A A A A A
Biblia en un año
Septiembre 20

Isaías 30:1-33
1. TAYTA DIOSMI nin: «¡Ay imanöraj canga mana wiyacoj wamräcuna! Mana tapucamayllapami jucwan-jucwan parlacusha. Chaynöpami jananman-jananman juchata rurarcaycan.
2. Egiptumanmi rasyaylla aywarcaycan. Nogataga manami tapucamanchu. Faraonmanmi ‹yanapämay› nir aywarcaycan. Paycunaga Egiptumanmi pacacurcaycan.
3. Ichanga faraonman yäracushanpita pengaypämi canga. Egiptuman pacacushanpitaga fiyupami pengaconga.
4. Zoán siudäman, Hanes siudäman cachata ruquin cachacusha captinpis
5. pengaychömi cangapaj mana bälej nasyunman yäracushanpita. Chay nasyun runacunaga manami yanapangachu. Chaypa ruquin paycunataga fiyupami llaquicachengapaj, pengacachengapaj.»
6. Egiptuman aywajcunaga chunyaj Neguevpami päsarcaycan bürruncunata y camëlluncunata cargasha. Päsarcaycan micucoj liyuncuna tiyashanpami, culebracuna, buylaj culebracuna tiyashanpami. Ima-aycantapis, cuestaj cösancunatapis apacurcaycan mana bälej Egipto nasyunman.
7. Chay nasyonga munayniynajmi. Yanapänanpäpis manami camäpacunchu. Chaymi chay nasyuntaga jutichapashcä: «Ima ruraytapis mana camäpacoj nunayllu» nir.
8. Nircorga Isaiasta Tayta Dios niran: «Cananga chay ribilashäta isquirbiy acta libruman. Nircorga sumaj churay shamoj watacunacho musyananpaj. Chayga canga imaycamapis yarparänanpämi.»
9. Cay nasyun runacunaga mana wiyacoj llullami. TAYTA DIOS yachachishantapis manami wiyayta munanchu.
10. Profëtacunatami nircaycan «Amana ricapacuynachu» nir. Profëtacunataga nircaycan: «Amana willapämaychu rasun cajta musyachishushayquita. Cushicuypaj cajcunallata willapämayga. Munashäcunallata willapämayga.
11. Tayta Dios ruraycächishushayquitaga cachaycäriyna. Rasun cajtaga amana ruraynachu. Israelpa Santo Tayta Diosnin nishantaga ama yachachimaynachu» nir.
12. Chaypitami Israelcunapa Santo Tayta Diosnenga nin: «Gamcunaga willaycächishäta manami wiyayta munanquichu. Chaypa ruquenga yarparcaycanqui wañuchinacuyllapaj, mana allita rurayllapaj.
13. Chaypitami gamcunaga juchayoj canqui. Juchayquega altu perga shillisha caycajnömi caycan. Perga shillicar mana yarpashapita amicäcojnömi canga.
14. Tunerga puyñu shallojnömi ricacunquipaj. Ushajpaj shallusha cashpan tullpapita shanshata jorgucunapäpis mana allino, ni yacuta chagacunapäpis mana allinöna ricacunquipaj.»
15. Israelcunapa Santo TAYTA DIOSNENGA nin: «Nogaman cutimushpayqui jamaycäriyna ari. Nogaman yäracamorga salbashanami canquipaj. Chayno nishuptiquipis gamcunaga manami munashcanquichu.
16. Chaypa ruquenga nishcanqui: ‹Manami cutëchu. Cawalluta muntacarcärirmi gueshpir aywacushaj› nir. Nishayquinöllami rasunpa gueshpinquipaj. Mastapis gamcunaga nirayqui: ‹Fiyupa cörrej carrëtacunaman wicharcurmi gueshpishaj› nir. Ichanga gaticachäshojcunapis mas fiyupa cörrejmi cangapaj.
17. Juc runalla manchachishuptillayquimi gamcunaga waranga gueshpinquipaj. Pichgaj runa manchachishuptiquega llapaniquimi gueshpinquipaj. Chaura wallcajllanami quëdanquipaj jircacho juc ishcaylla gueru ichiraycajno, man'chäga juc puytush lömacho señalpaj gueru jawishanöllana.»
18. Chaypis, TAYTA DIOSGA shuyaraycäshunquimi gamcunata cuyapäshunayquipaj. Payga fiyupami munaycan cuyacoj cayninta gamcunata musyachishuyta. TAYTA DIOSGA rasunpa alli cajta ruraj Diosmi. Alli cawaytami tarenga payman yäracojcunaga.
19. Sión runacuna, Jerusalencho tiyajcuna: Manami waganquipänachu. Yanapäshunayquipaj gaparaypa mañacuptiqui Tayta Diosga wiyashushpayqui cuyapäshunquipämi. Payga wiyarcushan öra jucllami yanapäshunquipaj.
20. Tayta Dios, fiyupa ñacayman llaquicuyman chayachishushpayquipis pushashojniqui caycarga manami yapayga pacaconganachu. Gamcunaga ñawiquiwanmi ricanquipaj.
21. Alli ruraycashayquipita wac-läman u cay-läman tunejnöpis llutanman chayajno captiqui, guepayquipitami gayacamushunquipaj. Chaymi nishunquipaj «Caypami näniga. Cay alli nänipa aywayga» nir.
22. Chauraga jitarinquipänami guellaypita rurashayquita, goriwan intërunpa chapyachiypa rurashayqui ïduluyquicunatapis. Chaycunataga ganra räputanömi manana ricaytapis munanquipänachu.
23. Murushayqui micuyniquicuna alli wiñamunanpämi Tayta Diosga tamyachimongapaj. Chaura chacrapis rïguyquita allimi wayuchengapaj. Chay wichanga uywayquicuna micunanpäpis achcami guewa canga.
24. Chacracho aroj buyiquicuna, carga ashtaj bürruyquicunapis alli limyu guewatami micongapaj.
25. Wañuchinacuy cashan wichan, pacacuna siudäcunapa perganta juchuchishan wichanga intëru puntacunapita, altunnin puytush lömacunapitapis yacu shamongapaj chayasha mayu-jinarämi.
26. TAYTA DIOSGA jampipashpan watapangapämi pay castigar däñashan runacunapa guerinta. Chauraga quillapis achicyangapaj intinörämi. Intipa achicyayninnami cangapaj ganchis intipa achicyayninnöraj.
27. Masqui ricay-llapa. Quiquin TAYTA DIOSMI caruta aywaycämun. Pay rabyashanga caycan nina ratarir yana goshtay jatarejnörämi. Fiyupa rabyasha cashpan rimananpämi caycan. Paypa shimenga imatapis rupar ushacurcoj ninanömi.
28. Jämayninpis caycan fiyupa chayasha mayu runata cuncancama ñiticurcojnömi. Payga aywaycämun juc-lä nasyun runacunata mana alliman chayachinanpämi. Llapan runacunapa shiminmanpis frënuta churapanga chaywan juc-läpana pantacächinanpaj.
29. Gamcunapämi ichanga cangapaj cushicur cantay. Fiyupa rispitädu fistata rurar cushicushayquino canga. Gamcunaga fiyupa cushishami carcaycanquipaj, pinculluta wiyapallapa TAYTA DIOS acrashan lömaman aywar. Chaychöga Tayta Diosmi Israelcunata ima-aycapitapis chapanga.
30. Asiriata ushananpaj shamur TAYTA DIOSGA fiyupa manchariypaj munayniyoj busnintami wiyacächenga. Rabyashpanmi fiyupa castigangapaj räyuwan, löcu tamyawan, runtuwanpis ima-aycatapis ushacurcoj ninawannöraj.
31. Asiria nasyun runacunaga TAYTA DIOSPA busninta wiyar fiyupami mancharengapaj.
32. Asiriacunata Tayta Dios castigaynin-tupumi gamcuna cushicur tamburcunata, arpacunata tucashayquipis wiyacangapaj. Asiria runacunata TAYTA DIOSGA fiyupami castigangapaj.
33. Unaypita-pachanami Asiriacunapäwan rayninpäga Tofet particho camarisha caycan fiyupa ñacananpaj. Chaychöga altar caycan fiyupa jatuncaraymi. Yantapis aypallami shancaraycan. TAYTA DIOSGA juc pücayllawanmi sindirengapaj. Paypa shiminpitaga ratataycaj asufrimi llojshimonga.

Isaías 31:1-9
1. ¡Ay imanöraj canqui yanapänanpaj Egiptucunaman ruwacoj aywajcuna; Egipto runacunapa cawalluncunaman yäracojcuna; aypalla carrëtancuna cashanman yäracojcuna; cawalluta muntacurcur pillyajcunaman yäracojcuna! Paycunaga yarpayllapis manami yarpärinchu Israelcunapa Santo TAYTA DIOSNINMAN. Paymanga manami yäracunpischu.
2. Tayta Diosga fiyupa yarpaysapami. Chaymi musyan imanöpa disigrasyata chayachiytapis. Imano rurananpäpis nishantaga simrimi cumplin. Fiyu runacunataga castigangami. Mana allita rurajcunata yanapajcunatapis castigangami.
3. Egipto runacunaga runallami, manami dioscunachu. Cawalluncunapis aychallami, manami espirituchu. TAYTA DIOSGA paycunata castigangami. Chauraga yanapaj Egiptuwan, «yanapämay» nej cajpis mana allimanmi chayangapaj. Llapan iwalmi wañongapaj.
4. TAYTA DIOS nimaran: «Juc liyun uyshata wañuycachiptin, llapan uyshërucuna shuntacaycur manchachinanpaj gaparpaptinpis liyonga manami manchacunnachu. Chaynömi shamonga munayniyoj TAYTA DIOSGA Sión lömacho caycaj acrashan runacunata washänanpaj.
5. Imanömi äbi gueshwancho chipshan caycajta täpar jananpa tumapan, chaynömi Jerusalentaga munayniyoj TAYTA DIOS chapangapaj. Imapitapis ricanga, salbanga, washanga, libri cananpaj ima-aycapitapis jorgonga.»
6. Israelcuna, gamcunaga Tayta Diosta manami wiyacushcanquichu. Cananga paytana yapay wiyacuy ari.
7. Chay junäga jucha ruraj maquiquiwan quiquiquicunami goripitawan guellaypita rurashayqui ïdulucunata llapaniqui jitarinquipaj.
8. «Asiria runacunaga llapanmi sabliwan wañongapaj. Ichanga manami runacunapa espädanwanchu wañonga. Sinöga quiquëpa espädäwanmi ushacanga. Guërra captin chay runacunaga gueshpirmi aywacongapaj. Pillyay-yachaj mösucunatanami uywayman ticrachengapaj.
9. Paycunapa pacacunanpis manchariyllawanmi juchucäconga. Capitannincunapis bandërancunata cachaycur gueshpir aywaconga.» Chayno cananpäga TAYTA DIOSMI nisha. Payga chiquejcunata castigananpaj camarishanami caycächin Sioncho nina rataycajta, Jerusalenchöna rataycaj jurnïllata.

Isaías 32:1-20
1. Juc raymi cangapaj rasun cajllata rurar mandananpaj. Payta mandäshejcunapis alli cajllatami rurangapaj.
2. Raypis mandäshejcunapis cada-ünun cangapaj wayra chayananta chapajno, löcu wayrapita pacacunano, chaqui jircacunata pargunapaj sicyano, chaqui jircacho jatuncaray gagapa llantuyninno.
3. Chauraga ricaycajcunapa ñawincunapis sumajmi ricanga. Wiyajcunapa rinrincunapis sumajmi wiyanga.
4. Mana tantiyajcunapis llapantami alli tantiyanga. Gägucunapis mana ñacapacayllapa clärunami rimangapaj.
5. Fiyu runataga manami «alli runa» nenganachu. Engañacojcunatapis manami «rispitädu runa» nenganachu.
6. Fiyu runaga mana allillatami parlan. Yarpayninchöpis yarpaycan mana allita ruranallanpämi. TAYTA DIOS melanäcushancunatami ruran. TAYTA DIOSPÄGA llutancunatami riman. Pishipacojcunatapis manami yawaycachinchu. Yacunaycajtapis manami yacuta chagapaycunchu.
7. Engañacojcunaga yäracun engañayta yachashallanmanmi. Melanaypajcunata rurayllatami yarparaycan. Pobricunatapis llullapaypami llaquicachin. Alli arriglananta ashiycajcunatapis mana allimanmi churan.
8. Alli runami ichanga allillata ruran. Chaymi paytaga pipis rispitan.
9. Imapäpis mana yarpachacoj warmicuna canan nishäta sumaj wiyacuy. Imanöpis caycashallayquiman yarparajcuna canan nishäta sumaj tantiyacuy.
10. Gamcuna cananga mana yarpachacuypa goyarcaycanqui. Cananpita wata masllataga fiyupami llaquicunquipaj. Chaynöga canquipaj cosëchata mana shuntar. Yapayga manami übasta shuntanquipänachu.
11. Imapäpis mana yarpachacuypa goyaycajcuna, manchariywan sicsicyay. Imanöpis caycashallayquiman yarparajcuna llaquicuy. Jatiraycashayqui alli röpayquicunata lojticuy. Nircorga llaquicur jaticunayqui röpayquicunatana jaticuy.
12. Micuy alli wayunan chacracunapaj, übas alli wayunan chacracunapaj llaquicushpayqui pëchuyquita cutacuy.
13. Acrashä runacunapa chacrancunachöga wiñamonga cashawan jachacunallami shatayänanpaj. Cushicur goyashan wasincunachöpis wiñamonga cashawan jachacunallanami.
14. Palasyucho pipis manami tiyangachu. Aypalla runacuna tiyashan siudäpis chunyajmi ricacongapaj. Sumaj curalasha siudäcunatapis para-simrimi cachaycärengapaj. Chaura chaychöga chucaru bürrucunami cushisha tiyangapaj. Manshu uywacunatapis chaychömi michengapaj.
15. Chaynöga cangapaj janaj pachapita Espíritu noganchïman chayamunancamami. Chaura chunyaj chaqui jircapis ticrangapaj muruna chacramannami. Muruna chacracunachönami micuy fiyupa wayongapaj.
16. Nasyun intëruchöpis rasun cajtawan alli cajllatanami pï-maypis ruranga.
17. Chaura llapanpis alli goyayllana canga. Allillanami imaycamapis goyanga.
18. Acrashä runacunaga allillami tiyangapaj. Mana manchacuypa sigüru wasicunachömi tiyangapaj.
19. Munticunata runtu tamya ushariptinpis, siudäcuna juchuchir-ushasha captinpis
20. gamcunaga cushishami goyanquipaj. Murushayquicunata pargunayquipaj achca yacu canga. Guewapis mana pishiypami canga bürrucunapaj y wäcacunapaj.

Salmos 108:7-13
7. Tayta Dios Templuyquicho caycarmi aunimarayqui cayno nir: «¡Ima cushisharaj raquipäshaj Shequemta! ¡Ima cushisharaj partipäshaj Sucot pampatapis!
8. Galaadwan Manasesga nogapami. Efrainga acrashä runacunata chapänanpaj caycan umäta chapämaj cascönömi. Judäga caycan acrashä runacunata mandananpaj ray tiyananmi.
9. Moabga sirbimänanpaj carmi mayllacunä labaturyuno. Edomnami llanguëta purichej uywaynëno canga. ¡Filistea runacunata binsiycurnami cushicuypita gaparäshaj!» nir.
10. Ichanga ¿piraj pushamanman intërunpa curalasha caycaj siudäman? ¿Piraj pushar chayachimanman Edomcama?
11. Tayta Dios gamga nogacunapita witicurishcanquinami. ¡Cananga mananami suldäröcunapa ñaupanta aywanquinachu!
12. Yanapämay ari chiquimajcunata binsinäpaj. Runaga yangallami yanapämanpis.
13. Tayta Dios yanapämashaga binsishunmi. ¡Chiquimajninchïcunatapis paymi lluchcargärenga!

Proverbios 25:23-24
23. Norte caj-läpita wayra wayrämuptinmi tamya chayamun. Runapa fiyu shiminpitami jagayächinacur chiquinacuypis chayamun.
24. Alli jatun wasicho rimanacuyllata pillyallata ashiycaj warmiwan goyänanpa ruquenga mas allimi canman japallan chucllallacho tiyacuptinmi.

2 Corintios 11:16-33
16. Waquenga yarpan wichaypa uraypa parlaycashätami. Chayno yarparga mä wiyaycäramay löcunöpis alabacamunäta.
17. Ichanga quiquilläpitami löcunöpis alabacushaj; manami Tayta Dios cachamaptinchu.
18. Alabacojcunataga gamcuna sumajchaj wiyaparanqui. Chauraga nogatapis wiyamay ari parlamushäta.
19. Gamcunaga sumaj yachajmi canqui ¿au? Chaypis llutan yachachicojcuna alabacur willapäshushayquita cushishami wiyar awantanqui.
20. Imata suwapäshuptiquipis, engañashuptiquipis, mana runatano ricashuptiquipis, lajyashuptiquipis awantacunquimi.
21. Chay llutan yachachicojcunano ñacachiytaga manami awantämanchu. Paycuna alabacur yachachishushayquita chasquiycarga ¿imanirtaj noga nishäcunata mana chasquinquichu? Ichanga paycunano löcu-tucushpä alabacur pengacömi.
22. ¿Paycunaga hebreo castachu? Nogapis hebreo castami cä. ¿Israel castachu? Nogapis Israel castami cä. ¿Abrahampa castanchu? Nogapis Abrahampa castanmi cä.
23. ¿Jesucristupa sirbejninchu? ¡Quibä! Nogaga masrämi Jesucristuta sirbë. May-chaychöpis masmi willacushcä. Willacushäpita carsilchöpis mas achca cutimi wichgarashcä. Paycunapitaga masmi autoridäcuna astimasha. Achca cutimi wañuchimayta munamasha.
24. Israel autoridäcuna pichga cutimi astimasha quimsa chunca isgunnin maqui.
25. Quimsa cutimi Roma suldärucunapis fiyupa wirumasha. Juc cutinami runacuna sajmar cäsi wañuchimasha. Quimsa biyäjimi aywaycashä büquipis tallpucaran. Juc chacay juc junajmi lamar yacucho wampurä.
26. Jesucristupa alli willacuyninta willacurmi may-chaypapis purishcä. Achca cutimi mayupis cäsi apamasha. Suwacunapa maquinpitapis gueshpirämi. Israel runacunapis mana Israelcunapis wañuchimaytami munamasha. Marcachöpis, chunyajchöpis lamarchöpis cäsi-cäsimi wañushcä. Jesucristuman janan shongulla yäracojcunapis wañuchimaytami munamasha.
27. Mayman chayarpis sasa aruycunachömi arushcä. Achca cutimi yarpachacur puñuytapis mana tarishcächu. Yargaypitapis yacunaypitapis ñacashcä. Röpä llapshalla captin gasaypitapis ñacashcämi.
28. Jananmanpis waran-waranmi llapan ermänucunapaj fiyupa yarpachacö.
29. Juc ermänu ñacaptenga fiyupami llaquicö. Juchaman chayachejpäga fiyupami rabyä.
30. Chaypis alabacorga alabacushaj quiquilläpitaga imatapis rurayta mana puydishäpitami.
31. Taytanchi Jesucristupa taytan Diosmi musyan rasun cajllata niycashäta. Paylla imaypis alabasha cachun.
32. Damascuchömi ray Aretaspa gobernadornin suldärucunata churaran marca puncupa llojshiptë prësu charimänanpaj.
33. Prësu charimänanpaj caycaptinmi ermänucunaga canastaman wiñarcur wajtaman warcuypa urächimaran. Chaynöpami Tayta Dios yanapämaran gueshpinäpaj.