A A A A A
Biblia en un año
Agosto 22

Job 35:1-16
1. Elihú sïguir niycaran:
2. «Job, gamga Diosta ‹juchaynajmi cä› nishcanqui. Chayno nerga ¿allitachuraj nishcanqui?
3. Mastapis tapushcanqui: ‹¿Imatataj gocushunqui juchata ruraptëpis? ¿Imatataj chasquë juchata mana rurasha carpis?› Chayno nerga ¿allitachuraj nishcanqui?
4. Cananmi gamtapis amïguyquicunatapis noga nishayqui.
5. Masqui syëluta ricäriy. Pucutayta ricärirpis masqui tantiyacuy ari. Chay pucutayga gampita may altuchöshi caycan.
6. Juchata ruraptiquipis Diospäga manami imananpischu. Maychica juchayqui captinpis Diostaga manami imananpischu.
7. Allita ruraptiquipis paytaga manami imatapis gonquichu. Paypäga manami ima allitapis ruranquichu.
8. Mana allita rurashanpis quiquin runallatami chayan. Allita rurashanpis quiquin runallapämi alli.
9. «Imapis päsaptinrämi runacunaga yarpachacur gaparpan. Munayniyojcunapa maquinpita pillapis salbananpaj ruwacun.
10. Chayno caycarpis camamajninchi Tayta Diostaga manami yarpanchu. Paymi chacaycunapapis cushicachimashpanchi cantachimanchi.
11. Uywacunapitapis mas yachaj cananchïpaj paymi yachachimanchi. Paymi äbicunapitapis mas yarpaysapa cananchïpaj tantiyachimanchi.
12. Ñacar gaparpaptinpis Diosga manami yanapanchu alli runapita ushasha purej fiyu runacuna captin.
13. Munayniyoj Tayta Diosga manami cäsupanchu mana cumbënejcunata mañacushanta.
14. «Tayta Diosta ‹Gamta manami ricächu› nishpayquipis shuyaycuy ari. Paypa maquinchömi caycanqui arriglashunayquipäga.
15. Gamga ninqui ‹Diosga manami rabyacunchu ni castigacunpischu, ima juchata rurashanchïtapis manami cäsupanchu› nir.
16. Job, gamga niycanqui manacajcunatami. Mana tantiyacurmi wichaypa uraypa rimaycanqui.»

Job 36:1-33
1. Elihú jinalla willapaycaran:
2. «Ichicllata shuyaycuy. Noganami willapar yachachishayqui. Tayta Diospa faburnin rimanäpäga achcarämi caycan.
3. Yachashätaga llapantami willapäshayqui. Camamajninchi rasun cajta rurashantami musyachishayqui.
4. Manami imatapis llullacuypaga nishayquichu. Nogaga rasunpa yachaj runami cä.
5. «Diosga fiyupa munayniyojmi; fiyupa yachajmi. Juchaynajcunataga manami castiganchu.
6. Fiyu runacunataga wallca diyallami cawachin. Ñacaycajcunatami ichanga alli yanapan.
7. Allillata ruraj runacunataga imapitapis simrimi chapan. Raycunawan goturänanpärämi camacächin. Paycunataga yanapan allilla mandananpämi.
8. Capaschari alli runacunaga cadinacunawan wataranman. Capaschari nanaywan ñacanman.
9. Chaura Diosga musyachin ima mana allita rurashancunatapis alli runapita ushasha cashantapis.
10. Chay runata corrijishpan willapan. Juchata ruraycashanta cachaycunanpaj willapan.
11. Diosta wiyacur cumlishpanga imaypis cawashanyäga cushisha allilla goyan.
12. Mana wiyacushpanmi ichanga wañun. Manaräpis imatapis yachallar wañun.
13. Fiyu runacunami ichanga ñacarpis fiyupa rabyan. Tayta Dios cadinarächiptinpis manami mañacunchu yanapänanpäpis.
14. Manaraj edäman chayallarmi wañun. Fiyupa cuyapaypämi wañun.
15. Ñacachir-rämi Tayta Diosga runata tantiyachin. Chayno ñacachiyparämi Diosga salban.
16. «Gamtapis salbaycäshunqui fiyupa ñacaycajta, alli pachaman chayachishunayquipaj, jauca goyächishunayquipaj, alli micuycunata tarichishunayquipaj.
17. Fiyu runacunata castïgu chayashallanpämi gamga yarpachacuycanqui. Ichanga jusgar castigashuptiqui manami imanöpapis chapacunquipächu.
18. Rabyashpayqui Tayta Diosta manacajman churargunquiman. Manacajman churar-imarga manami ima-aycata gorpis salbacunquipächu.
19. Ñacar llaquicuycashayqui öraga may-jina gaparaptiquipis may-jina alliyayta munaptiquipis yanganami canga.
20. Pacha chacänanta ama munaychu. Chacaychöga runacunata tucuy mana allicunami päsan.
21. Imano ñacay cashantapis musyaycashpayquinaga yapayga mana allicunata ama ruraynachu.
22. «Sumaj tantiyacuy Dios fiyupa munayniyoj cashanta. Paymanga manami pï yachachicojpis tincunchu.
23. Paytaga imata rurananpäpis manami pipis ninchu. Ni pipis manami ‹Mana allitami rurashcanqui› ninchu.
24. Pay camashantaga llapan runami alaban. Gampis alabaytaga ama gongaycuychu.
25. Llapan runami Tayta Dios rurashantaga rican. Carullapitapis ricanmi.
26. Diosga fiyupa munayniyojmi. Noganchëga manami imanöpa tantiyaytapis atipanchïchu. Ni manami musyanchïchu ayca watayoj cashantapis.
27. Paymi yacuta jutuy-jutuylla juc pachaman shuntacächin. Nircur tamyamanna ticrachin.
28. Tamyaga pucutaycunapitami shicwaycämun. Nircur cay pachamanga achca yacu machiypana chayamun.
29. ¿Pitaj tantiyan pucutaycuna imano aywashantapis, räyucuna syëlucho imanir junrurushantapis?
30. Diosmi intëru lamar jananpa illguyta achicyächin. Chayno achicyachishpan lamarpa rurintapis ricacächin.
31. Chaycunawanmi runacunatapis castigan. Tamyawanpis aypalla micuycunatapis shuntachin.
32. Räyutapis chararan. Chaura räyuga imapis mana cashallanmanna chayan. Tayta Dios munashallanman maymanpis chayan.
33. Tayta Diosga räyuchimur musyachimanchi rabyaycashantami. Chaynöpami musyachimanchi juchasapacunapaj rabyaycashanta.

Salmos 99:1-9
1. TAYTA DIOSMI rasunpa rayga. Llapan nasyun runacunapis sicsicyachun. Paypaga jamananpis caycan querubín anjilcuna caycashanchömi. Intëru cay pachapis sicsicyachun.
2. Sionchöga TAYTA DIOS fiyupa munayniyojmi. Tayta Diosga cay pachacho caj marcacunata llapantami munaynincho chararaycan.
3. Manchacuypaj, jatun munayniyoj Tayta Diosta alabay-llapa. ¡Tayta Diosga pasaypa santumi!
4. Gammi munayniyoj ray canqui Tayta Dios. Allita ruraj cajta cuyanqui. Gammi camacächishcanqui llapanpis iwal cananpaj. Israel runacuna caycashanchöga gammi alli cajta rasun cajta rurashcanqui.
5. ¡TAYTA DIOSNINCHÏTA alabay-llapa! ¡Paypa ñaupanman llapaniqui gongurpacuy! ¡Tayta Diosga santumi!
6. Aaronwan Moisés cürancuna caran. Samuelnami caran Tayta Diosta mañacoj. Paycuna mañacuptin TAYTA DIOSNAMI yanapaj.
7. Paycunatami Tayta Diosga willaparan pucutay ichiraycajpita. Paycunanami cumliran imata rurananpäpis willapashancunata. Laynincunatapis sumaj yachacuran.
8. TAYTA DIOS paycunataga mañacushuptiqui gam wiyarayquimi. Paycunata perdunaj Diosmi carayqui. Mana allita rurajcunatami ichanga castigarayqui.
9. ¡TAYTA DIOSNINCHÏTA alabay-llapa! ¡Paypa rispitädu jirca puntancho gongurpacuy-llapa! ¡TAYTA DIOSGA pasaypa santumi!

Proverbios 23:22-25
22. Taytayquita wiyacunqui. Mamayqui chacwanyaptin rispitanqui.
23. Alli tantiyaj yachaj caytaga imanöpapis yachacuy. Yachaj cayta, tantiyaj cayta imanöpapis ashiy. Chay tarishayquitaga ama imawanpis rucachiychu.
24. Alli yarpayniyoj, yachaj wamrapa taytanga «wamrä alli yachan» nir fiyupami cushiconga.
25. Gamga mamayquita taytayquita cushicachiy. «Wamrä alli yachajmi» nir cushisha goyächun.

1 Corintios 4:1-21
1. Ermänucuna, gamcuna musyanquiman nogacunaga Jesucristuta sirbejlla cashäta. Chaymi nogacunaga pipis mana musyashanta Tayta Diosninchi musyachimashancunata yachachinäpaj caycä.
2. Imatapis rurananpaj churaptin alli sirbëga yäracuypaj cashantami musyachin.
3. Nogaga musyaycänami ima rurashallätapis gamcuna tapucachaycashayquita. Ichanga noga manami manchacöchu gamcuna o juez jusgamänanpaj captinpis. Quiquëpis manami musyächu allita u llutanta ruraycashätapis.
4. Nogaga ima mana allitapis manami rurashcächu. Ichanga manami «juchaynaj cä» nëmanchu. Tayta Diosmi juchayoj o juchaynaj cashätapis jusgamanga.
5. Chaymi manaräpis timpu chayamuptenga ama pitapis jusgaychu. Tayta Jesucristo shamurnami llapanta jusganga. Paynami runa mana alli rurayta munashancunata y rurashancuna pacaraycajta y ima yarpashantapis jorgapanga. Chaychörämi imanöpis rurashanpita Tayta Diosninchi cada runata premyuta gonga.
6. Ermänucuna, gamcuna sumaj tantiyacunayquipämi Apolospäwan nogapaj parlashcä. Chayno në Tayta Diosninchïpa palabrancho nishanno pipis alli-tucur waquinta manacajpa mana ricananpämi.
7. Gamtaga ¿pitaj waquinpita mas alli cashayquita nishurayqui? ¿Llapan yachashayquitapis manachu Tayta Diospita chasquishcanqui? Chayno chasquisha caycarga ¿imanirtaj yarpaycanqui yachaj cashayqui quiquillayquipita cashanta?
8. Rïcunöpis ima-aycayojnöpis yachajnami carcaycanqui ¿au? Gamcuna yachaj car nogacuna mana caycaptëpis raycunanöna caycanqui ¿au? Ojalä rasunpa gamcuna raycunana caycanquiman nogacunapis mandäshinäpaj.
9. Ichanga niprësi apostulcunata Tayta Diosninchi churamasha llapanpitapis mas ñacanäpaj. Mana allita ruraj runatanöpis nogacunataga wañuchimayllatami munaman. Chayno ñacashätaga llapan runacunapis anjilcunapis ricaycämanmi.
10. Jesucristupitami nogacunataga upatano ricaman. Gamcuna ichanga Jesucristupitami yachaj runacuna caycanqui. Nogacunataga manacajtanömi ricaman. Gamcuna ichanga imatapis puydejno caycanqui. Gamcunataga allimi ricashunqui. Nogacunata ichanga mana alli ricaman.
11. Canancamapis nogacunaga ñacaycämi yargar, yacunar. Rucacunäpaj röpäpis manami canchu. Magar-ushasha puriycäcuna. Manami maycho tiyanäpäpis canchu.
12. Nistashäcunatapis uticashäcama arur-rämi tarë. Runacuna ashllimaptinpis nogacunaga Diostami mañacö bindisyunta gonanpaj. Chiquimaptinpis gaticachämaptinpis awantacömi.
13. Lebantamaptinpis nogacunaga alli shimilläpami cutichë. Pasaypa mana bälejtano y manacajtanömi ricaman. Canancamapis chaynöllami ricaycäman.
14. Cayno gamcunata niycä manami pengayman churanäpächu, chaypa ruquenga wamrätano piñacurmi. Gamcunaga cuyay wamränömi caycanqui.
15. Chunca waranga yachachishojniqui captinpis primëru jucnayllami willapäshurayqui Jesucristuta chasquicunayquipaj. Chay willapäshojniquega nogami caycä. Chaymi gamcunapa taytayquino caycä.
16. Chaymi gamcunata shacyächë noga cawashäno gamcunapis cawanayquipaj.
17. Gamcuna cajcho imano goyashätapis yarpächishunayquipämi Timoteota cachamushaj. Payga cuyay wamränömi caycan. May-chaychöpis yachachishäno gamcunatapis alli yachachishunquipaj.
18. Waquinniquega mana cutimunäta yarparshi alli-tucur conträ jatarishcanqui.
19. Chayno caycaptiquipis Tayta Diosninchi munaptenga cutimushämi watucoj. Chaychönami mayamanga chay alli-tucojcuna. Paycunaga mä rasunpachush Tayta Diospa munayninwan rurarcaycan u quiquillanpitachush rimarcaycan.
20. Tayta Diospa maquincho cawayga manami yachaj-tucur rimaychu, chaypa ruquenga Espíritu Santupa munayninwan ruraymi.
21. Gamcunaga ¿imano chayamunätataj munanqui? ¿Ollgusha chayamunätachu u cushisha chayamunätachu?