A A A A A
Biblia en un año
Septiembre 24

Isaías 39:1-8
1. Chay wichan Baladanpa wamran Merodac-baladán Babiloniapa raynin mayaran Ezequías fiyupa gueshyashanpita allchacashantana. Chaura cachancunawan cartata apachiran. Garaynintapis apachiran.
2. Cacha chayajcunata Ezequiasga cushisha jamachiran. Ima-aycan cashantapis ricachiran. Ricachiran gorita, guellayta, perfümicunata, fiyupa cuestaj asëtita, churaraj armancunata. Churacunan wasicho ima-aycallanpis churarajcunata ricachiran. Ushajpämi palasyuncho cajtawan mandashancho cajcunataga ricachiran juctapis mana cachaypa.
3. Chaymi profëta Isaías aywaran ray Ezequiasman. Chayaycur tapuran: «¿Maypitataj shamusha chay runacuna? Gamtaga ¿ima nisha-cashunquitaj?» nir. Chaura Ezequías niran: «Paycunaga shamusha fiyupa carupitami. Shamusha Babilonia nasyunpita.»
4. Isaías yapay tapuran: «¿Imatataj ricasha palasyuyquichöga?» nir. Chaura Ezequías niran: «Paycuna ricasha llapantami cay palasyöcho caycajtaga. Churacuna wasëcho caycajtapis usha-ushajpämi ricachishcä juctapis mana cachaypa.»
5. Chaura Ezequiasta Isaías niran: «Munayniyoj TAYTA DIOS nishanta wiyay:
6. Juc junajmi Babiloniaman apacongapaj cay palasyuyquipita llapan cösacunata, unay awiluyquicuna shuntashanpita canancama shuntaycashayquita. Chauraga caycho manami imapis quëdangapächu.
7. Asta gampita mirajcunatapis Babilonia nasyunman apangapämi. Chaychöna ollgu cajtaga capangapaj palasyucho raypa uywaynin cananpaj.»
8. Chaura ray Ezequiasga Isaiasta niran: «TAYTA DIOS nishanta willamashayqui nogapäga allimi. Noga cawashäcamaga allillami goyäshaj. Pipis imatapis manami rimapämangachu» nir.

Isaías 40:1-31
1. Tayta Diosninchïmi nin: «Acrashä Jerusalén runacunataga shogaycuy shogaycullay ari.
2. Paycunataga alli shimillayquipa willapaycuy. Cananpitaga manana llaquisha goyänanpaj cashanta willaycuy. Paycunaga manami uywaynachu canga. Paycunataga juchancunapita castigashcänami. Paycunataga llapan juchanpita perdunashcänami.»
3. Juc runami gayacuypa willacuycan cayno nir: «TAYTA DIOSNINCHI shamunanpaj nänita allchay. Diosninchi shamunanpaj chunyajpa nänita dirichay.
4. Llapan ragracunatapis pampayächiy. Puytush lömacunatapis parijay. Wicsu nänicunatapis dirichay. Uchcu-uchcu nänicunatapis pampachay.
5. Chayrämi TAYTA DIOSGA munayniyoj cayninta ricacächenga. Chaytaga llapan runacunami ricangapaj. Quiquin TAYTA DIOSMI chayno cananpaj nisha.»
6. «Sinchipa gayacuy» nimashantami wiyashcä. Chaura nogaga tapushcä: «¿Ima nirtaj gayacushaj?» nir. Chaymi nimaran: «Gayacuy llapan runacuna llullu guewanölla caycashanta; alli cawashanpis waytanölla caycashanta.
7. Jananpa TAYTA DIOSPA jämaynin päsariptenga guewapis chaquicäcunmi, waytapis wañuytacäcunmi. Runacunaga rasunpami guewanölla caycan.
8. Guewapis chaquicäcunmi, waytapis wañuytacäcunmi. Tayta Diosninchi rimashancunami ichanga imaypis mana ushacanchu.»
9. Sionman alli willapata apaj, altunnin puntaman wichay. Chaypita intërupa willacushpayqui llapan callpayquipa gayaray. Jerusalenman alli willapata apaj, mana manchacuypa sinchi gayaray. Judá siudäcunacho tiyajcunata willapay «¡Diosninchëga jananchichönami!» nir.
10. TAYTA DIOSGA fiyupa munayninwanmi chayamoj-aywan. Munayniyoj carmi llapanta maquincho chararanga. Juccunapa munaynincho caycajta shuntarcurmi acrashan runacunataga pushaycämun.
11. Payga pushaycämun juc uyshëru uyshancunata michejnömi. Uyshëruga uysha-mallwacunata margacurcurmi apan. Cuyashpanmi margasha apan. Chayraj wachashacunatapis allimi rican.
12. ¿Pitaj maqui paltanta ucrurcachillar lamar yacuta tupusha? ¿Pitaj imano jatun caynintapis syëluta cuartasha? Cay pachacho caycaj llapan ñuchu allpata ¿pillaga juc tupuman tupushachuraj? Puytush lömacuna, puntacuna ayca lasashantapis musyananpaj ¿pillaga pësashachuraj?
13. TAYTA DIOSTAGA ¿piraj «manami chaynöchu» nisha? U ¿piraj «caynömi ruranchi» nir yachachisha?
14. ¿Piraj willapasha, sumaj tantiyachisha? ¿Piraj yachachisha alli jusgananpaj? ¿Piraj yachachisha llapanta musyaj tantiyaj cananpaj? ¿Piraj yachachisha sumaj yachaj cananpaj?
15. Tayta Diospäga nasyuncuna caycan jutuy yacunöllami. Paypäga nasyuncuna caycan ichicnaylla allpa balansacho caycajnöllami. Lamar chaupincho caycaj nasyuncunapis juc agushnöllami caycan.
16. Tayta Diospaj pishtarcur rupachinapäga intëru Libanucho caycaj uywacunapis manami aypanmanchu. Ni Líbano munticho aypalla caycaj guerucunapis waycunapäga manami aypanmanchu.
17. Paypa ñaupanchöga llapan nasyuncunapis manami imapischu. Paypäga llapanpis manacajllami caycan.
18. Gamcunaga ¿imamanraj Tayta Diosta tincuchinqui? ¿Imanirajtataj ruranqui «diosnë» nishpayqui?
19. ¿Ïdulutachuraj ruranqui? Ïdulutaga tacay yachaj runallami ruran. Guellay tacayta yachajmi goriwan chapyan. Chayno guellaypita cadina wallgatapis jundiypa rurapan.
20. Pobriga ïduluta rurachinanpaj ashin puyu mana yachanan guerutami. Nircorga ïduluta ruray yachaj runawan rurachin. Chay runana ïduluta rurapan sumaj tacyajta. Tayta Diosman ichanga ima ïdulupis mana tincunchu.
21. ¿Manachu gamcunaga musyarayqui? ¿Manachu parlajta wiyarayqui? ¿Manachu ñaupapita-pachana willapäshurayqui? ¿Manachu tantiyashcanqui cay pachata camashanpita-pachana?
22. Tayta Diospaga jamanan caycan syëlupa jananchömi. Runacunataga chuspitanöllami ricaycämanchi. Paymi syëlutaga llantucunatanöpis mashtacächiran. Toldu wasi lluylluraycajta runa ichichir mashtajnömi mashtaran.
23. Munayniyoj runacunatapis Paymi manacajmanno ticrachin. Cay pachacho caj mandajcunatapis pasaypa ushacächin.
24. Paycunaga carcaycan lanta-mallwata chayraj lantaycushanömi, chayraj allpaman sapichaycajnömi. Paycunaman Dios pücarcamuptenga wañuytar chaquicäcunmi. Ogshata löcu wayra apacushannöllami ushacäcunpis.
25. Santo Tayta Diosmi tapushunqui: «Gamcunaga ¿imamanraj tincuchimanqui? ¿Piraj nogamanga tincunman?» nir.
26. Syëluman ñuquircushpayqui masqui ricchacuriy: ¿Pitaj llapan chaycunata rurasha? Chaycunataga rurasha llapan estrëllacunata juc juclla camacächejmi, llapantapis jutinpa-jutinpa rejsejmi. Payga fiyupa munayniyojmi, fiyupa callpayojmi. Rurashancunaga manami jucnayllapis pishinchu.
27. Jacobpita miraj Israelcuna, ¿imanirtaj cayno ninqui: «TAYTA DIOSGA manami musyanchu imano goyaycashätapis. Diostaga manami imapis gocunchu imano caycashäpis» nir?
28. Ichanga gamcuna ¿manachu musyanqui? ¿Manachu wiyashcanqui? Imaycamapis cawaj TAYTA DIOS mundu intëruta camäga manami yamacanchu, manami uticanpischu. Pay yarpashanga mana atipaypämi.
29. Paymi shacyächin yamacashana caycajcunata. Callpaynaj caycajtapis callpayojyächin.
30. Mösucunapis uticar bëtanrämi. Mas sinchi callpayojcunapis tacacar tuninrämi.
31. TAYTA DIOSMAN yäracojcunami ichanga alli callpallancho caycangapaj. Chaymi anca buylaycajno aywangapaj. Cörrirpis manami uticangapächu. Caruta aywarpis manami bëtangapächu.

Salmos 109:21-25
21. Gam ichanga TAYTA DIOS pï-maypis rispitashunayquipaj nogata alli ricamay. Cuyapäcoj cashpayqui salbamay.
22. Pasaypa pobrimi, pishipacaychömi caycä. Shongöpis fiyupami llaquicuycan.
23. Llantuy illgacäcojnömi ruracaycä. Chüpacatanömi wayrapis apaycäman.
24. Mana micuptëmi gongurnëpis sicsicyaycan. Pasaypa chaquishanami caycäpis.
25. Runacuna asipänanmi cä. Ricäramar asipämashpan umantapis jajtachinraj.

Proverbios 26:2-2
2. Ima maldäpis manami chayanchu juchan mana captenga. Maldä rurashanga gueshwaynaj pichiusano, wayanay äbinömi maymanpis mana chayaypa cacun.

Gálatas 2:1-21
1. Chaypita chunca chuscu (14) watatarämi Bernabëwan Jerusalenman cutirä. Chayman cutirmi Titutapis pusharä.
2. Chaymanga cutirä aywanäpaj Tayta Diosninchi musyachimaptinmi. Mayur ermänucunata Jerusalencho shuyni shuntaycurmi mana Israelcunata imata willapashätapis musyachirä. Chayno musyachirä llutanta yachaycächishäta paycuna mana yarpänanpämi. Llutanta yachachishäta paycuna yarpaptenga chay-jina ñacashäpis yangallami canman caran.
3. Chaymi willacushäta tantiyachiptë paycuna nimaran alli willacushäta. Chaynöpami mana Israel runa cashanta musyarpis Tituta mana niranchu señalacunanpaj.
4. Tito señalacunanpaj u mana señalacunanpäpis parlacurä shuntacashäman juc ishcay runacuna pacayllapa yaycamusha captinmi. Chay ermänu-tucojcunaga laycunata mana Israel ermänucunapis llapanta cumlinanpämi parlaran.
5. Chayno niptinpis nogacunaga manami chasquipashcächu. Manami munächu Jesucristupa alli willacuyninman llutan yarpaycunata tacurcachir yachachishunayquita.
6. Mana Israel runacunata imano yachachishäta willapaptëpis Jerusalencho caj mayurcuna imatapis manami nimashachu. Ichanga paycuna mayur ermänu casha captin u mana captinpis manami imapis gocamanchu. Tayta Diosninchëga llapanchïtapis iwalmi ricamanchi.
7. Michämänanpa ruquenga paycuna tantiyacuran Israelcunata willapänanpaj Pedruta Tayta Diosninchi acrashanno nogatapis mana Israelcunata willapänäpaj cachamashantami.
8. Tayta Diosninchïmi Pedruta Israelcunapa apostulnin car willapänanpaj acraran. Paymi nogatapis cachamasha mana Israelcunata willapänäpaj.
9. Chayno captinmi mayur ermänucuna Santiago, Pedro y Juanpis tantiyaran willacuyninta willacur purinäpaj Tayta Diosninchi acramashanta. Chaypitanami parlacurä paycuna Israel runacunaman alli willacuyta willacoj aywananpaj, y nogacunana mana Israel runacunaman aywanäpaj. Alli parlacushä musyacänanpänami maquinta gomaran.
10. Paycunaga nimaran Jerusalencho caj pobri ermänucunata mana gonganalläpämi. Chaytaga mana gongaypami ruraycä.
11. Unayllatanaga Siriacho caj Antioquía siudäman Pedro chayamuran. Chaychöga piñacur ollgöparä. Paytaga cäranchömi nirä mana allita ruraycashanpita.
12. Rimërullaga mana Israel ermänucunawan cushishami micoj. Santiago cachashan ermänucuna chayamuptinnami ichanga jamurpänanta manchacur mana Israel ermänucunawan shuntacayta mana munarannachu.
13. Pedruta ricacurmi waquin caj ermänucunapis ni Bernabëpis mana Israel ermänucunawan micunanpaj mana talluparannachu.
14. Chayno rurashan mana alli caycashanta ricarmi ermänucunapa ñaupancho Pedruta ollgöpar nirä: «Gamga Israel runa caycarpis mana Israel runacunanönami cawaycanqui. Chaura cananga ¿imanirtaj munanqui mana Israel ermänucunapis llapan laycunata cumlinantaraj?»
15. Nogacunaga yuriynëpita-pachami Israel runacuna cä. Manami laycunata mana cumlej juchayoj runacunanöchu cä.
16. Chaypis musyämi laycunata cumlir pipis mana salbacushanta, Jesucristuta chasquicuptillä Tayta Dios salbamashanta. Chaymi nogacunaga Jesucristuta chasquicushcä Tayta Dios perdunamashpan juchaynajtana chasquimänanpaj. Chaura layta cumlishallanpitaga manami pitapis Tayta Dios juchancunapita perdunangachu.
17. Tayta Dios perdunamänanchïpäga Jesucristumanmi yäracunanchi. Manami layta cumlinanchïnachu. Waquin ichanga nin «layta mana cumlerga juchayojmi caycanqui» nir. Chaura ¿Jesucristuman yäracuyga juchayojyächimanchïchu? ¡Manami!
18. «Layta manami cumlinanchïnachu» nircur laycuna nishanta yapay cumlerga juchayojmi caycä.
19. Noga layta cumliyta munaptë layga tantiyachimasha juchayoj cashätami. Chaymi nogaga layta cumliyta cachaycushcäna. Laytaga cachaycushcä Tayta Dios munashanno cawanäpämi.
20. Jesucristo cruscho wañushannömi nogapis jucha ruraycunapäga wañushanöna caycä. Mananami quiquë munashänönachu cawä, chaypa ruquenga Jesucristo munashannönami. Chaymi Jesucristuman yäracur cawaycanchi. Paymi cuyamashpanchi noganchi-raycu cruscho wañusha.
21. Nogaga manami Tayta Diosninchi salbamashanchïta manacajman churayta munächu. Laycuna niycashanta cumlir-raj salbacunanchïpaj cashanta yarpashaga yangallapämi Jesucristo cruscho wañusha canman.