A A A A A
Biblia en un año
Septiembre 2

Cantares 3:1-11
1. Cämächo chacaycuna ashirë cuyaynëta. May-jina ashirpis manami tarëchu.
2. Chaymi jatarcur siudä intërupa aywä cuyaynëta ashej. Cällicunapapis läsacunapapis ashë. May-jina ashirpis manami tarëchu.
3. Siudäta täpaycaj runacunata tapucö «¿Manachu gamcuna ricashcanqui cuyaynëta?» nir.
4. Tapucushäpita aywaycashallächönami cuyaynëtaga tarircö. Nircorga maquipita janchacurcur mana cachaypa pushä mamäpa wasinman.
5. Munti lluychucuna-raycu, tarushcuna-raycu aunimay ari Jerusalén jipashcuna cuyaynë puñucuycajta mana ricchachinayquipaj. Puñucuchun puñuyta sacsashanyaj.
6. ¿Imaraj goshtay ichiraycajno chunyajpita aywaycämöga? ¿Imataj aywaycämun mira perfümiwan insinsuwan cupacusha, cuyayllapaj alli asyaj perfümicunawan cupacusha?
7. ¡Chayga Salomonpa andasninchaj! Sojta chunca (60) suldärucunapa chaupillantami aywaycämun. Chay suldärucuna Israelchöga caycan jinyunnin cajcunallami.
8. Jinachöpis pillyay yachajcunallami. Llapanpis paycunaga sabliwan fiyupami pillyayta yachan. Paycunaga sablinta chegllancho jatishalla purichin chacaypa imapis captenga juclla pillyananpaj.
9. Ray Salomonga andasninta rurachicurcusha Libanucho caj allinnin guerucunapitami.
10. Ichirajnincunaga guellaypitami caycan. Jamaraptin wajtanta tucnananmi goripita caycan. Quiquin jamananna murädu tëlawan cuyayllapaj jirasha caycan. Rurinnami caycan Jerusalén warmicuna cuyar fiyupa cuyayllapäta burdashan.
11. Sión warmicuna, llojshimuy ray Salomonta ricanayquipaj. Maman cuyayllapaj corönata majachacänanpaj rurapashantami jatiraycan. Chay corönataga ruraparan mas cushisha-canan junajpämi.

Cantares 4:1-16
1. Cuyaynë, fiyupa cuyayllapämi canqui. Rasunpami cuyayllapaj canqui. Shucutacushayqui rurincho ñawiquicunaga caycan ishcay palumanömi. Ajchayquicunapis aypalla cabra-mallwacuna Galaad jircacunapa pañar purejnörämi caycan.
2. Quiruyquicunapis llapan cuyayllapaj yurajllami carcaycan. Chayga caycan bäñashanpita uyshacuna fïlayllanpa chayraj llojshirishano; rutunanpaj alli caycajnöna. Llapanpis mana pishiypa iwal-llami caycan.
3. Shimi wirpayquicunapis puca jïlunörämi caycan. Parlacuyniquega maysi wiyacuyllami. Shucutarashayqui rurincho cärayquicunaga caycan granadata pullanpa partirishanömi.
4. Cuncayquega cuyayllapaj caycan David rurachishan cuyayllapaj törrinörämi. Chay törrichöga waranganpami jinyu suldärucunapa chapacuna escüdun waguiraycan.
5. Ishcan chuchuyquicunaga caycan millish lluychucuna liryu waytacunapa chaupincho micuycajnöraj.
6. Manaraj pacha warashanyaj, manaraj intipis yagamushanyaj aywashaj mïrra perfümi cashan jircaman, insinsu cashan pataman.
7. ¡Cuyaynë, gamga cuyayllapämi canqui! ¡Chaquipita umacama camaraj cuyayllapämi canqui!
8. Majallä, aywacushun. Líbano puntapita uräcushun. Puntacunapita uräshun. Liyuncuna tiyanan machaycunapita aywacushun. Tigricuna tiyanan puntacunapitapis uräcushun.
9. Cuyaynë, majallä, shongötami pasaypa turwatächishcanqui. Gam ricäramaptillayquimi, wallgayquicho caycaj culur jïlullawanmi shongö pasaypa cuyacurcushurayqui.
10. Cuyaynë, majallä, cuyamashayquega shongöcamarämi chayaycun. Cuyamashayquega mishquej bïnupitapis mas allimi caycan. Perfümiwan pichucushayquipis llapan perfümicunapita mas cuyayllapämi asyan.
11. Cuyaynë, shimi wirpayquega mishquinörämi. Muchacuyniquipis lëchiwan mishqui caycajnörämi. Röpayquipis Libanucho caycaj muntipa asyayninnörämi cuyayllapaj asyan.
12. Cuyayllä, majallä, gam caycanqui intërunpa guenchasha wertano, ushajpaj chapasha yacu pösuno, pashtaj yacuta lläbishano.
13. Frütayoj wertanömi gamga canqui. Chay wertachömi caycan: mishquej granada,
14. nardo, azafrán, cuyayllapaj asyaj läbo-olor, canëla; tucuy casta insinsu yöracuna.
15. Werta chaupincho pashtaycaj pucyumi canqui. Yacu pashtaycämushan pösumi canqui. Libanupita uraycaj yacumi canqui.
16. Wichaypa aywaj wayra, sumaj wayrämuy. Uraypa aywaj wayra, shamuy cayman. Wertäman wayrämushpayqui cuyayllapaj asyayninta cuyaynë cajman mashtacächiy. Chayrämi cuyaynëga wertanman shamonga. Chaycho frütacunapa mishquej wayuyninta miconga.

Salmos 104:10-23
10. Tayta Dios, Gammi camacächinqui jircacunapita yacu urämunanpaj. Chay yacucunanami mayuman chayan.
11. Chay yacutanami upun chucaru animalcunapis. Chay yacuwannami yacunayninta chawächin jirca bürrucunapis.
12. Mayucunapa cantunchömi äbicunapis gueshtanta ruran. Chaychönami yöracunapa rämancunacho cantan.
13. Gammi llapan jircacunatapis tamyachimuypa pargunqui syëlucho wasiqui caycashanpita. Gam tamyachimushayquiwanmi allpapis ushman.
14. Uywacuna micunanpaj guewapis wiñamun. Runa murushancunatapis wiñachimunqui allpa wayuchiptin runa micunanpaj.
15. Chay micuywanmi runapaga callpan yurin. Bïnunami runataga cushicachin. Asëti achca captinmi cärancunapis llushwaypa-llushwan.
16. Libanuman sedrucunata TAYTA DIOS lantashan guerucunapäpis yacuga manami pishinchu.
17. Chaycunachöga llapan casta äbicunami gueshtanta ruran. Pino yöracunachönami tiyan cigüeña äbicuna.
18. Altu jircacunachömi tiyan jacha cabracuna. Gagacunachönami tiyan wishcashcuna.
19. Quillatami rurashcanqui cada ushaynin juc quilla cashanta musyanapaj. Intiga musyanmi imay öra yagacunantapis.
20. Inti yagacurcuptenga chacacäcunmi. Chauraga munti animalcunapis llojshipäcamunna.
21. Liyuncunapis yargashpan gaparpan. Tayta Diosta mañacun micuyta tarichinanpaj.
22. Inti ratarcamuptinnami ichanga machaynincunaman cutiycur puñucaycärin.
23. Chauraga runacunanami aroj llojshipäcun. Nircur arun pacha tardiyänancama.

Proverbios 24:17-18
17. Chiquishojcuna mana alliman chayashpan ñacaycho caycaptenga ama cushicuychu ni asipaypischu.
18. Chayno runa rurashanga TAYTA DIOSTA manami gustanchu. Cushipaptiquega fiyu runata castigaycashanpita manami castiganganachu.

1 Corintios 12:1-31
1. Ermänucuna, cananga Espíritu Santu yachaycunata gomashanchïpitanami willapäshayqui.
2. Musyashayquinöpis Jesucristuta manaraj chasquicur gamcunaga mana tantiyacur waquin runacunanömi ïdulucunata adurar goyarcaycanqui.
3. Chaymi sumaj tantiyacunayquita munä. Espíritu Santupa munaynincho caycarga pipis manami «Jesucristo maldisyunädu cachun» ninchu. «Jesucristo taytanchïmi» nerga Espíritu Santupa munayninwanmi rimaycan.
4. Runa ima ruraytapis yachananpäga tucuymi caycan. Ichanga ima ruraytapis yachananpaj Espíritu Santullami churan.
5. Tucuynöpami Tayta Diosninchïta sirbishwan. Ichanga imano sirbinanchïpäpis Tayta Jesucristullami churan.
6. Tucuytami rurayta yachanchi. Ichanga pï-maytapis yachayta göga caycan munayniyoj Tayta Diosnillanchïmi.
7. Cada ünunchïtami Espíritu Santu juc yachayta-cama gomanchi yanapänacunanchïpaj.
8. Waquintami Espíritu Santu yachayta gon tantiyacajta parlananpaj. Waquintana chay Espíritu Santulla yachayta gon yachacurcur waquintapis sumaj yachachinanpaj.
9. Waquinpis Espíritu Santupita yachayta chasquin Tayta Diosman sumaj yäracunanpaj. Waquintana chay Espíritu Santulla churan gueshyaycajcunata allchacächinanpaj.
10. Waquintana churan milagrucunata rurananpaj. Waquinna yachayta chasquin Tayta Dios tantiyachishancunata rimananpaj. Waquinpis Espíritu Santupita yachayta chasquin pipis llutanta u rasun cajta yachaycächishanta tantiyananpaj. Waquinna yachayta chasquin mana yachashan rimaycunacho willacunanpaj. Waquinna yachayta chasquin juc rimaycho willacushancunata rimaynincho tantiyachinanpaj.
11. Chay llapan yachaycunatapis juc Espíritu Santullami gomanchi. Quiquin Espíritu Santu munashannömi ima rurayta yachananpäpis cada-ünunman churan.
12. Sumaj tantiyacushun. Runaga cuerpun achca parti captinpis jucnayllami caycan. Tayta Jesucristupa maquincho goyaj ermänucunapis achcaj carpis juc cuerpunöllami caycanchi.
13. Bautisacojnömi Espíritu Santuta chasquishcanchi juc cuerpunölla cananchïpaj. Chaymi Jesucristupa cuerpun caycanchi Israel carpis o mana Israel carpis, uyway carpis o mana uyway carpis. Cada ünunchïtapis Tayta Diosga chay Espíritu Santullatami gomashcanchi.
14. Cuerpuga manami juc partillachu. Achca partirämi tananacusha caycan.
15. Chaquipis «Mana maqui carga manami cuerpupachu cä» nirpis manami cuerpupitaga llojshinchu.
16. Rinripis «Mana ñawi carga manami cuerpupachu cä» nirpis manami cuerpupitaga llojshinchu.
17. Cuerpunchi ñawilla captenga ¿imawanraj wiyashwan? Cuerpunchi rinrilla captenga ¿imawanraj asyaytapis mayashwan?
18. Ichanga Tayta Diosninchïmi cuerpunchïcho cada particunata camacächisha paypaj mayninchöpis alli cashanman.
19. Ushajpaj juc partilla captenga manami cuerpuchu canman.
20. Achca parti carpis rasunpaga juc cuerpullami caycan.
21. Manami ñawinchïpis maquinchïta ninmanchu «Manami gamta nistächu.» Umanchïpis chaquinchïta manami ninmanchu «Manami gamta nistächu.»
22. Chaypa ruquenga cuerpunchïcho mas pishi töpay caj partitami mas nistanchi.
23. Mana cäsupashanchi cuerpunchïtaga ¿manachu mas alli röpawan chapanchi? Cuerpunchïcho mana ricachicushanchi partitapis ¿manachu sumaj cuydanchi?
24. Alayri ricacaj cuerpunchïta ichanga mana chaynöga chapanchïchu. Ichanga Tayta Diosninchi cuerpunchïta rurar juc parti mana bälej-niraj captinpis alli ricanapämi churasha.
25. Chayno Tayta Diosga churasha cuerpucho jucninpis-jucninpis yanapänacunanpämi; manami raquicänanpächu.
26. Juc parti cuerpunchi nanaptenga intërunchïmi mana alli ricacun. Cuerpunchïcho maygan partitapis alli ricashaga chay partiwan llapan partimi cushicun.
27. Gamcunaga Jesucristupa cuerpunnömi caycanqui. Cada ünuyquinami juc partino caycanqui.
28. Tayta Diosninchi camacächisha yäracojcunacho rimëruga apostulcuna cananpaj, chaypita profëtacuna cananpaj, nircur yachachicojcuna cananpaj. Waquintana churasha milagrucunata rurananpaj, waquintana gueshyajcunata allchacächinanpaj, waquintana pobricunata yanapänanpaj, waquintana tantiyachicoj cananpaj, waquintana mana yachashan rimaycunata rimananpaj.
29. Manami llapanchu apóstol. Manami llapanchu profëta. Manami llapanchu yachachicoj. Manami llapanchu milagrucunatapis ruran.
30. Manami llapanchu gueshyajcunatapis allchacächin. Manami llapanchu juc rimaycunata riman. Chay rimaycunata rimashantapis manami llapanchu tantiyan.
31. Chaypis gamcunaga mas alli caj yachaycunata Tayta Diosta mañacunquiman. Cananga mas alli cajman chayanayquipämi willapäshayqui.