A A A A A
Biblia en un año
Agosto 21

Job 33:1-33
1. «Chaymi Job, cananga imata nishäcunatapis sumaj wiyamay. Imata nishätapis sumaj tantiyacuy.
2. Gamta cutichinäpäga shimi puncullächönami caycan.
3. Rasun cajtami parlamushaj. Mana pacaypami yarpaycashätaga nishayqui.
4. Chayno canäpämi munayniyoj Tayta Dios ruramasha. Nircur cawayta gomasha.
5. Puydishpayquega nishäta mä cutichimanqui. Tapunäpaj sumaj camaricuy.
6. Gampis nogapis Diospa ñaupanchöga iwalmi caycanchi. Nogapis mitullapitami caycä.
7. Chayno caycaptëga ama manchacamaychu. Nishäcunaga manami lasäshunquipächu.
8. «Gamga manacajcunatami rimashcanqui. Niprësi caynöpis nishcanqui:
9. ‹Nogaga juchaynaj limyu runami cä. Ima mana allitapis ni juchatapis manami rurashcächu.
10. Diosga mayacachaycanmi imapita castigamänanpäpis. Nogataga ricaycäman contran runatanömi.
11. Chaquëcunapitapis cadinawanmi watarcamasha. Nircur imallata rurashätapis ricapaycäman› nir.
12. «Gam chayno rimashayquega manami rasunpachu. Diosga llapan runacunapitapis mas munayniyojmi.
13. ¿Imanirtaj Tayta Dioswan churacayta munanqui? Diosga imata rurashancunatapis manami pitapis willapanchu.
14. Diosga tucuynöpami willapämanchi. Ichanga noganchi mana cuentata gocunchïchu.
15. Aybësiga willapämanchi suyñuyninchïcho cämacho puñucasha caycashanchi öra. Chacaypapis ricapacachimanchi.
16. Diosga runacunapa rinrillanchömi willapan. Piñacun. Mancharachin.
17. Chaynöga ruran mana allita ruraycashanta cachaycunanpaj, manana alli-tucoj cananpaj.
18. Chaynöpami timpullancho caycällar wañunanpita salban. Mala-muertipa wañunanpitapis salban.
19. Aybësi Diosga runacunata piñacun gueshyacunawan gueshyachir, intëru cuerpuncunata nanächir.
20. Chauraga mas allinnin mishquej micuycunapis mana micuypänönami ricacun.
21. Gueshyaptin aychancunapis ismur shicwan. Chaura tulluncunapis alayrina ricacan.
22. Quiquinpis sepultüramanna watgaraycan; wañuypis jananchöna caycan.
23. «Ichanga chay runapa ñaupancho juc anjil caycashpan, warangapita jucnayllapis paypa faburnin car alli ruraj cashanta rimarcuptin,
24. chay anjil cuyapashpan ‹Wañunanpita salbaycuy. Ruquintami noga tarishcä› niptin ichanga
25. chay runaga gueshyaycashanpita allchacangami. Mösu cashannömi cangapaj.
26. Chauraga mañacuptin Tayta Diospis yanapangami. Cushicushpanmi Dioswan ricanaconga. Diosga runata alli cashanmanmi cutichenga.
27. Chayrämi runa nenga: ‹Juchatami rurashcä, mana allicunatami rurashcä. Chaypis Tayta Diosga manami castigamashachu.
28. Chaypa ruquenga wañunäpitami salbamasha. Chaymi achicyaj pachataraj ricaycä› nir.
29. «Diosga chaynömi runata yaparir-yaparir ruran.
30. Wañunanpita salban. Nircur camacächin achicyaj pachata ricaycänanpaj.
31. Wiyamashpayqui sumaj tantiyacuy ari Job. Noga rimamushäcamaga upällalla cacuy.
32. Cutichimayta munashpayquega rimamuy ari. Rasun cajta nimaptiquega noga allimi wiyashayqui.
33. Imapis cutichimänayquipaj mana captenga upällalla wiyamay. Nogami yachachishayqui imano yachaj caytapis.»

Job 34:1-37
1. Elihú sïguir niycaran:
2. «Noga nishäta wiyamay musyaj yachajcuna.
3. Rinrinchi wiyaptenga pï imata parlaycashantapis rejsinchïmi. Gallunchïpis ima micuy cashantapis mayanmi.
4. Chayno, noganchïpis tantiyacushun. Nircur nishun maygan alli cashantapis.
5. Jobga nin: ‹Nogaga juchaynaj runami cä. Chaypis Diosga manami alliga arriglamanchu.
6. Llullacuycämanmi «juchayojmi cä» nishpäga. Guerëcunaga manami allchacanchu, juchaynaj caycaptëpis› nir.
7. «¡Jobnöga manami pipis canchu! Payga yacuta upojnöllami Tayta Diosta manacajman churarin.
8. Payga munan mana allita rurajcunawan goturayllata, mana alli runacunawan iwal puriyllata.
9. Payga nin ‹Dios munashanno allita rurashpanchïpis runaga manami imatapis chasquinchïchu› nir.
10. «Ichanga musyaj yachaj runacuna sumaj wiyamay. ¡Yarpayllapis ama yarpäshunchu munayniyoj Tayta Diospäga ‹mana allitami ruran› u ‹llutantami ruran› nerga!
11. Payga cada runatami cutichin imanöpis rurashanpita. Cada runami imata rurashanpitapis chasquin.
12. Rasunpami munayniyoj Tayta Diosga imatapis mana allita mana ruranchu, ni llutantapis mana ruranchu.
13. Diosga intëru munduta mandananpaj mandaj cayta manami pipitapis chasquishachu.
14. Tayta Dios munar jämayninta, espiritunta runapita shuntacurcuptenga
15. llapan runami wañunman. Nircur cashgan allpamannami ticranman.
16. «Job, imatapis tantiyaj cashpayquega sumaj wiyamay. Nishäcunata sumaj wiyay.
17. Alli cajta chiquishpanga Dios manami mandanmanchu. ¿Imanirtaj gamga juchaynaj Diospaj parlanqui juchayojpänöpis?
18. Raycuna, rispitädu runacuna fiyu captenga quiquincunamanmi Diosga ayñita cutichin.
19. Payga manami mandajcunapa faburninchu. Pobricunata cachaycorga manami rïcucunata yanapanchu. Paymi llapan runacunatapis rurasha.
20. Runacunaga illajpitami wañucäcun. Chacaychönami mancharishpan sicsicyan; nircorga illaraycanna. Munayniyojcunaga manami runacunapa callpanwanchu illgan.
21. Diosga ricaycanmi runacuna imallata rurashantapis. Musyaycanmi imano cawashallantapis.
22. Mana allita rurajcunataga yanauyaycaj chacajpis manami pacanchu.
23. Diosga runata manami willanchu arriglananpaj pay cajman aywananpaj.
24. Manami musyacachänanräpischu munayniyojcunata jitarinanpaj, chayman juctana ruquin churananpäpis.
25. Tayta Diosga pï rurashantapis musyaycanmi. Pacha chacarcuptin chayar illgarachinmi.
26. Fiyu runacunatanömi llapan ricaycaptin castigan.
27. Castigan mana wiyacuyta munajcunata, imano rurananpaj nishantapis mana cumlejcunata.
28. Chay fiyu runacuna ñacachiptinmi pobricunaga Tayta Diosta mañacuran. Chaura Tayta Diosnami wiyaran.
29. Dios mana rimacuptenga ¿piraj payta jitapanman? Dios ticracurcuptin runaga ¿imataraj ruranman? Paymi ricaycan marcacunatawan runacunatapis,
30. fiyu runacuna llullapaypa marcata mana mandananpaj.
31. «¿Gamga Diosta willashcanquichu: ‹Juchatami rurashcä. Cananpitaga manami juchata rurashänachu› nir?
32. ¿Nishcanquichu: ‹Mana musyaynëpa jucha rurashäcunata musyachimay. Mana allita rurasha carga yapayga manami rurashänachu› nir?
33. Diosta manacajman churasha caycaptiquipis ¿gam munashayquinöchuraj Tayta Diosga cutichishunqui? Chaytaga gammi acranayqui, manami nogachu. Mä gam nimay ari musyashayquita.
34. «Musyaj yachaj runacunapis, yachaj runacunapis wiyamaj cäga nenga:
35. ‹Jobga parlaycan manapis tantiyaycarmi. Pay rimashanga caycan manacajcunallami,› nir.
36. Payga rimaycan mana alli runacunanöllami. ¡Chaymi Jobpäga sumaj mayacachäshun!
37. Jobga manami juchallatachu ruraycan. Jananmanpis mana wiyacojmi. Noganchi wiyaycashapis Diostaga manacajman churaycan. Jananmanpis Diospa contran parlan.»

Salmos 98:4-9
4. Cay pachacho tiyajcunaga cushicushpayqui llapayqui TAYTA DIOSTA alabay. Cushicushpayqui llapan shonguyquiwan alabay.
5. TAYTA DIOSTA alabay arpa wagashanwan, waquin caj cuerdayoj instrumentucuna wagashanwan.
6. TAYTA DIOS Ray captin ñaupancho cushisha cantar alabay trompëtacuna y tucana wagracuna wagashanwan.
7. Lamar yacupis, lamarcho caycajcunapis, mundupis, munducho caycajcunapis gaparpächun.
8. Cushicuypita mayucunapis gaparpächun. Jircacunapis cushicuypita gaparpächun.
9. Shaycämoj TAYTA DIOSPA ñaupancho cantay-llapa. Tayta Diosga llapan runacunata jusgananpämi shaycämun. Payga llapantapis iwalmi arriglanga.

Proverbios 23:19-21
19. Ïju, llapan yachachishäta sumaj wiyacuy. Llapantapis alli cajcunata rurallar goyay.
20. Upyaj runacunawan ama goturanquichu. Alläpa micojcunawanpis ama goturanquichu.
21. Upyajcunawan alläpa micojcunaga ushapacangami. Guellacunapis sajpi röpallatami jaticonga.

1 Corintios 3:1-23
1. Ermänucuna, manami Espíritu Santu munashanno cawajcunatanöchu gamcunataga willapashcä. Chaypa ruquenga shonguncuna munashannölla cawajtanömi willapashcä. Y pishi wamra manaraj tantiyaj cashanno Jesucristupa willacuyninta mana tantiyaptiquimi gamcunata yaparir-yaparir willapashcä.
2. Micuyta manaraj micuptin iti wamrata chuchullawan maman uywashannömi nogapis gamcunata gallaycunan caj yachachicuycunallataraj yachachishcä. Canancamapis mana tantiyacoj carmi pishi wamranöllaraj carcaycanqui.
3. ¿Imanirtaj chayno caycanqui? Noga mayashcä gamcuna apänacur-apänacur goyaycashayquitami. Chayno goyar gamcunaga Jesucristuta mana chasquicoj runacunanöllami goyarcaycanqui.
4. Waquinniquega «Nogaga Pablupami cä»; waquinniquega «Nogaga Apolospami cä» nir apänacurcaycanqui. Chayno carga Jesucristuman mana yäracoj runacunanöllarämi goyarcaycanqui.
5. Chayno ninayquipäga ¿pitaj Apolos? ¿pitaj Pablo? Nogacunaga Tayta Dios munashanta ruraj runacunallami cä. Nogacunapitami Jesucristuman yäracurayqui. Nogacunami Tayta Jesucristo imata ruranäpaj churamashantapis rurashcäcuna.
6. Muruta muroj runa murushannömi gamcunata willapashcä Jesucristuta chasquicunayquipaj. Apolosnami juc runa murushanta pargojnöpis Jesucristupa willacuyninta mastana tantiyachishurayqui. Murushanchïta wiñachimushannöpis Tayta Diosninchïmi gamcunata sumaj tantiyachishurayqui Jesucristuman yäracunayquipaj.
7. Chauraga manami muroj cajchu ni pargoj cajpischu muruta wiñachimun. Chaypa ruquenga Tayta Diosninchïmi murushana caycajta wiñachimun.
8. Muroj cajpis pargoj cajpis iwal-llami. Tayta Diosnami ichanga cada-ünunta päganga imano rurashantapis ricaycur.
9. Nogapis Apolospis Tayta Diospa arojnincunallami caycä. Gamcunanami Tayta Dios aruycächishan chacrano caycanqui. Chaynöpis gamcunaga Tayta Dios aruycächishan wasinömi carcaycanqui.
10. Tayta Diosninchi cuyapämar churamasha captinmi alli yachaj albañil simintuta alli pergashannöpis yachachishcä. Chay simintu jananchönami juc albañil wasita arushanno juc runacuna masta yachaycächin. Ichanga cada-ünun imano aruycashantapis sumaj ricanman.
11. Manami pipis simintu churashana caycajta jitariycur juc mushoj simintuta pergananpaj yaycunchu. Jesucristunami wasipa simintunno caycan.
12. Chay simintu jananman pipis goriwan, guellaywan, cuestaj achicyaycachaycaj rumiwan, tablawan, ogshawan, shogushwanpis rurashannömi caycan.
13. Ichanga fisyu junajnami llapan rurashanpita Tayta Diosninchi jusgangapaj. Cada-ünun rurashan alli cashan musyacänanpaj ninawanrämi camanga.
14. Rurashan wasi alli captin nina mana rupashannömi alli yachachishancunaga quëdanga. Chayno captenga premyutami chasquenga.
15. Rupacäcoj cajcunallawan jatarachisha wasino rurashancuna captinmi ichanga nina rupar usharenga. Chayno captenga llapan rurashan manacajllapämi canga. Chayno captinmi wasita nina rupaptin runa gueshpir salbacushanno ichicllapitana salbaconga.
16. Gamcunaga ¿manachu musyanqui Tayta Diospa templun caycashayquita? ¿Manachu musyanqui gamcunacho Espíritu Santupis caycashanta?
17. Pipis Tayta Diospa templunta juchuchej cajtaga Tayta Diospis castigangami. Temploga Tayta Diosllapami. Gamcunami caycanqui Tayta Diospa templun.
18. Chaymi sumaj tantiyacushun. May-jina yachaj carpis ama yachaj-tucushunchu. Chaypa ruquenga Tayta Diosninchi yarpashanta tantiyacushun. Chayrämi yarpaysapa cashunpaj.
19. Yachaj-tucoj runacunataga Tayta Diosninchi manacajmanmi churangapaj. Palabranchöpis caynömi niycan: «Tayta Diosga yachajcunata quiquin yarpashallanwanmi pengayman churan.»
20. Mastapis cayno niycan: «Yachajcunataga quiquin yarpashallanta yachashanpitami Tayta Diosninchi manacajman churanga.»
21. Chayno caycaptenga «paypami wacpami cä» nir ama alabacuychu-llapa. Rasunpaga llapanpis gamcunapami.
22. Pablupis, Apolospis, Cefaspis, cay pachapis, cawaypis, wañuypis, canan cajpis y shamoj cajpis llapan gamcunapämi caycan.
23. Gamcunanami Taytanchi Jesucristupa caycanqui. Jesucristunami Tayta Diosninchïpa caycan.