas ucampejj achjjchini; ucat janipun achcanejja, ucapachaw phat'anucjjäta’ ” sasa.

Samarañ urun Jesusajj sinagogan yatichascäna.

Tunca quimsakallkoni mara usurnucstata warmiw ucancascaraquïna. Mä ñankha ajayuw juparojj c'umthaptayatayna, jupasti janiw cunjämatsa chekaptañataqui ch'amanïcänti.

Jesusajj jupar uñjasinjja, jawsänwa ucat saraquïna: —Warmi, usumatjja kollatäjjtawa —sasa.

Ucat jupjjaruw amparapamp Jesusajj lokjjati, uca warmisti ucspachaw chekaptjjäna, ucat Diosaru yupaycharaquïna.

Ucampis sinagogan jilïripajj colerasïnwa Jesusan samarañ urun c'umaraptayatapata, ucat jakenacar saraqui: —Sojjtüruw lurañataquejj utji; uca urunacanwa kollayasirejj jutapjjañamajja, janiw samarañ urunjja —sasa.

Ucapachaw Tatitojj jupar saraquïna: —C'ari chuymaninaca, ¿janit jumanacat cawquïris vacapsa jan ucajj asnopsa jararquejj samarañ urunjja, umt'ayir irpañataquejja?

Aca warmisti Abrahaman wawanacapat jutiriwa, supayasti juparojj tunca quimsakallkoni maraw aca usumpejj chinuntäna. ¿Janiti usupat jararañajj waquisqui samarañ urunjja? —sasa.

Jesusan ac satapatsti takeniw uñisirinacapajj p'enkasipjjäna. Take jakesti wal cusisipjjaraquïna Jesusan uca jach'a muspharcañanaca luratapata.

Ucjjarojj saraquïnwa: —¿Cunarus uñtasi Diosan reinopajja? ¿Cunampis uñtasiyaraquiristjja?

Mä mostaza jatjamawa cunjämtejj mä jakejj orakeparojj phawanti, mistusinjja jilsuwayi, mä jach'a kokar tucuñcama, uca layminacaparusti jamach'inacajj tapachasipjjewa —sasa.

Jesusajj saraquïnwa: —¿Cunampis Diosan reinopjj uñtasiyaraquiristjja?

Levadurjamawa, cunjämtejj mä warmejj quimsa ucqha jac'umpi chaptasajj takpach masa poktayejj uqhama —sasa.

Jesusasti Jerusalenaruw sarjjäna. Sarcasinsti jach'a marcanacana, uqhamaraqui jisc'a marcanacan yatichawayäna.

Ucatsti mayniw jupar jisct'äna: —Tata, ¿juc'aniquiti khespiyasirinacajja? sasa. Jupasti saraquïnwa:

—Take ch'amampi c'ullc'u punc chic mantañaru uchasipjjam, sapjjaracsmawa, waljaniw mantañ munapjjani, ucatsti janiw mantapcaniti.

Utanisti sartasin punc jist'antipanjja, jumanaca ankanquirinacajj punc lekt'apjjäta: ‘Tata, jist'art'apjjeta’ sasa. Ucampis jupajj sapjjätamwa: ‘Janiw uñt'apcsmati cawquinquirïsipcstajja’ sasa.

Ucapachaw jumanacajj sañ kalltapjjäta: ‘Jumamp chicaw mank'apjjta, umapjjaracta, jumasti marcanacajjana yatichtajja’ sasa.

Ucampis jupajj sapjjätamwa: ‘Niya sapjjsmawa, janiw uñt'apcsmati cawquinquirïsipcstajja. Jithektapjjet nayata take jan wal luririnaca’ sasa.

Ucanwa wararipjjäta, laca ch'aqhanacamsa t'urusipjjaraquïta, Abrahamampi, Isaacampi, Jacobompi, uqhamarac take profetanacampi Diosan reinopancatapa uñjasina, jumanacasti ankaru jakonucutäpjjatamataraqui.

Jakenacajj jutapjjaniwa inti jalsu toketa, inti jalant toketa, amstatsa, aynachatsa Diosan reinopan mank'eriw kont'asipjjaraquini.

Ucapachaw yakhepa jichha khepancapqui ucanacajj nayrancapjjani, yakhepa nayrancqui ucanacasti khepancapjjaraquini.

Uca urunracwa mä kawkha fariseonacajj purinipjjäna, ucat Jesusar sapjjäna: —Acat sarjjam, Herodesajj jiwayañ muntam —sasa.

Jupasti saraquïnwa: —Sarapjjam, ucatsti sapjjam uca sallka kamakeru: ‘Acajjaya uñtam, jichhürumpi kharürumpejj ñankha ajayunacwa jakonucta, ucatsti usutanacaruw c'umaraptayaracta. Ucatsti nayajj jurpüruw luräwejj tucuyjjä.’

Ucampis jichhajj sarascañajjaquiwa, kharürumpi jurpürumpejja; janiw waquisquiti mä profetan Jerusalén marcat ankäjjan jiwañapajja —sasa.

“¡Jerusalén, Jerusalén, jumajj profetanacarus jiwayta, Diosajj qhitanctam ucanacarus kalampiraquiw c'upjta! ¡Kawkha cutiraquiw nayajj jumanacar anthapiñjj munäyäta, cunjämtejj wallpajj chhiwchhinacapjja chhekhap mankherojj khomjjarusi uqhama, ucampis janiw munctati!

Uñtapjjamaya, utanacamajj apanucutäniwa; ucatsti sapjjsmawa, janiw uñjapquitätati, cunapachatï sapjjetäta: ‘Bendicitäpan Tatitun sutipar jutirejja’ sasa ucürcama.’ ”

Aymara Bible 1997

Biblia Aymara ©Sociedad Bíblica Boliviana 1997