A A A A A

Aymara Bible 1997

Génesis 17

Cunapachatejj Abramajj llätunc tunca llätuncani maranëjjan ucqhaw Tatitojj jupar uñstäna, ucatsti saraquïnwa: —Nayätwa take ch'amani Diosajja; jumasti nayan nayrakatajjanjja cheka asqui sarnakam,

ucatsti nayajj jumampejj mä amtäwi lurä; wawanacamasti waljanipunïniwa.

Ucapachasti Abramajj orakeruw alt'äna ajanupajj oraker puriñcama, Diosasti ucchañcamajj parljjayascaquïnwa:

—Acaw jumampi mä suma amtäwiru mantatajjajja: Jumajj walja marcanacan awquipäyätawa,

janiraquiw Abram satäjjätati. Jichhat ucsarusti Abraham satäjjätawa, walja marcanacan awquipa tucuyäma uca laycu.

Wawanacamsti waljanirupuniw tucuyäjja; jumatsti reyinaca, uqhamarac marcanacaw mistuni.

Cuna arust'äwtejj jumampi, uqhamarac acat kheparusa wawanacamampi lurcta ucajj acawa: Nayajj juman Diosamapunïyäwa, uqhamaraqui wawanacaman Diosapäyäwa, wiñayataqui.

Canaán orakesti jumaru uqhamaraqui wawanacamaru churatäniwa, cawqhantejj jichhajj jaccta uca orake, ucasti mä herenciata wiñayataqui churatäniwa, nayaraquiw jupanacan Diosapäyäjja.

Uqhamarus Diosajj Abrahamarojj sascaquïnwa: —Ucampisa jumajja uqhamaraqui wawanacamasa nayan arust'äwejjarojj phokhapjjapunim.

Acaw jumanacampi arust'äwiru mantatajjajja, uqhamarac wawanacaman uca arust'äwjja phokhañapapuniwa: Take chachaw jumanac taypinjja circuncidatäñapa.

Jumanacasti chhojjorasiñanacaman lip'ichi janchinacapwa qharirasipjjäta, ucawa mä chimpüni cuna arust'äwirutejj jumanacampi nayampi mantapctan ucatjja.

Jichhat ucsarojja take yokall wawaw circuncidatäñapa, nacitapat quimsakallko ururu, uqhamarac utaman nasqui kollkempi jaya jaket alascta ucan wawapasa.

Maynisa, maynisa circuncidatäñapapuniwa. Uqhamaw nayan arust'äwejjajj jumanacan janchiman mä chimpüniwa, wiñayataqui mä arust'äwiscapas uqhama.

Ucampisa qhititejj jan circuncidatäcani ucasti jumanac taypitjja apsutäjjañapawa, jan nayan arust'äwejjaru ist'atap laycu.

Diosasti Abrahamarojj saraquïnwa: —Sarai warmimajj janiw uqham sutinïcjjaniti. Jichhat ucsarojj Sara satäjjaniwa.

Nayaw juparojj bendiciraquï, jupa toksti mä wawa churaraquïma. Jïsa, bendicïwa. Jupasti walja marcanacan taycapäniwa, wawanacapasti marcanacapan reyinacaparaquïniwa.

Abrahamasti oraker p'ekep puriyañcamaw alt'asïna, larusiraquïnwa, aqham sasa: “¿Patac maran jakesti wawaniraquïspati? ¿Sarasti llätunc tunca maranirusti wawaniraquïspati?” sasa.

Ucatsti Diosarojj saraquïnwa: —¡Anchatï Ismael wawajj bendicionamampi jacaspa! —sasa.

Diosasti saraquïnwa: —Sara warmimajj mä wawa wawacharapïtam sismawa. Jumasti Isaac sasaw sutichäta, jupampiw arust'äwejj-jja suma sayt'ayä, wawanacapampisti wiñayataquiw arust'äwejj-jja utjayaraquï.

Ismael toketsti ist'aracsmawa, juparojj bendiciraquïwa wawanacapsa waljaniruw tucuyaraquï. Ismaelasti tunca payani jach'a jilïrinacan awquipäniwa, juparusti mä jach'a marcwa tucuyaraquï.

Ucampisa arust'äwejj-jja Isaacampiquiw utjayäjja, cawquïri wawtejj jichhajj Sarajj wawacharapcätam acat mä mararojja, ucampi.

Cunapachatejj Diosajj Abrahamampi parlañ tucuyjjän ucqhajj uca chekatjja sarjjänwa.

Ucürpacharaquiw Abrahamajj Ismael wawaparojj circuncidäna, uqhamarac kawkha sirvirinacapatejj utapan nascatayna ucanacarusa, uqhamarac cawquïri jakenactejj kollkempi alascatayna ucanacarusa circuncidaraquïnwa. Take jakenaca utapan jacapcäna, uqhamarac sirvipcäna ucanacasa circuncidataraquïnwa, cunjämtejj Diosajj siscatayna uqhamarjama.

[24-25] Abrahamasti llätunc tunca llätuncani maranïnwa, Ismaelasti tunca quimsani maraniraqui, cunapachatejj chhojjorasiñapan janchipajj qharekatacän ucapachajja.

***

Abrahamasa, uqhamarac Ismael wawapasa ucürpacharaquiw circuncidasjjapjjänjja,

utapan utjir take jakenacampi, utapan nacit sirvirinacampi, kollkempi alat jaya jakenacampi cuna. Takpachaniw circuncidatäpjjänjja.

Aymara Bible 1997

Biblia Aymara ©Sociedad Bíblica Boliviana 1997